រដ្ឋលេខាធិការដ្ឋានអាកាសចរស៊ីវិលកម្ពុជា បានចេញបម្រាមថ្មីមួយទៀត ដោយហាមក្រុមហ៊ុនយន្តហោះដឹកលោក សម រង្ស៊ី និងបក្ខពួក ចូលកម្ពុជា នៅថ្ងៃទី៩ វិច្ឆិកា និងព្រមានចោទក្រុមហ៊ុនយន្តហោះថា ចូលរួមគំនិតក្បត់ជាតិ បើហ៊ានល្មើសនឹងបម្រាមនេះ។ មេដឹកនាំបក្សប្រឆាំងហៅវិធានការនេះថា ជាការបង្ហាញឲ្យឃើញថា របបក្រុងភ្នំពេញខ្លាចវត្តមាន លោក សម រង្ស៊ី។ អ្នកវិភាគថា វិធានការនេះ ជាការបំភ័យ ដើម្បីរារាំងដំណើរមាតុភូមិនិវត្តន៍របស់គណបក្សសង្គ្រោះជាតិ។
មន្ត្រីរបបក្រុងភ្នំពេញ អះអាងការហាមយន្តហោះដឹកលោក សម រង្ស៊ី និងបក្ខពួក ដោយសារតែសាលដីកាសម្រេចទោសពីតុលាការ និងជាកាតព្វកិច្ចសមត្ថកិច្ចត្រូវការពារអ្នកដំណើរ និងស្ថិរភាព សន្តិសុខនៅប្រទេសកម្ពុជា។
អ្នកនាំពាក្យរដ្ឋលេខាធិការដ្ឋាននៃអាកាសចរណ៍ស៊ីវិល លោក ជា អូន ប្រាប់អាស៊ីសេរីថា អាកាសចរណ៍ស៊ីវិល បានហាមប្រាមក្រុមហ៊ុនយន្តហោះរួចហើយ។ បើមានក្រុមហ៊ុនណា ឬអ្នកបើកយន្តហោះណាហ៊ានដឹកលោក សម រង្ស៊ី និងបក្ខពួកមានសាលដីកា ក្រុមហ៊ុននោះ នឹងប្រឈមវិធានការច្បាប់ គឺត្រូវចោទពីបទរួមគំនិតក្បត់។ លោកព្រមានថា បើមានក្រុមហ៊ុនយន្តហោះណាល្មើស គឺមនុស្សនៅក្នុងក្រុមហ៊ុនយន្តហោះទាំងអស់ នឹងត្រូវចោទប្រកាន់។ លោកថា ការដាក់បទបញ្ជានេះ គឺជាច្បាប់ពីថ្នាក់លើ ហើយរដ្ឋលេខាធិការដ្ឋាន មានកាតព្វកិច្ចត្រូវគោរព និងអនុវត្តតាម៖ «ក្រុមហ៊ុនអស់ហ្នឹងក៏គាត់មិនហ៊ានដឹកដែរ។ មិនអាចក្រុមហ៊ុនយន្តហោះណាទៅដឹកអ្នកទោសម្ដេចកើត។ ឲ្យតែមានជាប់ទោសគេមិនអាចដឹកតាមយន្តហោះបានទេ។ បើយើងដឹងថា ជនហ្នឹង មានបញ្ហាធ្ងន់ធ្ងរ បើយើងទៅដឹកទៀត បានន័យថា យើងចូលរួមគំនិតជាមួយអ្នកអស់ហ្នុង។ អ៊ីចឹង ក្រុមហ៊ុនហ្នឹងក៏ត្រូវទទួលទោសដែរ តាមច្បាប់ណា។ អាហ្នឹង Pilot ( អ្នកបើកយន្តហោះ ) ហ្នឹង ក៏ពីឡុតហើយ គាត់អាចមិនដឹង ក៏ប៉ុន្តែក្រុមហ៊ុនគាត់ត្រូវដឹង។ អ៊ីចឹងវារឿងពាក់ព័ន្ធទាំងអស់ អ៊ីចឹងក្រុមហ៊ុន គាត់ដឹងហើយ គាត់មាន List ( បញ្ជី ) ឈ្មោះរបស់គាត់ហើយ»។
បម្រាមថ្មីនេះ ធ្វើផ្ទុយទៅនឹងការសម្រេចរបស់លោក ហ៊ុន សែន កាលពីឆ្នាំ២០១៧ ដែលបញ្ជាឱ្យលុបចោលបម្រាម ដែលហាមមិនឲ្យយន្តហោះដឹកលោក សម រង្ស៊ី មកកម្ពុជាវិញនោះ។ មេដឹកនាំគណបក្សប្រឆាំង ហៅការព្រមានក្រុមហ៊ុនយន្តហោះនេះថា ជាការបង្ហាញភាពភ័យខ្លាចវត្តមានលោក សម រង្ស៊ី វិលចូលកម្ពុជា នៅថ្ងៃទី៩ វិច្ឆិកា។
អ្នកស្រី មូរ សុខហួរ អនុប្រធានគណបក្សសង្គ្រោះជាតិ ចំអកថា កន្លងមក ក្រុមមេដឹកនាំរបបក្រុងភ្នំពេញ បានស្រែកស្វាគមន៍លោក សម រង្ស៊ី ចូលគ្រប់ផ្លូវ និងត្រៀមចាប់ខ្លួនជានិច្ច។ តែការពិតមែនទែនទៅអ្នកស្រី មូរ សុខហួរ យល់ថា របបក្រុងភ្នំពេញ ខ្លាចវត្តមានលោក សម រង្ស៊ី មិនហ៊ានឲ្យវិលចូលប្រទេសកម្ពុជាឡើយ។ អ្នកស្រី មូរ សុខហួរ ប្រាប់ថា លទ្ធភាពចូលកម្ពុជា នៅថ្ងៃទី៩ វិច្ឆិកា គឺមេដឹកនាំ និងសកម្មជនបក្សប្រឆាំង និងចូលទៅគ្រប់ផ្លូវទាំងអស់ ទាំងផ្លូវគោក ផ្លូវទឹក និងផ្លូវអាកាស។ មេដឹកនាំបក្សប្រឆាំងរូបនេះ បង្ហើបថា បើទោះលទ្ធភាព ចូលតាមផ្លូវគោកច្រើន តែអ្នកស្រី នឹងនៅតែទិញទាំងសំបុត្រយន្តហោះ។ អ្នកស្រីជំរុញឲ្យរបបលោក ហ៊ុន សែន ហ៊ានធ្វើតាមការលើកឡើងកន្លងមក គឺបើកគ្រប់ផ្លូវ ឲ្យក្រុមមេដឹកនាំបក្សប្រឆាំង បានចូលដល់ប្រទេសកម្ពុជា នៅថ្ងៃទី៩ វិច្ឆិកា ហើយធ្វើការចាប់ខ្លួន៖ « សួរទៅលោក ហ៊ុន សែន ហេតុអ្វីមិនចាប់លោកប្រធានទៅ ? ក្រែងថា មានដីកា ដីកាលោកប្រធានឲ្យចូល ! យើងទាំងអស់គ្នាចូលហ្នឹង គឺដើម្បីអ្វី ? បើថា មានដីកាចាប់ទៅ ខ្លាចអ្វីក៏ខ្លាចម្ល៉េះ ? លោក ហ៊ុន សែន ខ្លាចឥទ្ធិពលនៃលោកប្រធានស្ដីទីសម រង្ស៊ី ខ្លាចនូវសំឡេងពលរដ្ឋ ដែលលោកប្រធាន សម រង្ស៊ី មានប្រសាសន៍ហើយ គឺយកអំណាចប្រជាពលរដ្ឋ ឈានទៅរកការផ្លាស់ប្ដូរដោយវិជ្ជមាន ដោយអហិង្សា នៅក្នុងប្រទេសយើង»។
មេដឹកនាំបក្សប្រឆាំង ៩នាក់ ដែលតុលាការរបបក្រុងភ្នំពេញ បង្គាប់ឲ្យចាប់ខ្លួន និងបានស្នើសុំឲ្យប្រទេសអាស៊ានជួយចាប់ គឺលោក សម រង្ស៊ី លោក អេង ឆៃអ៊ាង អ្នកស្រី មូរ សុខហួរ លោក អ៊ូ ច័ន្ទឫទ្ធិ លោក ហ៊ូ វ៉ាន់ លោក ម៉ែន សុថាវរិន្ទ្រ លោក នុត រំដួល លោក ឡុង រី និងអ្នកស្រី ជូឡុង សូមូរ៉ា។ អ្នកនាំពាក្យរដ្ឋលេខាធិការដ្ឋានអាកាសចរស៊ីវិល លោក ជា អូន បញ្ជាក់ថា ឲ្យតែជាអ្នកទោស គឺយន្តហោះ មិនអាចដឹកចូលកម្ពុជាបានឡើយ។
គិតត្រឹមរាត្រីថ្ងៃទី១ វិច្ឆិកា គណបក្សប្រឆាំងអះអាងថា សល់ ៨ថ្ងៃទៀត ដល់ថ្ងៃកំណត់លោក សម រង្ស៊ី វិលចូលកម្ពុជាវិញ។ ក្រៅពីការទប់ស្កាត់លោក សម រង្ស៊ី ចូលតាមផ្លូវអាកាស របបក្រុងភ្នំពេញ ក៏បានពង្រាយកងទ័ព និងសព្វាវុធគ្រប់ធុន តាមព្រំដែនគោកដែរ។
សមាជិកក្រុមអ្នកវិភាគវ័យក្មេង លោក ហេង ច័ន្ទរស្មី យល់ថា បើទោះរដ្ឋាភិបាលក្រុងភ្នំពេញ បង្ហាញពីការក្ដោបក្ដាប់កងទ័ពពេញដៃមែន តែរដ្ឋាភិបាលនៅតែខ្លាចវត្តមានលោក សម រង្ស៊ី និងគណបក្សប្រឆាំងមានសិទ្ធិធ្វើនយោបាយឡើងវិញ។ លោកថា ការហាមយន្តហោះ និងការដាក់ពង្រាយកងទ័ពតាមព្រំដែន ជាយុទ្ធសាស្ត្រគំរាម ផ្នែកចិត្តសាស្ត្រលើគណបក្សប្រឆាំង។ ទោះយ៉ាងណាក្ដី លោកថ្លែងថាយុទ្ធសាស្ត្រទាំងនេះ ពិបាកក្នុងការទប់ទល់ដំណើរមាតុភូមិនិវត្តន៍របស់ក្រុមមេដឹកនាំ និងអ្នកគាំទ្រគណបក្សប្រឆាំងណាស់។ លោកបន្តថា ប្រសិនបើពលករ និងពលរដ្ឋ ទៅអមដំណើរមេបក្សប្រឆាំងចូលកម្ពុជា ថ្ងៃទី៩ វិច្ឆិកាមែន កងកម្លាំងប្រដាប់អាវុធ ពិបាកនឹងលើកដៃបង្ក្រាបណាស់ ព្រោះនេះ មិនមែនជាការធ្វើសង្គ្រាម តែជាការប្រឈមមុខជាមួយជាតិសាសន៍ឯង។ អ្នកវិភាគរូបនេះយល់ថា មានតែជម្រើសចរចានយោបាយមួយគត់ ជាជម្រើសល្អសម្រាប់កម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។