បក្ស​កាន់​អំណាច​​មិន​​ចែក​​បន្ទប់​​ធ្វើការ និង​​ឯកសណ្ឋាន​​ដល់​​ក្រុម​​ប្រឹក្សា​ឃុំ​​មក​ពី​​បក្ស​ភ្លើងទៀន

2022.08.07
Share on WhatsApp
Share on WhatsApp
បក្ស​កាន់​អំណាច​​មិន​​ចែក​​បន្ទប់​​ធ្វើការ និង​​ឯកសណ្ឋាន​​ដល់​​ក្រុម​​ប្រឹក្សា​ឃុំ​​មក​ពី​​បក្ស​ភ្លើងទៀន ក្រុមការងាររបស់គណបក្សភ្លើងទៀនខេត្តកំពង់ធំ។
រូប៖ គណបក្សភ្លើងទៀនខេត្តកំពង់ធំ។

គណបក្ស​ភ្លើងទៀន និង​អង្គការ​ក្រៅរដ្ឋាភិបាល ប្រតិកម្ម​ទៅ​អភិបាលខេត្ត​កំពង់ធំ ដែល​មិន​បាន​បែងចែក​បន្ទប់​ធ្វើការ ភារកិច្ច​ការងារ និង​ឯកសណ្ឋាន​សម្រាប់​មន្ត្រីឃុំ មកពី​គណបក្ស​ភ្លើងទៀន​ឲ្យ​បាន​សមរម្យ គឺជា​ការរើសអើង​នយោបាយ និង​បំពាន​ច្បាប់​។ ពួកគាត់​យល់ថា ពេល​ដែល​មន្ត្រីរាជការ​ពុំ​មាន​កន្លែង​ធ្វើការ​ឲ្យ​បាន​ត្រឹមត្រូវ នោះ​នឹង​ប៉ះពាល់​ដល់​ការបម្រើ​សេវា​សាធារណៈ​ជូន​ប្រជា​ពលរដ្ឋ និង​អាច​ខកខាន​បាត់បង់​ប្រយោជន៍​របស់​អ្នករងគ្រោះ។

មន្ត្រី​គណបក្ស​ភ្លើងទៀន និង​សង្គម​ស៊ីវិល ចាត់ទុក​ថា ការ​ដែល​រដ្ឋបាល​ខេត្ត​កំពង់ធំ​មិន​បាន​បែងចែក​សម្ភារៈ​សម្រាប់​បំពេញការងារ​ដល់​មន្ត្រី​ឃុំ​ជាប់ឆ្នោត​មកពី​បក្ស​ភ្លើងទៀន គឺជា​ការ​បំពេញ​ផ្ទុយ​ទៅ​នឹង​អនុក្រឹត្យ ស្ដីពី​ឯកសណ្ឋាន​ការងារ និង​សញ្ញា​ស័ក្ដិ​សម្រាប់​សម្គាល់​មេឃុំ ចៅសង្កាត់ ជំទប់ ចៅ​សង្កាត់​រង និង​សមាជិក​ក្រុមប្រឹក្សា​ឃុំ សង្កាត់ និង​អាច​ជា​ការ​មើលងាយ​ដល់​សំឡេងឆ្នោត​របស់​ប្រជាពលរដ្ឋ ដែល​បាន​បោះ​ឲ្យ​គណបក្ស​ភ្លើង​ទៀន​កន្លង​មក។

ប្រធាន​ក្រុមការងារ​គណបក្ស​ភ្លើងទៀន​ប្រចាំ​ខេត្ត​កំពង់ធំ លោក ស៊ុន ចន្ធី ប្រាប់​វិទ្យុ​អាស៊ីសេរី​នៅ​រសៀល​ថ្ងៃទី​៦ ខែ​សីហា​ថា តាំងពី​ការបែងចែក​អាសនៈ​ក្រុម​ប្រឹក្សាឃុំ សង្កាត់​ជា​ផ្លូវការ​ជាង​១​ខែ​មក​ហើយ សមាជិក​របស់​គណបក្ស​ភ្លើងទៀន​ដែល​ជាប់ឆ្នោត​នៅក្នុង​ឃុំ​ទាំង​៤៤ ក្នុង​ខេត្ត​កំពង់ធំ នៅ​មិន​ទាន់​មាន​បន្ទប់ធ្វើការ និង​ឯកសណ្ឋាន​ឲ្យ​បាន​សមរម្យ​នៅឡើយ​ទេ​។ លោក​បន្ត​ថា គណបក្ស​ភ្លើងទៀន​បាន​ដាក់​សំណើ​ទៅ​ផ្នែក​រដ្ឋបាល​ខេត្ត​កំពង់ធំ កាលពី​ថ្ងៃទី​៤ ខែ​សីហា ដើម្បី​សុំ​អន្តរាគមន៍​ពី​ថ្នាក់​ខេត្ត តែ​នៅ​មិនទាន់​ទទួល​បាន​ការ​ឆ្លើយ​តប​នោះ​ដែរ​។ លោក​បន្ថែម​ថា មន្ត្រីឃុំ សង្កាត់ ខាង​គណបក្ស​ប្រជាជន គឺ​គេ​មាន​របស់របរ​ទាំងនេះ​គ្រប់គ្រាន់​សម្រាប់​ធ្វើការ មិន​មាន​ការ​ខ្វះខាត​អ្វី​ឡើយ​។

លោក​យល់ថា ពេល​ដែល​មន្ត្រី​ថ្នាក់លើ ចាត់ចែង​កន្លែងធ្វើការ ភារកិច្ច​ការងារ និង​ឯកសណ្ឋាន​សម្រាប់​មន្ត្រីឃុំ​មិន​ស្មើភាព​គ្នា ហាក់ដូចជា​មិន​ឲ្យ​តម្លៃ​មន្ត្រីរាជការ ដែល​ពលរដ្ឋ​បាន​បោះឆ្នោត​ឲ្យ និង​អាច​ជា​ការរើសអើង​លម្អៀង​ទៅ​ខាង​បក្ស​កាន់​អំណាច​ជ្រុល​ពេក​៖ «គាត់​មិនបាន​យកចិត្តទុកដាក់​ថា ក្រុមប្រឹក្សា​ហ្នឹង​ជាប់ឆ្នោត​ផ្លូវការ​ដោយ​ការបោះឆ្នោត​ទេ អ៊ីចឹង​ហើយ​បាន​គាត់​មិន​ខ្វាយខ្វល់​ប្រគល់​កន្លែងធ្វើការ​ងារ​ឲ្យ​បាន​ត្រឹមត្រូវ​ដូច​មានកំណត់​នៅក្នុង​ច្បាប់​ប្រគល់​ឯកសណ្ឋាន​ឲ្យ​បាន​ត្រឹមត្រូវ​ដូច​មាន​កំណត់​នៅក្នុង​ច្បាប់​ទេ​។ តែ​ដោយឡែក​សម្រាប់​មន្ត្រី​ក្រុម​ប្រឹក្សាឃុំ​ជាប់ឆ្នោត​ទាំងអស់​មក​ពី​គណបក្ស​កាន់អំណាច គេ​មាន​លក្ខណៈ​សម្បត្តិ​គ្រប់គ្រាន់ ស្រប​ទៅ​នឹង​ច្បាប់​កំណត់ ។ អ៊ីចឹង​បាន​យើង​សន្និដ្ឋាន​ថា ចំណុច​ពីរ ទី​១​ជា​ការ​រើសអើង​ផ្នែក​នយោបាយ ទី​២​ជា​ការ​មាក់ងាយ​ទៅដល់​ម្ចាស់​ឆ្នោត​តែម្ដង​បាទ!»

វិទ្យុ​អាស៊ីសេរី មិន​អាច​ទាក់ទង​សុំ​ការ​ស្រាយ​បំភ្លឺ​ជុំវិញ​បញ្ហា​នេះ ពី​អភិបាល​ខេត្តកំពង់ធំ​លោក ងួន រតនៈ បាន​ទេ នៅ​ថ្ងៃទី​៦ ខែ​សីហា ដោយ​ទូរស័ព្ទ​ហៅ​ចូល​តែ​ពុំ​មាន​អ្នក​ទទួល។

ពាក់ព័ន្ធ​នឹង​រឿង​នេះ អ្នកនាំពាក្យ​សមាគម​ការពារ​សិទ្ធិមនុស្ស​អាដហុក (Adhoc) លោក សឹង សែន​ករុណា លើកឡើង​ថា ករណី​មន្ត្រី​ថ្នាក់លើ​បែងចែក​កន្លែង​សម្រាប់​ធ្វើ​ការងារ ក៏ដូចជា​ឯកសណ្ឋាន​មិនបាន​ត្រឹមត្រូវ​ដល់​មន្ត្រីឃុំ សង្កាត់ អាច​ធ្វើ​ឲ្យ​រអាក់រអួល​ដល់​ការ​បំពេញ​តម្រូវ​ការ​ជូន​ពលរដ្ឋ និង​ឆ្លុះបញ្ចាំង​ឲ្យ​ឃើញថា​ថ្នាក់​ខេត្ត​មិនបាន​គោរព​ទៅតាម​នីតិវិធី​ដែល​បាន​ចេញ​ជា​ធរមាន ដោយ​ក្រសួង​មហាផ្ទៃ​។ លោក​យល់​ឃើញ​ថា មន្ត្រី​អាជ្ញាធរ​ឃុំ សង្កាត់ គួរតែ​រួបរួម​គ្នា​ដើម្បី​បម្រើសេវា​កម្ម​ជូន​ពលរដ្ឋ​ឲ្យ​ទទួល​បាន​ភាព​កក់ក្ដៅ មិន​ត្រូវ​បែងចែក​បក្សពួក​ក្នុង​ស្ថាប័នរដ្ឋ​ទេ ជៀសវាង​ជះឥទ្ធិពល​អាក្រក់​ដល់​សង្គម និង​មិនបាន​បំពេញ​កាតព្វកិច្ច​បម្រើ​ពលរដ្ឋ​ឲ្យ​បាន​ល្អ៖ «ប៉ះពាល់​ទៅដល់​បញ្ហា ដល់​ការរស់នៅ​របស់​ពួកគាត់​អី​ជាដើម អីចឹង​វា​មិន​គួរ​គប្បី​មាន​អំពើ​បែប​ហ្នឹង​ទេ គួរតែ​មាន​ភាព​ចាស់ទុំ​ផ្នែក​នយោបាយ​ហើយ ព្រោះ​កម្ពុជា​យើង​យើង​ជា​ប្រទេស​ប្រកាន់​របប​ប្រជាធិបតេយ្យ ។ ហើយ​អ្នក​នៅ​មូលដ្ឋាន​ហ្នឹង​ក៏​គាត់​គួរតែ​ដឹង​ដែរ​ថា ក្រោយ​ការបោះឆ្នោត​ត្រូវតែ​រួមគ្នា​ដើម្បី​ធ្វើ​កិច្ច​ការងារ​បម្រើ​ជាតិ បម្រើ​ពលរដ្ឋ មិនមែន​នៅតែ​ពាក់​ស្លាក​គណបក្ស​នយោបាយ​ទៅ​រើសអើង​គ្នា មិន​ជួយ​សម្របសម្រួល​ការងារ​គ្នា​បែប​ហ្នឹង​ទេ​បាទ»

ប្រធាន​ក្រុមការងារ​គណបក្ស​ភ្លើងទៀន​ប្រចាំ​ខេត្ត​កំពង់ធំ លោក ស៊ុន ចន្ធី ស្នើ​លោក​អភិបាលខេត្ត​កំពង់ធំ ជួយ​ធ្វើ​អន្តរាគមន៍​ប្រគល់​បន្ទប់ធ្វើការ ភារកិច្ច​ការងារ និង​ឯកសណ្ឋាន ឲ្យ​ទៅ​ជំទប់​ទី​១ ជំទប់​ទី​២ និង​សមាជិក​ក្រុម​ប្រឹក្សាឃុំ សង្កាត់ ដែល​មកពី​គណបក្ស​ភ្លើងទៀន ដើម្បី​ឲ្យ​កិច្ចការ​រដ្ឋបាល​ឃុំ សង្កាត់ ប្រព្រឹត្តទៅ​កាន់តែ​ល្អ​ប្រសើរ និង​មាន​ប្រសិទ្ធភាព​ថែមទៀត ក្នុង​ការ​ផ្ដល់​សេវា​នានា​ជូន​ប្រជាពលរដ្ឋ​ស្រប​ទៅ​តាម​គោលការណ៍​ច្បាប់។

គណបក្ស​ភ្លើងទៀន​អះអាង​ថា រដ្ឋបាល​ឃុំ សង្កាត់ អាណត្តិ​ទី​៥​នេះ គឺ​បាន​សហការ​យ៉ាង​ល្អ​ជាមួយ​គណបក្ស​ដែល​មាន​និន្នាការ​ផ្ទុយគ្នា ដើម្បី​បម្រើសេវា​កម្ម​ជូន​ប្រជាពលរដ្ឋ​ឲ្យ​ទទួល​បាន​ភាព​កក់ក្ដៅ​នៅ​ពេល​ដែល​ពលរដ្ឋ​មានទុក្ខ​លំបាក ហើយ​មក​រក​ឲ្យ​ខាង​មន្ត្រីឃុំ សង្កាត់ ដោះស្រាយ​។ ក៏ប៉ុន្តែ​គណបក្ស​ភ្លើងទៀន​ថា នៅ​ខ្វះ​បន្ទប់ធ្វើការ​១៨​បន្ទប់ និង​ខ្វះ​ឯកសណ្ឋាន​ជំទប់​ទី​១ ជំទប់​ទី​២ និង​សមាជិក​ចំនួន​៤២​ឯកសណ្ឋាន ដែល​រដ្ឋបាល​ឃុំ សង្កាត់ ទាំងនេះ​មិនទាន់​ទទួល​បាន ក្នុង​បណ្ដា​ឃុំ សង្កាត់ ទាំង​៤៤​របស់​ខេត្តកំពង់ធំ និង​ស្នើ​ដល់​រដ្ឋបាល​ខេត្ត​ជួយ​ពន្លឿន​ផ្ដល់​ឧបករណ៍​ទាំងនេះ​ដល់​មន្ត្រី​ដែល​មកពី​គណបក្ស​ភ្លើង​ទៀង ដើម្បី​ឲ្យ​ពួកគេ​ងាយ​បំពេញ​កាតព្វកិច្ច​របស់​ខ្លួន​ឲ្យ​បាន​ពេញ​លេញ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

រឿង​ដែល​គេ​អាន​​ច្រើន​បំផុត
នយោបាយ
ពលរដ្ឋ​ខ្មែរ​នាំ​គ្នា​ធ្វើ​បាតុកម្ម ប្រឆាំង​វត្តមាន​លោក ហ៊ុន សែន នៅ​បុរីញ៉ូវយ៉ក​សហរដ្ឋ​អាមេរិក
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។