គ្រួសារ​សកម្មជន​បក្ស​ប្រឆាំង​ដែល​ត្រូវ​អាជ្ញាធរ​​ខេត្ត​កំពង់ធំ​ចាប់​ខ្លួន កំពុង​ខ្វះ​ខាត​ជីវភាព​ខ្លាំង

ដោយ ទីន ហ្សាការីយ៉ា
2019-09-09
អ៊ីម៉ែល
មតិ
Share
បោះពុម្ព
លោក រស់ គឹមស្រៀង (ឆ្វេង) លោក ស៊ុន ប៊ុនថុន និង​លោក នូ ភឿន (ស្ដាំ) ជា​សកម្មជន​គណបក្ស​ប្រឆាំង នៅ​ស្រុក​បារាយណ៍ ខេត្ត​កំពង់ធំ ដែល​នគរបាល​ចាប់​​ខ្លួន កាល​ពី​ថ្ងៃ​ទី១ ខែ​កញ្ញា ឆ្នាំ២០១៩ រឿង​ចែករំលែកសារ​រិះគន់​មេដឹកនាំ​របប​ក្រុង​ភ្នំពេញ។
លោក រស់ គឹមស្រៀង (ឆ្វេង) លោក ស៊ុន ប៊ុនថុន និង​លោក នូ ភឿន (ស្ដាំ) ជា​សកម្មជន​គណបក្ស​ប្រឆាំង នៅ​ស្រុក​បារាយណ៍ ខេត្ត​កំពង់ធំ ដែល​នគរបាល​ចាប់​​ខ្លួន កាល​ពី​ថ្ងៃ​ទី១ ខែ​កញ្ញា ឆ្នាំ២០១៩ រឿង​ចែករំលែកសារ​រិះគន់​មេដឹកនាំ​របប​ក្រុង​ភ្នំពេញ។
រូប៖ គេផ្ដល់​ឱ្យ

គ្រួសារ​របស់​សកម្មជន​គណបក្ស​សង្គ្រោះ​ជាតិ​នៅ​ខេត្ត​កំពង់ធំ កំពុង​ប្រឈម​មុខ​នឹង​ការ​ខ្វះខាត​ជីវភាព​ធ្ងន់ធ្ងរ​ ដោយសារ​សមត្ថកិច្ច​នៃ​របប​ក្រុង​ភ្នំពេញ បាន​ចាប់​ខ្លួន​ប្ដី និង​ឪពុក​របស់​ពួកគេ​ដាក់​ពន្ធនាគារ។ មន្ត្រី​បក្ស​ប្រឆាំង​ខេត្ត​កំពង់ធំ ប្រាប់​ថា សកម្មជន​ទាំង​៣នាក់ ដែល​សមត្ថកិច្ច​ចាប់​ខ្លួន​​ សុទ្ធ​តែ​ជា​មនុស្ស​ស្លូតត្រង់ និង​ក្រីក្រ​បំផុត​នៅ​ក្នុង​ភូមិ ហើយ​ពួកគេ​ខ្លះ ​មាន​​កូន​តូច​ក្នុង​បន្ទុក។

គ្រួសារ​សកម្មជន​បក្ស​ប្រឆាំង ​នៅ​ខេត្ត​កំពង់ធំ​ ប្រាប់​ថា ជីវភាព​របស់​ពួកគេ​ធ្លាក់​ចុះ​ជា​លំដាប់ នៅ​ពេល​មាន​ការ​ចាប់​ខ្លួន​ ​សមាជិក​ក្រុម​ប្រឹក្សា​ជាប់​ឆ្នោត​ឃុំ​បារាយណ៍ លោក ស៊ុន ប៊ុនថុន និង លោក នូ ភឿន និង​​​ប្រធាន​ចលនា​យុវជន​គណបក្ស​សង្គ្រោះ​ជាតិ​ខេត្ត​កំពង់ធំ លោក រស់ គឹម​ស្រៀង។ ពួកគេ​ទាំង​៣​នាក់ ត្រូវ​បាន​សាលា​ដំបូង​ខេត្ត​កំពង់ធំ បង្គាប់​ឲ្យ​ឃុំ​ខ្លួន​ ពាក់​ព័ន្ធ​នឹង​បទ​ចែកចាយ​សារ​តាម​បណ្ដាញ​សង្គម​ហ្វេសប៊ុក (facebook) ដែល​ធ្វើ​ឲ្យ​ប៉ះពាល់​ដល់​របប​ក្រុង​ភ្នំពេញ។

បងប្រុស​របស់ លោក ស៊ុន​ ប៊ុនថុន គឺ​លោក ស៊ុន​ ធន់ ប្រាប់​អាស៊ី​សេរី​ថា លោក​​ទើប​បាន​នាំ​កូន​ស្រី​ពៅ​របស់​ លោក ស៊ុន ប៊ុនថុន អាយុ ១២ឆ្នាំ​ឱ្យ​ចូល​ជួប​ឪពុក​នាង​ក្នុង​ពន្ធនាគារ​ខេត្ត​កំពង់ធំ នៅ​ព្រឹក​ថ្ងៃ​ទី​០៨ កញ្ញា។ លោក​ប្រាប់​ថា ឆ្មាំ​ពន្ធនាគារ​ឲ្យ​លោក ស៊ុន ប៊ុនថុន ដេក​នៅ​ច្រក​ចេញ​ចូល​បង្គន់​ ហើយ​គ្មាន​ខ្យល់​ចេញ​ចូល​គ្រប់គ្រាន់​ទេ គឺ​មាន​តែ​ក្លិន​ស្អុយ​ភាយ​ចេញពី​ក្នុង​បង្គន់៖ «គាត់​ត្រូវ​បាន​គេ​យក​ទៅ​ដាក់​ក្នុង​បន្ទប់ ហើយ​កន្លែង​សម្រាក​គាត់​ជិត​កន្លែង​បន្ទប់​បត់ជើង​ គាត់​ស្អុយ ហើយ​គាត់​ស្អុះស្អាប់។ អំបាញ់មិញ​នេះ ខ្ញុំ​បាន​ទិញ​កង្ហារ​ដាក់​ឲ្យ​គាត់​ ព្រោះ​គាត់​ត្រូវ​ការ​កង្ហារ។ សំណូមពរ​ឲ្យ​ខាង​ពន្ធនាគារ​ឲ្យ​គាត់​បាន​សម្រាន្ត​ចេញ​ឆ្ងាយ​ពី​ពន្ធនាគារ​មក​ ព្រោះ​គាត់​ធំ​ស្អុយ​លាយ​មក​ចេញ​ពី​បន្ទប់​ទឹក​ហ្នឹង»

លោក ស៊ុន ធន់​ រៀបរាប់​ថា ប្អូន​ប្រុស​របស់​លោក​បាន​ប្រកប​របរ​ធ្វើ​ស្រែ​ ក្រោយ​របប​ក្រុង​ភ្នំពេញ​​រំលាយ​គណបក្ស​សង្គ្រោះ​ជាតិ​ ហើយ​ប្រពន្ធ​របស់​គេ​បាន​ចំណាក​ស្រុក​ទៅ​ធ្វើការ​នៅ​ប្រទេស​ថៃ ​ដោយ​​បន្សល់​កូន​ប្រុស​ស្រី ៣នាក់ ឲ្យ​ប្អូន​ប្រុស​របស់​លោក​​​ចិញ្ចឹម។ លោក​បន្ត​ថា កូនស្រី​ច្បង​​ អាយុ​១៧ឆ្នាំ បាន​ចំណាក​ស្រុក​ទៅ​ស៊ីឈ្នួល​នៅ​​ព្រំដែន​បាវិត តាំង​ពី​ឆ្នាំ​មុន ​ក្រោយ​ពេល​នាង​ប្រឡង​បាក់ឌុប​ចប់​ ចំណែក​កូន​ប្រុស​ទី២ អាយុ ១៥ឆ្នាំ ប្រកប​របរ​ធ្វើ​ស្រែ​ជាមួយ​ឪពុក។ លោក​​បន្ត​ទៀត​ថា កូនស្រី​ពៅ របស់​លោក ស៊ុន ប៊ុនថុន អាយុ ១២​ឆ្នាំ បាន​ទៅ​រស់​នៅ​ជាមួយ​សាច់ញាតិ​ខាង​ម្ដាយ ក្រោយ​ពេល​សមត្ថកិច្ច​ចាប់​ខ្លួន​ឪពុក។ លោក ស៊ុន ធន់ បញ្ជាក់​ថា ​​ក្មួយៗ របស់​លោក សឹង​តែ​ប្រឈម​ការ​អត់បាយ​ទៅ​ហើយ ក្រោយ​ពេល​សមត្ថកិច្ច​ចាប់​ខ្លួន​ឪពុក​។ លោក​ហៅ​ការ​​​ចាប់​ខ្លួន​ប្អូន​ប្រុស​របស់​លោក គឺ​លោក ស៊ុន ប៊ុនថុន នេះ​ថា ជា​ការ​គាប​សង្កត់​​ផ្នែក​នយោបាយ និង​ធ្វើ​​បាប​​​គ្រួសារ​​លោក​ឱ្យ​​បែក​បាក់​ ព្រាត់ប្រាស​គ្នា និង​កាន់​តែ​លំបាក៖ «ប្អូន​ខ្ញុំ​ជា​អ្នក​សកម្ម​កិច្ច​ការ​នយោបាយ​ណាស់ ហើយ​​លោក នូ ភឿន​ ហ្នឹង​គាត់​ជា​អ្នក​អាជីវករ​ទេ។ ប៉ុន្តែ​គាត់​សកម្ម​ណាស់​ ដោយសារ​ទាំង​ពីរ​​នាក់​ហ្នឹង​​ជា​មនុស្ស​ពិសេស​ប្រចាំ​មូលដ្ឋាន​ ធ្វើ​ឲ្យ​ភូមិ​ចាក់​ត្រឡោក ឃុំ​បារាយណ៍​នេះ មាន​សំឡេង​ឈ្នះ​គណបក្ស​ប្រជាជន​ ដោយសារ​មនុស្ស​២​នាក់​នេះ ​ជា​មនុស្ស​ចាំ​បាច់​សំខាន់។ ទាំង​ពីរ​នាក់​​ ចុះ​ពន្យល់​ពលរដ្ឋ​ក្នុង​មូលដ្ឋាន។ ដូច្នេះ​ជា​ហេតុផល​នយោបាយ»

ចំណែក​ ស្ថានភាព​របស់​សមាជិក​ក្រុម​ប្រឹក្សា​ជាប់​ឆ្នោត​ឃុំ​បារាយណ៍​ម្នាក់​ទៀត គឺ​លោក នូ ភឿន ក៏​មាន​លក្ខណៈ​ប្រហាក់​ប្រហែល​គ្នា​នេះ​​ដែរ។ លោក​ស្រី សុក ថៃ ដែល​ជា​ភរិយា ឱ្យ​ដឹង​ថា ស្វាមី​លោកស្រី​​​ត្រូវ​​គេ​​ឲ្យ​ដេក​នៅ​ក្បែរ​បង្គន់​ក្នុង​បន្ទប់​ឃុំឃាំង។ លោក​ស្រី​បញ្ជាក់​ថា ស្វាមី​លោក​ស្រី​​ត្រូវ​គេ​ឃុំ​នៅ​​បន្ទប់​ផ្សេងគ្នា​ពី​​សកម្មជន​២ រូប​ទៀត ហើយ​បន្ទប់​ឃុំ​នោះ មាន​លក្ខណៈ​ចង្អៀត គ្មាន​ខ្យល់​ចេញ​ចូល ហើយ​សំបូរ​អ្នក​ជក់​បារី។ ​លោកស្រី បន្ត​ថា លោក នូ ភឿន ពិបាក​សម្រាន្ត​ ហើយ​ឈឺ​ដោយ​សារ​ ក្នុង​ពន្ធនាគារ​គ្មាន​ថ្នាំ​គ្រប់គ្រាន់ ឲ្យ​លោក​ព្យាបាល​​បញ្ហា​ក្រពះ និង​បំពង់​ក។

លោកស្រី​បន្ថែម​​​ថា លោក នូ ភឿន​ បាន​ផ្ដាំ​ឱ្យ​លោកស្រី​​​ថែ​រក្សា​កូន​ស្រី​តូចៗ ទាំង​២ ឲ្យ​ល្អ ហើយ​ខិតខំ​បន្ត​មុខ​​​​របរ​សិប្បកម្ម​ទឹក​សុទ្ធ ដើម្បី​យក​លុយ​ចិញ្ចឹម​គ្រួសារ​។ ​ភរិយា​សកម្មជន​បក្ស​ប្រឆាំង​រូប​​នេះ ​ក៏​មាន​អារម្មណ៍​មិន​ខុស​ពី​​ភរិយា​របស់​សកម្មជន​បក្ស​ប្រឆាំង​ផ្សេង​ទៀត​ដែរ គឺ​​​ យំ​ជាមួយ​កូន​រាល់​យប់ ដោយ​សង្ឃឹម​ថា ​ស្វាមី​នឹង​ត្រូវ​បាន​ដោះលែង​ឆាប់ៗ​នេះ ​មុន​បុណ្យ​ភ្ជុំបិណ្ឌ៖ «ពិបាក​មែន​ទែន ការ​រស់​នៅ​រាល់​ថ្ងៃ​ហ្នឹង ដូច​ថា អារម្មណ៍​មួយ​ ព្រួយ​ពី​ប្ដី​ អារម្មណ៍​មួយ ​កូន​នៅ​តូចៗ ដល់​ពេល​អ៊ីចឹង​ទៅ ឃើញ​គាត់​អ៊ីចឹង​ទៀត ហើយ​​គាត់​ត្អូញត្អែរ​ថា ពិបាក​រស់​នៅ​ក្នុង​គុក អ៊ីចឹង​ទៅ​មក​វិញ ខ្ញុំ​មាន​អារម្មណ៍​មួយ ណែន​ទ្រូង ធ្វើ​ម្ដេច​ខ្ញុំ​ជួយ​អត់​បាន​។ កូន​សួរ​រាល់​ថ្ងៃ សួរ​រក​ប៉ា​រាល់​ថ្ងៃ​ ថា​ថ្ងៃ​ណា ថ្ងៃ​ណា​ទៅ ខ្ញុំ​ចេះ​តែ​និយាយ​កុំ​ភ័យ​ បន្តិច​ទៀត​ប៉ា​មក​វិញ​ហើយ ចេះ​តែ​សម្រួល​ទៅ​។ យើង​អាច​ភរ​វា​បាន​ប៉ុណ្ណា ក៏​ភរ​វា​សិន​ទៅ។ ខ្ញុំ​ចង់​ណាស់ ចង់​ឲ្យ​ខាង​ហ្នុង​ជួយ​ដោះលែង​ប្ដី​ខ្ញុំ​ឲ្យ​ត្រលប់​មក​ផ្ទះ​វិញ។ សុំ​អំពាវនាវ​ខាង​អង្គការ​ក្រៅ​ប្រទេស​ក្ដី ក្នុង​ប្រទេស​ក្ដី តុលាការ​ហ្នឹង​ក៏​ដោយ សុំ​ឲ្យ​ជួយ​កាត់​ ជួយ​បំភ្លឺ​ ថា​គាត់​មាន​ទោស​អ្វី សុំ​ជួយ​ដោះ​លែង​គាត់​មក​វិញ​មក»

ចំណែក​ឯ​ប្រធាន​ចលនា​យុវជន​​គណបក្ស​សង្គ្រោះ​ជាតិ​ខេត្ត​កំពង់ធំ លោក រស់ គឹមស្រៀង វិញ សាច់​ញាតិ​ប្រាប់​ថា មិន​ទាន់​ដឹង​ពី​ស្ថានភាព​ក្នុង​ពន្ធនាគារ​ទេ ដោយសារ​ឆ្មាំ​ពន្ធនាគារ​មិន​អនុញ្ញាត​ឲ្យ​ចូល​ជួប​ឡើយ។

បងប្រុស​របស់​លោក រស់ គឹមស្រៀង ប្រាប់​ថា មន្ត្រី​ពន្ធនាគារ​តែ​ដេញ​លោក​ឲ្យ​ត្រលប់​មក​វិញ​​ ដូច្នេះ​លោក​ពុំ​បាន​ដឹង​ពី​ស្ថានភាព​ប្អូន​នោះ​ទេ។ លោក​មិន​ដឹង​ពី​ការ​ចាប់​ខ្លួន ឬ​មូលហេតុ​ ដែល​អាជ្ញាធរ​​ឃុំ​ខ្លួន​ប្អូន​ប្រុស​របស់​លោក​ឡើយ ​តែ​លោក​គ្រាន់​ដឹង​ថា ការ​ចាប់​ខ្លួន​នេះ ធ្វើ​ឡើង​ក្រោយ​ពេល​រូប​គេ ​វិល​ត្រឡប់​​ពី​ក្រៅ​ប្រទេស​វិញ កាល​ពី​ពេល​ថ្មីៗ នេះ៖ «គេ​មិន​ទាន់​ប្រាប់​មូលហេតុ​ទេ ប៉ិន​គ្រាន់​ថា​ សួរ​គេ​ទៅ​ ផ្នែក​សន្តិសុខ គេ​ថា​មិន​ទាន់​ឲ្យ​ជួប​ទេ។ វា​មិន​ដែល​បង្ក​ហេតុ​អ្វី​ឲ្យ​អាក្រក់​ទេ។ ខ្ញុំ​មិន​សូវ​​ដឹង​រឿង​ទេ អា​ការងារ​ហ្នឹង មើល​ទៅ​វា​ទៅ​ថៃ។ ស្រាប់​តែ​កែ​ពិន្ទុ​គ្រូ​ (បាក់ឌុប)​ចប់ ខាង​ប៉ុស្តិ៍​គេ​ហៅ​ទៅ»

សាច់​ញាតិ​ជន​ជាប់​ឃុំ​ទាំង​៣​នាក់ សុទ្ធ​តែ​ចាត់​ទុក​ថា ការ​ចាប់​ខ្លួន​សកម្មជន​បក្ស​ប្រឆាំង​ទាំង​៣​នាក់ ដោយសារ​នយោបាយ និង​ទទូច​ឲ្យ​អាជ្ញាធរ​ ដោះលែង​ឲ្យ​មាន​សេរីភាព​ឡើងវិញ​ ជា​បន្ទាន់។ អង្គការ​លីកាដូ សង្កេត​​ឃើញ​ថា រយៈ​ពេល​៩​ខែ​ សកម្មជន​បក្ស​ប្រឆាំង​ចំនួន ២១នាក់ ត្រូវ​បាន​ចាប់​ខ្លួន ដាក់​ពន្ធនាគារ​ ខណៈ​សកម្មជន​១៥៦​នាក់ ត្រូវ​បាន​សមត្ថកិច្ច និង​តុលាការ​កោះ​ហៅ។

អ្នក​នាំ​ពាក្យ​សមាគម​ការពារ​សិទ្ធិ​មនុស្ស អាដហុក យល់​ថា ការ​ចាប់​ខ្លួន​សកម្មជន​បក្ស​ប្រឆាំង​កន្លង​មក​នេះ​ ជា​រឿង​នយោបាយ ជា​ជាង​ការ​អនុវត្ត​ច្បាប់។ លោកសង្កេត​ឃើញ​ថា សកម្មជន​បក្ស​ប្រឆាំង​ទាំង​នោះ មិន​បាន​​ប្រព្រឹត្តិ​បទ​ល្មើស​ញុះញង់​ដូច​ការ​ចោទ​ប្រកាន់​ឡើយ​ តែ​រដ្ឋាភិបាល ​មាន​ចេតនា​​រៀបចំ​ជា​​ប្រព័ន្ធ​ ដើម្បី​បង្ក្រាប​លើ​​សកម្មជន​បក្ស​ប្រឆាំង​​ច្រើន​ជាង៖ «ជា​រឿង​នយោបាយ​ច្រើន​ជាង​រឿង​អនុវត្ត​ច្បាប់​ ពី​ព្រោះ​យើង​មើល​ទៅ​សកម្មជន​នៃ​អ្នក​នយោបាយ​ទាំង​អស់​ហ្នឹង។ គាត់​ធ្វើ​សកម្មភាព​ក្នុង​បែប​នយោបាយ គាត់​មិន​បាន​ទៅ​ប្រព្រឹត្តិ​បទ​ល្មើស​អ្វី​ទេ ព្រោះ​សកម្មភាព​ទាំងអស់​ហ្នឹង ក្នុង​នាម​ជា​ពលរដ្ឋ ក្នុង​នាម​អ្នក​នយោបាយ ជា​ទូទៅ​សកម្មភាព​ទាំង​អស់​ហ្នឹង គឺ​ផ្ដល់​សិទ្ធិ​ដោយ​ច្បាប់​កំពូល​របស់​ជាតិ ហើយ​និង​ច្បាប់​សិទ្ធិ​មនុស្ស​អន្តរជាតិ»

អាស៊ី​សេរី មិន​អាច​សុំ​ការ​បំភ្លឺ​ពី​ខាង​អ្នក​នាំ​ពាក្យ​របប​ក្រុង​ភ្នំពេញ លោក ផៃ ស៊ីផាន ​បាន​ទេ នៅ​ថ្ងៃ​ទី​០៨ កញ្ញា ដោយសារ​មិន​ទទួល​ទូរស័ព្ទ​ តែ​ លោក​​ធ្លាប់​អះអាង​ថា ការ​ចាប់​ខ្លួន​សកម្មជន​បក្ស​ប្រឆាំង កន្លង​មក គឺ​ជា​ការ​អនុវត្ត​ច្បាប់។

សមាជិក​ក្រុម​ប្រឹក្សា​​ជាប់​ឆ្នោត​ខេត្ត​កំពង់ធំ លោក ថោង វិបុល​សុខុម អំពាវនាវ​ឲ្យ​សប្បុរស​ជន​ជួយ​ផ្ដល់​ថវិកា​ខ្លះ សម្រាប់​សកម្មជន​បក្ស​ប្រឆាំង​ទាំង​៣ ដែល​កំពុង​ជាប់​ឃុំ ពិសេស​គឺ​លោក ស៊ុន ប៊ុនថុន ដែល​ជា​សកម្មជន​បក្ស​ប្រឆាំង​ក្រីក្រ​ជាង​គេ និង​មាន​បន្ទុក​ចិញ្ចឹម​កូនថែម​ទៀត៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល