ដំណើររឿងចាប់ឃុំខ្លួន និងដោះលែងលោក យឹម ស៊ីណន
2023.03.29
អតីតមេបាតុកម្ម និងជាសកម្មជនបក្សប្រឆាំងដ៏លេចធ្លោម្នាក់ដែលនិយមខាងលោក កឹម សុខា គឺលោក យឹម ស៊ីណន (ឆ្វេង) និងប្រធានគណបក្សសង្គ្រោះជាតិ លោក កឹម សុខា។
រូប៖ ហ្វេសប៊ុកលោក យឹម ស៊ីណន
អតីតមេបាតុកម្ម និងជាសកម្មជនបក្សប្រឆាំងដ៏លេចធ្លោម្នាក់ដែលនិយមខាងលោក កឹម សុខា គឺលោក យឹម ស៊ីណន ត្រូវបានតុលាការក្រុងភ្នំពេញដោះលែងកាលពីព្រលប់ថ្ងៃទី២៨ មីនា បន្ទាប់ពីលោក និងប្រពន្ធបានផ្ញើសារអង្វរផង និងសុំទោសផងដល់លោកនាយករដ្ឋមន្ត្រី ហ៊ុន សែន។
លោក យឹម ស៊ីណន គឺជាអតីតប្រធានចលនាយុវជនគណបក្សសង្គ្រោះជាតិ នៅប្រទេសកូរ៉េខាងត្បូង ដែលធ្លាប់ដឹកនាំពលករខ្មែរធ្វើបាតុកម្មប្រឆាំងនឹងលោកនាយករដ្ឋមន្ត្រី ហ៊ុន សែន ជាច្រើនលើក។ លោកបានវិលចូលមករស់នៅប្រទេសកម្ពុជាវិញនៅខែមករា ឆ្នាំ២០២២ បន្ទាប់ពីលោកបានសរសេរលិខិតសុំអន្តរាគមន៍ទៅលោក ហ៊ុន សែន កាលពីខែកញ្ញា ឆ្នាំ២០២១ ហើយភ្លាមៗនោះ លោក ហ៊ុន សែន ក៏បានយល់ព្រមបញ្ជាឲ្យតុលាការដកការចោទប្រកាន់ទាំងឡាយលើលោក យឹម ស៊ីណន និងសហការីរបស់លោកចំនួន៩នាក់ពាក់ព័ន្ធនឹងការគាំទ្រដំណើរមាតុភូមិនិវត្តន៍របស់លោក សម រង្ស៊ី កាលពីថ្ងៃទី៩ វិច្ឆិកា ឆ្នាំ២០១៩។
បន្ទាប់ពីចូលដល់កម្ពុជាភ្លាម លោក យឹម ស៊ីណន បានចាប់ផ្តើមបង្ហាញមុខក្នុងក្រុមលោក កឹម សុខា ព្រមទាំងបានបង្កើនទំនាក់ទំនងជាមួយលោក ហ៊ុន សែន និងកូនប្រុសច្បងរបស់លោក គឺលោក ហ៊ុន ម៉ាណែត ដែលត្រៀមចាំស៊ីកេរបន្តពីឪពុក។លោក យឹម ស៊ីណន ធ្លាប់កំដរលោក កឹម សុខា ទៅអង្គុយជជែក និងញាំនំជាមួយលោក ហ៊ុន សែន ក្នុងពិធីបុណ្យសពបងប្រុសរបស់លោក ហ៊ុន សែន កាលពីខែឧសភា ឆ្នាំ២០២២។ បន្ទាប់មក សកម្មជនបក្សប្រឆាំងរូបនេះ ក៏បានជួបជាមួយលោក ហ៊ុន ម៉ាណែត ក្នុងអំឡុងខែសីហា ឆ្នាំ២០២២ ខណៈអ្នកទាំងពីរ ក៏ធ្លាប់ជួបគ្នានៅប្រទេសកូរ៉េខាងត្បូងដែរ។
ទោះជាយ៉ាងណា កាលពីរសៀលថ្ងៃទី២១ ខែមីនា លោក ហ៊ុន សែន បានផ្ទុះកំហឹងខ្លាំង និងបញ្ជាឲ្យសមត្ថកិច្ចចាប់ខ្លួនលោក យឹម ស៊ីណន និងដៃគូរបស់លោកម្នាក់ទៀតគឺលោក ហ៊ុន កុសល បន្ទាប់ពីពួកគាត់ បានបង្ហោះសារតាមបណ្ដាញសង្គម ពាក់ព័ន្ធនឹងរូបភាពដែលចោទថា លោក ហ៊ុន សែន មានអំណាចជាងព្រះមហាក្សត្រ ក្នុងពេលចូលរួមព្រះរាជពិធីប្រទានព្រះអគ្គីជ័យកីឡា នៅខេត្តសៀមរាប។
សំណេរដើមរបស់លោក យឹម ស៊ីណន បានសរសេរថា «បើតាមសំឡេងពលរដ្ឋតាមហាងកាហ្វេ៖ «ថ្ងៃនេះយើងអាចឃើញច្បាស់ថា នរណាជាស្ដេចផែនដីពិតប្រាកដ»។ រីឯលោក ហ៊ុន កុសល វិញ លោកបានសរសេរថា «លោកនឹងប្រើសមត្ថភាពចូលរួមពូនផ្ដុំជាមួយលោក កឹម សុខា ដើម្បីការពារព្រះចេស្ដាមហាក្សត្រ និងព្រះរាជបល្ល័ង្ក ក្រោយពីឃើញក្រុមលោក ហ៊ុន សែន ធ្វើបាបព្រះទ័យ និងបង្អាប់ព្រះចេស្ដាព្រះមហាក្សត្រខ្មែរគ្រប់ច្រក»។
បើទោះបីជាភ្លាមៗនោះ លោក យឹម ស៊ីណន បានលុបសារនោះចោលវិញ និងបង្ហោះសារបកស្រាយថា លោកគ្រាន់តែបង្ហោះសារសំឡេងរបស់អ្នកអង្គុយផឹកកាហ្វេក្តី ក៏លោក ហ៊ុន សែន មិនរំសាយកំហឹងឡើយ។ លោក ហ៊ុន សែន បានចូលទៅបញ្ចេញមតិ ឬខមមិន(comment) តបវិញជាបន្តបន្ទាប់ថា មិនចាំបាច់លុបសារចោលទេក្មួយ ព្រោះលោកបានថតទុកជាភស្តុតាងរួចហើយ។ លោកថែមទាំងសរសេរថា ករណីនេះ បើគ្មានទោស ទើបចម្លែក ព្រោះនេះមិនមែនជារបៀបនៃការបញ្ចេញមតិឡើយ តែជាការបំភ្លៃការពិតដោយចេតនា។ ទោះយ៉ាងណា លោក ហ៊ុន សែន ទាំងសរសេរក្តី និយាយផ្ទាល់មាត់ក្តីហាក់ប្រយ័ត្នប្រយែង និងតែងបន្ទាបខ្លួនឲ្យនៅក្រោមច្បាប់ជានិច្ច ដើម្បីកុំឲ្យបង្ហាញននលគោកពេកថា លោក មានឥទ្ធិពលលើប្រព័ន្ធតុលាការ។ លោក ខំសរសេរបញ្ជាក់ថា រឿងក្តីនេះ ទុកជូនតុលាការកាត់ក្តីទៅចុះ។ ប៉ុន្តែលុះព្រឹកថ្ងៃទី២២ មីនា ក្នុងពេលដែលតុលាការ កំពុងសាកសួរលោក យឹម ស៊ីណន និងលោក ហ៊ុន កុសល នោះ លោក ហ៊ុន សែន ក៏បានឆ្លៀតឱកាសក្នុងពេលចែកសញ្ញាប័ត្រដល់និស្សិតដោយថ្លែងទាំងញ័រសំឡេងថា លោកនឹងមិនអធ្យាស្រ័យឲ្យលោក យឹម ស៊ីណន ដែលលោកចាត់ទុកជាក្មេងពាលទៀតនោះទេ ព្រោះលោកធ្លាប់អធ្យាស្រ័យនិងជួយសម្រួលឲ្យលោក ស៊ីណន បានចូលមកប្រទេសកម្ពុជាម្តងរួចហើយ។
លោក ហ៊ុន សែន៖ «ហេតុអីបានអ្នកឯងធ្វើអ៊ីចឹង ជាចេតនាដ៏អាក្រក់ តែខ្ញុំមិនជំរុញឲ្យតុលាការយកអ្វីដែលខ្ញុំនិយាយទៅធ្វើទម្ងន់នៃការចោទប្រកាន់ទេ អត់ទេ។ តែខ្ញុំត្រូវធ្វើការបកស្រាយដើម្បីធានាថា ព្រះមហាក្សត្រមិនត្រូវបានគេប្រមាថហើយនាយករដ្ឋមន្ត្រី ក៏មិនត្រូវបានគេមើលងាយដែរ។ ខ្ញុំសុំបញ្ជាក់ថា ខ្ញុំមិនអត់ឱនឲ្យ អ្នកណាដាច់ខាត់លើការប្រមាថអស់ទាំងនេះ។ ត្រូវតែប្រើច្បាប់ ឬរដ្ឋបាល ហើយខ្ញុំ មិនមិនទទួលយកការសុំទោសណា សុំប្រកាសឲ្យហើយ»។
លោក ហ៊ុន សែន និយាយចប់តុលាការក៏ដឹងតួនាទីរបស់ខ្លួនដែរ។ ចៅក្រមស៊ើបសួរនៃសាលាដំបូងរាជធានីភ្នំពេញ អ្នកស្រី យី សុខវួច បានសម្រេចចោទប្រកាន់សកម្មជននយោបាយទាំងពីរនាក់ ពីបទប្រមាថព្រះមហាក្សត្រ និងបទញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម ហើយបញ្ជូនទៅឃុំខ្លួននៅពន្ធនាគារព្រៃស(ម១)នៅល្ងាចថ្ងៃទី២២ ខែមីនា។
ងាកមកប្រពន្ធរបស់លោក យឹម ស៊ីណន វិញ គឺលោកស្រី សុផាត មករា ដែលកំពុងរស់នៅមើលថែកូនស្រីតូចពីរនាក់នោះ លោកស្រីមិននៅស្ងៀមឡើយ។ មនុស្សមួយចំនួន អាចគិតថា ការចោទលោក យឹម ស៊ីណន ពីរឿងប្រមាថព្រះមហាក្សត្របែបនេះ មានតែទៅសុំព្រះរាជទានទោសពីព្រះមហាក្សត្រ ឬទៅអង្វរតុលាការទេ ទើបជាជម្រើសល្អ ព្រោះលោក ហ៊ុន សែន និងបក្ខពួក តែងនិយាយថា នៅពេលសំណុំរឿងដល់ដៃតុលាការហើយ អ្វីៗសម្រេចតែលើតុលាការ គ្មាននរណាម្នាក់អាចជ្រៀតជ្រែក ឬដាក់សម្ពាធលើតុលាការឯករាជ្យបានឡើយ។
ផ្ទុយទៅវិញ លោកស្រី សុផាត មករា ជ្រើសរើសជម្រើសតែមួយគត់គឺស្វែងរកកិច្ចអន្តរាគមន៍ចំពោះតែលោក ហ៊ុន សែន ម្នាក់ប៉ុណ្ណោះ ដែលលោកស្រីហៅថា សម្តេចពុក។ លោកស្រី បានបង្ហោះសារ នៅថ្ងៃទី២៤ មីនា នៅលើទំព័រហ្វេសប៊ុករបស់ខ្លួនជាសាធារណៈផង និងផ្ញើសារទៅហ្វេសប៊ុក(Facebook)ផ្ទាល់របស់លោក ហ៊ុន សែន ផង ដោយរៀបរាប់ថា លោកស្រី មានតែម្រាមដៃ១០ សូមអង្វរសម្តេចពុក ជួយឱ្យកូនៗរបស់លោកស្រី បានជួបប៉ារបស់គេវិញផង ។ លោកស្រីបន្តថា ប្តីរបស់លោកស្រី ធ្វើខុស ព្រោះគិតខ្លីមួយឆាវ ដូច្នេះសូមសម្តេចពុកមេត្តា សន្តោសប្រណី ឱ្យប្តីរបស់លោកស្រីផង ទោះធ្វើអ្វីក៏លោកស្រី ព្រមដែរ។
លោកស្រី សុផាត មករា៖ «សម្តេចពុកជាទីគោរព សម្តេចពុកតែងតែមានចិត្តករុណា សន្តោស ប្រណីដល់កូនជានិច្ច។ កូនធ្វើខុសហើយ ពួកកូននឹងកែខ្លួន មិនធ្វើឲ្យពុកខកបំណងទេ។ កូនបានឆាតទៅផេករបស់សម្តេចពុក ផ្ញើរសារទៅពុក តែខ្ញុំមិនទាន់បានការឆ្លើយតបពីសម្តេចពុកទេ។ បើពុកផ្តល់ឱកាសឲ្យកូនស្រីម្នាក់នេះ កូននិងទៅក្រាបអង្វរសូមទោសសម្តេចពុក សូមសម្តេចពុកមេត្តាទទួលការសូមទោសពីគ្រួសាររបស់ប្តីខ្ញុំផង។ សម្តេចពុកបានលើកលែងទោសម្តងឱ្យប្តីកូន និងគ្រួសារបានជួបជុំគ្នារស់នៅស្រុកខ្មែរវិញ កូននៅតែជឿជាក់យ៉ាងមុតមាំថា សម្តេចពុកមិនបោះបង់កូនចោលទេ។ កូនៗរបស់គាត់សួររកគាត់ តែកូនមិនដឹងថា ឆ្លើយប្រាប់កូនគាត់ថាម៉េចទេ? សូមសម្តេចពុក មេត្តាលើកលែងទោសឱ្យប្តីរបស់កូនផង គាត់គ្មានចេតនាប្រមាថពុកទេ គាត់គោរព និងស្រឡាញ់ពុកណាស់ ព្រោះពុកមានចិត្តល្អ មិនយកទោសអ្វីពីកូនទេ ។ បើទោះបីប្តីកូនធ្លាប់ធ្វើបាតុកម្មនៅកូរ៉េក៏ដោយ ក៏ពុកនៅតែលើកលែងទោសហើយឱ្យពួកកូនចូលស្រុកវិញទៀត»។
ប្រពន្ធរបស់លោក យឹម ស៊ីណន បន្តថា ប្រសិនបើលោក ហ៊ុន សែន បានទទួលសំណេរនេះហើយ លោកស្រី នឹងទៅក្រាបអង្វរសូមអភ័យទោសពីលោកដោយផ្ទាល់។ មួយថ្ងៃក្រោយមក គឺនៅថ្ងៃទី២៥ ខែមីនា លោកស្រី សុផាត មករា ក៏បានបង្ហោះសាជាថ្មីម្តងទៀត ដោយផ្តែផ្តាំឱ្យប្តី ថែរក្សាសុខភាពឲ្យ បានល្អ កុំបារម្ភពីកូនៗ ហើយរង់ចាំបន្តិចទៀតលោក ហ៊ុន សែន នឹងបាត់ខឹងហើយ។
លោកស្រី សុផាត មករា៖ «ពេលសម្តេចពុកបាត់ខឹង ពុកនឹងឱ្យយើងជួបជុំគ្នាវិញហើយ ព្រោះសម្តេចពុកក៏មិនចង់ឱ្យយើងបែកបាក់គ្រួសារទេ។ ពេលដែលបងមកផ្ទះយើងវិញ បងកុំឱ្យសម្តេចពុកខឹងទៀតណា។ យើងត្រូវធ្វើកូនល្អ ស្តាប់បង្គាប់គាត់ ព្រោះគាត់ជាអ្នកមានគុណយើង។ នៅពេលដែលយើងធ្លាក់ដល់សូន្យ គឺគ្មានអ្នកណាគេចង់រាប់រកយើងទេ ពេលនេះអូនរៀនសូត្របានច្រើនណាស់ក្នុងពេលនេះ ពួកយើងតែងតែជួយទុក្ខធុរៈអ្នកដទៃ អូនជឿថា ទេវតាមិនឱ្យយើងរងទុក្ខបែបនេះទេ ធ្វើល្អគង់តែជួបមនុស្សល្អ គាត់នឹងមកជួយពួកយើង»។
នៅពេលលោក យឹម ស៊ីណន ជាប់ពន្ធនាគារ បាន៧ថ្ងៃ លោកស្រី បានបង្ហោះសារ ម្តងទៀតបង្ហាញពីការឈឺចាប់ និងអស់សង្ឃឹមមិនដឹងថា ថ្ងៃណាបានជួបប្តីវិញទេ បើលោក ហ៊ុន សែន នៅតែខឹងបែបនេះ។
លោកស្រី សុផាត មករា៖ «ពេលនេះពុកខឹងនឹងបងណាស់ គាត់មិនលើកលែងឲ្យបងទេ បើអ៊ីចឹងទៅហើយ ទោះបីយើងប្រឹងប្រែងយ៉ាងណា ក៏ពួកយើងមិនអាចជួបគ្នាវិញដែរ ។ បើរស់នៅគ្មានបងទៅហើយ តើអូនរស់នៅមានន័យអ្វី? តើឱ្យអូនរំពឹងអ្វីទៀត អ្នកណាក៏គេរើសអើងអូនដែរ គេមិនជួយយើងទេ តែយើងមិនអាចបន្ទោសគេទេ ព្រោះបងធ្វើឱ្យអ្នកមានគុណបង គាត់ខឹងខ្លាំងណាស់។ សូមទោសប្តីសម្លាញ់ ដោយសារតែអូនទើបធ្វើឱ្យបងជួបរឿងបែបនេះ អូនស្តាយក្រោយណាស់ បើអូនមិនឲ្យបងមកខ្មែរវិញទេ បងមិនជួបរឿងបែបនេះទេ ។ នេះជាកំហុសអូន ដោយសារតែស្រលាញ់ គ្រួសារ ប្រទេសកំណើតខ្លួន ទើបយើងសម្រេចមកវិញ តែមកដល់ពេលនេះគ្រួសារយើងបែបជាជួបរឿងបែបនេះ។ ប៉ុន្តែបើអាចបកក្រោយវិញបាន អូនក៏នៅតែជ្រើសរើសផ្លូវមួយនេះដែរ»។
នៅថ្ងៃទី២៨ មីនា លោកស្រីក៏បានបង្ហោះសារលើកទី៤ រៀបរាប់ពីកូនៗយំនឹករកប៉ា និងនាំកូនដើរលែងជិតៗផ្ទះបន្លប់កុំឲ្យនឹកដល់ប៉ាទៀត។ ដោយឡែក លោក យឹម ស៊ីណន ពីក្នុងពន្ធនាគារវិញ លោក បានសរសេរលិខិតផ្ទាល់ដៃ និងចេញវីដេអូសុំទោសដល់លោក ហ៊ុន សែន និងព្រះមហាក្សត្រ ឲ្យព្រះរាជទានទោសនិងលើកលែងទោសដល់រូបលោកដែរ។ លោក យឹម ស៊ីណន ដែលមានទឹកមុខស្លេកស្លក់ និងដុះពុកមាត់ចេញស្កូវមួយៗ ក្រោយជាប់ពន្ធនាគារមួយសប្តាហ៍ រៀបរាប់ថា សារដែលលោកបានបង្ហោះនៅលើទំព័រហ្វេសប៊ុក (Facebook) ដែលនាំដល់ការចាប់ខ្លួនលោកនោះ គឺគ្មានចេតនាប្រមាថលោក ហ៊ុន សែន និងព្រះមហាក្សត្រឡើយ។
លោក យឹម ស៊ីណន៖ «ចំពោះកំហុសខុសឆ្គងដោយអចេតនានេះ ដោយសារ ខ្ញុំមិន បានគិតឲ្យបានគ្រប់ជ្រុងជ្រោយដែលជាហេតុធ្វើឲ្យមានការភ័ន្តច្រឡំពីសំណាក់ មហាជនទូទៅទាំងក្នុងនិងក្រៅប្រទេស។ ឆ្លៀតក្នុងឱកាសនេះ ខ្ញុំព្រះករុណាខ្ញុំបាទ សូមប្រោសប្រទានទោសពីព្រះបាទសម្តេចបរមនាថ នរោត្តម សីហមុនី និងសូមទោសចំពោះសម្តេចតេជោនាយករដ្ឋមន្ត្រី ហ៊ុន សែន ជាសាធារណៈ និងដោយចិត្តស្មោះ»។
អតីតប្រធានចលនាយុវជនគណបក្សសង្គ្រោះជាតិ នៅប្រទេសកូរ៉េខាងត្បូងរូបនេះ បានបញ្ចប់លិខិតរបស់លោកដោយបញ្ជាក់ថា ការសុំទោសជាសាធារណៈ និងការស្នើសុំលើកលែងទោសនេះ គឺធ្វើឡើងដោយគ្មានការបង្ខិតបង្ខំឡើយ។
លោក យឹម ស៊ីណន៖ «គឺស្តែងចេញពីឆន្ទៈរបស់ខ្ញុំពិតៗមិនមានជនណាមួយ បង្ខិតបង្ខំ ឬជំរុញនោះទេ។ ដូច្នេះខ្ញុំសូមឲ្យជនរួមជាតិទាំងអស់ មេត្តាជ្រាប និងអនុគ្រោះសម្រាប់រូបខ្ញុំបាទ នាឱកាសនេះ»។
ករណីលោក យឹម ស៊ីណន នេះ ជាករណីចម្លែកខុសគេដែលអាចមានលទ្ធភាពរៀបចំឈុតឆាកថតវីដេអូចេញពីពន្ធនាគារ ខណៈដែលសកម្មជននយោបាយ និងសកម្មជនសង្គមផ្សេងទៀត សឹងតែគ្មានលទ្ធភាព អាចទាក់ទងមកគ្រួសារនៅខាងក្រៅពន្ធនាគារបាន។
បន្ទាប់ពីការសុំទោសនេះមិនដល់១ម៉ោងផង ចៅក្រមស៊ើបសួរនៃសាលាដំបូងរាជធានីភ្នំពេញ អ្នកស្រី យី សុខវួច បានរូតរះធ្វើការទាំងយប់ដោយចេញដីកាបង្គាប់ឲ្យមន្ត្រីពន្ធនាគារដោះលែងលោក យឹម ស៊ីណន នៅម៉ោងជាង៧យប់ថ្ងៃទី២៨ មីនា។
ក្រោយបានជួបជុំគ្រួសារវិញ ប្រពន្ធរបស់លោក យឹម ស៊ីណន បានបង្ហោះសារត្រេកអរ និងមិនភ្លេចអរគុណដល់សម្តេចពុកឡើយ។
លោកស្រី សុផាត មករា៖ «សូមគោរពសម្តេចពុកជាទីគោរព ប្តីរបស់កូនបានមកដល់ផ្ទះវិញហើយ។ ពេលនេះ គាត់បានជួបកូនៗគាត់វិញហើយ។ កូនសូមក្រាបថ្វាយបង្គំ ថ្លែងអំណរគុណ ដល់សម្តេចពុក ដែលលោកបានសន្តោសប្រណី អាណិតអាសូរដល់គ្រួសារដ៏កំសត់មួយនេះ ។កូនស្រី និងក្រុមគ្រួសារទាំងអស់ សូមថ្លែងអំណរគុណដល់ សម្តេចពុក និងសូមជូនពរសម្តេចពុក ទទួលបានសុខភាពល្អ រឹងមាំ គង់ជាម្លប់ដ៏ត្រជាក់ដល់កូនចៅ»។
ដោយមិនបង្អង់យូរ លោក ហ៊ុន សែន ក៏បានផ្ញើសារតបទៅវិញដោយហៅ លោក យឹម ស៊ីណន និងប្រពន្ធរបស់លោកថា កូនពេញៗមាត់។ លោក ហ៊ុន សែន ថា លោក យឹម ស៊ីណន មានសំណាងល្អដែលមានប្រពន្ធដ៏ពូកែ ចេះរត់មកពឹងលោកឲ្យជួយនៅពេលប្តីជាប់ឃុំ ដោយមិនរត់ទៅពឹងបរទេស ឬអង្គការក្រៅរដ្ឋាភិបាល។
លោក ហ៊ុន សែន៖ «ពេលកូនមានបញ្ហាផ្លូវច្បាប់ កូនស្រី មិនបានស្រែករកអ្នកណាជួយ ក្រៅពីស្រែករកសម្តេចពុកជួយនោះឡើយ។ ពុកជាមនុស្សចិត្តរឹង ជាមួយមនុស្សអាក្រក់ តែក៏ជាមនុស្សចិត្តទន់ជាមួយមនុស្សល្អ។ ជាសំណាងកូនហើយដែលភរិយាកូនមិនបានទៅពឹងជនបរទេស ឬអង្គការក្រៅរដ្ឋាភិបាលដែលប្រឆាំង ឲ្យមកគាប់សង្កត់រាជរដ្ឋាភិបាលដើម្បីដោះលែងកូន។ ពុកជាមនុស្សក្បាលរឹងជាមួយ ការគាប់សង្កត់ពីបរទេស។ កាន់តែគាប់សង្កត់ ការជាប់ទោស ឬពិរុទ្ធជនជាប់ទោស ឬជាប់ឃុំកាន់តែយូរ។ គេត្រូវចងចាំលើចំណុចនេះ។ ផ្ទុយពីអ្នកដទៃ ភរិយាកូននឹក ឃើញមុនគេគឺសុំឲ្យពុកជួយ ដូច្នេះពេលឃើញភរិយាកូនបង្ហោះតាមហ្វេសប៊ុក និងឃើញកូនទទួលស្គាល់កំហុស រដ្ឋមន្ត្រីក្រសួងយុត្តិធម៌ខិតខំសម្របសម្រួលជាមួយតុលាការដើម្បីឲ្យកូនបានចាកចេញទៅជួបប្រពន្ធកូនវិញ»។
មេដឹកនាំដែលមានចិត្តឆេវឆាវ ឆាប់ច្រឡោតរូបនេះ ក៏ណែនាំឲ្យគ្រួសារលោក យឹម ស៊ីណន ចាត់ទុកករណីនេះ ថា ជាសុបិនអាក្រក់ និងរំដោះគ្រោះក្នុងឆ្នាំចាស់ ដើម្បីសេចក្តីសុខ និងសប្បាយរីករាយក្នុងឆ្នាំថ្មីក្នុងពេលដ៏ខ្លីខាងមុខ។ ភរិយារបស់លោក យឹម ស៊ីណន ក៏បានតបទៅវិញភ្លាមថា លោកស្រី រំភើប និងសំណាងណាស់ដែលឃើញលោក ហ៊ុន សែន ផ្ញើសារមកបែបនេះ។ លោកស្រីចាត់ទុកថា មានតែសម្តេចពុកម្នាក់គត់ដែលអាចជួយឲ្យប្តីរបស់លោកស្រី មកជួបជុំប្រពន្ធកូនវិញ។
ចំណែកសកម្មជនគណបក្សប្រឆាំងម្នាក់ទៀត គឺលោក ហ៊ុន កុសល ដែលត្រូវបានអាជ្ញាធរចាប់ឃុំខ្លួនក្នុងសំណុំរឿងជាមួយលោក យឹម ស៊ីណន នោះ មកដល់ពេលនេះ លោកនៅតែបន្តជាប់ឃុំក្នុងពន្ធនាគារដដែល ប្រហែលមកពីលោកមិនទាន់សរសេរលិខិតសុំទោស និងស្នើសុំលើកលែងទោសពីលោក ហ៊ុន សែន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- លោក ថេង សាវឿន និងសហការីសរសេរលិខិតសុំទោសលោក ហ៊ុន សែនដើម្បីរួចពីការឃុំខ្លួន
- ហេតុអ្វីលោក ឡេង ណាវ៉ាត្រា និងអតិថិជនមិនប្រើប្រាស់តុលាការដោះស្រាយវិវាទបែរជាវាយប្រហារគ្នាតាមបណ្ដាញសង្គម?
- ពលករខ្មែរមួយចំនួនធ្វើការនៅប្រទេសថៃប្រកាសស្វាគមន៍អមដំណើរលោក សម រង្ស៊ី វិលចូលស្រុកវិញ
- កម្មករត្រូវបានបង្ខំឱ្យទៅស្ដាប់លោក ហ៊ុន សែន និយាយ
- លោក ហ៊ុន សែន ផ្ដល់មរតកនយោបាយកំសាកដល់លោក ហ៊ុន ម៉ាណែត ជាបន្តបន្ទាប់
អត្ថបទពេញនិយម
នយោបាយ
- អាមេរិកនិងប្រទេសប្រជាធិបតេយ្យធំៗព្រមានកម្ពុជាក្រោយផាត់ភ្លើងទៀនចេញពីការបោះឆ្នោត
- លោក ហ៊ុន សែន រងការរិះគន់រឿងជេរប្រមាថសកម្មជនសិទ្ធិមនុស្សកញ្ញា សេង ធារី
- លោក ហ៊ុន សែន ប្រកាសបន្តដឹកនាំនយោបាយដដែល ទោះលោកមិនធ្វើជានាយករដ្ឋមន្ត្រីនៅពេលខាងមុខក្ដី
- មិនមានភស្តុតាងបញ្ជាក់ថា លោក សម រង្សី ត្រូវបណ្ដេញចេញពីម៉ាឡេស៊ី ទេ
- គណបក្សភ្លើងទៀន គ្រោងប្រមូលផ្ដុំសមាជិកបក្ស ១ម៉ឺននាក់ តស៊ូមតិនៅទីលានប្រជាធិបតេយ្យ