មន្ត្រីប៉ូលិសខេត្តបន្ទាយមានជ័យបន្តដាក់កម្លាំងគំរាមកំហែងមន្ត្រីបក្សប្រឆាំងនៅតាមមូលដ្ឋាន
2019.09.12
សកម្មជនគណបក្ស សង្គ្រោះជាតិ ខេត្តបន្ទាយមានជ័យ ជួបជុំគ្នាពង្រឹងសាមគ្គីភាពនៅភូមិចាន់គិរី សង្កាត់ប៉ោយប៉ែត ខេត្តបន្ទាយមានជ័យ កាលពីព្រឹកថ្ងៃទី១ ខែមករា ឆ្នាំ២០១៩។
រូបថត៖ ដោយប្រជាពលរដ្ឋ
សកម្មជនគណបក្សប្រឆាំងនៅក្រុងប៉ោយប៉ែតខេត្តបន្ទាយមានជ័យអះអាងថា មន្ត្រីប៉ូលិសខេត្តនេះនៅតែបន្តដាក់កម្លាំងអុកឡុករំខាននៅមុខផ្ទះធ្វើឱ្យក្រុមគ្រួសារភិតភ័យមិនហ៊ានស្នាក់នៅក្នុងផ្ទះ។ មន្ត្រីសង្គមស៊ីវិល ចាត់ទុកទង្វើរបស់សមត្ថកិច្ចនេះ ថា ជាការគំរាមកំហែងបំភិតបំភ័យមកលើប្រជាពលរដ្ឋដោយខុសច្បាប់។
សមាជិកក្រុមប្រឹក្សាសង្កាត់ប៉ោយប៉ែតជាប់ឆ្នោតនៃគណបក្សសង្គ្រោះជាតិ លោក ឆាំ សុភាន់ ប្រាប់អាស៊ីសេរី នៅថ្ងៃទី១២ កញ្ញាថា ចាប់ពីលោកបានរត់ភៀសខ្លួនរកទីសុវត្ថិភាព កាលពីថ្ងៃទី៥ កញ្ញាមក លោកបានដាក់កាមេរ៉ាសុវត្ថិភាពនៅជុំវិញផ្ទះ គឺឃើញមានមន្ត្រីប៉ូលិសជាច្រើននាក់នៅតែបន្តតាមយាយីរំខានមុខផ្ទះរបស់លោកដដែល។ លោកបន្តថា មន្ត្រីប៉ូលិសបានប្ដូររូបភាព ពីការស្លៀកពាក់ឯកសណ្ឋានប៉ូលិសមកស្លៀកស៊ីវិលបន្លំធ្វើជាពលរដ្ឋធម្មតាវិញ។ លោកបញ្ជាក់ថា ក្នុងមួយថ្ងៃយ៉ាងហោចណាស់មានប៉ូលិសទៅឃ្លាំមើលមុខផ្ទះរបស់លោកពី៤ ទៅ ៥ដងដែរ និងបានសួរនាំពលរដ្ឋក្បែរនោះរកលោកជារៀងរាល់ថ្ងៃទៀតផង៖ «ឥឡូវប៉ូលិសអត់ហ៊ានយកឡានមកទេ គេជិះម៉ូតូឈប់ជក់បារីក្បែរផ្ទះមួយសន្ទុះ ក៏ចេញទៅវិញ ហើយមួយសន្ទុះក្រោយមកវិញទៀត។កាលពីដើមយូរៗគេមកម្ដង គឺមួយថ្ងៃប្រហែល ៣ទេ តែសព្វថ្ងៃប៉ូលិសមកញឹកពេកធ្វើឱ្យអ្នកផ្ទះចេះតែបារម្ភ ព្រោះបើមកស្លៀកពាក់ប៉ូលិស មិនសូវជាបញ្ហាទេ តែគេមកឃ្លាំមើលបែបសំលៀកបំពាក់ដូចប្រជាពលរដ្ឋអីចឹងគាត់ខ្លាចគេបន្លំធ្វើជាចោរ ឬមួយខ្លាចសមត្ថកិច្ចយករបស់ខុសច្បាប់ដូចជាថ្នាំញៀនមកបោះចូលក្នុងផ្ទះ ហើយមកចាំខ្លួនអ្នកនៅក្នុងផ្ទះ»។
លោកបន្តថា សកម្មភាពរបស់សមត្ថកិច្ចនេះបានប៉ះពាល់យ៉ាងខ្លាំងដល់ការរស់នៅរបស់ក្រុមគ្រួសារលោក ជាពិសេសធ្វើឱ្យប្រពន្ធនិងម្ដាយក្មេកដែលរស់នៅផ្ទះភ័យខ្លាច ហើយមិនហ៊ានស្នាក់នៅក្នុងផ្ទះឡើយ ដោយសារព្រួយបារម្ភខ្លាចជនខិលខូចមានបំណងអាក្រក់ធ្វើបាបពួកគាត់។
អាស៊ីសេរីមិនអាចទាក់ទង ស្នងការរងទទួលបន្ទុកផ្នែកព្រហ្មទណ្ឌ លោក សិទ្ធ ឡោះ ដើម្បីសុំអត្ថាធិប្បាយជុំវិញបញ្ហានេះបានទេ នៅថ្ងៃទី១២ កញ្ញា ដោយទូរស័ព្ទចូលជាច្រើនដងពុំមានអ្នកទទួល។
ប៉ុន្តែលោក សិទ្ធ ឡោះ បានប្រាប់មន្ត្រីសមាគមការពារសិទ្ធិមនុស្សអាដហុក (Adhoc) ខេត្តបន្ទាយមានជ័យលោក ស៊ុំ ច័ន្ទគា ថា មន្ត្រីប៉ូលិសរបស់លោកមិនបានទៅអុករំខានដល់ផ្ទះសកម្មជនគណបក្សសង្គ្រោះជាតិដូចការចោទឡើយ។ លោកបន្តថា ផ្ទុយទៅវិញ គឺប៉ូលិសគ្រាន់តែធ្វើដំណើរឆ្លងកាត់នៅមុខផ្ទះប្រជាពលរដ្ឋនៅតំបន់នោះ ដើម្បីការពារសុវត្ថិភាពសណ្ដាប់ធ្នាប់និងសន្តិសុខជូនពលរដ្ឋនៅតាមមូលដ្ឋានប៉ុណ្ណោះ។
ទោះជាយ៉ាងណា មន្ត្រីសម្របសម្រួលសមាគមការពារសិទ្ធិមនុស្សអាដហុក ខេត្តបន្ទាយមានជ័យ លោក ស៊ុំ ច័ន្ទគា កត់សំគាល់ថា មន្ត្រីប៉ូលិសតាមធ្វើទុក្ខបុកម្នេញមកលើសកម្មជនបក្សប្រឆាំងនេះ ដោយសារតែលោក ឆាំ សុភាន់ ជាក្រុមប្រឹក្សាសង្កាត់ប៉ោយប៉ែតជាប់ឆ្នោតគណបក្សសង្គ្រោះជាតិ ដែលតែងដឹកនាំសកម្មជនដទៃទៀត ប្រមូលផ្ដុំគ្នាថ្លែងសារនយោបាយ និងបាននិយាយចាំទទួលលោក សម រង្ស៊ី វិលចូលស្រុកវិញ នៅថ្ងៃទី៩ វិច្ឆិកាខាងមុខ។ ទោះជាយ៉ាងនេះក្ដី លោក ស៊ុំ ច័ន្ទគា អះអាងថា ការជួបជុំគ្នារបស់បក្សប្រឆាំងកន្លងមក គឺពុំមែនជាការខុសច្បាប់អ្វីនោះទេ ពីព្រោះសកម្មភាពរបស់ពួកគាត់ គឺជាការជួបប្រជុំឈឺឆ្អាលរឿងនយោបាយ ដែលជាសិទ្ធិសេរីភាពក្នុងការសម្ដែងមតិរបស់ពលរដ្ឋដែលមានកំណត់នៅក្នុងរដ្ឋធម្មនុញ្ញ។ លោកចាត់ទុកបញ្ហានេះ ថា ជាការគំរាមកំហែងបំភ័យបំភ័យមកលើប្រជាពលរដ្ឋដោយខុសច្បាប់៖ «យើងការពារអធិបតេយ្យភាពរបស់កម្ពុជា ការពារសិទ្ធិមនុស្សប្រសើរជាការពារអំណាចឱ្យបុគ្គល អីចឹងការឃ្លាំមើលមកលើផ្ទះសកម្មជនបក្សប្រឆាំងឈប់មានឈប់អីទៅ មិនគួរណាកើតឡើងទេ ពីព្រោះថា សមត្ថកិច្ចស៊ីប្រាក់ខែរដ្ឋត្រូវបម្រើរាស្ត្រ គួរតែពិនិត្យមើលតើក្រុមនោះជាខ្លា ឬក៏ជាបិសាចចាំចាត់ការគាត់ ប៉ុន្តែបើសិនគ្រាន់តែខុសនិន្នាការគណបក្សនយោបាយអីបែរជាយើងលាបពណ៌ក្រុមឧទ្ទាមនេះក្រុមឧទ្ទាមនោះវាអាក្រក់ពេក»។
កាលពីថ្ងៃទី៨ កញ្ញាកន្លងទៅ មន្ត្រីប៉ូលិសក្រុងសិរីសោភ័ណប្រមាណ២៥នាក់ បានទៅអុកឡុកមុខផ្ទះប្រធានគណបក្សសង្គ្រោះជាតិក្រុងសិរីសោភ័ណ គឺ លោក ឃ្លាំង ប៊ុនឡាយ ដើម្បីសាកសួររកលោក។ លោក ឃ្លាំង ប៊ុនឡាយ អះអាងថា នៅពេលនោះលោកមិនបាននៅផ្ទះនោះទេ ហើយប្រមាណកន្លះម៉ោងក្រោយមកប៉ូលិសក៏បានដកថយទៅវិញ។ លោក ស៊ុំ ច័ន្ទគា លើកឡើងថា ការដាក់កម្លាំងនៅមុខផ្ទះពលរដ្ឋដ៏ច្រើនបែបនេះ គឺមិនមែនជាការការពារសុវត្ថិភាពជូនពលរដ្ឋឡើយ តែជាការបំភិតបំភ័យដល់ពលរដ្ឋធ្វើឱ្យពួកគាត់មានការភ័យខ្លាចទៅវិញទេ។
កន្លងមកមេដឹកនាំរបបក្រុងភ្នំពេញបានព្រមានកម្ចាត់សកម្មជនគណបក្សសង្គ្រោះជាតិណាដែលហ៊ានចេញមុខធ្វើសកម្មភាពឱ្យគណបក្សប្រឆាំង និងក្នុងករណីដែលសហភាពអឺរ៉ុបផ្ដាច់ការអនុគ្រោះពន្ធEBAពីកម្ពុជា។ ក្រោយមានបញ្ជាបែបនេះ អាជ្ញាធរនៅតាមខេត្តមួយចំនួនក៏ចាប់ផ្ដើមធ្វើសកម្មភាពយាយីរំខាន និងចាប់ខ្លួនសកម្មជនគណបក្សប្រឆាំងជាបន្តបន្ទាប់។
របាយការណ៍អង្គការលីកាដូ (Licadho) បង្ហាញថា គិតត្រឹមថ្ងៃទី១២ កញ្ញា មានសកម្មជនគណបក្សសង្គ្រោះជាតិចំនួន២១នាក់ហើយ ដែលរដ្ឋាភិបាលចាប់ខ្លួន និងកំពុងស្ថិតនៅក្នុងពន្ធនាគារ ដោយសារតែពួកគេធ្វើសកម្មភាពនយោបាយដែលអនុញ្ញាតដោយច្បាប់កម្ពុជា។
សកម្មជនគណបក្សប្រឆាំង អះអាងថា បើទោះបីជាមានការគំរាមកំហែងយ៉ាងនេះក្ដី ក៏ពួកគេនៅតែប្រកាន់ជំហរទៅចូលរួមអមដំណើរលោក សម រង្ស៊ី វិលចូលស្រុកវិញ នៅពេលខាងមុខដដែល ពីព្រោះពួកគាត់សង្ឃឹមថា នៅពេលលោក សម រង្ស៊ី ធ្វើមាតុភូមិនិវត្តន៍នឹងមានដំណោះស្រាយនយោបាយនៅកម្ពុជាជាមិនខាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
អត្ថបទពេញនិយម
នយោបាយ
- លោក ហ៊ុន សែន បដិសេធការចោទរបស់វៀតណាម ដែលថា ព្រែកជីកហ្វូណនសម្រាប់សម្រួលវត្តមានយោធាចិន
- លោក ហ៊ុន ម៉ាណែត ថ្លែងការពារគម្រោងព្រែកជីកហ្វូណនតេជោ ក្រោយពេលវៀតណាមរិះគន់
- លោក ហ៊ុន សែន ស្នើជួបមេដឹកនាំរដ្ឋប្រហារយោធាភូមាភ្លាមៗក្រោយឡើងតំណែងជាប្រធានព្រឹទ្ធសភា
- ពលរដ្ឋខ្មែរនៅក្រៅប្រទេសចង់ឃើញលោក ហ៊ុន ម៉ាណែត បង្រួបបង្រួមជាតិឡើងវិញក្នុងឱកាសចូលឆ្នាំខ្មែរ
- សមត្ថកិច្ចចាប់មន្ត្រីបក្សភ្លើងទៀនខេត្តកំពង់ចាមបីនាក់ទៀតរឿងក្លែងឯកសារ ខណៈមួយចំនួនរត់គេចខ្លួន