ជីវិត​ក្នុង​ពន្ធនាគារ​របស់​អតីត​អ្នក​ទោស​នយោបាយ​មួយ​ចំនួន​ដែល​ទើប​ត្រូវ​បាន​ដោះលែង

ដោយ ខែ សុណង
2019-11-22
អ៊ីម៉ែល
មតិ
Share
បោះពុម្ព
លោក អ៊ុត ជឿន សមាជិក​ក្រុម​ប្រឹក្សា​ស្រុក​​ជាប់​ឆ្នោត​ខាង​គណបក្ស​សង្គ្រោះ​ជាតិ នៃ​ស្រុក​មោង​ឫស្សី ខេត្ត​បាត់ដំបង។
លោក អ៊ុត ជឿន សមាជិក​ក្រុម​ប្រឹក្សា​ស្រុក​​ជាប់​ឆ្នោត​ខាង​គណបក្ស​សង្គ្រោះ​ជាតិ នៃ​ស្រុក​មោង​ឫស្សី ខេត្ត​បាត់ដំបង។
រូប៖ ហ្វេសប៊ុក​លោក អ៊ុត ជឿន

សកម្មជន​បក្ស​ប្រឆាំង​ស្នើ​ឱ្យ​រដ្ឋាភិបាល​លោក ហ៊ុន សែន គួរតែ​កែ​លម្អ ស្ថានភាព​នៅក្នុង​ពន្ធនាគារ បន្ទាប់ពី​ពួកគេ​មួយ​ចំនួន​ត្រូវ​ជាប់ពន្ធនាគារ​រ​ពី ជាង​ពីរ ឬ​បី​ខែ ដោយសារតែ​ការចោទប្រកាន់​នយោបាយ។

សកម្មជន​បក្ស​ប្រឆាំង​ស្រុក​បាធាយ ខេត្ត កំពង់ចាម លោក ដុង សុវណ្ណារិទ្ធិ ប្រាប់​ថា លោក​ជាប់ពន្ធនាគារ​១​ខែ​កន្លះ​គត់ (០១ តុលា ដល់ ១៥ វិច្ឆិកា)។ ក្នុង​រយៈពេល​នោះ លោក​ថា ស្ថានភាព​ពិបាក​បំផុត​សម្រាប់​លោក គឺ​ភាព​ចង្អៀត​ណែន និង​ផ្សែង​បារី ដោយសារ​អ្នក​ជាប់ឃុំ​មួយ​ចំនួន ជក់បារី​ក្នុង​បន្ទប់​ឃុំឃាំង​។ ក្នុង​ពេល​ជាប់ឃុំ​ឃាំង​នោះ លោក​បាន​ទ្រាំ​ហិត​ផ្សេង​បារី​ទាំង​ថ្ងៃ និង​យប់ ដោយ​មិន​ហ៊ាន​ប្ដឹង​ទៅ​ឆ្មាំ​ពន្ធនាគារ​ឡើយ ព្រោះ​ខ្លាច​រង​ការ​ធ្វើ​បាប។ លោក​រៀបរាប់​ថា នៅ​ខេត្ត​កំពង់ចាម មាន​អ្នក​ទោស​នយោបាយ ជាង​១០​នាក់ តែ​មិន​ត្រូវ​បាន​ដាក់​ឃុំ​ចូលគ្នា​ទេ គឺ​ឃុំ​ដោយឡែក​ពី​គ្នា តែ​រង​ស្ថានភាព​មិនសូវ​ខុសគ្នា​ទេ។

លោក​រៀបរាប់​ថា ឆ្មាំ​ពន្ធនាគារ​ខេត្ត​កំពង់ចាម មានការ​រើសអើង​លោក ដោយ​បាន​ហាម​ប្រាប​អ្នក​ជាប់ឃុំ​ខ្លះ មិន​ឱ្យ​និយាយ​ស្ដី​រក​លោក ព្រោះ​លោក​ជា​អ្នកទោស​មនសិការ​។ ទោះ​យ៉ាងណា លោក​ថា អ្នក​ជាប់ឃុំ ដែល​រស់នៅ​លាយឡំ ក្នុង​បន្ទប់​ឃុំឃាំង​នោះ មាន​គ្រប់​ប្រភេទ បទល្មើស​ឧក្រិដ្ឋកម្ម គ្រឿងញៀន និង​អ្នក​រង​ភាព​អយុត្តិធម៌ មិន​មាន​ការរើសអើង​លោក តាម​ការ​បង្គាប់​របស់​ឆ្មាំ​ឡើយ៖ «ខ្ញុំ​មើល​ទៅ ដូចជា​អ្នកទោស​ទាំងឡាយ ទាំងពួង គេ​មិន​រើសអើង​ទេ​។ ប៉ុន្តែ​គ្រាន់​ថា ដូចជា​មន្ត្រី​ពន្ធនាគារ គាត់​រាង​រឹតត្បិត​យើង។ រឹតត្បិត​យើង ឬក៏​គាត់​រឹតត្បិត​អ្នកទោស​ផ្សេងៗ កុំ​ឱ្យ​ទៅ​និយាយ​អ្វី កុំ​ឱ្យ​ទៅ​ថា អ្វី​លិច​កើត​អ៊ីចឹង​ណា​។ គាត់​ដូចជា​រាង​រើសអើង ប៉ុន្តែ​សម្រាប់​អ្នក​ជាប់គុក​ដូចគ្នា គាត់​អត់​មាន​ប្រកាន់​ទេ គាត់​មាន​តែ​សាទរ​យើង អាណិត​យើង ស្រលាញ់​យើង គោរព​យើង ដោយសារ​យើង​មាន​វីរភាព ខ្លះ​ទៀត​ទៅ​គាត់​រងគ្រោះ ដោយសារតែ​តុលាការ​វា​មិន​មាន​ភាព​យុត្តិធម៌​សម្រាប់​ពួកគាត់​អ៊ីចឹង​ណា​បង»

របប​អាហារ​វិញ លោក​ថា ខាង​ពន្ធនាគារ​ខេត្តកំពង់ចាម បានផ្ដល់​បាយ និង​ម្ហូប​ឱ្យ​អ្នក​ជាប់ឃុំ តែ​មិនអាច​ហូប​ឆ្អែត និង​គ្រប់គ្រាន់​ទេ ដូច្នេះ លោក​បាន​ចំណាយលុយ​ទិញ ម្ហូបអាហារ​បន្ថែម សម្រាប់​ការ​ស្នាក់​នៅក្នុង​ពន្ធនាគារ​។ លោក​ថា ទំនិញ​ក្នុង​ពន្ធនាគារ មានតម្លៃ​ថ្លៃ​ជាង​នៅ​ខាងក្រៅ​ខ្លាំង តែ​គ្មាន​ជម្រើស​ត្រូវតែ​បង្ខំចិត្ត​ទិញ​។ សម្រាប់​ពន្ធនាគារ​ខេត្ត​កំពង់ចាម អ្នក​ទោស​នយោបាយ​រូប​នេះ ថា ខាង​ពន្ធនាគារ​មិន​រឹតត្បិត ឬ​កំណត់​ការ​អនុញ្ញាត​ឱ្យ​ជួប​សាច់ញាតិ​ទេ គឺ​ជួប​គ្រប់​បាន​រាល់ថ្ងៃ និង​គ្រប់ពេល តែ​រយៈពេល​ខ្លី ត្រឹម​១០ ឬ​២០​នាទី​។ រីឯ​ស្ថានភាព​អំពើពុករលួយ​ក្នុង​ពន្ធនាគារ​ខេត្ត​កំពង់ចាម​វិញ លោក​មិន​ហ៊ាន​អត្ថាធិប្បាយ​ទេ។

ចំណែក​ស្ថានភាព​អ្នក​ទោស​នយោបាយ​នៅតាម​ពន្ធនាគារ​តាម​បណ្ដា​ខេត្ត​ផ្សេងទៀត ក៏​មិន​ខុសគ្នា​ដែរ​។ របប​ក្រុងភ្នំពេញ បាន​បើក​យុទ្ធការបង្ក្រាប​លើ​សកម្មជន និង​អ្នកគាំទ្រ​បក្សប្រឆាំង ជិត​១០០​នាក់ នៅ​មុន​ថ្ងៃ​ទី៩ វិច្ឆិកា នៃ​គម្រោង​មាតុភូមិនិវត្តន៍​ចូល​ប្រទេស​កម្ពុជា របស់ លោក សម រង្ស៊ី​។ តែ​នៅ​ថ្ងៃទី១៤ វិច្ឆិកា មេដឹកនាំ​របប គឺ លោក ហ៊ុន សែន បាន​បញ្ជា​ឱ្យ​ដោះលែង​អ្នក​ទោស​នយោបាយ​ជាង​៧០​នាក់​វិញ។

ចំណែ លោក នូ ភឿន ដែល​ជាប់ឃុំ​នៅ​ពន្ធនាការ​ខេត្តកំពង់ធំ​វិញ​ថា លោក​ក៏​ត្រូវ​បាន​គេ​បំបែក​ពី​អ្នកទោស​មនសិការ​ដូច​គ្នា​ដែរ ដោយ​ឱ្យ​ស្នាក់នៅ​លាយឡំ​ជាមួយ​អ្នក​ជាប់ឃុំ​បទឧក្រិដ្ឋ​ដែរ​។ ក្នុង​បន្ទប់​ឃុំខ្លួន​របស់​លោក នូ ភឿន ស្នាក់នៅ​សម្បូរ​ទៅ​ដោយ​អ្នក​ទោស​នយោបាយ​ឈ្លោះ​គ្នា និង​ឈានដល់​អំពើ​ហិង្សា ព្រោះតែ​ភាព​ចង្អៀត ហើយ​ដេក​ប៉ះ​គ្នា​។ កន្លែងដេក​របស់ លោក នូ ភឿន គឺ​នៅ​ជាប់​នឹង​បង្គន់​ក្នុង​បន្ទប់​ឃុំឃាំង។

លោក​រៀបរាប់​បន្ត​ថា អ្នក​ជាប់ឃុំ​ទាំងអស់ ត្រូវ​ទិញ​កង្ហារ​ដាក់​ខ្លួនឯង បើ​មិន​ដូច្នេះ​ទេ គឺ​ស្អុះស្អាប់​ពិបាក​ដកដង្ហើម​ណាស់​។ នៅ​ថ្ងៃ​ខ្លះ មន្ត្រី​ពន្ធនាគារ​បាន​ផ្ដាច់​ចរន្តអគ្គិសនី ដែល​ធ្វើ​ឱ្យ​អ្នក​ជាប់ឃុំ​រង​ភាព​ស្អុះស្អាប់​។ ចំណែក​ការ​ចេញ​លំហែ​ប្រចាំថ្ងៃ​វិញ គឺ​ឆ្មាំ​ពន្ធនាគារ​ខេត្ត​កំពង់ធំ អនុញ្ញាត​ឱ្យ​ចេញពី​ដង ព្រឹក​ម្ដង ថ្ងៃ​ម្ដង ដោយ​ក្នុង​ម្ដង​ប្រហែល​៤០ ទៅ ៥០​នាទី​។ ឯ​ថ្ងៃ​បុណ្យជាតិ មិន​ត្រូវ​បាន​អនុញ្ញាត​ឱ្យ​ចេញ​ក្រៅ​ឡើយ៖ «ការ​លំហែ វា​ឱ្យ​ចេញ​ហ្នឹង គេ​ដូចជា​មិនសូវ​បើក​ឱ្យ​យើង​ទូលំទូលាយ​ទេ ក្នុង​មួយថ្ងៃ គេ​ឱ្យ​យើង​លម្ហែ​បាន​អត់​ដល់​មួយ​ម៉ោង​ផង ក្នុង​មួយ​ព្រឹក​ណា​។ ដល់ពេល​ថ្ងៃ​ហ្នឹង គេ​(​អត់​ឱ្យ​លម្ហែ​)​ដល់​១​ម៉ោង​ផង​។ ជួនកាល​គេ​ឱ្យ​ដល់​មួយ​ម៉ោង ជួនកាល​អត់​។ អ៊ីចឹង​ណា​។ បាទ ដល់ពេល​ថ្ងៃ​បុណ្យទាន​ថ្ងៃ​ឈប់សម្រាក​របស់​រាជការ គឺ​គេ​អត់​ឱ្យ​ចេញ បាន​គេ​ឱ្យ​នៅ​ក្នុង​បន្ទប់​រហូត​អ៊ីចឹង​ទៅ។ ការរស់នៅ​ពេល​ឃុំ​ហ្នឹង គេ​អត់​ផ្ដល់​ការ​បើក​ចរន្តអគ្គិសនី​ឱ្យ​ប្រើប្រាស់ ដូចជា​កង្ហារ​ដើម្បី​កុំ​ឱ្យ​មាន​បរិយាកាស​ស្អុះស្អាប់​ណា​។ វា​ពិបាក ពេល​រស់នៅ​វា​ក្ដៅ វា​ត្រូវ​នឹង​មនុស្ស​ច្រើន​ផង​ទៅ»

លោក លី ម៉េងឃាង ដែល​ជាប់ឃុំ​នៅ​ខេត្ត​កណ្តាល​វិញ បាន​យល់ដឹង​ច្រើន​ថា ក្នុង​រដ្ឋាភិបាល​គួរ​កែប្រែ​ការដឹកនាំ​សង្គម បើ​មិន​ដូច្នេះ​ទេ យុវជន​ពេញកម្លាំង​នឹង​បន្ត​ជាប់ឃុំ​កាន់តែ​ច្រើន​ជាង​នេះ​ទៀត។ លោក​ថា លោក​ឃើញ​មាន​យុវជន​ពេញកម្លាំង​ជាង ១០​នាក់ ត្រូវ​បាន​បញ្ជូន​ឃុំខ្លួន​ក្នុង​ពន្ធនាគារ​រាល់ថ្ងៃ ដោយសារ​បទល្មើស​គ្រឿងញៀន។ លោក​មាន​ភាព​សង្វេគ អាណិត​យុវជន​ទាំងនោះ​ណាស់ នៅ​ពេល​ឃើញ​បែបនេះ៖ «អ្វី​ដែល​ខ្ញុំ​ឈឺចិត្ត​ជាងគេ​ហ្នឹង គឺ​យុវជន​ខ្មែរ ត្រូវ​គ្រប់​ដណ្ដប់​ដោយ​គ្រឿងញៀន កុមារា​ខ្មែរ ត្រូវ​គ្របដណ្ដប់​ដោយ​គ្រឿងញៀន អ៊ីចឹង​ខ្ញុំ​មាន​ភាព​ឈឺចាប់​ណាស់​ចំពោះ​ជាតិ​មាតុភូមិ ក្នុងនាម​ខ្ញុំ​ជា​កូន​ខ្មែរ ម្នាក់​ដែរ​។ តាមពិត​ខ្ញុំ​អរគុណ ពួកគាត់​ដែល​បាន​ចាប់​ខ្ញុំ​ដាក់​ក្នុង​ពន្ធនាគារ ដោយសារ​អ្វី ដែល​យើង​ដឹង​ពី​ខាងក្រៅ​ហ្នឹង វា​តិច​ពេក តែ​ពេល​ដែល​ខ្ញុំ​ចូល​ក្នុង​ពន្ធនាគារ​ជាង​៦០​ថ្ងៃ​ហ្នឹង គឺ​ធ្វើ​ឱ្យ​ខ្ញុំ​ដឹង​ច្បាស់​ថា វិស័យ​ដឹកនាំ​របស់​រដ្ឋាភិបាល​គួរ​កែទម្រង់​អ្វីខ្លះ ហើយ​វា​មាន​ភាព​អយុត្តិធម៌​ហ្នឹង អ្វីខ្លះ? គឺ​វា​ច្រើនពេក ដែល​មិន​អាច​រៀបរាប់​អស់​។ អ៊ីចឹង ធ្វើ​ឱ្យ​ខ្ញុំ​កាន់តែ​អាណិត​កូន​ខ្មែរ។ ធ្វើ​ឱ្យ​ខ្ញុំ​ហ្នឹង កាន់តែ​ឈឺចាប់ ចំពោះ​ជាតិ​យើង ដែល​ឃើញ​កុមារ​អាយុ​ជាង​១០​ឆ្នាំ ចូល​ពន្ធនាគារ មិន​ដឹង​ថា ជាតិ​យើង​ទៅ​យ៉ាងណា ទៅ​អនាគត បើ​មិន​កែទម្រង់​ប្រព័ន្ធ​ច្បាប់​ទេ​។ បើ​មិន​កែទម្រង់​ប្រព័ន្ធ​ច្បាប់​ទេ គឺ​យើង ជាតិ​យើង​ទៅ​ថ្ងៃមុន ខ្ញុំ​មិន​ដឹង​ថា ធ្លាក់​ដុនដាប ឬ​រីកចម្រើន យ៉ាងណា​? វា​ឈឺចាប់​ណាស់ ចូល​ទៅ​ដល់​ក្នុង​ហ្នឹង ឃើញ​យុវជន​ខ្មែរ ចូល​ក្នុង​ពន្ធនាគារ​មួយថ្ងៃ ១០​នាក់ ១០​នាក់​ជាង»

លោកស្រី ប៉ែន មុំ ដែល​ជាប់ឃុំ​នៅ​ខេត្ត កំពត រៀបរាប់​ថា ស្ថានភាព​ក្នុង​ពន្ធនាគារ​ខេត្ត​កំពត ក៏​មាន​លក្ខណៈ​ស្រដៀង​គ្នា​នៅ​ខេត្ត​កណ្ដាល​ដែរ។ អ្នកស្រី ប៉ែន មុំ ត្រូវ​បាន​ឃុំ​នៅ​ក្នុង​អគារ​B1 នៃ​ពន្ធនាគារ​ខេត្ត​កំពត ដែល​ជា​កន្លែង​ឃុំឃាំង​ស្ត្រី​។ ក្នុងចំណោម​អ្នក​ជាប់ឃុំ​ស្ត្រី មាន​៤៥​នាក់ មានតែ​លោកស្រី​ម្នាក់​គត់ ជា​អ្នក​ទោស​នយោបាយ ឯ​អ្នក​ផ្សេងទៀត គឺ ជា​ស្ត្រី​ពេញកម្លាំង ជាប់​ទោស​​បទ​គ្រឿងញៀន​ភាគច្រើន​។ ស្ថានភាព ក្នុង​ពន្ធនាការ​ខេត្ត​កំពត ក៏​ចង្អៀត​ណែន​ដែរ​។ ចំណែក​អគារ​ឃុំឃាំង​ខាង​បុរស​វិញ គឺ​មាន​អ្នក​ជាប់ឃុំ​ចំនួន​៩៥​នាក់ សុទ្ធសឹងតែ​ជា​យុវជន និង​មនុស្ស​ពេញកម្លាំង ហើយ​ភាគច្រើន គឺ​បទល្មើស​គ្រឿងញៀន៖ «ខ្ញុំ​រស់នៅ​ក្នុង​ពន្ធនាគារ រយៈពេល ១​ខែ​ហ្នឹង ខ្ញុំ​មើល​ទៅ ខ្ញុំ​មានចិត្ត​ខ្លោច​ផ្សា​មែនទែន ដោយសារ​ខ្ញុំ​ឃើញ​ប្រជាពលរដ្ឋ ជា​បុរសៗ​ហ្នឹង ប្រាំបួន​រយ ហុកសិប (៩៦០)​នាក់ ជាប់​នៅ​ក្នុង​ពន្ធនាគារ​ខេត្ត​កំពត​ហ្នឹង ដែល​ជា​មនុស្ស​ចាប់ពី​អាយុ ១៨​ឆ្នាំ ដល់​៦០​ឆ្នាំ​ជាង គឺ​ពេញ​កម្លាំង ជា​អ្នក​រកស៊ី ជា​អ្នក​អ្វី​អ៊ីចឹង​ណា ដោយសារ​ទោស​ភាគច្រើន ជាង ៨០​ភាគរយ គឺ​ទោស​គ្រឿងញៀន ដោយសារ​មាន​គ្រឿងញៀន ហូរ​ចូល​មក អ៊ីចឹង​បានជា​ប្រជាពលរដ្ឋ គាត់​មាន​ការ​ប្រឈម គាត់​ខ្វះខាត​លុយកាក់​រកស៊ី​អ៊ីចឹង​ទៅ គាត់​ជ្រុលជ្រួស​ទៅ​ជក់ លក់ គ្រឿងញៀន ឈាន​ដល់​ការចែក​ចាយ អ៊ីចឹង​គាត់​ត្រូវ​ប្រឈម​ដល់​ការ​ចាប់​ហើយ គឺ​គេ​បញ្ជូន​មក​ពន្ធនាគារ​ហើយ​។ បើ​ក្មេងៗ​អាយុ​១៨ អ្វី ទៅ​ទំនាក់ទំនង​នៅ​ត្រឹម​ស្នងការ​ហ្នឹង បើ​មាន​អ្នកធានា​អ្នក​អ្វី អាច​រួច បើ​អត់​ទេ គឺ​គេ​បញ្ជូន​ទៅ​ដាក់​នៅ​ពន្ធនាគារ​ហើយ​។ យ៉ាងតិច ១​ឆ្នាំទៅ​១៨​ខែ ទើប​មាន​ការ​ដោះលែង កាត់ទោស​តាម​ច្បាប់​ហ្នឹង​ណា​។ ចំណែក​ខាង​ខ្ញុំ​ហ្នឹង B1 មានទោស​ស្ត្រី​ហ្នឹង​ចំនួន ៤៥​នាក់​។ ៤៥​នាក់​ហ្នឹង គឺ​៩០​ភាគរយ​ហើយ ជា​ទោស​គ្រឿងញៀន ហើយ​ចំណែក​នាង​ខ្ញុំ អ្នក​ទោស​នយោបាយ​មាន​តែ​ម្នាក់​ទេ»

សកម្មជន​គណបក្សប្រឆាំង ជាប់ឃុំ​នៅ​ពន្ធនាគារ​ខេត្ត​បាត់ដំបង លោក អ៊ុត ជឿន និយាយ​ថា វា​មាន​ភាព​លំបាក​ខ្លាំង​ណាស់ នៅ​ពេល​លោក ជាប់ឃុំ​នៅ​ទីនោះ​។ មួយ​ជីវិត​លោក មិន​ធ្លាប់​ជួបប្រទះ​ភាព​អយុត្តិធម៌​បែប​នេះ​ឡើយ៖ «និយាយ​ឱ្យ​ចំ ពាក្យ​មួយ​មាត់ វា​លំបាក។ ខ្ញុំ​មិន​អាច​រៀបរាប់​បាន ហើយ​អ្វីៗ​ក្នុង​ពន្ធនាគារ​វា​ថ្លៃ​ទាំងអស់​។ សម្រាប់​អ្នក ដែល​មាន​ទោស គេ​អាច​ទទួល​យក​បាន តែ​សម្រាប់​អ្នក​ដែល​គ្នា​អត់​ទោស​ទេ វា​អយុត្តិធម៌ សម្រាប់​គ្នា វា​មិន​អាច​ទទួល​យក​បាន​ទេ​បង​។ នៅ​ជាមួយ​ចោរ គេ​បំបែក​គ្នា។ គ្នា​ខ្ញុំ​៣​នាក់ មួយ​សំពៅ​លូន ១​រុក្ខ ៣​មោង ទាំង​ខ្ញុំ​ហ្នឹង គេ​បំបែក​គ្នា អត់​ឱ្យ​នៅ​ជុំ​គ្នា​ទេ នៅ​បន្ទប់​រៀង​ៗ​ខ្លួន»

ចំណែក​អតីត​អ្នកទោស​មនសិការ​ផ្សេង​ទៀត ដូចជា លោក ពុយ តាក់ នៅ​ខេត្ត​កំពង់ស្ពឺ កញ្ញា យូ ចាន់ធានី ជាប់​ក្នុង​ពន្ធនាគារ ម២ នៃ​ពន្ធនាគារ​ព្រៃ​ស មិន​ហ៊ាន​ធ្វើការ​អត្ថាធិប្បាយ​ទេ ដោយសារ​បារម្ភ​ខ្លា​ចរក​ការ​ធ្វើ​ទុក្ខបុកម្នេញ​ជាថ្មី លើ​ពួក​គាត់។

ពាក់ព័ន្ធ​នឹង​ស្ថានភាព​ក្នុង​ពន្ធនាគារ ដែល​អតីត​អ្នក​ទោស​នយោបាយ​ទាំងនេះ បាន​លើក​ឡើង ត្រូវ​បាន​អគ្គនាយករង និង​ជា​អ្នកនាំពាក្យ​អគ្គនាយកដ្ឋាន​ពន្ធនាគារ លោក នុត សាវនា បំភ្លឺ​ថា ភាព​ចង្អៀត​ណែន​ក្នុង​ពន្ធនាគារ កើន​ឡើង​ដោយសារ​កំណើន​អ្នកទោស។ ខាង​ពន្ធនាគារ មិន​ទាន់​មាន​លទ្ធភាព ញែក​អ្នក​ជាប់ឃុំ​ប្រភេទ​ទោស ដាក់​ផ្សេងគ្នា​បាន​ឡើយ​។ លោក ថា ជា​គោលការណ៍ គឺ​ហាមឃាត់​ការ​ជក់បារី​ក្នុង​ពន្ធនាគារ និង​គ្មាន​គោលការណ៍​រើសអើង​ឡើយ ដូច្នេះ​បើ​មាន​ករណី​ណា ល្មើស អ្នក​ជាប់ឃុំ​អាច​ដាក់​ពាក្យ​ប្ដឹង​បាន​។ ទោះ​យ៉ាងណា លោក​ថា ខាង​ពន្ធនាគារ​កំពុង​កែ​លម្អ​ស្ថានភាព​ទាំងឡាយ ឱ្យ​មាន​ភាព​ប្រសើរ​ឡើង​វិញ៖ «ទាក់ទង​នឹង​ភាព​ចង្អៀត​ណែន អាហ្នឹង ខ្ញុំ​ទទួលស្គាល់ ដោយសារ​កើន​ឡើង​អ្នក​ទោស​។ នៅ​លាយឡំ​គ្នា អាហ្នឹង​ជា​ធម្មតា វា​អត់​មាន​ជា​ជម្រើស​ទេ​។ អ៊ីចឹង បើ​យើង​ញែក​គាត់​ដោយឡែក​ទៅ​កន្លែង​ពិសេស​ណាមួយ លទ្ធភាព​យើង​មាន យើង​ធ្វើ​អត់​ទាន់​បាន​។ អ៊ីចឹង ដើម្បី​ឆ្លើយតប​នឹង​កិច្ចការ​ហ្នឹង យើង​ត្រូវ​ដាក់​គាត់​លាយ​គ្នា មួយ​រយៈ​សិន​។ ផ្សែង​បារី អ្វី​ហ្នឹង តាមពិត​យើង​ហាម​មិន​ឱ្យ​មាន»

នាយករង​ទទួលបន្ទុក​ឃ្លាំមើល​សិទ្ធិមនុស្ស នៃ​អង្គការ​លីកាដូ លោក អំ សំអាត សង្កេត​ឃើញ​ថា ពន្ធនាគារ​នៅ​ទូទាំង​ប្រទេស​កម្ពុជា មាន​ភាព​ចង្អៀត​ណែន​មែន។ លោក ថា បើ​ទោះ​រដ្ឋាភិបាល និង​អគ្គនាយកដ្ឋាន​ពន្ធនាគារ បាន​ប្រកាស​ពី​ការ​ប្ដេជ្ញា​ចិត្ត​រក​មធ្យោបាយ​បន្ថយ​ភាព​ចង្អៀត​ណែន​តែ​មិន​អាច​ធ្វើ​ទៅ​រួច​ទេ ដោយសារ​ការ​កើន​ឡើង​នៃ​បទល្មើស​គ្រឿងញៀន និង​កត្តា​តុលាការ​មិន​អនុវត្ត​ក្រមព្រហ្មទណ្ឌ ឱ្យ​អ្នក​ជាប់ទោស​មជ្ឈិម​នៅ​ក្រៅ​ឃុំ​បណ្ដោះអាសន្ន​។ ចំណែក​អ្នក​ជាប់ឃុំ ដោយសារ​បទល្មើស​នយោបាយ​ទៀតសោត ក៏​មិន​អាច​នៅ​ក្រៅ​ឃុំ​បាន​ដែរ បើសិនជា​ការសម្រេច​ពី​ប្រមុខ​រដ្ឋាភិបាល។

តំណាង​អង្គការ​សិទ្ធិមនុស្ស ឃ្លាំមើល​ពន្ធនាគារ​រូប​នេះ យល់ថា កត្តា​ទាំងនេះ និង​ការ​ដាក់​ឱ្យ​ស្នាក់នៅ​លាយឡំ​គ្នា គ្រប់​ប្រភេទ​បទល្មើស និង​អ្នក​ជក់បារី បាន​ប៉ះពាល់​ដល់​សិទ្ធិ​របស់​អ្នក​ជាប់ឃុំ​។ លោក អំ សំអាត បន្ត​ថា ការ​ចេញ​លំហែ​របស់​អ្នក​ជាប់ឃុំ ក៏​គ្មាន​ភាព​ប្រសើរ​ដែរ។ ចំពោះ​ភាព​ចង្អៀត​ណែន ក្នុង​ពន្ធនាគារ​វិញ គឺ​កន្លែង​ឃុំខ្លួន​ខ្លះ អ្នក​ជាប់​ឃុំ​ត្រូវ ដាក់​ម៉ោង ផ្លាស់​វេន​គ្នា​សម្រាន្ត៖ «អ៊ីចឹង វា​ប៉ះពាល់​ទៅដល់​សុខភាព​របស់​អ្នកទោស​នៅ​ក្នុង​ហ្នឹង​ណា ហើយ​មួយទៀត យើង​ឃើញ​ថា អាការ​ចេញ​លម្ហែ​យក​ខ្យល់អាកាស​អ្វី កាលណា​ច្រើនពេក យើង​អាច​ប្ដូរ​វេន​គ្នា ក្នុង​ការ​ចេញ។ អ៊ីចឹង វា​ធ្វើ​ឱ្យ​ប៉ះពាល់​ដែរ ហើយ​មួយទៀត ការ​គេង ការ​អ្វី​ហ្នឹង អាច​គេង​បញ្ឆិត គេ​ផ្អៀង ឬក៏​ប្ដូរ​វេន​គ្នា​គេង អ្វី​អ៊ីចឹង​។ អាហ្នឹង គឺ​សុទ្ធ​តែ​ជា​រឿង ដែល​ត្រូវ​ប៉ះពាល់​ហើយ​។ អ៊ីចឹង បាន​ត្រលប់​មកវិញ ដោយសារតែ ទី​១ អា​ភាព​ចង្អៀត​ណែន​ហ្នឹង ដោយសារ​កំណើន​នៃ​អ្នក​ជាប់ឃុំ ជាពិសេស​គឺ​បទល្មើស​គ្រឿងញៀន​ហ្នឹង វា​ច្រើន​ជាង​គេ​ហើយ​។ អ្វី​ដែល​សំខាន់ គឺ​រដ្ឋាភិបាល ឬក៏​តុលាការ​ហ្នឹង អត់​ទាន់​បាន​អនុវត្ត​ត្រឹមត្រូវ​ទៅ​តាម​ក្រម​ព្រហ្មទណ្ឌ​ណា»

សកម្មជន​គណបក្ស​សង្គ្រោះជាតិ​ដែល​ទើប​ទទួល​មាន​សេរីភាព​បណ្ដោះអាសន្ន មាន​បំណង​ស្នើសុំ​ឱ្យ​ខាង​ពន្ធនាគារ ដោះស្រាយ​កង្វល់​របស់​ពួកគេ ដោយ​កែ​លម្អ​ស្ថានភាព​មិន​ប្រក្រតី​ទាំងឡាយ​ក្នុង​ពន្ធនាគារ​ឱ្យ​មាន​ភាព​ប្រសើរ ដោយ​ត្រូវ​ប្រមូល​យក​អ្នក​ជក់បារី ឃុំ​ផ្ដុំ​គ្នា​នៅ​បន្ទប់​តែមួយ​ជាដើម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល