កូនស្រី​សកម្មជន​បក្ស​ប្រឆាំង​​នៅ​ពោធិ៍សាត់ ទាមទារ​ឱ្យ​តុលាការ​ដោះលែង​ឪពុក​ពី​ពន្ធនាគារ

2019-12-11
អ៊ីម៉ែល
មតិ
Share
បោះពុម្ព
លោក ចាន់ សុផាល (រូប​ធំ) សកម្មជន​បក្ស​សង្គ្រោះ​ជាតិ ស្រុក​វាលវែង និង​លោក ទួន សំអាត (កណ្ដាល) ពាក់​អាវ​ដៃ​វែង​ខោ​ជើង​វែង​ពណ៌​ដី អនុប្រធាន​គណបក្ស​សង្គ្រោះ​ជាតិ​ស្រុក​វាលវែង ខេត្ត​ពោធិ៍សាត់ ដែល​ត្រូវ​អាជ្ញាធរ​ភ្នំពេញ​ចាប់​ដាក់​គុក កាល​ពី​ថ្ងៃ​ទី​២៨ ខែ​ឧសភា ឆ្នាំ២០១៩។
លោក ចាន់ សុផាល (រូប​ធំ) សកម្មជន​បក្ស​សង្គ្រោះ​ជាតិ ស្រុក​វាលវែង និង​លោក ទួន សំអាត (កណ្ដាល) ពាក់​អាវ​ដៃ​វែង​ខោ​ជើង​វែង​ពណ៌​ដី អនុប្រធាន​គណបក្ស​សង្គ្រោះ​ជាតិ​ស្រុក​វាលវែង ខេត្ត​ពោធិ៍សាត់ ដែល​ត្រូវ​អាជ្ញាធរ​ភ្នំពេញ​ចាប់​ដាក់​គុក កាល​ពី​ថ្ងៃ​ទី​២៨ ខែ​ឧសភា ឆ្នាំ២០១៩។
រូប៖ ហ្វេសប៊ុក

កូនស្រី​សកម្មជន​គណបក្សប្រឆាំង​នៅ​ស្រុក​វាលវែង​ដែល​កំពុង​ជាប់ឃុំ​នៅ​ពន្ធនាគារ​ខេត្ត​ពោធិ៍សាត់ ទាមទារ​ឱ្យ​តុលាការ​ដោះលែង​ឪពុក​របស់​លោកស្រី ឱ្យ​មាន​សេរីភាព​ឡើងវិញ។ លោកស្រី​អះអាង​ថា របប​លោក​ក្រុងភ្នំពេញ​ចាប់​ឪពុក​របស់​លោកស្រី គឺ​លោក ទួន សំអាត ដាក់គុក​ដោយ​អយុត្តិធម៌​អស់​ជាច្រើន​ខែ​ហើយ​មិនទាន់​ដោះលែង​នៅឡើយ។

កូនស្រី​ជន​ជាប់ឃុំ​ជាស​កម្ម​គណបក្ស​សង្គ្រោះ​ជាតិ​ស្រុក​វាលវែង លោកស្រី ទួន ស្រីរ័ត្ន ប្រាប់​អាស៊ីសេរី​នៅ​រសៀល​ថ្ងៃ​ទី​១០ ធ្នូ​ថា ឪពុក​របស់​គាត់​មិនបាន​ប្រព្រឹត្ត​ខុសច្បាប់​ដូច​ការចោទប្រកាន់​របស់​តុលាការ​នោះ​ឡើយ​។ លោកស្រី​បន្ត​ថា ឪពុក​របស់​លោកស្រី​ធ្លាក់ខ្លួន​ឈឺ​ធ្ងន់​នៅ​ក្នុង​ពន្ធនាគារ ហើយ​អាច​នឹង​គ្រោះថ្នាក់​ដល់​អាយុជីវិត​នៅ​ក្នុង​ពន្ធនាគារ ប្រសិនបើ​តុលាការ​មិន​ដោះ​លេង​ឱ្យ​មាន​សេរីភាព​វិញ ពីព្រោះ​លោក ទួន សំអាត មាន​អាយុ ៧០​ឆ្នាំ និង​ត្រូវ​លេប​ថ្នាំ​ព្យាបាល​ជំងឺ​ជាប្រចាំ។ អ្នកស្រី​បន្ត​ថា សុខភាព​របស់​ជន​ជាប់ឃុំ​ទ្រុឌទ្រោម​ខ្លាំង ដោយសារ​លោក​ពិបាកចិត្ត​ដែល​ជាប់គុក​ដោយ​អយុត្តិធម៌៖ «ចាប់​គាត់​គឺ​ចាប់ទោស​នយោបាយ​ហ្នឹង ប៉ុន្តែ​តុលាការ​ដល់​ចោទប្រកាន់​គឺ​តុលាការ​ចោទ​ផ្លូវ​ផ្សេង ដើម្បី​ដាក់គុក​ពួកគាត់​ឱ្យ​បាន​យូរ។ តាម​សម្ដី​មេធាវី​គាត់​និយាយ​ប្រាប់​ខ្ញុំ​គឺ​ប្រហែល​គេ​អាច​ឃុំខ្លួន​ពួកគាត់​១៨​ខែ ព្រោះ​គេ​ចោទ​ពី​បទ​ទោសឧក្រិដ្ឋ។ ខ្ញុំ​យល់​ថា តុលាការ​មិន​យុត្តិធម៌ គាត់​អត់​មានការ​ស៊ើបអង្កេត​ទេ និយាយ​មួយ​ទៅ​គេ​ចាប់​ឪពុក​ខ្ញុំ​ឃុំ​រយៈពេល​៦​ខែ​ជាង​ហើយ គឺ​អត់​ដែល​ឃើញ​ទៅ​ស៊ើបអង្កេត​អី​គឺ​មិនដែល​មាន​ទេ គឺ​ចាប់​គាត់​យក​ទៅ​ឃុំ​ចោល​តែម្ដង»

លោក ទួន សំអាត ជា​អនុប្រធាន​គណបក្ស​សង្គ្រោះជាតិ ស្រុក​វាលវែង ត្រូវ​បាន​សមត្ថកិច្ច​ចាប់ខ្លួន កាលពី​ថ្ងៃ​ទី​២៨ ឧសភា កន្លងទៅ ដោយ​ចោទប្រកាន់​ទន្ទ្រាន​ដី​ព្រៃ​ខុសច្បាប់។

ប៉ុន្តែ​លោកស្រី ទួន ស្រីរ័ត្ន អះអាង​ថា ឪពុក​របស់​គាត់​មិន​បាន​ទៅ​ទន្ទ្រាន​ដី​ព្រៃ​ដូច​ការ​ចោទប្រកាន់​នោះ​ទេ ហើយ​លោក​ស្រី ហៅ​ការ​ចាប់ខ្លួន​នេះ​ថា ជា​រឿង​នយោបាយ ដោយសារ​ជន​ជាប់ឃុំ​ជា​មន្ត្រី​គណបក្ស​សង្គ្រោះ​ជាតិ ស្រុក​វាលវែង ដែល​ជា​ឆ្អឹង​ទទឹង​ក​របស់​អាជ្ញាធរ​ដែនដី។

លោកស្រី ទួន ស្រីរ័ត្ន អះអាង​ថា កាល​ពី​ចុងខែ​វិច្ឆិកា​ថា លោកស្រី​បាន​ដាក់​ពាក្យ​ស្នើ​សុំ​ឱ្យ​ដោះលែង​ឪពុក​គាត់​ឱ្យ​នៅ​ក្រៅ​ឃុំ​ដែរ ប៉ុន្តែ​សំណើសុំ​នោះ​ត្រូវ​បាន​បដិសេធ ដោយ​តុលាការ​ប្រាប់​លោកស្រី​ថា សំណុំ​រឿង​នេះ មិនមែន​ជា​រឿង​នយោបាយ​នោះ​ទេ គឺជា​បទល្មើស​ព្រៃឈើ ដែល​មិន​អាច​អនុគ្រោះ​ឱ្យ​បាន​ឡើយ។

អាស៊ីសេរី​មិន​អាច​ទាក់ទង​អ្នកនាំពាក្យ​សាលាដំបូង​ខេត្ត​ពោធិ៍សាត់​លោក ហេង ដូនីន ដើម្បី​សុំ​អត្ថាធិប្បាយ​ជុំវិញ​បញ្ហា​នេះ​បានទេ​នៅ​ថ្ងៃ​ទី​១០ ធ្នូ ដោយ​ទូរស័ព្ទ​ចូល​ជា​ច្រើនដង​ពុំ​មាន​អ្នកទទួល។

មន្ត្រី​ស៊ើបអង្កេត​អង្គការ​លីកាដូ (Licadho) ខេត្ត​ពោធិ៍សាត់ លោក កែម គីមស្រ៊ន់ មាន​ប្រសាសន៍​ថា ការ​ចាប់ខ្លួន​សកម្មជន​បក្ស​ប្រឆាំង​នេះ ជា​រឿង​នយោបាយ ដោយសារ​ពួកគាត់​ជា​មន្ត្រី​បក្ស​សង្គ្រោះ​ជាតិ​ស្រុក​វាលវែង ដែល​តែង​ដើរ​ធ្វើ​សកម្មភាព​នយោបាយ​នៅ​តាម​ព្រំដែន​កម្ពុជា​ថៃ នៅ​តំបន់​នោះ​។ លោក​បន្ត​ថា ការ​ចាប់​ខ្លួន​នេះ គឺជា​ការ​គំរាមកំហែង​ដល់​សកម្មជន​បក្ស​ប្រឆាំង​ដទៃ​ទៀត ដើម្បី​ធ្វើ​ឱ្យ​ពួកគាត់​ភិតភ័យ និង​ឱ្យ​ឈប់​គាំទ្រ​លោក សម រង្ស៊ី និង​ថ្នាក់ដឹកនាំ​គណបក្ស​នេះ​បន្ត​ទៀត​។ ទោះជា​យ៉ាងណា​លោក​ថា ការ​ធ្វើ​បែបនេះ​មិន​ផ្ដល់​ផល​ចំណេញ​ដល់​របប​ដឹកនាំ​សព្វថ្ងៃ​នោះ​ទេ ផ្ទុយទៅវិញ​គឺ​កាន់តែ​ដាក់​បន្ទុក​ដល់​រដ្ឋាភិបាល​បន្ថែម​ទៀត៖ «អ៊ីចឹង​យើង​យល់​ឃើញ​ថា ល្មម​ដល់ពេល​ដោះលែង​ពួកគាត់​វិញ​ហើយ ហើយ​អ្នក​ដែល​ធ្លាប់​ខឹង​គាត់​ដោយសារតែ​ពួកគាត់​មិន​ព្រម​ចុះចូល​គណបក្ស​នយោបាយ​របស់​ខ្លួន​ហ្នឹង​ល្មម​ឈប់​ខឹង​គាត់​ទៅ។ ការ​ឃុំខ្លួន​ក៏​ល្មម​ដល់​ពេល​កំណត់​ហើយ ហើយ​កន្លងមក​រដ្ឋាភិបាល​ក៏បាន​ប្រកាស​ឱ្យ​ដោះលែង​អ្នក​ទោស​នយោបាយ​ដែរ ទោះ​បី​ថា​ចោទប្រកាន់​រឿង​កាប់​រុករាន​ព្រៃ ប៉ុន្តែ​បើ​យើង​មើល​ប្រវត្តិ​របស់​សកម្មជន​បក្ស​ប្រឆាំង​ទាំងនោះ គឺ​ពួកគាត់​អត់​មាន​ដី​កន្លែង​ចោទ​ប្រកាន់​នោះ​ទេ»

សាច់ញាតិ​ជន​ជាប់​ឃុំ​ទទូច​ឱ្យ​របប​ក្រុងភ្នំពេញ​ដោះលែង​។ សមត្ថកិច្ច​បាន​ចាប់​សកម្មជន​គណបក្ស​សង្គ្រោះ​ជាតិ​ស្រុក​វាលវែង ខេត្ត​ពោធិ៍សាត់​ចំនួន ៧​នាក់ ដាក់​ពន្ធនាគារ​ជា​បន្តបន្ទាប់ កាល​ពី​ខែ​ឧសភា​កន្លង​ទៅ​។ ក្នុង​នោះ​មាន​អនុប្រធាន​គណបក្ស​ស្រុក​វាលវែង គឺ​លោក ទួន សំអាត ជំទប់​ទី​២ ឃុំ​អូរសោម លោក ប្រាក់ រិន សកម្មជន​គណបក្សប្រឆាំង​ឃុំ​ប្រម៉ោយ លោក ចាន់ សុផល និង​អ្នក​ដទៃ​ទៀត​ជា​សមាជិក​ក្រុម​ប្រឹក្សាឃុំ និង​ជា​សកម្មជន​គណបក្ស​ស្រុក​វាលវែង ដោយ​ចោទប្រកាន់​ពី​បទ​ទន្ទ្រានព្រៃ​យក​ដី​ធ្វើជា​កម្មសិទ្ធិ​ខុសច្បាប់​ដូចគ្នា​។ ចំណែក​ឯ​សកម្មជន​គណបក្សប្រឆាំង​ស្រុក​វាលវែង​ជាច្រើន​ទៀត បាន​រត់​គេច​ខ្លួន​នៅ​ទី​សុវត្ថិភាព មិនទាន់​ទៅដល់​ផ្ទះ​វិញ​នៅឡើយ​ទេ ព្រោះ​ខ្លាច​អាជ្ញាធរ​ចាប់​ដាក់គុក​បន្ថែម​ទៀត។

លោកស្រី ទួន ស្រីរ័តុ្ន ព្រមាន​ថា ប្រសិនបើ​តុលាការ​មិន​ដោះលែង​អ្នក​ជាប់ឃុំ​ទាំងនោះ​ឱ្យ​មាន​សេរីភាព​វិញ​ទេ ពួកគាត់​នឹង​ប្រមូលផ្ដុំ​គ្នា​តវ៉ា​នៅមុខ​សាលាដំបូង​ខេត្ត​ពោធិ៍សាត់​ក្នុង​ពេល​ឆាប់ៗ នេះ៕

ព័ត៌មាន (0)
Share
គេហទំព័រ​ទាំងមូល