គណបក្ស​កាន់​អំណាច ​រំលឹក​ខួប​គម្រប់ ២១ឆ្នាំ នៃ​ការ​ដាក់​ចេញ​គោល​នយោបាយ​ឈ្នះៗ ដោយ​អះអាង​ថា ជា​ការ​បញ្ចប់​សង្គ្រាម​​នៅ​កម្ពុជា

ដោយ ទីន ហ្សាការីយ៉ា
2019.12.29
ទៀ បាញ់ 122919 គណបក្ស​ប្រជាជន​កម្ពុជា នៅ​ថ្ងៃ​ទី២៩ ខែ​ធ្នូ ឆ្នាំ២០១៩ រំលឹក​ខួប​គម្រប់ ២១ឆ្នាំ នៃ​ការ​ដាក់​ចេញ​គោល​នយោបាយ​ឈ្នះៗ ដោយ​អះអាង​ថា ជា​ការ​បញ្ចប់​សង្គ្រាម​ស៊ីវិល​នៅ​កម្ពុជា តែ​អ្នក​វិភាគ​ថា ជា​ពិធី​ដឹង​គុណ​ អ្នក​លើក​បន្តុប​លោក ហ៊ុន សែន ឲ្យ​ឡើង​កាន់​តំណែង​ដល់​សព្វ​ថ្ងៃ។
រូប៖ ហ្វេសប៊ុក​លោក ទៀ បាញ់

គណបក្ស​ប្រជាជន​កម្ពុជា រំលឹក​ខួប​គម្រប់ ២១ឆ្នាំ នៃ​ការ​ដាក់​ចេញ​គោល​នយោបាយ​ឈ្នះៗ ដោយ​អះអាង​ថា ជា​ការ​បញ្ចប់​សង្គ្រាម​ស៊ីវិល​នៅ​កម្ពុជា។ តែ​អ្នក​វិភាគ​ថា ក្រុម​លោក ហ៊ុន សេន និង​គណបក្ស​កាន់​អំណាច​រំលឹក​ពិធី​នេះ ដើម្បី​ពង្វក់​ពលរដ្ឋ និង​ជា​ការ​ដឹង​គុណ ចំពោះ​អ្នក​ដែល​បាន​លើក​បន្តុប​លោក ហ៊ុន សែន ឲ្យ​ឡើង​កាន់​តំណែង​ដល់​សព្វ​ថ្ងៃ​ប៉ុណ្ណោះ។

សមាជិក​គណៈកម្មាធិការ​អចិន្ត្រៃយ៍​​គណបក្ស​​ប្រជាជន​កម្ពុជា និង​ជា​រដ្ឋ​មន្ត្រី​ក្រសួង​ការពារ​ជាតិ លោក ទៀ បាញ់ ថ្លែង​ក្នុង​ពិធី​​អបអរ​សាទរ​ខួប​លើក​ទី២១ នៃ​ការ​បញ្ចប់​សង្គ្រាម​ស៊ីវិល​នៅ​កម្ពុជា និង​ការ​អនុវត្ត​​​គោល​នយោបាយ​ឈ្នះៗ នៅ​ព្រឹក​ថ្ងៃ​ទី​២៩ ធ្នូ នៅ​ស្តូប​អនុស្សាវរីយ៍​វិមាន​ឈ្នះៗ នៅ​ជាយ​រាជធានី​ភ្នំពេញ។ សេចក្ដី​ថ្លែង​ការណ៍​របស់​លោក​មិន​ខុស​ពី​ការ​លើក​ឡើង​របស់ លោក​នាយក​រដ្ឋមន្ត្រី ហ៊ុន សែន កន្លងទៅ​​ទេ គឺ​ លើក​សរសើរ​​គោល​នយោបាយ​ឈ្នះៗ ថា បាន​នាំ​មក​នូវ​សន្តិភាព ការ​អភិវឌ្ឍន៍​គ្រប់​វិស័យ​ ដូច​សព្វ​ថ្ងៃ​ជាដើម៖ «ការ​បង្រួប​បង្រួម​ជាតិ និង​ការ​​ដាក់​ចេញ​នូវ​នយោបាយ​ឈ្នះៗ ដែល​បាន​​បញ្ចប់​សង្គ្រាម​ស៊ីវិល​ទាំង​ស្រុង នាំ​មក​នូវ​សន្តិភាព និង​ឯកភាព​ពេញ​លេញ សម្រាប់​ប្រទេស​ជាតិ​ នៅ​ថ្ងៃ​​២៩ ធ្នូ ឆ្នាំ​១៩៩៨ ហើយ​ថ្ងៃ​នេះ ជា​ខួប​លើក​ទី​២១»

គណបក្ស​កាន់​អំណាច​បាន​ប្រកាស ​គោល​នយោបាយ​ឈ្នះៗ នៅ​ចុង​ឆ្នាំ​១៩៩៨ បន្ទាប់​ពី​លោក ហ៊ុន សែន អះអាង​ថា ក្រុម​មេដឹកនាំ​​កម្ពុជា​ប្រជាធិបតេយ្យ ឬ​ក្រុម​ខ្មែរ​ក្រហម បាន​សុំ​ចុះ​ចូល​ជាមួយ​រដ្ឋាភិបាល​ក្រុង​ភ្នំពេញ ដល់​​ក្នុង​ភូមិ​គ្រឹះ​របស់​លោក នៅ​ថ្ងៃ​ទី២៩ ខែ​ធ្នូ ឆ្នាំ១៩៩៨។

កាល​ពី​ចុង​ឆ្នាំ២០១៨ ក្នុង​ពេល​សម្ពោធ​វិមាន​ឈ្នះៗ ត្រូវ​ជា​ខួប​លើក​ទី២០ លោក ហ៊ុន សែន ​បាន​ទម្លាក់​កំហុស​ឲ្យ​ក្រុម​មេ​ដឹក​នាំ​សម័យ​សាធារណរដ្ឋ​ខ្មែរ និង​សហរដ្ឋ​អាមេរិក​ថា ធ្វើ​ឲ្យ​កម្ពុជា​ខ្ទេចខ្ទាំ ទើប​កើត​ចេញ​គោល​នយោបាយ​​ឈ្នះៗ នេះ។ ប៉ុន្តែ លោក ហ៊ុន សែន ​មិន​បាន​ ស្ដីបន្ទោស​ ប្រទេស​ចិន និង​​​វៀតណាម ដែល​ជា​អ្នក​បាន​ចូលរួម និង​ជ្រោមជ្រែង​​​ការ​​បង្ក​សង្គ្រាម ​នៅ​ពេល​នោះ​ទេ។

បើ​ទោះ​ជា​លោក ហ៊ុន សែន កំពុង​រង​ការ​រិះគន់​ជុំ​ទិស ថា អសមត្ថភាព​ក្នុង​ការ​ដឹកនាំ​តាម​បែប​លទ្ធិ​ប្រជាធិបតេយ្យ ក៏​ លោក ទៀ បាញ់ ប្រាប់​កង​កម្លាំង​ប្រដាប់​អាវុធ ​ឲ្យ​លើក​តម្កើង​ លោក ហ៊ុន សែន ជា​ មហា​វីរបុរស​សម័យ​ថ្មី ដោយសារ​ លោក ហ៊ុន សែន បាន​ដាក់​ចេញ​គោល​នយោបាយ​ឈ្នះៗ។ ប៉ុន្តែ​គោល​នយោបាយ​ឈ្នះ​ៗ​​របស់​បក្ស​កាន់​អំណាច ​​ត្រូវ​បាន​អ្នក​ឃ្លាំមើល​ថា មាន​តែ​ឈ្មោះ​ទេ គ្មាន​ខ្មែរ​រូប​ណា ឈ្នះ​ទេ គឺ មាន​តែ​បក្ខ​ពួក​លោក ហ៊ុន សែន ទទួល​បាន​លាភ​សក្ការ និង​អំណាច​ធំៗ ក្នុង​ជួរ​បក្ស​កាន់​អំណាច។

អ្នក​វិភាគ​នយោបាយ លោក គឹម សុខ ថ្លែង​ថា បក្ស​កាន់​អំណាច​ធ្វើ​ពិធី​រំលឹក​ខួប​នូវ​ ​អ្វី​ដែល​គេ​ហៅ​ថា វិមាន​ឈ្នះៗ នោះ គ្រាន់​តែ​ចង់​រំលឹក​ដល់​បុព្វហេតុ​នៃ​ការ​កាន់​អំណាច តាម​រយៈ​ការ​លើក​បន្តុប​ បក្ខ​ពួក​ លោក ហ៊ុន សែន ឲ្យ​បាន​ដឹកនាំ​ប្រទេស​ មក​ដល់​សព្វ​ថ្ងៃ​។ លោក គឹម សុខ អះអាង​ថា ក្រោម​ការ​ដឹកនាំ​របស់​បក្ស​កាន់​អំណាច និង​លោក ហ៊ុន សែន គ្មាន​​ពលរដ្ឋ​ខ្មែរ​ណា​ឈ្នះ​ឡើយ គឺ​មាន​តែ​បក្ខ​ពួក និង​ត្រកូល​អ្នក​មាន​អំណាច​មួយ​ចំនួន​ក្នុង​ជួរ​បក្ស​កាន់​អំណាច។

លោក គឹម សុខ បន្ត​ថា គោល​ដៅ​របស់​បក្ស​កាន់​អំណាច ដែល​ធ្វើ​ពិធី​រំលឹក​ខួប​នយោបាយ​ឈ្នះ​ៗ និង​ការ​បង្កើត​ស្តូប​រំលឹក​គុណ​នោះ គឺ​ចង់​បំភ័ន្ត​​យុវជន និង​ពលរដ្ឋ​ខ្មែរ ដើម្បី​ឲ្យ​ដឹង​គុណ​ដល់​អ្នក​ដែល​បាន​ជួយ​លើក​បន្តុប លោក ហ៊ុន សែន​ ឲ្យ​កាន់​តំណែង​កំពូល។ តែ​អ្នក​វិភាគ​រូប​នេះ ជឿជាក់​ថា គណបក្ស​កាន់​អំណាច មិន​អាច​ពង្វក់ ពលរដ្ឋ​​ ពិសេស​យុវជន បាន​ទេ ដោយសារ​ពួកគេ មាន​ចំណេះ​ដឹង​ និង​យល់​ពី​អ្វី​ដែល​គណបក្ស​កាន់​អំណាច​ កំពុង​ធ្វើ៖ «គាត់​គ្មាន​អ្វី​ធ្វើ​ ក្រៅ​តែ​ពី​ព្យាយាម​ធ្វើ​បែប​ហ្នឹង ដើម្បី​រំលឹក​គុណ ទៅ​ដល់​ពួក​អ្នក​ដែល​បន្តុប​គាត់ ឲ្យ​ឡើង​កាន់​អំណាច​​តាំង​ពី​ឆ្នាំ​១៩៧៩ មក​ដល់​ពេល​បច្ចុប្បន្ន​ហ្នឹង។ ចង់​ដឹង​ថា មាន​ឥទ្ធិពល​ប៉ុណ្ណា​ដល់​យុវជន បើក​សេរីភាព​​ឲ្យ​យុវជន និយាយ​រិះគន់​ដោយ​ចំហ​ទៅ​លើ​ការ​អួតអាង​អំពី​គោល​នយោបាយ​ឈ្នះ​ៗ របស់​គាត់​ទៅ​ ដឹង​ហើយ​។ ខ្ញុំ​គិត​ថា ឥទ្ធិពល​ដ៏​ធំ​បំផុត គឺ​ប្រតិកម្ម​ប្រឆាំង​ ពី​យុវជន មិន​មែន​ការ​អបអរ​សាទរ ពី​យុវជន​ទេ»

លោក គឹម សុខ បញ្ជាក់​ថា បក្ស​កាន់​អំណាច​ បាន​​ធ្វើ​ឲ្យ​កម្ពុជា​ ប្រែក្លាយ​ពី​ប្រទេស​មាន​ពហុបក្ស​ ទៅ​​ជា​ឯក​បក្ស និង​បាន​លាប​ពណ៌​​អ្នក​ជំទាស់ ថា ក្បត់​ជាតិ និង​បាន​រឹតត្បិត​មិន​ឲ្យ​មាន​សិទ្ធិ​សេរីភាព សូម្បី​សិទ្ធិ​រស់​នៅ​ក្នុង​ប្រទេស​របស់​ខ្លួន​ក៏​គ្មាន​ដែរ ព្រោះ​អ្នក​ជំទាស់​មួយ​ចំនួន​ បាន​បង្ខំ​ចិត្ត​រត់​ភៀស​ខ្លួន​ ចោល​ស្រុក​កំណើត និង​ក្រុម​គ្រួសារ​របស់​ខ្លួន។ ដូច្នេះ ការ​អួតអាង​របស់​គណបក្ស​ប្រជាជន​កម្ពុជា​ថា ខ្លួន​កំពុង​អនុវត្ត​គោល​នយោបាយ​ឱ្យ​ពលរដ្ឋ​ខ្មែរ​ឈ្នះៗ គ្រប់​គ្នា ឬ​គ្រប់​ភាគី​នោះ គឺ​ជា​ការ​និយាយ​បោកប្រាស់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។