មន្ត្រីអង្គការសង្គមស៊ីវិលមួយចំនួនរិះគន់អាជ្ញាធរក្រុងភ្នំពេញ ករណីហាមពលរដ្ឋធ្វើដំណើរឆ្លងកាត់នៅតំបន់កោះពេជ្រ ដើម្បីប្រារព្ធខួបលើកទី៦៨នៃការបង្កើតគណបក្សប្រជាជនកម្ពុជានៅថ្ងៃទី២៨មិថុនា ខាងមុខ ថាជាការអនុវត្តច្បាប់ស្តង់ដារ២។ ពួកគាត់លើកឡើងថា កន្លងមកមន្ត្រីអង្គការសង្គមស៊ីវិល និងពលរដ្ឋបានសុំច្បាប់ធ្វើពិធីសម្ដែងមតិនៅទីក្រុងភ្នំពេញ ត្រូវបានអាជ្ញាធរបដិសេធជាប្រចាំ។
អភិបាលរាជធានីភ្នំពេញ លោក ឃួង ស្រេង បានចេញសេចក្ដីប្រកាសកាលថ្ងៃទី២៤ មិថុនា ណែនាំឱ្យពលរដ្ឋផ្អាកធ្វើដំណើរទៅកោះពេជ្រ ចាប់ពីម៉ោង៦ព្រឹក រហូតដល់ចប់កម្មវិធីនៅថ្ងៃទី២៨ មិថុនា ដើម្បីរៀបចំរំលឹកខួបលើកទី៦៨ នៃថ្ងៃបង្កើតគណបក្សប្រជាជនកម្ពុជា។ សាលាក្រុងបន្តថា ពលរដ្ឋត្រូវផ្អាកធ្វើដំណើរចាប់ពីម៉ោង ៦ព្រឹក រហូតដល់ចប់កម្មវិធី ហើយសូមបងប្អូនទាំងអស់មេត្តាយោគយល់ អធ្យាស្រ័យ និងចូលរួមសហការ។
មន្ត្រីអង្គការសង្គមស៊ីវិលសម្ដែងការសោកស្ដាយយ៉ាងខ្លាំងទៅនឹងសេចក្ដីប្រកាសនេះ ព្រោះបានប៉ះពាល់ដល់សិទ្ធិរស់នៅនិងការរបររកស៊ីរបស់ពលរដ្ឋ។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការ លីកាដូ (LICADHO) លោក អំ សំអាត មានប្រសាសន៍នៅថ្ងៃទី២៦ មិថុនា ករណីនេះជាការអនុវត្តច្បាប់ស្តង់ដារ ដែលខុសមន្ត្រីអង្គការសង្គមស៊ីវិល សហជីពនិងពលរដ្ឋ ដែលបានសុំច្បាស់រៀបចំពិធីសម្ដែង និងរៀបចំពិធីរំលឹកខួចផ្សេងត្រូវបានអាជ្ញាធរបដិសេធនោះ។ លោកបន្តថា កន្លងមកគណបក្សប្រជាជនកម្ពុជាមានសិទ្ធិជ្រើសរើសរៀបចំប្រារព្ធពិធីបានគ្រប់ទីកន្លែងទាំងអស់ មិនថានៅកន្លែងទីក្រុងឬក៏នៅកោះពេជ្រនោះទេ បើទោះបីជាមានការរិះគន់ពីពលរដ្ឋ និងអង្គការសង្គមស៊ីវិលក៏ដោយ៖ «ហើយមិនមែនថា អង្គការសង្គមស៊ីវិលធ្វើអី ដើម្បីប្រឆាំងរដ្ឋាភិបាល និងដើម្បីបង្កឱ្យមានបញ្ហា គឺវាអត់មានទេ គឺយើងធ្វើអ្វីក៏អនុវត្តតាមច្បាប់ ព្រោះយើងនៅក្នុងប្រទេស ដែលមានច្បាប់។ កម្ពុជាក៏អនុវត្តច្បាប់ដូចគ្នា ហើយធ្វើម៉េចឱ្យវាមានតម្លាភាព និងយុត្តិធម៌។ អ៊ីចឹង យើងកុំលាបពណ៌ដាក់គ្នាមិនឱ្យក្រុមខាងណោះធ្វើ ហើយយកលេសថាអីចេះអ៊ីចុះ ដោយមួយក្រុមទៀតធ្វើបាន គឺមិនស្មើភាពគ្នាទេ »។
ចំណែកប្រធានសមាគមឯករាជ្យនៃសេដ្ឋកិច្ចក្រៅប្រព័ន្ធ ឬហៅថា (IDEA) លោក វ៉ន់ ពៅ សង្កេតឃើញថា កន្លងមកពួកគាត់ក៏ធ្លាប់បានសុំច្បាប់ធ្វើពិធីសម្ដែងមតិដែរ តែត្រូវបានអាជ្ញាធរក្រុងភ្នំពេញបដិសេធ ដោយយកលេសថា ទីកន្លែងមិនអំណោយផល ព្រោះនាំឱ្យស្ទះចរាចរ និងប៉ះពាល់សន្តិសុខសង្គមជាដើម។ លោកបន្តថា ការធ្វើបែបនេះ បង្ហាញឱ្យឃើញថា អាជ្ញាធរបានរឹតត្បិតសិទ្ធិសេរីភាព ចំពោះតែមន្ត្រីអង្គការសង្គមស៊ីវិល សហជីព និងប្រជាពលរដ្ឋ ចំណែកគណបក្សកាន់អំណាចអាចធ្វើបានដោយសារសេរី ដែលខុសពីការកំណត់ក្នុងរដ្ឋធម្មនុញ្ញ ដែលតម្រូវឱ្យពលរដ្ឋគ្រប់រូប មានសិទ្ធិសេរីភាពក្នុងការជួបជុំនិងការបញ្ចេញមតិដោយស្មើភាពគ្នា៖ « អង្គការសង្គមស៊ីវិលមិនដែលធ្វើអីរញ៉េរញ៉ៃទេ ច្រើនតែអាជ្ញាធរតើ តែងតែដាក់ប៉ូលិសទាហានពេញទឹកពេញដី។ កន្លងមកអ្វីដែលជាការគាត់សំគាល់ គេឱ្យយើងធ្វើនៅកន្លែងឯកជន ឬទីស្នាក់ការរបស់ខ្លួន។ ប៉ុន្តែកន្លែងឯកជនហ្នឹងកម្រអង្គការសង្គមជួលបានណាស់ លើកលែងតែអង្គការ ILO ទេ។ ចំពោះអង្គការសង្គមស៊ីវិល ដែលធ្វើរឿងក្ដៅៗ ធ្វើការតស៊ូមតិ កម្រជួលបាន ដោយសារអាជ្ញាធរទៅគំរាមម្ចាស់ទីតាំងនោះតែម្ដង ទោះបីទៅជួយកន្លែងឯកជន ក៏គេមិនងាយជួលឱ្យដែរ សូម្បីខាងខ្ញុំទៅជួលកន្លែងមជ្ឈមណ្ឌលផ្សេងៗ គេមិនជួលឱ្យទេ គ្រាន់តែឮថា យើងជាសហជីពសមាគមដែលឯករាជនោះ » ។
អាជ្ញាធរក្រុងភ្នំពេញ លោក ឃួង ស្រេង រំពឹងថា ពិធីនេះនិងមានសមាជិក សមាជិកាគណបក្សកាន់អំណាចចូលរួមប្រមាណ ៣ម៉ឺននាក់ នៅទីធ្លាមុខសាលមហោស្រពកោះពេជ្រ នៅព្រឹកថ្ងៃទី២៨ ខែមិថុនាខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។