អ្នក​ជំនាញ​បង្ហាញ​ក្ដី​មន្ទិល​ករណី​ចិន​ផ្ដល់​ជំនួយ​វេជ្ជសាស្ត្រ និង​ម៉ាស់​ដល់​ប្រទេស​កំពុង​អភិវឌ្ឍន៍​ការពារ​ជំងឺ​កូវីដ​១៩

ដោយ មាន ឫទ្ធិ
2020-04-01
អ៊ីម៉ែល
មតិ
Share
បោះពុម្ព
លោក ហ៊ុន សែន មេដឹកនាំ​របប​ក្រុង​ភ្នំពេញ និង​លោក ស៊ី ជិនពីង (Xi Jinping) ប្រធានាធិបតី​ចិន​ក្នុង​ជំនួប​នៅ​ទីក្រុង​ប៉េកាំង​កាល​ពី​ថ្ងៃ​ទី២៩ ខែ​មេសា ឆ្នាំ២០១៩។
លោក ហ៊ុន សែន មេដឹកនាំ​របប​ក្រុង​ភ្នំពេញ និង​លោក ស៊ី ជិនពីង (Xi Jinping) ប្រធានាធិបតី​ចិន​ក្នុង​ជំនួប​នៅ​ទីក្រុង​ប៉េកាំង​កាល​ពី​ថ្ងៃ​ទី២៩ ខែ​មេសា ឆ្នាំ២០១៩។
រូប៖ ហ្វេសប៊ុក Samdech Hun Sen, Cambodian Prime Minister

អ្នក​ជំនាញ​បង្ហាញ​ក្តី​មន្ទិល​ករណី​មហា​យក្ស​ចិន យកចិត្តទុកដាក់ និង​សកម្ម​ក្នុង​ការ​ផ្តល់​ជំនួយ​វេជ្ជសាស្ត្រ និង​ម៉ាស់​យ៉ាង​ច្រើន​សន្ធឹកសន្ធាប់ ដល់​ប្រទេស​កំពុង​អភិវឌ្ឍន៍ ជាពិសេស​ដូចជា​កម្ពុជា ដើម្បី​ចូលរួម​បង្ការ និង​ទប់ស្កាត់​ការ​រីក​រាលដាល នៃ​ជំងឺ​កូវីដ១៩។ ស្រប​ពេល​ដែល​ប្រទេស​មហាអំណាច​មួយ​នេះ ជា​ប្រភព​ដើម​នៃ​ការ​ចម្លង​មេរោគ​ដ៏​កាច​សាហាវ​នេះ អ្នក​ជំនាញ​ខ្លះ​លើកឡើង​ថា ចិន​អាច​បង្កប់​ហេតុផល​នយោបាយ ក្នុង​ជំនួយ​មនុស្សធម៌​នេះ ដើម្បី​លាង​ជម្រះ​រូបភាព​មិនល្អ​របស់​ខ្លួន ពាក់ព័ន្ធ​នឹង​ជំងឺ​កូវីដ​១៩ ​នេះ នៅ​លើ​ឆាក​អន្តរជាតិ។

ចាប់​តាំង​ពី​ជំងឺ​កូវីដ-១៩ ត្រូវ​បាន​អង្គការ​សុខភាព​ពិភពលោក​ចាត់ទុកថា​ជា​ជំងឺ​រាតត្បាត សាកល​មក ប្រទេស​ចិន​បាន​បង្កើន​យុទ្ធនាការ ផ្តល់​ជំនួយ​វេជ្ជសាស្ត្រ និង​ផ្គត់ផ្គង់​ម៉ាស់​យ៉ាង​ច្រើន​សន្ធឹកសន្ធាប់​ដល់​ប្រទេស​ក្រីក្រ គួរ​ឱ្យ​កត់សម្គាល់​។ ក្នុង​នោះ ប្រទេស​ក្រីក្រ ដូចជា​កម្ពុជា ដែល​ជា​សម្ព័ន្ធមិត្ត​ចាក់​ទឹក​មិន​លិច​របស់​ខ្លួន​នោះ ក៏​មិន​ត្រូវ​បាន ប្រទេស​ចិន​មើល​រំលង​ឡើយ​។ ភាព​សកម្ម​ក្នុង​ការ​ផ្ដល់​ជំនួយ​មនុស្ស​ធម៌​បែបនេះ ដែល​រួមមាន​ដូចជា ការ​បញ្ជូន​ក្រុម​អ្នក​ជំនាញ​វេជ្ជសាស្ត្រ​របស់​ខ្លួន​មក​ជួយ ការ​ផ្ដល់​សម្ភារៈ​បរិក្ខារ​ពេទ្យ ឧបករណ៍​ធ្វើតេស្ត​រក​មេរោគ​នេះ និង​ជាពិសេស​ការ​ផ្គត់ផ្គង់​ម៉ាស់​ជាដើម កើត​មាន​ឡើង ស្រប​ពេល​ដែល​ប្រទេស​ចិន ខ្លួនឯង​នៅ​មិនទាន់​អាច​ទប់ស្កាត់​ជំងឺ​កូវីដ​១៩​នេះ ឱ្យ​បាន​ជោគជ័យ​ទាំងស្រុង​នៅឡើយ។

កាលពី​ថ្ងៃទី​២៤ មីនា ស្ថានទូត​ចិន​នៅ​កម្ពុជា បាន​ផ្តល់​សំលៀកបំពាក់​ការពារ​ជំងឺ កវីដ​១៩ ចំនួន​ ២០០​កំផ្លេ និង​ស្រោមដៃ​ពេទ្យ​ចំនួន​ ៥០០​គូរ ដល់​មន្ត្រី​នគរបាល នៃ​អគ្គស្នងការដ្ឋាន​នគរ​បាល​ជាតិ​កម្ពុជា​។ ទន្ទឹមគ្នា​នោះ ចិន​ក៏បាន​បញ្ជូន​ក្រុម​គ្រូពេទ្យ​ជំនាញ​នៃ​តំបន់​ស្វយ័ត​ក្វាងស៊ី (Guangxi) ចំនួន ៧​រូប​មក​កម្ពុជា ក្រោម​អ្វីមួយ​ដែល​ប្រទេស​នេះ​អះអាង​ថា ដើម្បី​ចែក​រំលែក​បទ​ពិសោធន៍​ប្រយុទ្ធ​ប្រឆាំង​នឹង​ជំងឺ​កូវីដ​១៩​។ ពួកគេ​បាន​នាំមក​ជាមួយ​នូវ​សម្ភារៈ​បរិក្ខារ​ពេទ្យ​មួយ​ចំនួន ដូចជា ស្រោមដៃ​ចំនួន ៧​ពាន់ ម៉ាស់​វះកាត់ ជិត​ ៦​ម៉ឺន​ម៉ាស់ ម៉ាស​វេជ្ជសាស្ត្រ អិន​៩៥ (N95) ចំនួន ៥​ពាន់ សំលៀកបំពាក់​សុវត្ថិភាព​របស់​មន្ត្រី​សុខាភិបាល របាំងមុខ​វេជ្ជសាស្ត្រ ជាច្រើន​ទៀត មក​ប្រគល់​ឱ្យ​កម្ពុជា​។ មិនមែន​មានតែ​កម្ពុ​ជាមួយ​ទេ​ដែល​ទទួល​បាន​ជំនួយ វេជ្ជសាស្ត្រ​របស់​ចិន​នា​ពេល​ប្រទេស​ដទៃ​ទៀត​ក្នុង​តំបន់ ដូចជា​ថៃ ឥណ្ឌូណេស៊ី ហ្វីលីពីន និង​បណ្តា​ប្រទេស​កំពុង​អភិវឌ្ឍន៍​នានា​ក្នុង​ពិភពលោក ក៏​ទទួល​បាន​ជំនួយ​វេជ្ជសាស្ត្រ របស់​ចិន​នេះ​ដែរ។

អ្នក​ជំនាញ​កិច្ចការ​អន្តរជាតិ បណ្ឌិត អៀ សុផល យល់ថា ចិន​កំពុង​ប្រើប្រាស់​អំណាច​ទន់ភ្លន់ ឬ Soft Power តាមរយៈ​សកម្មភាព​ផ្តល់​ជំនួយ​ទាំងនេះ ក្នុងពេលដែល​សហរដ្ឋ​អាមេរិក កំពុង​ផ្ដោត​អាទិភាព​លើ​នយោបាយ​ក្នុង​ប្រទេស​របស់​ខ្លួន​។ លោក​ថា ក្រុង​ប៉េកាំង​មាន​មហិច្ឆតា​ចង់​បញ្ជ្រាប​ឥទ្ធិពល​របស់​ខ្លួន​បន្ថែម​ទៀត ទៅ​ក្នុង​ប្រទេស​កំពុង​អភិវឌ្ឍន៍ និង​សូម្បីតែ​ប្រទេស​អភិវឌ្ឍន៍​ដែរ​នោះ​។ លោក​ថា ចិន​ចង់​ឃើញ​ប្រទេស​ទាំងនោះ បង្ហាញ​ការ​ពេញចិត្ត​ពេញ​ថ្លើម ទៅ​នឹង​សកម្មភាព​មនុស្ស​ធម៌​របស់​ខ្លួន​។ សាស្ត្រាចារ្យ​ការទូត និង​កិច្ចការ​ពិភពលោក​រូប​នេះ កត់សម្គាល់​ថា ចេតនា​របស់​ក្រុង​ប៉េកាំង​បែបនេះ គួរតែ​មាន​ការ​យកចិត្ត​ទុកដាក់ និង​គិតគូរ​ពិចារណា​ឱ្យ​បាន​ច្បាស់លាស់​។ លោក​ផ្ដល់​អំណះអំណាង​ថា ចូរ​កុំភ្លេច​ថា មេរោគ​នេះ​មាន​ដើមកំណើត​ចេញ​មក​ពី​ប្រទេស​ចិន​ខ្លួនឯង នោះ​គឺ​ដោយសារតែ​ប្រព័ន្ធ​គ្រប់គ្រង​បែប​ផ្ដាច់ការ និង​ខ្វះ​តម្លាភាព​របស់​ក្រុង​ប៉េកាំង​នេះ​ហើយ ដែល​បាន​បណ្ដាល​ឱ្យ​មេរោគ​នោះ​ផ្ទុះ​រីក​រាលដាល​ឡើង​។ បណ្ឌិត អៀ សុផល ថា ប្រសិនបើ​វេជ្ជបណ្ឌិត​នៅ​ប្រទេស​ចិន ត្រូវ​បាន​ប្រទេស​នេះ​អនុញ្ញាត​ឱ្យ​រាយការណ៍ អំពី​រឿងរ៉ាវ​អស់​នេះ​តាំងពី​ដំបូង​ឡើង​នោះ នោះ​មេរោគ​នេះ ទំនងជា​អាច​ត្រូវ​បាន​គេ​ទប់ស្កាត់​បាន តាំង​ពី​ពេលនោះ​មក​ម្ល៉េះ​។ ជា​លទ្ធផល​ទីផ្សារ​ភាគហ៊ុន បាន​ខាតបង់​ប្រាក់ ១០​ទ្រី​លាន​ដុល្លារ ហើយ​សេដ្ឋកិច្ច​ពិភពលោក ទាំងមូល​កំពុង​ប្រឈម​នឹង​វិបត្តិ​ធ្ងន់ធ្ងរ​។ លោក​ពន្យល់​ថា នេះ​ហើយ​គឺជា​តម្លៃ​ខាតបង់​នៃ​ការគ្រប់គ្រង​ប្រទេស​តាម​បែប​ផ្ដាច់ការ ហើយ​ប្រទេស​ដូចជា​កម្ពុជា​មិន​គួរ​ភ្លេច​ឡើយ​។ បណ្ឌិត អៀ សុផល ថា របប​ក្រុងភ្នំពេញ​នឹង​មិន​រៀន​សូត្រ​មេរៀន​នេះ​ឡើយ ហើយ​ថា ផ្ទុយទៅវិញ អ្វី​ដែល​របប​ក្រុងភ្នំពេញ​រៀន​សូត្រ​នោះ គឺ​របៀប​បង្កើន​ការគ្រប់គ្រង​តាម​បែប​ផ្តាច់ការ កាន់តែ​ខ្លាំង​ឡើងៗ​នៅ​ក្នុង​ប្រ​ទស តាមរយៈ​ការ​ឈាន​ទៅ​ប្រើ​ច្បាប់​ដាក់​ប្រទេស​ក្នុង​ស្ថានភាព​មាន​អាសន្ន ដែល​នឹង​អនុញ្ញាត​ឱ្យ​របប​នេះ បំបិទ​ចោល សំឡេង​រិះគន់​ទាំងស្រុង​តែម្ដង។

សម្រាប់​អ្នក​ជំនាញ​វិទ្យាសាស្ត្រ​នយោបាយ លោក ឯម សុវណ្ណារ៉ា វិញ លោក​កត់សម្គាល់​ថា ក្នុង​ស្ថានភាព​បច្ចុប្បន្ន​នេះ ចិន​បាន​ផ្តល់​អាទិភាព ដោយ​ផ្តល់​ជំនួយ​វេជ្ជសាស្ត្រ​នេះ ដល់​ប្រទេស​ទាំងឡាយ​ណា​ដែល​មាន​ប្រវត្តិ​ទំនាក់ទំនង​ល្អ​នឹង​ខ្លួន មុន​នឹង ឈាន​ទៅ​ផ្តល់​ជំនួយ​បែបនេះ ដល់​បណ្ដា​រដ្ឋ​ផ្សេងៗ​ដែល​មាន​ទំនាក់ទំនង​ធម្មតា៖ «ចិន​ធ្វើ​បែប​នេះ គឺ​ទីមួយ​អាច​បង្ហាញ​ឱ្យ​ឃើញ​ពី​ទឹកចិត្ត សប្បុរសធម៌​។ ទី​ពីរ​អាច​បង្ហាញ​ឱ្យ​ឃើញ​ពី​សកម្មភាព​របស់​ខ្លួន​ដើម្បី​ពង្រីក​ឥទ្ធិពល នៅ​លើ​ឆាក​អន្តរជាតិ​ក្នុងពេលដែល​ពិភពលោក​ជួប​ហានិភ័យ​ទាំងអស់​គ្នា»

លោក ឯម សុវណ្ណារ៉ា នៅ​មិនទាន់​ហ៊ាន​វាយ​តម្លៃ​ថា ជំនួយ​មនុស្សធម៌​របស់​ចិន​នេះ មាន​បង្កប់​នូវ​ចេតនា​នយោបាយ​អាក្រក់ ឬ​ល្អ​យ៉ាងណា​នោះ​ទេ ព្រោះ​លោក​យល់ថា ពិភពលោក​ទាំងមូល កំពុង​ស្ថិត​ក្នុង​ដំណាក់កាល​ហានិភ័យ​នៅឡើយ។

យ៉ាងណាក៏ដោយ សម្រាប់​ស្ថាប័ន​ស្រាវជ្រាវ​អំពី​ទំនាក់ទំនង​ការបរទេស Council on Foreign Relations ដែល​មាន​មូលដ្ឋាន​នៅ​បុរី​ញ៉ូវយ៉ក សហរដ្ឋអាមេរិក មើល​ឃើញ​ពី​ហេតុផល​នៅ​ពីក្រោយ​ជំនួយ​សប្បុរសធម៌​របស់​ចិន​នា​ពេល​នេះ ថា​ក្រុង​ប៉េកាំង​កំពុង​ព្យាយាម​លាង​ជម្រះ​រូបភាព​មិនល្អ​របស់​ខ្លួន ក្រោយពី​មានការ​រិះគន់​ថា ចិន​បាន​ព្យាយាម​លាក់បាំង​រឿង​វិបត្តិ​ជំងឺ​នេះ​ក្នុង​ដំណាក់កាល​ដំបូង នៅ​គ្រា​ដែល​មេរោគ​នេះ ត្រូវ​គេ​រក​ឃើញ​នៅ​ក្រុង​វូហាន (Wohan) កាលពី​ខែ​វិច្ឆិកា​។ ហើយ​ចិន​ត្រូវ​បាន​ពិភពលោក​ស្តី​បន្ទោស ដោយសារតែ​មិនបាន​ផ្ដល់​សញ្ញា​ព្រមាន​ដល់​ពិភពលោក​ឱ្យ​បាន​ដឹង​ទុកជាមុន ទាន់​ពេល​វេលា​។ របាយការណ៍​របស់​ស្ថាប័ន​ស្រាវជ្រាវ​អំពី​ទំនាក់ទំនង​ការបរទេស Council on Foreign Relations សរសេរ​ថា ក្នុង​ចំណោម​កំហុស​ធំៗ​របស់​ចិន​នៅ​ពេល​មានការ​ផ្ទុះឡើង នៃ​ជំងឺ​នេះ នៅ​ក្រុង​វូហាន គឺ​ចិន​ខកខាន​មិនបាន​ផ្តល់​ដំណឹង​នេះ ទៅកាន់​ពិភពលោក​ឱ្យ​ដឹង​ជាមុន​ឡើយ​។ អាជ្ញាធរ​មូលដ្ឋាន​របស់​ចិន​ទៀតសោត បាន​លាក់បាំង​ព័ត៌មាន​អំពី​មេរោគ​នេះ មិន​ឱ្យ​សាធារណជន និង​រដ្ឋាភិបាល​មជ្ឈិម​របស់​ខ្លួន​បាន​ដឹង ហើយ​បាន​បំបិទ​មាត់​ក្រុម​វេជ្ជបណ្ឌិត ដែល​ហ៊ាន​និយាយ​ការពិត អំពី​រឿង​នេះ។

អ្នកជំនាញ​ជនជាតិ​ហ្វីលីពីន អំពី​កិច្ចការ​ប្រទេស​ចិន លោក រ៉ូម៉ែល បានឡៅ (​ឬ​ommel Banlaoi) មើលឃើញ​ថា តាមរយៈ​ការ​ផ្តល់​ជំនួយ​ម៉ាស និង​វេជ្ជសាស្ត្រ​ក្នុងអំឡុងពេល​មានការ​ផ្ទុះ​ជំងឺ​នេះ ក្រុង​ប៉េកាំង មាន​បំណង​ចង់​កសាង​មុខមាត់ និង​រូបភាព​របស់​ខ្លួន ឱ្យ​ពិភពលោក​មើល​ឃើញ​ថា ខ្លួន​ជា​មហាអំណាច​មួយ ប្រកប​ដោយ​ការទទួលខុសត្រូវ និង​ចេះ​អាណិតអាសូរ​ប្រទេស​ដទៃ។ លោក​ប្រាប់​សារព័ត៌មាន BernaNews របស់​អាស៊ីសេរី​ថា ចិន​ចង់​ប្រាប់​ទៅកាន់​ពិភពលោក​ថា ខ្លួន​អាច​ផ្ដល់​មេរៀន​ចាំបាច់​នានា តាមរយៈ​បទពិសោធន៍​របស់​ខ្លួន ក្នុង​ការ​ប្រយុទ្ធ​ប្រឆាំង​នឹង​មេរោគ​នេះ។

ក្រៅពី​ការ​ព្យាយាម​កសាង​មុខមាត់​នៅ​លើ​ឆាក​អន្តរជាតិ អ្នក​ជំនាញ​វិទ្យាសាស្ត្រ​នយោបាយ និង​ជា​បេក្ខជន​អនុបណ្ឌិត​នៅ​សាកលវិទ្យាល័យ អ៊ុកស្វ៊ត (Oxford University) នៃ​ចក្រភព​អង់គ្លេស ត្រូវ​សារព័ត៌មាន The Diplomat ស្រង់​ប្រសាសន៍​ថា តាមរយៈ​ជំនួយ​សម្ភារៈ​វេជ្ជសាស្ត្រ របស់​ចិន​ដ៏​ច្រើន​នេះ​ទៅដល់​បណ្ដា​ប្រទេស​នានា ក្នុង​ពេល​កំពុង​មាន​វិបត្តិ​ជំងឺ​កូវីដ​១៩​នេះ ចិន​ចង់​ទទួល​បាន​លទ្ធភាព​ចូល​ទៅ​ពិនិត្យមើល ហេដ្ឋារចនាសម្ព័ន្ធ​សំខាន់ៗ​ក្នុង​បណ្ដា​រដ្ឋ​នានា ដែល​បាន​ទទួលយក​ជំនួយ​ពី​ចិន​នេះ។

យ៉ាងណាក៏ដោយ ការ​ផ្តល់​ជំនួយ និង​សម្ភារៈ​វេជ្ជសាស្ត្រ​របស់​ចិន​ក្នុង​ពេល​ពិភពលោក កំពុង​ជួប​វិបត្តិ​នេះ ក៏​ត្រូវ​ប្រទេស​មួយ​ចំនួន​រិះគន់​ថា សម្ភារៈ​វេជ្ជសាស្ត្រ​របស់​ចិន​មួយ​ចំនួន ខូច​គុណភាព ប្រើការ​មិនកើត​។ តួយ៉ាង ដូចជា​នៅ​សាធារណរដ្ឋ​ឆែក កាល​ពី​ពេល​ថ្មីៗ​នេះ បាន​ទទួល​ឧបករណ៍​ធ្វើតេស្ត​រក​ជំងឺ​កូវីដ​១៩ ពី​ចិន ហើយ​ឧបករណ៍​ទាំងនោះ បង្ហាញ​លទ្ធផល មិន​ត្រឹមត្រូវ​។ តំណាងរាស្ត្រ និង​ជា​សមាជិក​ជាន់ខ្ពស់​នៃ​គណៈកម្មាធិការ​កិច្ចការ​បរទេស នៃ​រដ្ឋសភា​អាមេរិក លោក ម៉ៃឃ័ល ម៉ាកខូល (Michael McCaul) ថ្មីៗ​នេះ បាន​ស្តី​បន្ទោស​ចិន ដោយសារ​តែ​មាន​សេចក្តី​រាយការណ៍​នានា​ថា ចិន​បាន​លក់​សម្ភារៈ​វេជ្ជសាស្ត្រ​ខូច​គុណភាព ដល់​ប្រទេស​ដែល​កំពុង​រង​ការវាយប្រហារ​ខ្លាំង​ដោយ​ជំងឺ​កូវីដ​១៩ ក្នុង​នោះ​មាន​ដូចជា សាធារណរដ្ឋ​ឆែក និង​ប្រទេស​អេស្ប៉ាញ​ជាដើម​។ លោក​ថា ខណៈ​គណបក្ស​កុម្មុយនិស្ត​ចិន កំពុង​ប៉ុនប៉ង បង្វែរ​ពី​រឿង​ស្តី​បន្ទោស ទៅ​ជា​ថា​ខ្លួន​អ្នកការពារ​សុខភាព​ពិភពលោក​នោះ ឥឡូវ​នេះ​ការពិត​នៅ​ពីក្រោយ​យុទ្ធនា​ការឃោសនា​បែបនេះ បាន​ស្តែង​ចេញ​ឱ្យ​គេឯង​បាន​ឃើញ​ជាក់ច្បាស់​ហើយ។

អាស៊ីសេរី បាន​ព្យាយាម​ទាក់ទង​អ្នកស្រី ឱ វណ្ណឌីន អ្នកនាំពាក្យ​ក្រសួងសុខាភិបាល កាលពី​ថ្ងៃ​ទី​៣១ មីនា ដើម្បី​ចង់​ដឹង​ថា ជំនួយ​វេជ្ជសាស្ត្រ​របស់​ចិន​ដល់​កម្ពុជា​ទាំងនេះ​មាន​ខូចគុណភាព​ដែរ​ឬទេ តែ​អ្នកស្រី​ថា​ជាប់​រវល់​ប្រជុំ​។ រីឯ​លោក លី សុវណ្ណ អ្នកនាំពាក្យ​មួយ​រូប​ទៀត​នៃ​ក្រសួងសុខាភិបាល មិន​ទទួល​ទូរស័ព្ទ។រដ្ឋាភិបាល​ក្រុងភ្នំពេញ តែងតែ​ទាត់ចោល​រាល់​កង្វល់ និង​អនុសាសន៍​នានា​របស់​អ្នក​ជំនាញ ជុំវិញ​បញ្ហា និង​វិធានការណ៍​ទប់ស្កាត់​ជំងឺ​កូវីដ​១៩​នេះ ជាពិសេស​ពាក់ព័ន្ធ​នឹង​ប្រទេស​ចិន ដែល​ជា​ចំណុច​ស្នូល​ដំបូង​នៃ​ការ​ផ្ទុះ​រាលដាល​ឡើង​នៃ​ជំងឺ​ដ៏​កាច​សាហាវ​មួយ​នេះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល