អ្នកប្រើប្រាស់បណ្ដាញសង្គមចង់ឲ្យរដ្ឋាភិបាលប្រើយន្តការតុលាការអន្តរជាតិ ដើម្បីដោះស្រាយបញ្ហាកោះគជ់ ខណៈរដ្ឋាភិបាលដែលដឹកនាំដោយគ្រួសារត្រកូល « ហ៊ុន» ពីរនាក់ឪពុក និងកូនថា កុំឲ្យពលរដ្ឋខ្វល់រឿងកោះគជ់ ហើយបានចោទប្រកាន់លើអ្នកដែលប្រតិកម្មរឿងកោះគជ់ថា ជាក្រុមប្រឆាំង ជ្រុលនិយម ដែលមានបំណងយករឿងនេះ ដើម្បីកេងចំណេញនយោបាយ តាមរយៈការញុះញង់ប្រជាពលរដ្ឋឱ្យបះបោរប្រឆាំងនឹងរដ្ឋាភិបាល។
ពលរដ្ឋខ្មែរក្នុងស្រុក និងនៅទូទាំងពិភពលោក កំពុងព្រួយបារម្ភរឿងបាត់បង់ទឹកដីទៅប្រទេសជិតខាង រួមមាន ថៃ និងវៀតណាមជាដើម ជាពិសេស បញ្ហាកើតជម្លោះថ្មីចុងក្រោយនេះទៀត គឺរឿងការគ្រប់គ្រងតំបន់កោះគជ់ លើឈូងសមុទ្រខ្មែរ-ថៃ។
ការព្រួយបារម្ភនេះ ដោយសារពួកគាត់មើលឃើញរដ្ឋាភិបាលកម្ពុជា នៅមិនទាន់បង្ហាញគោលជំហរច្បាស់លាស់នៅឡើយ ជុំវិញដំណោះស្រាយលើភាពចម្រូងចម្រាសនៃការគ្រប់គ្រងកោះគជ់។
Opens in new windowចំណែករដ្ឋាភិបាលថៃ គេបានដាក់គោលដៅច្បាស់លាស់ហើយថា ទោះបីករណីនេះឈានដល់ការប្រកាសសង្គ្រាមក៏ដោយ គឺដាច់ខាត ត្រូវតែដណ្ដើមកោះគជ់មកគ្រប់គ្រង់ផ្ដាច់មុខឲ្យទាល់តែបាន។
អ្នកប្រើប្រាស់បណ្ដាញសង្គមយូធូបម្នាក់ ( @SrHe-l6b) បានបញ្ចេញមតិដោយមានក្ដីកង្វល់ជុំវិញរឿងនេះថា « ក្នុងនាមខ្ញុំជាកូនខ្មែរមានការព្រួយបារម្ភអំពីទឹកដីខ្មែរយើងណាស់ ដូច្នេះហើយ ក្នុងនាមខ្ញុំជាកូនខ្មែរស្នើសុំរដ្ឋាភិបាលខ្មែរដោះស្រាយវិវាទព្រំដែនទឹកខ្មែរថៃឲ្យបានច្បាស់លាស់ » ។
ចំណែកអ្នកប្រើបណ្ដាញសង្គមហ្វេសប៊ុក ដែលដាក់ឈ្មោះ ថា រ៉ា ចិត្ត ( Ra Chet) បញ្ចេញមតិដោយបង្ហាញក្ដីកង្វល់ជុំវិញរឿងនេះដែរថា៖ «មនុស្សស្លាប់ អាចកើតឡើងវិញបាន តែទឹកដី បើបាត់បង់ហើយមិនអាចកើតឡើងវិញបានទេ ត្រូវចូលរួមថែរក្សា ការពារ ទាំងអស់គ្នា សម្រាប់កូនចៅជំនាន់ក្រោយ»។
រីឯអ្នកប្រើបណ្ដាញសង្គមយូធូបម្នាក់ទៀត ដាក់ឈ្មោះថា ជឿន សុខលុច បានបញ្ចេញមតិរបៀបលេងសើចបន្តិច។
គាត់សរសេរថា « បើសួរថា កោះគជ់ និងកោះមាន់ មួយណាឆ្ងាញ់ជាង ? ខ្ញុំថា កោះមាន់ឆ្ងាញ់ជាង តែបើសួរថា កោះគជ់ជារបស់ខ្មែរ ឬរបស់ថៃ ខ្ញុំសូមមិនឆ្លើយ ទុកឲ្យអ្នកជាតិនិយមខ្លះឆ្លើយចុះ។
គាត់សរសេរបន្តថា សូមកុំបារម្ភថា ជារបស់នរណា អ្វីដែលត្រូវបារម្ភនោះគឺ៖
១ - តើភាគីកម្ពុជាទទួលផលចំណេញ និងបានទាញប្រយោជន៍អ្វីខ្លះ ក្រោយការយល់ព្រមចុះហត្ថលេខាលើអនុស្សរណៈយោគយល់គ្នា (MOU) ឆ្នាំ២០០១ រវាងទ្វេភាគី តើវាសមតុល្យគ្នាទេ ?
២ - តើភាគីទាំងពីរ ( កម្ពុជា ថៃ ) អាចដោះស្រាយជម្លោះ នៅតំបន់ត្រួតស៊ីគ្នា (OCA) (Overlapping Claims Areas) បានដែរឬទេ ?
៣ - ប្រសិនបើភាគីថៃថាកោះគជ់ជារបស់ខ្លួន តើកម្ពុជាមានសេណារីយ៉ូ ដើម្បីការពារនិងទាមទារកោះនោះមកវិញស្របច្បាប់អន្តរជាតិ LOSC ឆ្នាំ១៩៨២ ដែរឬទេ ?» ។
ដោយឡែក អ្នកប្រើបណ្ដាញសង្គមហ្វេសប៊ុក ដែលដាក់ឈ្មោះថា ផល្លា ជុន ( Phalla Chhun) គាត់បញ្ចេញទស្សនៈថា មេដឹកនាំខ្មែរខួរយួន (វៀតណាម) ទើបសៀមគេហ៊ាន សៀមគេដឹងមេដឹកនាំខ្មែរគិតតែរឿងអំណាច ចង់បាត់ដី បាត់អីបាត់ទៅ កុំឱ្យតែបាត់អំណាចអញ»។
ចំណែកអ្នកប្រើបណ្ដាញសង្គមយូធូប ដែលដាក់ឈ្មោះថា ម៉ាចាន់សុភាឧត្តម ( @machansopheaoudom8577) បានបញ្ចេញមតិរបៀបផ្តល់ជាដំណោះស្រាយជុំវិញរឿងនេះថា «ខ្ញុំបាទឲ្យចំណុចពីរ គឺត្រូវតែដោះស្រាយដែនសមុទ្ររវាងប្រទេសទាំងពីរ មួយទៀត គឺចង់ឲ្យរដ្ឋាភិបាលត្រូវចេញបំភ្លឺនឹងភាគីពាក់ព័ន្ធផ្សេងៗជុំវិញរឿងបញ្ហាព្រំដែនទឹកសមុទ្រត្រួតស៊ីគ្នា។
ចំណែកលោកនាយករដ្ឋមន្ត្រី ហ៊ុន ម៉ាណែត ក្នុងពិធីចែកសញ្ញាប័ត្រដល់និស្សិតសាកលវិទ្យាល័យភូមិន្ទភ្នំពេញនៅថ្ងៃទី២១ វិច្ឆិកា បានថ្លែងថា ការណ៍ដែលរដ្ឋាភិបាលកម្ពុជារក្សាភាពស្ងៀមស្ងាត់ជុំវិញបញ្ហាកោះគជ់នេះ គឺដោយផ្អែកលើភាពចាស់ទុំផ្នែកនយោបាយ និងការទទួលខុសត្រូវ ចំពោះជាតិ និងប្រជាពលរដ្ឋ ចំពោះបូរណភាពទឹកដី និងអធិបតេយ្យជាតិ ដោយលោកអះអាងថា មិនមែនធ្វើតាមការរុញច្រានរបស់ក្រុម ដែលលោកហៅថា ជាអ្នកប្រឆាំងជ្រុលនិយមនោះឡើយ។
លោក ហ៊ុន ម៉ាណែត៖ « ព្រំដែនសមុទ្រ យើងមិនទាន់ឯកភាពគ្នាទេ ចរចាគ្នាច្រើនដងហើយ តែមិនទាន់មានការឯកភាព។ បើមិនទាន់មានការឯកភាព ថា តើយើងបាត់ស្អី ? ចេះតែថា ក្បត់ជាតិ បាត់ កោះ បាត់ស្អី បើមិនទាន់មានការឯកភាពគ្នាផងហ្នឹង ហើយឱ្យទៅប្ដឹង ICJ ម៉េច បើយើងមិនទាន់មានការឯកភាពស្អីផង។ ប្ដឹងស្អី ? គេសួរប្ដឹងរឿងអី ? ហើយឱ្យរដ្ឋាភិបាលមិននៅស្ងៀម ឱ្យរដ្ឋាភិបាលលើក រវល់តែតតាំងរឿងទៅពន្យល់ ICJ ស្អី។ វាអត់មានរឿង រឿងផ្ទះគេសោះ ឯងយកមក ចង់ដុតនៅក្នុង ( ប្រទេស )» ។
ឆ្លើយតបនឹងការលើកឡើងរបស់នាយករដ្ឋមន្ត្រី ហ៊ុន ម៉ាណែត យ៉ាងដូច្នេះ អ្នកប្រើបណ្ដាញសង្គមយូធូប ដែលដាក់ឈ្មោះថា ភារម្យ សុខ (@PhearomSok) បានបញ្ចេញទស្សនៈថា « កុំយកភ្លើងចូលផ្ទះ ? តែនេះគេយកភ្លើងមកដុតផ្ទះយើងណា កុំនិយាយបោករាស្ត្រ គេមិនជឿទេ »។
ដោយឡែក អ្នកប្រើហ្វេសប៊ុក ដែលមានឈ្មោះថា សុវឌ្ឍិន ម៉ម (Sovathin Mam) ក៏ទំនងបញ្ចេញមតិឆ្លើយតបនឹងការថ្លែងប្រតិកម្មទៅនឹងគណបក្សប្រឆាំង ជុំវិញជម្លោះកោះគជ់នេះដែរថា «ចោទអ្នកប្រឆាំងថាក្បត់ជាតិ ប៉ុន្តែខ្ញុំមិនដែលឃើញថាអ្នកប្រឆាំងកាត់ដីអោយបរទេសណាទេ!
ចំណែកអ្នកប្រើហ្វេសប៊ុកម្នាក់ទៀត ដែលមានឈ្មោះថា ស្រុកសម្ដេច (Srok Samdeach) បើហ៊ានធ្វើ លោក ហ៊ុន ម៉ាណែត នឹងឡើងកូដ មិនបាច់ចាប់អ្នកតវ៉ាដាក់គុកទេ»។
នៅចុងក្រោយ គឺជាទស្សនៈរបស់ អ្នកប្រើហ្វេសប៊ុកម្នាក់ផ្សេងទៀត ដែលមានឈ្មោះថា ស៊ូ ខេមរិន្ទ ( Sou Khemrin )។ លោកជាអ្នកកវីនិពន្ធ លោកសរសេរចេញមកជាអត្ថបទកំណាព្យ មានចំណងជើងថា «កោះគជ់» ជាបទព្យាង្គ៧ ដូចតទៅនេះ៖
នឹករឿងកោះគជ់ មុជទឹកភ្នែក ចិន្ដាសង្វេគប្រវត្តិសាស្ត្រ ស្ដាប់ពាក្យបណ្ឌិត ឥតអៀនខ្មាស បែកន័យព្រាត់ប្រាស ផ្ដាសចោលខ្មែរ។
កោះគជ់ កោះកេរ ឆ្នេរមិនឆ្ងាយ នៅកៀកនឹងម្ដាយ ម្ដេចប្រួលប្រែ? បណ្ឌិតត្រូវព្រួយ ស្ទួយមើលថែ ឱ្យគជ់នៅតែ ក្បែរកោះកុង។
កុំឆ្លងដល់ត្រើយ ឆ្លើយលែងត្រង់ ក្បាលតាមគេចង់ បង់សំយុង ប្រយោជន៍តិចតួច លួចចូលទ្រុង ងងឹតសូន្យសុង លង់ក្បត់សាសន៍៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។