គ្រួសារមន្ត្រីគណបក្សភ្លើងទៀន នៅខេត្តត្បូងឃ្មុំ ដែលអាជ្ញាធរអះអាងថា ស្លាប់ដោយសារគ្រោះថ្នាក់ចរាចរណ៍ម្នាក់ឯង គ្រោងរៀបចំពាក្យបណ្ដឹង ដើម្បីទាមទារឱ្យអាជ្ញាធរបើកការស្រាវជ្រាវ រកមូលហេតុពិតប្រាកដ។ សង្គមស៊ីវិល ជំរុញឱ្យអាជ្ញាធរស៊ើបអង្កេតរឿងនេះបន្ថែមទៀត ដើម្បីបកស្រាយឱ្យគ្រួសារជនរងគ្រោះ និងមហាជនអស់ចិត្ត។
សាច់ញាតិរបស់គណបក្សភ្លើងទៀននៅខេត្តត្បូងឃ្មុំ និងជាជំទប់ទី២ឃុំត្រមូង លោក ហែម ហឿន លើកឡើងថា ការស្លាប់របស់លោក ហែម ហឿន កាលពីថ្ងៃទី ២៤ ខែកញ្ញា កន្លងមកនេះ មានចំណុចសង្ស័យជាច្រើន ដែលធ្វើឱ្យពួកគាត់មិនអាចទទួលយកការបកស្រាយរបស់អាជ្ញាធរបានឡើយ។
ប្រពន្ធរបស់ លោក ហែម ហឿន គឺលោកស្រី ឈឿន ចាន់ ប្រាប់វិទ្យុអាស៊ីសេរី នៅថ្ងៃទី២៧ កញ្ញា ថា លោកស្រីមិនទាន់ទទួលព័ត៌មានបន្ថែមពីអាជ្ញាធរ ជុំវិញលទ្ធផលការស៊ើបអង្កេត លើករណីស្លាប់របស់ប្ដីលោកស្រីនៅឡើយ។ លោកស្រីលើកឡើងថា ការបកស្រាយរបស់អាជ្ញាធរ ដែលថាប្ដីរបស់លោកស្រី ស្លាប់ដោយសារគ្រោះថ្នាក់ចរាចរណ៍នោះ មានចំណុចជាច្រើន ដែលលោកស្រីមិនយល់ស្រប ព្រោះផ្ទុយពីចរិតលក្ខណៈរបស់ប្ដីលោកស្រី មានដូចជា ប្ដីរបស់លោកស្រីតែងតែប្រយ័ត្នប្រយែង ក្នុងការបើកបរ ដោយមិនបើកឱ្យហួសពីល្បឿនកំណត់ ឬបើកបរទាំងមានជាតិស្រវឹង និងគ្មានជំងឺប្រចាំកាយរ៉ាំរ៉ៃនោះឡើយ ហើយត្រង់ចំណុចផ្លូវដែលប្ដីលោកស្រីជួបគ្រោះថ្នាក់នោះ ក៏មិនមានការលំបាកនោះដែរ។
លោកស្រី ឈឿន ចាន់៖ «អ៊ីចឹងបានថា ខ្ញុំមិនអស់ចិត្ត។ ក្នុងចិត្តខ្ញុំនៅមន្ទិលនៅឡើយ។ ខ្ញុំជាប្រពន្ធ ខ្ញុំតែងតែដាស់តឿនគាត់ដែរថា ឯងអើយ!មុននិយាយអ្វីមួយ ចេញអ្វីមួយ ធ្វើអ្វីមួយ ខ្លួនឯងធ្វើឱ្យហ្មត់ចត់ណាឯង ព្រោះយើងមិនដឹងនរណាគេស្រលាញ់ នរណាស្អប់យើង។ គាត់ថា ឯងមិនបាច់និយាយទេរឿងហ្នឹង ខ្ញុំដឹងហើយ ព្រោះអីខ្ញុំធ្វើខាងហ្នឹង ខ្ញុំដឹងជាងឯទៀត»។
ទោះជាយ៉ាងណា លោកស្រី ឈឿន ចាន់ បញ្ជាក់ថា លោកស្រីនឹងរៀបចំពាក្យបណ្ដឹង ដើម្បីស្នើទៅអាជ្ញាធរឱ្យស៊ើបអង្កេតករណីនេះជាបន្ត ក្រោយបញ្ចប់ពិធីបុណ្យគម្រប់ខួប ៧ថ្ងៃរបស់ប្ដី នៅថ្ងៃទី ២៩ ខែកញ្ញា។
វិទ្យុអាស៊ីសេរីមិនអាចទាក់ទងលោក ឡោ ចាន់ណា នាយប៉ុស្តិ៍ឃុំត្រមូង និងអធិការរងនគរបាលស្រុកមេមត់ ទទួលបន្ទុកផែនចរាចរណ៍លោក យឹម គីមស៊ន ដើម្បីបកស្រាយរឿងនេះបានទេ នៅថ្ងៃទី២៧ ខែកញ្ញា ដោយលោកប្រាប់ថា រវល់ជាប់ប្រជុំ។
ជុំវិញរឿងនេះ មន្ត្រីឃ្លាំមើលការរំលោភសិទ្ធិមនុស្ស និងដីធ្លីនៃសមាគមការពារសិទ្ធិមនុស្សអាដហុក ប្រចាំខេត្តត្បូងឃ្មុំ និងខេត្តកំពង់ចាម លោក ឡេង សេងហាន យល់ឃើញថា ដោយសារ ជនរងគ្រោះ គឺលោក ហែម ហឿន កន្លងមកធ្លាប់ទទួលរងការគំរាមកំហែងផ្នែកនយោបាយ ហើយដែលកត្តានេះ គឺជាហេតុផលដែលគ្រួសារជនរងគ្រោះ មានការសង្ស័យថា មានភាពមិនប្រក្រតី។ លោកជំរុញឱ្យអាជ្ញាធរ ស៊ើបអង្កេតរឿងនេះបន្ថែម ដើម្បីបកស្រាយឱ្យគ្រួសារជនរងគ្រោះ និងមហាជនអស់ចិត្ត និងលែងមានការសង្ស័យ។
លោក ឡេង សេងហាន៖ «វាពិបាកដែរ ដោយសារកន្លែងកើតហេតុអត់មាននរណាបានឃើញជាក់លាក់ ថា គាត់យ៉ាងម៉េច។ អ៊ីចឹងទៅគ្រាន់តែយើងដាក់ការសង្ស័យថា មុនកើតហេតុ គាត់ចេញពីជួបជាមួយសកម្មជនរបស់គាត់ ទីមួយ។ ទីពីរ គាត់ជាមនុស្សសកម្ម ហើយគាត់ត្រូវបានគេឃ្លាំមើលកន្លងមក»។
លោក ហែម ហឿន គឺជាអតីតសមាជិកក្រុមប្រឹក្សាជាប់ឆ្នោតគណបក្សសង្គ្រោះជាតិនៅឃុំត្រមូង ស្រុកមេមត់ កាលពីឆ្នាំ២០១៧។ បច្ចុប្បន្នលោកជាប្រធានគណៈកម្មាធិការប្រតិបត្តិគណបក្សភ្លើងទៀនឃុំ និងជាជំទប់ទី២ ឃុំត្រមូង មកពីគណបក្សភ្លើងទៀន។
ប្រពន្ធលោក ហែម ហឿន ស្នើឱ្យអាជ្ញាធរបើកការស៊ើបអង្កេត ដើម្បីរកភស្តុតាងមកបញ្ជាក់ថា ករណីនេះបណ្ដាលមកពីគ្រោះថ្នាក់ចរាចរណ៍ ឬក៏ជាប់ទាក់ទងនឹងរឿងនយោបាយ ពីព្រោះកាលពីនៅមានជីវិត ប្ដីរបស់លោកស្រីធ្លាប់រងការធ្វើទុក្ខបុកម្នេញ និងព្រួយបារម្ភអំពីសុវត្ថិភាពជាបន្តបន្ទាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។