គ្រួសារ និងមេធាវីព្រួយបារម្ភអំពីបញ្ហាសុខភាពរបស់ លោក ថាច់ សេដ្ឋា កាន់តែធ្ងន់ធ្ងរ ឬប្រឈមគ្រោះថ្នាក់ដល់ជីវិតនៅក្នុងពន្ធនាគារ បើគ្មានការព្យាបាលជំងឺពីគ្រូពេទ្យជំនាញទាន់ពេលនោះទេ។ មន្រ្តីសង្គមស៊ីវិលយល់ថា រដ្ឋាភិបាលគួរតែដោះស្រាយវិបត្តិនយោបាយ និងប្រគល់សេរីភាពជូនមេដឹកនាំបក្សជំទាស់រូបនេះឡើងវិញ។
គ្រួសារខ្លោចចិត្តអាណិតលោក ថាច់ សេដ្ឋា ជាប់ពន្ធនាគារដោយអយុត្តិធម៌ហើយ ថែមទាំងធ្លាក់ខ្លួនឈឺរងទុក្ខលំបាកនៅក្នុងពន្ធនាគារ ដោយគ្មានការពិនិត្យព្យាបាលត្រឹមត្រូវថែមទៀត។
ប្រពន្ធអនុប្រធានគណបក្សភ្លើងទៀន លោក ថាច់ សេដ្ឋា គឺលោកស្រី ថាច់ សុខបូរ៉ានី ប្រាប់វិទ្យុអាស៊ីសេរីថា គ្រួសារលោកស្រីបាននាំគ្នាទៅពន្ធនាគារសួរសុខទុក្ខលោក ថាច់ សេដ្ឋា ដែលកំពុងមានសុខភាពទ្រុឌទ្រោម ស្លេកស្លាំងជាងលើកមុនៗ។ លោកស្រីឱ្យដឹងថាបញ្ហានេះ ដោយសារស្ថានភាពជំងឺឡើងជាតិអាស៊ីដ ជំងឺលើសជាតិស្ករ ជំងឺលើឈាម និងជំងឺបេះដូងជាដើមបានធ្វើទុក្ខបណ្តាលឱ្យប្តីលោកស្រីឈឺចាប់ និងហើមជើងរហូតដើរអូសជើង ខណៈមន្រ្តីពន្ធនាគារព្រៃសក៏លួចប្រាប់ដំណឹងនេះដែរ។ លោកស្រីចាត់ទុកការបន្តឃុំខ្លួនប្តីលោកស្រី ដែលមិនមានកំហុសឱ្យរស់នៅរងទុក្ខលំបាក និងព្រាត់ពីប្រពន្ធកូនដូច្នេះ ជារឿងអយុត្តិធម៌ និងឈឺចាប់បំផុត ហើយលោកស្រីទាមទារឲ្យតុលាការដោះលែងប្តី ដើម្បីឱ្យគាត់មានសេរីភាពទៅព្យាបាលជំងឺ និងធ្វើនយោបាយឡើងវិញ។
លោក ថាច់ សេដ្ឋា៖ «សូមឱ្យតុលាការដោះលែងគាត់ឱ្យមានសេរីភាពមកវិញមក ដើម្បីឱ្យប្តីរបស់ខ្ញុំបានទៅព្យាបាលជំងឺបេះដូង បច្ចុប្បន្នមិនថា បេះដូង រាងកាយរបស់គាត់ទ្រុឌទ្រោម គាត់ចាស់ គាត់នៅក្នុងហ្នឹងយូរណាស់ហើយ នៅពន្ធនាគារអាប់អួរ ដោះលែងគាត់ឱ្យមានសេរីភាពវិញមក ខ្ញុំនៅក្នុងពន្ធនាគារ ពេលឃើញប្តីខ្ញុំចេញមកជួបម្តងៗកាត់ស្គមជាងមុន មិនស្រស់ស្រាយ ខ្ញុំអាណិតគាត់ណាស់»។
ទោះយ៉ាងណា លោកស្រី ថាច់ សុខបូរ៉ានី កោតសរសើរទឹកចិត្តប្ដីរបស់លោកស្រីនៅតែមានស្មារតីរឹងមាំ ដោយមិនផ្លាស់ប្ដូរជំហរនយោបាយឡើយ ទោះបីជាគាត់ជាប់ពន្ធនាគារទាំងអយុត្តិធម៌ក៏ដោយ។
ចំណែកមេធាវីការពារក្ដីឱ្យលោក ថាច់ សេដ្ឋា គឺលោក សឺន ជុំជួន ប្រាប់វិទ្យុអាស៊ីសេរីថា បីសប្តាហ៍មុនលោក ថាច់ សេដ្ឋា បានប្រាប់លោកអំពីបញ្ហាសុខភាពរបស់គាត់នៅក្នុងពន្ធនាគារដែរ។ លោកថាអ្វីដែលលោកបារម្ភខ្លាំង គឺស្ថានភាពជំងឺបេះដូងរបស់លោក ថាច់ សេដ្ឋា អាចប្រែប្រួល ឬប្រឈមគ្រោះថ្នាក់គ្រប់ពេល បើកគ្មានការព្យាបាលថែទាំឱ្យត្រឹមត្រូវទេនោះ។ លោក សឺន ជុំជួន ថាសំណុំរឿងរបស់លោក ថាច់ សេដ្ឋា បានចូលជាស្ថាពរហើយ មកទល់ពេលនេះ ប៉ុន្តែលោកនឹងទៅជួបកូនក្តីនៅពន្ធនាគារ ដើម្បីពិភាក្សាផ្លូវច្បាប់ ពិនិត្យមើលស្ថានភាពជំងឺនៅសប្តាហ៍ក្រោយ ដើម្បីរៀបចំឯកសារដាក់ទៅស្ថាប័នពាក់ព័ន្ធស្នើជួយអន្តរាគមន៍ដោះលែងគាត់ឱ្យមានសេរីភាពវិញ។
លោក សឺន ជុំជួន៖ «កន្លងមកគាត់ផ្តាំឱ្យទៅជួបដែរ ហើយខ្ញុំនឹងទៅសប្តាហ៍ក្រោយ ខ្ញុំក៏មានការព្រួយបារម្ភដែរថា គាត់ខ្វះការថែទាំសុខភាពឱ្យបានត្រឹមត្រូវ អាចធ្វើឱ្យជំងឺរបស់គាត់ហ្នឹងមានការប្រែប្រួលច្រើន»។
ទាក់ទងរឿងនេះ អ្នកនាំពាក្យអគ្គនាយកដ្ឋានពន្ធនាគារ នៃក្រសួងមហាផ្ទៃលោក ឃៀង សុណាឌីន អះអាងថា លោក ថាច់ សេដ្ឋា ពុំមានស្ថានភាពជំងឺបេះដូងធ្វើទុក្ខបណ្តាលឱ្យហើមជើងដូចការលើកឡើងរបស់គ្រួសារនោះទេ។ ប៉ុន្តែលោកបញ្ជាក់ថា ជំងឺបេះដូង និងជំងឺលើសឈាមរបស់គាត់បានកើតមានតាំងពីមុនពេលជាប់ឃុំ ដោយបច្ចុប្បន្នគាត់បន្តលេបថ្នាំដែលគ្រួសារផ្តល់ឱ្យជាប្រចាំ ព្រមទាំងទទួលបានសេវាសុខភាពពីគ្រូពេទ្យក្នុងពន្ធនាគារ និងអង្គការលីកាដូផងដែរ។
លោក ឃៀង សុណាឌីន៖ «ខ្ញុំចង់ស្នើឱ្យគ្រួសារ សាច់ញាតិរបស់លោក ថាច់ សេដ្ឋា នេះ ធ្វើការទំនាក់ទំនង មកអង្គភាព គឺមណ្ឌលអប់រំកែប្រែទី១ ដើម្បីស្នើសុំ ការបញ្ជាក់ ពីមន្រ្តីជំនាញរបស់មណ្ឌលអប់រំកែប្រែទី១ ទៅលើស្ថានភាពសុខភាព ជៀសវាងទទួលព័ត៌មានណាមួយមិនផ្លូវការ ហើយយកទៅផ្សព្វផ្សាយទៅមិនត្រឹមត្រូវធ្វើឱ្យមានការយល់ច្រឡំពីសាធារណជនទូទៅ»។
លោក ថាច់ សេដ្ឋា វ័យ៧០ឆ្នាំ មានដើមកំណើតខ្មែរក្រោម ត្រូវបានអាជ្ញាធរក្រុងភ្នំពេញចាប់ខ្លួន កាលពីថ្ងៃទី១៦ ខែមករា ឆ្នាំ២០២៣ ក្នុងពេលរដ្ឋាភិបាលរបស់ត្រកូល’’ហ៊ុន’’បើកយុទ្ធនាការរារាំង និងកម្ទេចគណបក្សប្រឆាំង នៅមុនការបោះឆ្នោតមួយដែលលោក ហ៊ុន សែន និងក្រុមមេដឹកនាំកំពូលៗរបស់បក្សប្រជាជនកម្ពុជា ត្រៀមផ្ទេរអំណាចជាប្រព័ន្ធឲ្យកូនចៅជំនាន់ក្រោយរបស់ពួកគេ។
តុលាការគ្រប់ជាន់ថ្នាក់បានផ្តន្ទាទោសលោក ថាច់ សេដ្ឋា នៅក្នុងសំណុំរឿងចេញសែកអត់លុយ ឱ្យជាប់ពន្ធនាគារ១៨ខែ។ ចំណែកសំណុំរឿងញុះញង់មួយទៀត តុលាការផ្តន្ទាទោសដាក់ពន្ធនាគារ៣ឆ្នាំ ទាក់ទងលោកនិយាយពីប្រវត្តិគណបក្សប្រជាជនកម្ពុជា ស្តូបមិត្តភាពកម្ពុជាវៀតណាម និងប្រវត្តិ៧មករានៅក្នុងវេទិកាជាមួយអ្នកគាំទ្រនៅក្រៅប្រទេសកាលខែមករា ឆ្នាំ២០២៣។
នាយកទទួលបន្ទុកកិច្ចការទូទៅ នៃអង្គការសិទ្ធិមនុស្សលីកាដូ លោក អំ សំអាត មានប្រសាសន៍ថា បើសិនពន្ធនាគារមិនមានពេទ្យជំនាញក្នុងការព្យាបាលជំងឺបេះដូងនោះគួរបញ្ជូនលោក ថាច់ សេដ្ឋា ទៅព្យាបាលនៅមន្ទីរពេទ្យឯកទេសខាងក្រៅពន្ធនាគារ ដើម្បីបង្ហោញការយកចិត្តចំពោះជនជាប់ឃុំ។ ក្រៅពីនេះ លោក អំ សំអាត បញ្ជាក់ថា ការដោះលែងលោក ថាច់ សេដ្ឋា និងអ្នកទោសមសិការដទៃទៀតឱ្យមានសេរីភាពវិញនឹងផ្តល់ផលចំណេញដល់ជាតិ ពីព្រោះសហគមន៍ជាតិ និងអន្តរជាតិនៅតែចាត់ទុកសំណុំរឿងទាំងនោះពាក់ព័ន្ធរឿងនយោបាយ ហើយបន្តជំរុញឱ្យរដ្ឋាភិបាលកម្ពុជាដោះស្រាយវិបត្តិនយោបាយ ដើម្បីបើកលំហសេរីភាព និងប្រជាធិបតេយ្យឡើងវិញ។
លោក អំ សំអាត៖ «បើសិនជាមានការលើកលែងទោសណាមួយចំពោះលោក ថាច់ សេដ្ឋា ទៅលើបញ្ហាសុខភាព និងការព្យាបាលអី ក៏អាចជួយបង្ហាញឆន្ទៈក្នុងការលើកកម្ពស់ទៅលើលំហសេរីភាពនយោបាយផងដែរបាទ»។
រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិកម្ពុជា លោក ប្រាក់ សុខុន បានប្ដេជ្ញាចិត្តលើកកម្ពស់នីតិរដ្ឋ និងលំហប្រជាធិបតេយ្យ ចំពោះមុខឯកអគ្គរដ្ឋទូតសហភាពអឺរ៉ុបប្រចាំកម្ពុជា លោក អ៊ីហ្គោរ៍ ទ្រីសម៉ាន (Igor Driesmans) នៅក្នុងជំនួបទ្វេភាគី កាលពីថ្ងៃ ទី២ ខែមករា។
ការប្ដេជ្ញាចិត្តរបស់រដ្ឋាភិបាលកម្ពុជា តាមរយៈក្រសួងការបរទេសនេះ ក្រោយពេលសភាសហភាពអឺរ៉ុប កាលពីថ្ងៃទី២៨ ខែវិច្ឆិកា ឆ្នាំ២០២៤ បានចេញសេចក្តីសម្រេចមួយដោយជំរុញឱ្យរដ្ឋសមាជិកអឺរ៉ុប និងសហគមន៍អន្តរជាតិ ចាត់វិធានការដាក់ទណ្ឌកម្មឱ្យមានប្រសិទ្ធភាពលើក្រុមមនុស្សទាំងឡាយណា ដែលទទួលខុសត្រូវលើការរឹតត្បិតផ្នែកនយោបាយ និងដាក់សម្ពាធលើរដ្ឋាភិបាលកម្ពុជា រហូតទាល់តែអ្នកទោសនយោបាយទាំងអស់ត្រូវបានដោះលែង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។