ប្រជាពលរដ្ឋនៅតំបន់ព្រំដែនកម្ពុជា-ថៃក្នុងខេត្តបន្ទាយមានជ័យ អះអាងថា ប៉ូលិសខេត្តនេះ បានបិទខិត្តប័ណ្ណតាមដងផ្លូវក្នុងក្រុងប៉ោយប៉ែតប្រកាសចាប់ថ្នាក់ដឹកនាំគណបក្សប្រឆាំងជាង២០នាក់ ដែលកំពុងភៀសខ្លួននៅក្រៅប្រទេស ប្រសិនបើពួកគេមកដល់កម្ពុជា។ពលរដ្ឋនៅក្រុងប៉ោយប៉ែត ថ្លែងថា ថ្វីត្បិតតែសមត្ថកិច្ចបិទខិត្តប័ណ្ណគំរាមកំហែងដល់មន្ត្រីបក្សប្រឆាំងយ៉ាងនេះក្ដី ក៏ពួកគេនៅតែត្រៀមខ្លួនទៅទទួលលោក សម រង្ស៊ី វិលចូលស្រុកវិញនៅថ្ងៃទី៩វិច្ឆិកាខាងមុខ ដោយមិនរាថយឡើយ។
ប្រជាពលរដ្ឋមួយចំនួននៅក្រុងប៉ោយប៉ែត លើកឡើងស្រដៀងគ្នាថា ស្របពេលដែលកៀកថ្ងៃថ្នាក់ដឹកនាំគណបក្សសង្គ្រោះជាតិ វិលចូលស្រុក អាជ្ញាធររបបក្រុងភ្នំពេញបង្កើនការគំរាមកំហែងសកម្មជនបក្សប្រឆាំងកាន់តែខ្លាំង ជាពិសេសនៅតំបន់ព្រំដែនខេត្តបន្ទាយមានជ័យតែម្ដង។
ប្រជាពលរដ្ឋរស់នៅក្រុងប៉ោយប៉ែត ខេត្តបន្ទាយមានជ័យ សុំមិនឱ្យបញ្ចេញឈ្មោះ ដើម្បីការពារសុវត្ថិភាពថ្លែងនៅថ្ងៃទី៤វិច្ឆិកាថា ប៉ូលិសខេត្តបន្ទាយមានជ័យ ដើរបិទខិត្តប័ណ្ណព្រោងព្រាតតាមដើមឈើលើចិញ្ចើមផ្លូវក្នុងក្រុងនេះ ប្រកាសចាប់ថ្នាក់ដឹកនាំគណបក្សសង្គ្រោះជាង២០នាក់។ពលរដ្ឋរូបនេះ បន្ថែមថា ខិត្តប័ណ្ណនេះមិនសូវមានការចាប់អារម្មណ៍ពីប្រជាពលរដ្ឋនោះទេ ពីព្រោះពួកគាត់យល់ច្បាស់អំពីស្ថានការណ៍នយោបាយសព្វថ្ងៃ។លោកស្រី ចាត់ទុកខិត្តប័ណ្ណរបស់ប៉ូលិសនេះថាគំរាមកំហែងដល់មន្ត្រីបក្សប្រឆាំងធ្វើឱ្យភ័យខ្លាច ដើម្បីទប់ស្កាត់ពួកគាត់ហ៊ានវិលចូលស្រុកនៅពេលខាងមុខ៖ «ការដឹងនាំរយៈពេលកន្លងមកមិនមានភាពរីកចំរើន ពុករលួយ បក្សពួកនិយម ហើយពលរដ្ឋនៅតែក្រ ហើយកាន់តែក្រីទៅ រីឯគណបក្សសង្គ្រោះជាតិជាគណបក្សប្រឆាំងដ៏ធំដែលអាចឱ្យប្រទេសរួចផុតពីរបបផ្ដាច់ការបាន។ដូច្នេះខ្ញុំតាំងចិត្តសុំផ្លាស់ប្ដូរផ្ដួលរលំរបបនេះ ហើយចូលរួមថ្ងៃទី៩វិច្ឆិកាទាំងអស់គ្នា។ ទោះបីជាចំណាយពេលច្រើនថ្ងៃទៅមុខទៀតក៏ដោយដាច់ខាងខ្ញុំត្រូវតែទៅចូលរួម ដើម្បីឱ្យបានមនុស្សច្រើន » ។
ពលរដ្ឋដដែលបន្ថែមថា ប្រជាពលរដ្ឋនៅក្រុងប៉ោយប៉ែតភាគច្រើនមិនពេញចិត្តនឹងប៉ូលិសដែលបិទខិត្តប័ណ្ណតាមចាប់ខ្លួនមន្ត្រីបក្សប្រឆាំងនោះទេ ប៉ុន្តែពួកគាត់ចេះតែនាំគ្នាខាំមាត់សង្កត់ចិត្តរង់ចាំថ្ងៃទី៩វិច្ឆិកាមកដល់ ដើម្បីនាំគ្នាទៅអមដំណើរលោក សម រង្ស៊ី ធ្វើមាតុភូមិនិវត្តន៍ចូលប្រទេសវិញ។
ប្រជាពលរដ្ឋនៅតំបន់ព្រំដែនក្រុងប៉ោយប៉ែតម្នាក់ទៀត ថ្លែងមិនសុំឱ្យបញ្ចេញឈ្មោះនិងសំឡេង ឱ្យដឹងថា ប៉ូលិសដើរបិទប្រកាសចាប់ខ្លួនមន្ត្រីបក្សប្រឆាំងនៅតាមដងផ្លូវដែលមានមនុស្សឆ្លងកាត់ច្រើនជាពិសេសនៅព្រំដែនប្រទល់ថៃក្នុងភូមិក្បាលស្ពានមួយសង្កាត់ប៉ោយប៉ែត។លោកបន្តថា ប្រជាពលរដ្ឋភាពច្រើនមើលមិនឃើញទោសកំហុសរបស់មន្ត្រីបក្សប្រឆាំងដែលត្រូវប្រកាសចាប់ខ្លួននោះទេ។
ពលរដ្ឋថ្លែងថា ក្រៅពីការតាមចាប់ខ្លួនមន្ត្រីបក្សប្រឆាំងទាំងនេះហើយ អាជ្ញាធរបានបន្ថែមការរឹតបន្តឹងនៅព្រំដែនកាន់តែខ្លាំង ដោយអាជ្ញាធរបានដាក់បន្លាលួស ព័ទ្ធនៅផ្លូវរថភ្លើងព្រំដែនកម្ពុជាថៃក្រុងប៉ោយប៉ែត ដើម្បីរារាំងមិនឱ្យអ្នកគាំទ្រគណបក្សប្រឆាំងឆ្លងដែនពីប្រទេសថៃចូលទៅកម្ពុជាបានស្រួល។ពួកគាត់បន្តទៀតថា ចាប់តាំងពីថ្ងៃទី៣វិច្ឆិកាមក អាជ្ញាធរបានបន្ថែមកងទ័ពប្រមាណ៥០០នាក់តាមផ្លូវជាតិលេខ៥ពីព្រំដែនថៃរហូតដល់សង្កាត់និមិត្តក្រុងប៉ោយប៉ែត។
អភិបាលខេត្តបន្ទាយមានជ័យលោក អ៊ុំ រាត្រី បានបដិសេធមិនធ្វើអត្ថាធិប្បាយ៖ «អធ្យាស្រ័យខ្ញុំកំពុងប្រជុំ»។
ចំណែកអគ្គស្នងការនគរបាលជាតិលោក នៀត សាវឿនប្រាប់អាស៊ីសេរីថា អ្នកដែលមានឈ្មោះប្រកាសនឹងត្រូវចាប់ខ្លួនទាំងអស់។
សំឡេង«ជាគោលការណ៍ឲ្យតែមានដីកាតាមចាប់នគរបាលយុត្តិធម៌ត្រូវចាប់អោយតែមានដីកា។អញ្ចឹងបើមានដីកាគេប្រកាសតាមចាប់ចង់ដឹងចាំមើលចូលសិនប៉ុន្មាននាក់បានដឹងហើយ»។
ខិត្តប័ណ្ណដែលប៉ូលិសដើរបិទនោះមានសរសេរអក្សរក្រហមធំៗថា ស្នងការនគរបាលខេត្តបន្ទាយមានជ័យប្រកាសតាមចាប់ខ្លួនក្រុមឧទ្ទាម ក្បត់ជាតិ។ប៉ូលិសបានអំពាវនាវដល់ប្រជាពលរដ្ឋនៅក្នុងខេត្តបន្ទាយមានជ័យ ប្រសិនបើឃើញក្រុមមន្ត្រីបក្សសង្គ្រោះជាតិទាំងនោះ សូមរាយការណ៍ទៅនគរបាលដែលនៅជិតផ្ទះ។មន្ត្រីបក្សប្រឆាំងដែលមានឈ្មោះប្រកាសចាប់ខ្លួនក្នុងខិត្តប័ណ្ណនេះ សរុបមានចំនួន២១នាក់ក្នុងនោះរួមមាន ប្រធានស្ដីទីគណបក្សសង្គ្រោះជាតិ លោក សម រង្ស៊ី អ្នកស្រី មួរ សុខហួ លោក អេង ឆៃអៀង លោក អ៊ុំ សំអាន លោក ហៃ វណ្ណា លោក អ៊ីសា ឧស្មាន លោក នុត រំដួល និង ប្រធានគណបក្សសង្គ្រោះជាតិក្រុងសិរីសោភ័ណ លោក ឃ្លាំង ប៊ុនឡាយជាដើម។
លោក ឃ្លាំង ប៊ុនឡាយ ប្រាប់អាស៊ីសេរីថា ខិត្តប័ណ្ណនេះជាល្បិចបោកបញ្ឆោតរបស់អាជ្ញាធររបបក្រុងភ្នំពេញ ដើម្បីទប់ស្កាត់រូបលោកនិងថ្នាក់ដឹកនាំគណបក្សប្រឆាំងដទៃទៀត មិនឱ្យវិលចូលស្រុកនៅថ្ងៃទី៩វិច្ឆិកា ខាងមុខ។លោកបញ្ជាក់ថា ថ្វីត្បិតតែអាជ្ញាធរគំរាមកំហែងពួកលោកយ៉ាងនេះក្ដី ក៏លោកនៅតែវិលត្រឡប់ទៅកម្ពុជាវិញ ដើម្បីស្ដារប្រជាធិបតេយ្យជាមួយថ្នាក់ដឹកនាំដទៃគណបក្សប្រឆាំង ដោយមិនមានការរាថយឡើយ៖ «បើសិនជាយើងនៅអោបដៃរង់ចាំទទួលនូវលទ្ធផលដែលគេធ្វើបាបយើងទាំងអយុត្តិធម៌អីចឹងខ្ញុំគិតថា ពលរដ្ឋខ្មែរនឹងរងអយុត្តិធម៌តកូនចៅ។ដូច្នេះក្នុងនាមជាអ្នកដែលស្រលាញ់ប្រជាធិបតេយ្យ ស្រលាញ់សិទ្ធិសេរីភាពយើងត្រូវតែ ក្រោយឡើងទាំងអស់គ្នាដើម្បីតតាំងអំពើទាំងនេះ។បើទោះបីជាមានបញ្ហាអ្វីកើតឡើងមកលើខ្ញុំក៏ខ្ញុំនៅតែធ្វើដែរ » ។
ចំណែក លោក អ៊ីសា អូស្មាន ភ្ញាក់ផ្អើលនៅពេលលឺដំណឹងថាឈ្មោះ និងរូបថតរបស់លោកមាននៅក្នុងសេចក្ដីប្រកាសតាមចាប់ខ្លួននៅតាមព្រំដែនខែត្របន្ទាយមានជ័យនោះ។លោកបញ្ជាក់ថាឥលូវនេះលោកនៅខែត្រត្បូងឃ្មុំ ដែលលោកបានទៅសួរសុខទុក្ខម្ដាយចាស់ជរានៅឯស្រុកកំណើត ស្រាប់តែទទួលដំណឹងពីការតាមចាប់ខ្លួនលោកទៅវិញ។ លោកបញ្ជាក់ថាលោកបានលាលែងពីគណបក្សសង្រ្គោះជាតិប្រមាណជាង១ឆ្នាំហើយគឺលោកមិនចង់ពាក់ព័ន្ធនិងរឿងនយោបាយអ្វីទៀតទេគឺលោកចង់ធ្វើប្រជាពលរដ្ឋសាមញ្ញហើយកំពុងទំនុកបម្រុងសិស្សានុសិស្សក្រីក្រឯស្រុកកំណើតក្នុងស្រុកក្រូចឆ្មារឲ្យរៀនភាសាអង់គ្លេសនិងកំព្យួទ័រ។
«ខ្ញុំចេះតែងឿងឆ្ងល់ហើយមិនអស់ចិត្តហេតុអ្វីបានជាខ្ញុំមានឈ្មោះក្នុងបញ្ជី។ខ្ញុំបានប្រកាសហើយកាលពីខែមេសាឆ្នាំហ្នឹង ថាខ្ញុំបានលាលែងចេញពីនយោបាយទាំងស្រុងទោះបីថាគណបក្សណាក៏ខ្ញុំមិនបានចូលរួមតទៅទៀតដែរដោយសារកត្តាសុខភាពរបស់ខ្ញុំផ្ទាល់ ក្រុមគ្រួសាររបស់ខ្ញុំហើយនឹងក្មេងៗ ប្អូនៗដែលកំពុងរស់នៅរៀនសូត្រតាមការទំនប់បំរ៉ុងរបស់ខ្ញុំ ខាងផ្នែកភាសាអង់គ្លេសនិងកុំព្យូទ័រ»។
អ្នកសម្របសម្រួល និងអង្កេតអង្គការ ខុមហ្វ្រែល (comfrel) លោក កន សាវាង្ស យល់ថា ការដាក់កម្លាំងនិងការប្រកាសតាមចាប់ខ្លួនសកម្មជនបក្សប្រឆាំងនេះ គឺជាយុទ្ធសាស្ត្របំភិតបំភ័យសកម្មជនបក្សប្រឆាំងនិងអ្នកគាំទ្រ ដើម្បីរារាំងកុំឱ្យពួកគេវិលត្រឡប់ទៅកម្ពុជាវិញ។ ទោះជាយ៉ាងណាលោកអះអាងថា យុទ្ធសាស្ត្រនេះមិនបានប្រយោជន៍ដល់សង្គមជាតិឡើយ ផ្ទុយទៅវិញកាន់តែធ្វើឱ្យហិនហោចថវិកាជាតិ និងបង្កជម្លោះខ្មែរគ្នាឯង៖ «ប្រហែលជាគាត់ព្រួយបារម្ភស្ថានភាពផ្សេងៗ ទៀត ដែលមិនអាចកំណត់ទុកជាមុនបាន ជាពិសេសក្រែងលោមានកម្លាំងមហាជនទៅអមដំណើរលោក សម រង្ស៊ី វិលចូលស្រុកវិញ បានដាក់កម្លាំងច្រើនបែបនេះ។ព្រោះខ្ញុំគិតថា បើសិនជាសកម្មជនតែប៉ុន្មាននាក់នោះ មិនបាច់ដាក់ប៉ូលិសដ៏ច្រើនបែបនេះទេ មានប៉ូលិសតែ៥នាក់ក៏ចាប់បានហើយ » ។
មន្ត្រីសង្គមស៊ីវិលរូបនេះនៅតែទទូចឱ្យដល់មេដឹកនាំគណបក្សកាន់អំណាច និងបក្សប្រឆាំង ត្រូវរ៉ូវគ្នាឡើងវិញ ដើម្បីកុំឱ្យមានការប៉ះទង្គិចបង្ហូរឈាមដាក់គ្នាកើតឡើងនៅពេលខាងមុខ ដែលនាំឱ្យខាតបង់ដល់សេដ្ឋកិច្ចជាតិ ជាពិសេសធ្វើឱ្យកម្មកររោងចក្រអត់ការងារធ្វើដោយសារសហភាពអឺរ៉ុប និងសហរដ្ឋអាមេរិកផ្ដាច់ការអនុគ្រោះពន្ធ EBA និង GSP។
ពលរដ្ឋនៅតំបន់ព្រំដែនក្រុងប៉ោយប៉ែត អះអាងថា ប្រជាពលរដ្ឋនៅព្រំដែនប្រទេសថៃក្នុងខេត្តបន្ទាយមានជ័យ ភាគច្រើនអន្ទះសារង់ចាំទៅទទួលលោក សម រង្ស៊ី វិលចូលមាតុប្រទេស ដើម្បីផ្លាស់របបដឹកនាំសព្វថ្ងៃឱ្យទៅជាសង្គមស៊ីវិល័យ មានប្រជាធិបតេយ្យពេញលេញ មានយុត្តិធម៌ និងរីកចំរើនជឿនលឿនដូចប្រទេសប្រជាធិបតេយ្យលោកខាងលិច៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។