លោក ហ៊ុន ម៉ាណែត​ អះអាង​ថា កម្ពុជា​មិន​លម្អៀង​ទៅ​រក​ចិន​ទេ

ដោយ មាន ឫទ្ធិ
2023.04.03
លោក ហ៊ុន ម៉ាណែត​ អះអាង​ថា កម្ពុជា​មិន​លម្អៀង​ទៅ​រក​ចិន​ទេ (ឆ្វេង) មេបញ្ជាការកងទ័ពរំដោះប្រជាជនចិន និង​ស្ដាំ លោក ហ៊ុន ម៉ាណែត អគ្គមេបញ្ជាការ​រង​នៃ​កងយោធពលខេមរភូមិន្ត ក្នុង​ពិធីសមយុទ្ធនាគមាស២០២៣ រវាងកងទ័ពរំដោះ​កម្ពុជា និងចិន នៅមជ្ឈមណ្ឌលហ្វឹកហ្វឺនកងរាជអាវុធហត្ថលើផ្ទៃប្រទេស នៅ​ខេត្ត​កំពង់ឆ្នាំង កាល​ពី​ថ្ងៃ​ទី២៣ ខែមីនា ឆ្នាំ២០២៣។
រូប៖ ហ្វេសប៊ុកលោក ហ៊ុន ម៉ាណែត

កូន​ប្រុស​ច្បង​របស់​លោក​នាយករដ្ឋមន្ត្រី ហ៊ុន សែន គឺ​លោក ហ៊ុន ម៉ាណែត ប្រកាស​ថា កម្ពុជា​ប្រកាន់​ជំហរ​នយោបាយ​អព្យាក្រឹត្យ និង​មិន​លម្អៀង​ទៅ​រក​ប្រទេស​ចិន​កុម្មុយនិស្ត​ឡើយ។ ទោះ​បី​ជា​យ៉ាង​ណា អ្នកឃ្លាំមើល​នៅ​តែ​រិះគន់​ថា កម្ពុជា​ក្រោម​ការដឹកនាំ​របស់​លោក ហ៊ុន សែន រង​ការ​រិះគន់ និង​ខាតបង់​ប្រយោជន៍​សេដ្ឋកិច្ច​ពី​បណ្ដា​ប្រទេស​លោក​សេរី​ដោយសារ​តែ​កម្ពុជា​អនុវត្ត​គោលនយោបាយ​លម្អៀង​ទៅ​រក​ចិន​តែ​ម្ខាង។

បេក្ខភាព​នាយករដ្ឋមន្ត្រី​តពូជ​របស់​លោក ហ៊ុន សែន គឺ​លោក ហ៊ុន ម៉ាណែត ប្រកាស​ថា គោល​នយោបាយ​កម្ពុជា​នា​ពេល​បច្ចុប្បន្ន​មិន​បាន​លម្អៀង​ទៅ​ប្រទេស​ចិន​កុម្មុយនិស្ត​នោះ​ទេ។ លោក​អះអាង​ទៀត​ថា កម្ពុជា​តែង​ប្រកាន់​ជំហរ​អព្យាក្រឹត្យ​ហើយ​នា​ថ្ងៃ​អនាគត​កម្ពុជា​នឹង​បង្កើន​ទំនាក់ទំនង​ជាមួយ​បណ្ដា​ប្រទេស​ទាំង​អស់​ក្នុង​ពិភព​លោក។ លោក​ថ្លែង​បែបនេះ​ក្នុង​​ឃ្លីប​វីដេអូ​ដែល​ត្រូវ​បាន​ផ្សព្វផ្សាយ​ក្នុង​គេហទំព័រ​ហ្វេកប៊ុក (Facebook) របស់​លោក​នៅ​ថ្ងៃទី៣ ខែមេសា។

លោក ហ៊ុន ម៉ាណែត៖«គោលនយោបាយ​កម្ពុជា​អត់​នៅ​កៀក​ចិន​ទេ​រាល់ថ្ងៃ​នេះ អត់​មាន​នៅ​កៀក​ពី​ណា​ទាំងអស់ គឺ​នៅ​អព្យាក្រឹត្យ​នៅ​កណ្ដាល ប៉ុន្តែ​លើក​ទឹកចិត្ត និង​ប្ដេជ្ញា​ចិត្ត ដើម្បី​បង្កើត​ភាព​ជិតស្និទ្ធ​ជាមួយ​គ្រប់​ប្រទេស អា​ហ្នឹង​បាន​ត្រូវ។ ចិន​ក៏​ជិត អាមេរិក​ក៏​ជិត ជប៉ុន​ក៏​ជិត ស្អី​ក៏​ជិត​ដែរ ដែល​យើង​ចង់​បាន»

ថ្វីត្បិត​តែ​លោក ហ៊ុន ម៉ាណែត ប្រឹងប្រែង​ប្រកាស​ថា កម្ពុជា​តែង​រក្សា​ជំហរ​អព្យាក្រឹត្យ​ក្ដី ក៏​សហគមន៍​ជាតិ និង​អន្តរជាតិ​មើលឃើញ​ថា កម្ពុជា​ក្រោមការដឹកនាំ​ដោយ​ឪពុក​របស់​លោក​បាន​ដឹកនាំ​ប្រទេស​កាន់តែ​ឃ្លាតឆ្ងាយ​ពី​គន្លង​ប្រជាធិបតេយ្យ និង​រណប​ចិន ដើម្បី​យក​ចិន​ធ្វើ​ជា​ខ្នង​បង្អែក។ លើសពីនេះ អ្វី​ដែល​ពិភពលោក​ដឹង​នោះ​រដ្ឋាភិបាល​លោក ហ៊ុន សែន បាន​បង្កើន​ចំណង​មិត្តភាព​ដែកថែម​ជាមួយ​ប្រទេសចិន​កាន់ស៊ីជម្រៅ​ស្ទើរ​គ្រប់​វិស័យ ជាពិសេស​ក្នុង​ក្របខ័ណ្ឌ​វិស័យយោធា​រហូត​រងការ​ចោទប្រកាន់​ពី​សហរដ្ឋអាមេរិក​ថា រដ្ឋាភិបាល​ឯកបក្ស​បាន​ផ្ដល់​ទីតាំង​មួយផ្នែក​នៅ​កំពង់ផែ​សមុទ្រ​រាម ដើម្បី​ឱ្យ​ចិន​សាងសង់​មូលដ្ឋាន​ទ័ព។ លើសពីនេះ ភាគីកម្ពុជា និង​ចិន ក៏​ចាប់​ផ្ដើម​ធ្វើ​សមយុទ្ធយោធា​នាគមាស​ឆ្នាំ២០២៣ ឡើងវិញ ខណៈ​ភាគី​កម្ពុជា​បាន​លុបចោល​ការ​ធ្វើ​សមយុទ្ធយោធា​ឯកតោភាគី​រួមមាន «ឆ្មាំអង្គរ» ជាមួយ​សហរដ្ឋអាមេរិក និង «ដនគោព្រៃ» ជាមួយអូស្ត្រាលី កាល​ពី​ឆ្នាំ២០១៧។

អ្នកឃ្លាំមើល​ស្ថានការណ៍​នយោបាយ​កម្ពុជា វាយ​តម្លៃ​ថា ការ​ថ្លែង​របស់​លោក ហ៊ុន ម៉ាណែត គឺជា​សារនយោបាយ​បែប​ប្រជាភិថុតិ​បោកប្រាស់​ប្រជាពលរដ្ឋ​ខ្មែរ និង​សហគមន៍​អន្តរជាតិ​តែប៉ុណ្ណោះ។

អគ្គលេខាធិការសហព័ន្ធនិស្សិតបញ្ញវន្តកម្ពុជា លោក គៀន ពន្លក លើកឡើង​ថា ការ​ប្រកាស​របស់​លោក ហ៊ុន ម៉ាណែត ពុំ​បាន​ឆ្លុះបញ្ចាំង​ពី​ការពិតជាក់ស្ដែង​ថា កម្ពុជា​បាន​រក្សា​ជំហរនយោបាយ​ការបរទេស​អព្យាក្រឹត្យ​នោះទេ។ លោក​បន្ថែម​ថា បើ​លោក ហ៊ុន ម៉ាណែត ពិតជា​មាន​ឆន្ទៈ​បង្ហាញ​ប្រាប់​អន្តរជាតិ​ថា កម្ពុជា​មាន​ជំហរ​នយោបាយ​អព្យាក្រឹត្យ​ពិតមែន​នោះ រដ្ឋាភិបាល​ឯកបក្ស​គួរ​ធានា​អំពី​តម្លាភាព​នៃ​មូលដ្ឋានទ័ព​ចិន និង​ស្ដារទំនាក់ទំនង​ល្អ​ជាមួយ​អាមេរិក​ឡើងវិញ​តាមរយៈ​បញ្ឃប់​ការធ្វើទុក្ខបុកម្នេញ​លើ​អ្នកមាន​និន្នាការ​នយោបាយ​ប្រឆាំង រួមទាំង​បើក​លំហ​នយោបាយ​ឱ្យ​មានភាព​ល្អ​ប្រសើរ​ឡើងវិញ។

«ហើយ​លើស​ពី​នេះ​ទៅ​ទៀត ការធ្វើសមយុទ្ធយោធា​រដ្ឋមន្ត្រី​ក្រសួង​ការពារជាតិ​ឯកឧត្ដម ទៀ បាញ់ គឺ​បាន​ប្រកាស​ថា កម្ពុជា និង​ចិន គឺ​ជា​មិត្តដែកថែប ហើយ​នឹង​សហការ​គ្នា​គ្រប់ជ្រុងជ្រោយ។ អ៊ីចឹង​ទោះបីជា​ឯកឧត្ដម ហ៊ុន ម៉ាណែត លើកឡើង​អំពី​អព្យាក្រឹត្យភាព​លើ​ឆាកអន្តរជាតិ ក៏​ប៉ុន្តែ ប្រទេស​លោកសេរី ក៏​ដូចជា​សហរដ្ឋអាមេរិក សហភាពអឺរ៉ុប នៅ​មិន​ទាន់​មាន​ជំនឿ​ជឿជាក់​ថា កម្ពុជា​ពិត​ជា​អព្យាក្រឹត្យ​ទេ»

លោក ហ៊ុន សែន និង​មន្ត្រី​ក្នុង​ជួររដ្ឋាភិបាល តែងតែ​គាំទ្រ​គោលនយោបាយ​ចិន និង​លើក​សរសើរចិន​គ្រប់​កាលៈទេសៈ ដ្បិត​រដ្ឋាភិបាល​លោក​តែងតែ​ទទួល​បាន​ការ​ជួយគាំទ្រ​ផ្នែក​នយោបាយ​ការទូត​លើ​ឆាកអន្តរជាតិ ព្រម​ទទួល​បាន​ជំនួយ និង​កម្ចី​ពី​ប្រទេសចិន។ គិតត្រឹមដំណាច់ត្រីមាសទីពីរឆ្នាំ២០២២ កម្ពុជា​ជំពាក់​បំណុល «មិត្តដែកថែប» ចិន គឺ​ជាង ៤ពាន់​លានដុល្លារ (.០៤៣,៥៧ លានដុល្លារ)

អ្នកវិភាគ​នយោយបាយ លោក គឹម សុខ មានប្រសាសន៍​ថា ការថ្លែង​របស់​លោក ហ៊ុន ម៉ាណែត ថា​កម្ពុជា​មាន​នយោបាយអព្យាក្រឹត្យ​គឺជា​សារនយោបាយ​ដោះស្រាយ​បញ្ហា​មួយគ្រា​តាមរយៈ​ការប្រកាស​ជា​សាធារណៈ​ដូចជា​ឪពុក​របស់​លោក ដែល​ត្រង់​ចំណុច​នេះ​លោក​ប្រៀប​ប្រដូច​ថា ស្លឹកឈើ​ជ្រុះ​មិន​ឆ្ងាយ​ពី​គល់។ លោក​មើលឃើញ​ថា របត់​នយោបាយ​កម្ពុជា​នាពេលបច្ចុប្បន្ន​ពិបាក​ក្នុងការ​រក្សា​ជំហរ​នយោបាយអព្យាក្រឹត្យ​របស់​ខ្លួន ប្រសិន​បើ​គ្មាន​ការ​ផ្លាស់ប្តូរ​របបដឹកនាំ ដ្បិត​រដ្ឋាភិបាល​បច្ចុប្បន្ន​បាន​លម្អៀង​ទៅ​រក​ចិន និង​លើកសរសើរ​នយោបាយ​ប្រជាភិថុតិ​ចិន​ឥតងាករេ។

លោក គឹម សុខ៖ «សារ​នយោបាយ​របស់​លោក ហ៊ុន ម៉ាណែត គឺជា​គំរូ​នយោបាយ​ប៉ាហ៊ី​តែ​ប៉ុណ្ណោះ ប៉ាហ៊ី​ដែល​ដោះស្រាយ​បញ្ហា​មួយ​គ្រាៗ ប៉ាហ៊ី​របស់​លោក ហ៊ុន ម៉ាណែត គ្រាន់តែ​នយោបាយ​លក់​រូបភាព​ពាណិជ្ជកម្ម​ប្រជាភិថុតិ​នយោបាយ​របស់​ពួកគាត់ ដែល​មិន​អព្យាក្រឹត្យ ហើយ​ចេះ​តែ​ថ្លែង​បោកប្រាស់​ប្រជាពលរដ្ឋ និង​សហគមន៍​អន្តរជាតិ ថា​អព្យាក្រឹត្យ។ មិន​អព្យាក្រឹត្យ​នៅ​ត្រង់​ថា មួយ​ថ្ងៃៗ ទាំង​លោក ហ៊ុន សែន និង​លោក ហ៊ុន ម៉ាណែត ប្រកាស​គាំទ្រ​ចិន ដោយ​ឥត​លក្ខខណ្ឌ​ទាំង​កិច្ច​សហប្រតិបត្តិការ​សេដ្ឋកិច្ច​ពាណិជ្ជកម្ម ការ​ទទួល​ជំនួយ​ពី​ចិន​ដោយ​ឥត​លក្ខខណ្ឌ»

អ្នកឃ្លាំមើល លើកឡើង​ថា បើ​កម្ពុជា​នៅតែ​គ្មាន​ការ​ឆ្លើយតប​ជា​វិជ្ជមាន​ពាក់ព័ន្ធ​ការ​ស្ដារ​ប្រជាធិបតេយ្យ ហើយ​បែរ​មក​បង្កើន​ទំនាក់ទំនង​កាន់តែ​ស្អិត​ល្មួត​ជាមួយ​ចិន កម្ពុជា​មិន​​​ត្រឹមតែ​មិន​អាច​រក្សា​ជំហរ​អព្យាក្រឹតភាព​នោះ​ទេ ប៉ុន្តែ​នឹង​រង​ការ​រិះគន់​កាន់តែ​ខ្លាំង​ថា កម្ពុជា​ក្រោម​ការ​ដឹកនាំ​ដោយ​លោក ហ៊ុន សែន ដឹកនាំ​ប្រទេស​តាម​លំនាំ​បែប​កុម្មុយនិស្ត និង​កាន់តែ​ផ្ដាច់ការ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។