លោកនាយករដ្ឋមន្ត្រី ហ៊ុន សែន អះអាងនៅថ្ងៃទី១៦ ធ្នូថា ការធ្វើសមយុទ្ធយោធាជាមួយប្រទេសវៀតណាមក្នុងខេត្តស្វាយរៀង គឺដើម្បីសង្គ្រោះមហន្តរាយឆ្លងព្រំដែន។ លោកបញ្ជាក់ទៀតថា សមយុទ្ធនេះជាគំនិតផ្ដួចផ្ដើមរបស់លោកផ្ទាល់។
ប្រមុខរដ្ឋាភិបាលកម្ពុជា លោក ហ៊ុន សែន បកស្រាយថា សមយុទ្ធយោធាជាមួយវៀតណាម ដែលគ្រោងប្រព្រឹត្តទៅនៅថ្ងៃទី១៨ ធ្នូខាងមុខនេះ ពុំមែនជាការឈ្លានពានរបស់វៀតណាមទេ ប៉ុន្តែជាគំនិតរបស់លោកក្នុងពង្រឹងកិច្ចសហប្រតិបត្តិការជាមួយប្រទេសជិតខាងក្នុងការទប់ស្កាត់គ្រោះមហន្តរាយឆ្លងកាត់ព្រំដែន ដូចជា ភ្លើងឆេះព្រៃ និងទឹកជំនន់ ជាដើម។ លោកអះអាងទៀតថា សមយុទ្ធយោធានេះធ្វើឡើងដោយមានកិច្ចព្រមព្រៀងត្រឹមត្រូវ ហើយលោកថា ប្រទេសដទៃនៅលើពិភពលោកក៏មានសមយុទ្ធយោធាស្រដៀងគ្នានេះដែរ៖ «គំនិតផ្ដួចផ្ដើមរបស់ខ្ញុំ គឺចង់ឱ្យមានសមយុទ្ធឆ្លងកាត់ទល់ដែលនេះ យើងត្រូវមានអន្តរាគមន៍ ពីខាងយើងផង ពីខាងភាគីប្រទេសជិតខាងផង ដើម្បីស្រោចស្រង់សភាពការណ៍សន្តិសុខ។ ព្រំដែនយើងនៅតែជាព្រំដែន គ្រាន់តែជានិច្ចកាល ប្រតិបត្តិការរួមគ្នា ដើម្បីដោះស្រាយបញ្ហា កុំឱ្យមានការភ័ន្តច្រឡំថា វៀតណាម ឈ្លានពាន ឡាវឈ្លានពាន ឬក៏ថៃឈ្លានពាន។ ដំបូងធ្វើជាមួយវៀតណាម ប៉ុន្មានថ្ងៃទៀតចាប់ផ្ដើមសកម្មភាពនេះ » ។
លោក ហ៊ុន សែន ថ្លែងបែបនេះ ដើម្បីឆ្លើយតបនឹងមតិរិះគន់ និងការព្រួយបារម្ភនានា ជុំវិញការអនុញ្ញាតឱ្យកងទ័ពវៀតណាមឆ្លងដែនចូលមកក្នុងទឹកដីកម្ពុជា ត្រង់ភូមិសាស្ត្រស្រុកចន្ទ្រា ខេត្តស្វាយរៀង។
ទោះជាមានការបកស្រាយពីប្រមុខរដ្ឋាភិបាលបែបនេះក្តី ក៏ពលរដ្ឋរស់នៅព្រំដែនកម្ពុជាវៀតណាម ក្នុងស្រុកចន្ទ្រា ថ្លែងសុំមិនបញ្ចេញឈ្មោះ ប្រាប់អាស៊ីសេរីថា ការធ្វើសមយុទ្ធយោធារវាងប្រទេសទាំងពីរនេះ អាជ្ញាធរខ្មែរ មិនបានជូនដំណឹងប្រាប់ពលរដ្ឋឱ្យបានទូលំទូលាយនោះទេ ដែលជាហេតុធ្វើឱ្យពលរដ្ឋមួយចំនួនភ័យខ្លាច៖ «ឆ្ងល់បានចេះតែសួរតៗ គ្នាទៅ គេថា ធ្វើអី ? គេថា សមយុទ្ធៗ ពលរដ្ឋខ្លះគាត់អត់ដឹងថា សមយុទ្ធអីផងហ្នឹង។ ទី១ ទូរទស្សន៍ ទី២ វិទ្យុ និងទី៣រដ្ឋអំណាចហ្នឹង នៅភូមិ / ឃុំយើងហ្នឹង។ យើងផ្សព្វផ្សាយអ៊ីចឹងទៅ ដឹងហើយអាហ្នឹងបានទូលំទូលាយ »។
ប្រធានអង្គការសម្ព័ន្ធគណនេយ្យភាព សង្គមកម្ពុជា លោក សន ជ័យ ចង់ឃើញ សកម្មភាពទាំងអស់នេះធ្វើឡើងដោយ មានការផ្សព្វផ្សាយឱ្យបានទូលំទូលាយ ដើម្បីចៀសវាងកុំឱ្យមានការយល់ច្រឡំ និងព្រួយបារម្ភពីហេតុផលផ្សេងៗ។ លោកថា កង្វះព័ត៌មានស្ដីពីបញ្ហានេះ គឺជាចំណុច ដែលត្រូវកែលម្អឡើងវិញ ដោយសារកន្លងទៅ លោកសង្កេតឃើញថា វត្តមានជនជាតិវៀតណាម មកតាំងទីលំនៅរយៈពេលខ្លីក្នុងប្រទេសកម្ពុជា ក្រោមហេតុផលស្វែងរកអដ្ឋិធាតុ គ្មានការបរិច្ឆេទច្បាស់លាស់៖ «វត្តមានរបស់កងទ័ពវៀតណាមហ្នឹង មានការបញ្ជាក់ពីពេលវេលា ពេលណាៗ ដែលពួកគាត់ឱ្យច្បាស់អាហ្នឹង ទើបជារឿងមួយដែរល្អ ហើយបើមកហើយទៅវិញ វាគ្មានអីប៉ះពាល់ដល់អធិបតេយ្យ របស់ប្រទេសជិតខាងទេ ប៉ុន្តែដែលគេបារម្ភវត្តមាន កងទ័ពទាំងអស់នោះ មិនមានការបញ្ជាក់ជាលាយលក្ខណ៍អក្សរណាមួយ ឱ្យបានច្បាស់លាស់ ជាពិសេសគឺ កម្រិតនៃការទទួលបានព័ត៌មានហ្នឹងវាតិចតួច ហើយក្រោយពេលដែលមានប្រតិកម្មពីពលរដ្ឋទៅ បានមានការបំភ្លឺ ហើយបំភ្លឺផ្ទាល់មាត់ បំភ្លឺយកទៅចុះផ្សាយតាមសារព័ត៌មាន វានៅមិនទាន់គ្រប់គ្រាន់ » ។
លោកនាយករដ្ឋមន្ត្រី ហ៊ុន សែន បញ្ជាក់បន្ថែមថា ក្រៅពីជាមួយវៀតណាម កម្ពុជាក៏នឹងរៀបចំសមយុទ្ធយោធាទប់ស្កាត់គ្រោះមហន្តរាយបែបនេះជាមួយប្រទេសថៃ និងឡាវ ដូចគ្នាដែរ ដើម្បីបង្កើនការទុកចិត្តគ្នាទៅវិញទៅមក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។