លោក ហ៊ុន សែន ថា ចង់​បង្កើន​ទំនាក់ទំនង​នយោបាយ និង​វិនិយោគ​ជាមួយ​តួកគី​ដោយ​ស្ថានភាព​នយោបាយ​ស្រដៀង​គ្នា

ដោយ ទីន ហ្សាការីយ៉ា
2018-10-21
អ៊ីម៉ែល
មតិ
Share
បោះពុម្ព
មេដឹកនាំ​របប​ក្រុង​ភ្នំពេញ លោក ហ៊ុន សែន (ឆ្វេង) និង​លោក ប៊ីណាលី យីដីរីម (Binali Yıldırım) ប្រធាន​រដ្ឋសភា និង​ជា​អតីត​នាយក​រដ្ឋមន្ត្រី​តួគី (ស្ដាំ) ក្នុង​ជំនួប​នា​ប្រទេស​តួគី កាល​ពី​ថ្ងៃ​ទី២០ ខែ​តុលា ឆ្នាំ​២០១៨។
មេដឹកនាំ​របប​ក្រុង​ភ្នំពេញ លោក ហ៊ុន សែន (ឆ្វេង) និង​លោក ប៊ីណាលី យីដីរីម (Binali Yıldırım) ប្រធាន​រដ្ឋសភា និង​ជា​អតីត​នាយក​រដ្ឋមន្ត្រី​តួគី (ស្ដាំ) ក្នុង​ជំនួប​នា​ប្រទេស​តួគី កាល​ពី​ថ្ងៃ​ទី២០ ខែ​តុលា ឆ្នាំ​២០១៨។
Photo courtesy of Hun Sen Facebook page

មេដឹកនាំ​របប​ក្រុងភ្នំពេញ លោក ហ៊ុន សែន បញ្ជាក់​ថា របប​លោក​ចង់​បង្កើន​ទំនាក់ទំនង​នយោបាយ និង​វិនិយោគិន ជាមួយ​រដ្ឋាភិបាល​ប្រទេស​តួកគី (Tukey) ដោយសារតែ​ប្រទេស​ទាំងពីរ​មាន​ស្ថានភាព​នយោបាយ​ស្រដៀង​គ្នា។ អ្នកវិភាគ​នយោបាយ យល់​ថា លោក ហ៊ុន សែន មិន​អាច​បញ្ចុះបញ្ចូល​នយោបាយ និង​ទាក់ទាញ​អ្នក​វិនិយោគ​ពី​ប្រទេស​តួកគី បាន​ច្រើន​ទេ បើ​ទោះ​ជា​សម្លឹង​ឃើញ​ហេតុផល​នយោបាយ​របស់​រដ្ឋាភិបាល​តួកគី កំពុង​មាន​ភាព​ប្រទូស្តប្រទាំង​ជាមួយ​សហរដ្ឋអាមេរិក​ក៏ដោយ។

អ្នកវិភាគ​នយោបាយ និង​អ្នកឃ្លាំមើល​កម្ពុជា ថា គម្រោង​លោក ហ៊ុន សែន អាច​កំពុង​ស្ថិត​ក្នុង​ការ​ពិចារណា​របស់​រដ្ឋាភិបាល​តួកគីនៅ​ឡើយ។ អ្នកវិភាគ​នយោបាយ លោក ហង្ស វិទូ យល់ថា ទំនាក់ទំនង​របស់​របប​ក្រុងភ្នំពេញ ជាមួយ​រដ្ឋាភិបាល​ប្រទេស​តួកគី ជា​ទំនាក់ទំនង​ធម្មតា ហើយ​រដ្ឋាភិបាល​ប្រទេស​តួកគី នឹង​មិន​អាច​បង្កើត​ទំនាក់ទំនង​ការទូត​ខ្លាំង ឬ​បង្កើន​ការ​វិនិយោគ ជាមួយ​កម្ពុជា ព្រោះតែ​ហេតុផល ចរន្ត​ការ​ធ្វើ​នយោបាយ​ប្រហាក់ប្រហែល​គ្នា​បែន​នេះ​នោះ​ទេ៖ «ស្ថានភាព​នៅ​ពេល​នេះ គឺ តួកគី។ នៅ​សល់​តែ​ប៉ុន្មាន​ប្រទេស​ទេ ដែល​មាន​ផលប្រយោជន៍​ជាមួយ​កម្ពុជា តែ​ក៏​មិន​ឈ្លោះ​គ្នា​ជាមួយ​កម្ពុជា​ដែរ។ អ៊ីចឹង​ខ្ញុំ​ជឿជាក់​ថា ប្រទេស​ដែល​នៅ​សេសសល់​ទាំងនេះ គឺជា​គោលដៅ​របស់​កម្ពុជា ដែល​នឹង​ធ្វើ​ការ​ចរចា ដើម្បី​ឲ្យ​បាន​ផលប្រយោជន៍​ទាំង​នយោបាយ សេដ្ឋកិច្ច ការទូត​អ៊ីចឹង​ទៅ​ណា។ ប៉ុន្ដែ​ជា​សរុប ខ្ញុំ​យល់​ឃើញ​ថា បាន​ផល​តិចតួច​ណាស់ បើសិនជា​រំពឹង​១០០% ខ្ញុំ​ថា អាច​បាន​ប្រហែលជា​១០ ឬក៏​២០% អី​ច្រើន​បំផុត»

បន្ទាប់ពី​ទីក្រុង​ប្រ៊ុចសែល ប្រទេស​បែលហ្សិក លោក ហ៊ុន សែន កំពុង​ដឹកនាំ​មន្ត្រី​របប​ក្រុងភ្នំពេញ ទស្សនកិច្ច នៅ​ប្រទេស​តួកគី រយៈពេល​២​ថ្ងៃ គឺ​ចាប់ពី​ថ្ងៃ​ទី​២០ ដល់​ថ្ងៃ​ទី​២២ តុលា។ ដំណើរ​ទស្សនកិច្ច នៅ​ទីក្រុង​អ៊ីស្ដង់បូល (Istanbul) នៃ​សាធារណរដ្ឋ​តួកគី (Tukey) លោក ហ៊ុន សែន បាន​ជួប​ទ្វេភាគី ជាមួយ​ប្រធានាធិបតី តួកគី លោក រ៉េជីប ថាយយ៉ីប អែដូហ្គាន (Recep Tayyip Erdogan) និង​ប្រធានរដ្ឋសភា លោក ប៊ីណាលី យីឌឺរីម (Binary Yidirim)

ថ្លែង​ក្នុង​ពិធី​សំណេះសំណាល​ជាមួយ​សមាគម​និស្សិត​ខ្មែរ​កំពុង​សិក្សា​នៅ​ប្រទេស​តួកគី នៅ​ថ្ងៃ​ទី​២១ តុលា លោក ហ៊ុន សែន បញ្ជាក់​ថា បំណង​របប​ក្រុងភ្នំពេញ ក្នុង​ដំណើរ​ទស្សនកិច្ច​នៅ​ប្រទេស​តួកគី ដើម្បី​រឹតចំណង​ការ​នយោបាយ​ទូត និង​ទាក់ទាញ​អ្នក​វិនិយោគ​តួកគី ទៅកាន់​កម្ពុជា ដោយសារ​ស្ថានភាព​នយោបាយ​នៅ​ប្រទេស​តួកគី និង​នៅ​កម្ពុជា ស្រដៀង​គ្នា គឺ​នៅ​ប្រទេស​តួកគី មាន​រដ្ឋប្រហារ​យោធា មិន​បាន​សម្រេច​មួយ កាល​ពី​ឆ្នាំ​២០១៦ ឯ​នៅ​កម្ពុជា របប​លោក ហ៊ុន សែន បាន​ចោទ​ប្រកាន់​គណបក្សប្រឆាំង ថា​មាន​គម្រោង​ធ្វើ​បដិវត្តន៍​ពណ៌​ដែរ៖ «គោលដៅ​ធំ​បំផុត គឺ​ការ​លើក​កម្ពស់​កម្រិត​ទំនាក់ទំនង​លើ​គ្រប់​វិស័យ។ ជាពិសេស ជំនឿ​ទុកចិត្ត​ផ្នែក​ខាង​នយោបាយ​នៃ​ប្រទេស​ទាំងពីរ ដែល​មាន​ជាមួយគ្នា។ ចំណុច​នេះ គឺជា​ទំនាក់ទំនង​ដែល​ល្អ រវាង​យើង​ជាមួយ​នឹង​តួកគី ហើយ​សភាពការណ៍​យើង នឹង​សភាពការណ៍​តួកគី​នេះ​ទៀតសោត គឺ​ប្រហាក់ប្រហែល​គ្នាៗ។ អ្នក​ទាំងអស់​គ្នា​បាន​ដឹង​ហើយ ហើយ​ប្រហែលជា​អ្នកខ្លះ មក​ក្រោយ​ប្រហែល​មិនបាន​ជួប​ប្រទះ។ ប៉ុន្តែ នៅចាំ​ទេ នៅ​ឆ្នាំ​២០១៦ ពេលនោះ មាន​រដ្ឋប្រហារ​មួយ​មិន​សម្រេច​នៅ​ទីនេះ​... មក​ដល់​ពេល​នេះ ការ​បោស​សំអាត​របស់​រដ្ឋាភិបាល​ទៅលើ​ក្រុម​ប៉ុនប៉ង​ចូលរួម​រដ្ឋប្រហារ​មិនបាន​សម្រេច​មិនទាន់​បញ្ចប់​ទេ។ សម្រាប់​កម្ពុជា ក៏​មាន​រឿង​អកុសល​កើតឡើង​តាមរយៈ​ក្រុម​បដិវត្ត​ពណ៌​ដែល​រាជរដ្ឋាភិបាល​កម្ពុជា តម្រូវ​ត្រូវ​ធ្វើ​សកម្មភាព​ចាំបាច់»

នៅមុន​ដំណើរ​ទស្សនកិច្ច​ទៅ​ប្រទេស​តួកគី កាលពី​ថ្ងៃ​ទី​២ តុលា រដ្ឋាភិបាល​តួកគី បាន​ស្នើ​ជាថ្មី​ឲ្យ​របប​ក្រុងភ្នំពេញ​ធ្វើ​បត្យាប័ន ក្រុម​សមាជិក​ចលនា​សង្គម​អ៊ីស្លាមសេរី (FETO) ៣​នាក់ ដែល​រដ្ឋាភិបាល​តួកគី​ចោទ​ថា ជាប់​ពាក់ព័ន្ធ​នឹង​ការ​ធ្វើ​រដ្ឋប្រហារ កាលពី​ខែ​កក្កដា ឆ្នាំ​២០១៦។ រដ្ឋាភិបាល​តួកគី ក៏​ស្នើ​ឲ្យ​របប​ក្រុងភ្នំពេញ បិទ​សាលា​អន្តរជាតិ​ហ្សាមាន់ (Zaman) នៅ​ក្រុងភ្នំពេញ​ដែរ ដោយសារ តួកគី ចោទ​ថា សាលា​មួយ​នេះ ជា​ភាគហ៊ុន​របស់​មេដឹកនាំ​ចលនា​សង្គម​អ៊ីស្លាម លោក មហាម៉ាត់ ហ្វេធូឡា ហ្គូ​ឡិន (Muhammed Fethullah Gülen ) ដែល​មាន​វ័យ​៧៧​ឆ្នាំ កំពុង​រស់នៅ​សហរដ្ឋអាមេរិក។

នៅ​ថ្ងៃ​ទី​១៩ តុលា នៅ​ទីក្រុង​ប្រ៊ុចសែល លោក ហ៊ុន សែន ប្រកាស​ថា នៅ​អាណត្តិ​ក្រោយ លោក មានបំណង​សុំ​ធ្វើជា​ប្រធាន​ចលនា​ក្រុម​ប្រទេស​មិន​ចូល​បក្ស​សម្ព័ន្ធ។

កាលពី​ថ្ងៃ​ទី​១៧ តុលា របប​ក្រុងភ្នំពេញ ប្រកាស​ថា នៅ​ឆ្នាំ​២០១៩ កម្ពុជា​នឹង​បើក​ស្ថាន​ឯកអគ្គរាជទូត​ប្រចាំ​នៅ​ទីក្រុង​អង់ការ៉ា (Ankara) ប្រទេស​តួកគី ហើយ​ប្រទេស​ទាំងពីរ នឹង​ប្ដេជ្ញា​បង្កើន​ទំហំ​ពាណិជ្ជកម្ម​ទ្វេភាគី​ឲ្យ​ដល់​ចំនួន ៥០០​លាន​ដុល្លារ​អាមេរិក នៅ​ក្នុង​ឆ្នាំ​ខាងមុខ។ លោក ហ៊ុន សែន អះអាង​ថា បច្ចុប្បន្ន​ទំហំ​ពាណិជ្ជកម្ម ចំនួន​ភ្ញៀវ​ទេសចរ និង​ការ​វិនិយោគ របស់​ប្រទេស​ទាំងពីរ គឺ កម្ពុជា តួកគី មាន​ចំនួន​តិចតួច​នៅឡើយ។ ប្រទេស​កម្ពុជា និង​សាធារណរដ្ឋ​តួកគី បាន​ចាប់ផ្ដើម​ទំនាក់ទំនង​ការទូត​ជាមួយគ្នា កាល ពី​ខែ​មិថុនា ឆ្នាំ​១៩៩៤។ នៅ​ឆ្នាំ​២០១៣ សាធារណរដ្ឋ​តួកគី បាន​បើក​ស្ថាន​ឯកអគ្គរដ្ឋទូត​នៅ​រាជធានី​ភ្នំពេញ។ ចំណែក​កម្ពុជា មាន​ស្ថាន​ឯក​អគ្គ​កុងស៊ុល ចំនួន​ពីរ នៅ​សាធារណរដ្ឋ​តួកគី

ប្រធាន​ក្រុមប្រឹក្សា​ឃ្លាំមើល​កម្ពុជា និង​ជា​ប្រធាន​សហភាព​សហជីព​កម្ពុជា លោក រ៉ុង ឈុន យល់ថា បើទោះជា​មានការ​អះអាង​ថា ស្ថានភាព​នយោបាយ​កម្ពុ​ជា និង​តួកគីស្រដៀង​គ្នា ក៏​មិន​អាច​ទាក់ទាញ​វិនិយោគិន​តួកគី​បាន​ច្រើន​ដែរ ហើយ​រដ្ឋាភិបាល​ប្រទេស​តួកគី អាច​កំពុង​ស្ថិត​ក្នុង​ស្ថានភាព​ពិចារណា​នៅ​ឡើយ ក្នុង​ការ​បង្កើន​ទំនាក់ទំនង​នយោបាយ​ជិត​ស្និត​ជាមួយ​របប​ក្រុងភ្នំពេញ ព្រោះ​បច្ចុប្បន្ន របប​ក្រុងភ្នំពេញ កំពុង​រង​ការ​ថ្កោលទោស​ពី​សហគមន៍​អន្តរជាតិ៖ «ខ្ញុំ​មើល​ឃើញ​ថា តួកគី ក៏​គេ​គិត​ពី​ចរន្ត​ពិភពលោក​ដែរ។ ទោះបី​មានការ​អញ្ជើញ​នាយករដ្ឋមន្ត្រី​ឲ្យ​ទៅ​ទស្សនកិច្ច​នៅ​តួកគី​ក៏ដោយ។ ក៏ប៉ុន្ដែ​គេ​ក៏​មើល​ចរន្ត​អន្តរជាតិ​ផង​ដែរ។ ប្រសិនបើ​កម្ពុជា​យើង​នៅតែ​ទទួល​ការ​ថ្កោលទោស​បន្ត​បន្ទាប់ពី​បណ្ដា​ប្រទេស​លោក ខាងលិច។ ដូច្នេះ​យើង​គិត​ថា ការ​បង្កើន​ទំនាក់ទំនង​ហ្នឹង វា​មានការ​លំបាក សម្រាប់​កម្ពុជា ឬមួយ​ការ​វិនិយោគទុន​តួកគី ឲ្យ​មក​វិនិយោគ​នៅ​កម្ពុជា ទោះបី​លោកនាយក​រដ្ឋមន្ត្រី​អះអាង​ថា ស្ថានភាព​តួកគី​ប្រហាក់ប្រហែល​នឹង​កម្ពុជា​យើង​ក៏ដោយ»

លោក ហ៊ុន សែន នឹង​ចាក​ចេញពី​ប្រទេស​តួកគី នៅ​ថ្ងៃ​ទី​២២ តុលា ហើយ​បន្ត​ដំណើរ​ទៅ​ទីក្រុង​ហ្សឺណែវ ប្រទេស​ស្វីស ដើម្បី​ចូលរួម​សន្និបាត​អង្គការសហប្រជាជាតិ​ស្ដីពី​ពាណិជ្ជកម្ម និង​ការ​អភិវឌ្ឍ ចាប់​ពី​ថ្ងៃ​ទី​២២ ដល់​ថ្ងៃ​ទី​២៤ តុលា៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (2)
Share

ថុល

ពី ភ្នំពេញ

ហ៊ុនសែននិយាយថាស្ថានភាពនយោបាយស្រដៀងគ្នាមិនខុសទេពីព្រោះអ្នកទាំងពីរជាជនផ្ដាច់ការដូចគ្នា។

Oct 23, 2018 06:05 AM

blind man VS cripple man and who's gonna win...

Walk and talk like dictators...comradeship run to see comradeship...serial killer run to see serial killer...poor man run to see poor man...bad man run to see bad man...fascist dictator run to see fascist dictator...rapist run to see rapist...corrupter run to see corrupter...coup d'etat bloodshed run to see coup d'etat bloodshed...fascism run to see fascism...authoritarianism run to see authoritarianism...mafia run to see mafia...despotism run to see despotism...barbarism run to see barbarism...evildoer run to see evildoer...communism run to see communism...failure leader run to see failure leader...useless/worthless run to see useless/worthless....blind man run to see cripple man,and who gonna to make a business with all these bad guys above???????

Oct 22, 2018 03:55 PM

គេហទំព័រ​ទាំងមូល