ជនភៀសខ្លួនម្នាក់ក្នុងចំណោមជនភៀសខ្លួន៦នាក់ កំពុងជាប់ឃុំនៅពន្ធនាគារព្រៃស គឺលោកស្រី ហុង អាន ផ្ញើលិខិតចេញពីពន្ធនាគារ ពឹងឱ្យសកម្មជនបក្សប្រឆាំង ជួយមើលថែកូនលោកស្រីផង។ សកម្មជនបក្សប្រឆាំងរូបនេះ នៅតែបង្ហាញជំហររឹងមាំ និងមិនតក់ស្លុត បើទោះជាលោកស្រី កំពុងជាប់ពន្ធនាគារ ហើយសកម្មជនបក្សប្រឆាំងផ្សេងទៀតកំពុងរងការគៀបសង្កត់និងធ្វើទុក្ខបុកម្នេញពីរដ្ឋាភិបាលត្រកូលហ៊ុនក្ដី។
លោកស្រី ហុង អាន ចង់ឱ្យកូនប្រុសរបស់ខ្លួនដែលកំពុងរស់នៅប្រទេសថៃបានចូលរៀន បើទោះជាគ្មានម្ដាយនៅក្បែរមើលថែក៏ដោយ។ ខ្លឹមសារក្នុងលិខិតដែលបានផ្ញើចេញពីពន្ធនាគារព្រៃស កាលថ្ងៃទី១៦ ខែធ្នូ របស់លោកស្រី ហុង អាន ក៏បានផ្ដាំដល់សកម្មជន និងជនភៀសខ្លួនផ្សេងទៀត ត្រូវរឹងមាំនិងកុំតក់ស្លុត។
កូនស្រីរបស់លោកស្រី ហុង អាន គឺលោកស្រី សៀន នួន ឱ្យវិទ្យុអាស៊ីសេរីដឹងនៅថ្ងៃទី១៧ ខែធ្នូ ថាម្ដាយលោកស្រី នៅតែមានស្មារតីរឹងមាំ និងរក្សាជំហរថា លោកស្រីគ្មានកំហុស មិនបានធ្វើសកម្មភាពខុសច្បាប់ដូចការចោទប្រកាន់របស់តុលាការឡើយ។ កូនស្រីរបស់លោកស្រី ហុង អាន រូបនេះ ស្នើទៅ UNHCR និងអង្គការសិទ្ធិមនុស្សជាតិ និងអន្តរជាតិ ជំរុញទៅរដ្ឋាភិបាលកម្ពុជា ឱ្យដោះលែងម្ដាយលោកស្រី និងជនភៀសខ្លួនឱ្យទទួលបានសេរីភាពឡើងវិញ។
លោក សៀន នួន៖ «ទឹកចិត្តគាត់(លោកស្រី ហុង អាន)នៅតែមោះមុតដដែលហ្នឹង គាត់នៅតែតស៊ូបន្តទៀតដដែល។ គាត់អត់មានទន់ទោចុះញ៉ម នៅតែរឹងប៉ឹងហ្មង»។
លោកស្រ ហុង អាន ជាជនភៀសខ្លួនម្នាក់ចំណោមជនភៀសខ្លួនទាំង៦នាក់ដែលត្រូវបានអាជ្ញាធរថៃ ចាប់ខ្លួននិងបញ្ជូនទៅឱ្យអាជ្ញាធររដ្ឋាភិបាលលោក ហ៊ុន ម៉ាណែត កាលពីថ្ងៃទី២៥ ខែវិច្ឆិកា ដោយតុលាការចោទប្រកាន់ពួកគាត់ពីបទ «អំពើក្បត់ជាតិ»។ ទោះយ៉ាងណា អង្គការសិទ្ធិមនុស្ស ចាត់ទុកការបញ្ជូនជនភៀសខ្លួន នេះជាការធ្វើទុក្ខបុកម្នេញ និងរំលោភសិទ្ធិមនុស្ស។
ជនភៀសខ្លួនកំពុងរស់នៅប្រទេសថៃ លោក ជាតិ ខេមរា ប្រាប់វិទ្យុអាស៊ីសេរីថា លោកស្រី ហុង អាន បានផ្ដាំផ្ញើពីពន្ធនាគារឱ្យលោកជួយមើលថែកូនរបស់លោកស្រី ដូច្នេះ លោកនឹងបន្តជួយមើលថែកូនលោកស្រី ហុង អាន ឱ្យដូចកូនៗរបស់លោកដែរ។ ជនភៀសខ្លួនរូបនេះ ស្នើទៅUNHCR ឱ្យដាក់គំនាបទៅរដ្ឋាភិបាលថៃ ឱ្យបញ្ឈប់ការចាប់ខ្លួនជនភៀសខ្លួនបញ្ជូនទៅឱ្យរដ្ឋាភិបាលកម្ពុជា តទៅទៀត។
លោក ជាតិ ខេមរា៖ «កូនគាត់(កូនរបស់លោកស្រី ហុង អាន)នៅខ្ញុំដដែលទេ ខ្ញុំនៅមើលថែរហូត លុះទាល់តែបានចេញទៅប្រទេសទី៣ ឬយ៉ាងណាតាមជាក់ស្ដែង មួយទៀតទោះមិនបានចេញទៅក៏ដោយ ក៏ខ្ញុំនៅតែរក្សាគោលជំហរ និងមើលថែឱ្យមានអនាគតល្អដែរ»។
ក្រុមអង្គការសិទ្ធិមនុស្ស លើកឡើងថា ប្រទេសថៃ មិនមែនជាទីកន្លែងមានសុវត្ថិភាពដល់ជនភៀសខ្លួនទៀតហើយ។ ពួកគេទាមទារឱ្យរដ្ឋាភិបាលកម្ពុជា និងថៃត្រូវងាកមកគោរពសិទ្ធិមនុស្ស និងបញ្ឈប់ការធ្វើទុក្ខបុកម្នេញលើជនភៀសខ្លួនជាបន្ទាន់។
នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ (LICADHO) លោក អំ សំអាត លើកឡើងថា ជនភៀសខ្លួនទាំង ៦នាក់នោះ ត្រូវបានធានា និងការពារ ដោយអនុសញ្ញាស្ដីពីសិទ្ធិជនភៀសខ្លួន។ លោកសង្កេតឃើញថាចំណាត់ការរបស់អាជ្ញាធរថៃនេះរងការរិះគន់ខ្លាំងពីសហគមន៍ជាតិ និងអន្តរជាតិថា ជាការចាប់ខ្លួនទាំងបំពានច្បាប់សាកល និងរំលោភសិទ្ធិមនុស្ស។ អ្នកការពារសិទ្ធិមនុស្សរូបនេះ ចង់ឃើញថា រដ្ឋាភិបាលកម្ពុជា ពិចារណា ឡើងវិញក្នុងការដោះលែងជនភៀសខ្លួនទាំង៦នាក់ និងអ្នកទោសមនសិការផ្សេងទៀតដើម្បីបន្ធូរបន្ថយស្ថានការណ៍នយោបាយ និងសិទ្ធិមនុស្សឡើងវិញ។
លោក អំ សំអាត៖ «ការចោទប្រកាន់ និងការឃុំខ្លួន ដែលធ្វើឱ្យគាត់(ជនភៀសខ្លួន)ឃ្លាតឆ្ងាយពីក្រុមគ្រួសារ ឬកូនតូចអីហ្នឹង សុទ្ធតែទុក្ខសោកមួយទៀតសម្រាប់ក្រុមគ្រួសារពួកគាត់។ អ៊ីចឹងហើយ ចំណុចហ្នឹងហើយ ដែលយើងជាអង្គការសង្គមស៊ីវិល ផ្នែកសិទ្ធិមនុស្ស នៅតែទទូចសុំឱ្យពិចារណា ទៅលើករណីហ្នឹងជាពិសេសរឿងCLVប្រសិនជាអាចឱ្យពួកគាត់មានសេរីភាពវិញគឺជារឿងល្អ»។
ទាក់ទងលិខិតរបស់លោកស្រី ហុង អាន និងការលើកឡើងរបស់អ្នកការពារសិទ្ធិមនុស្ស វិទ្យុអាស៊ីសេរីមិនអាចសុំការឆ្លើយតបពីប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា និងអ្នកនាំពាក្យគណបក្សប្រជាជនកម្ពុជា លោក សុខ ឥសាន បានទេនៅថ្ងៃទី១៧ ខែធ្នូ។ នេះជាលើកទី២ ហើយរដ្ឋាភិបាល ត្រកូល ហ៊ុន សហការជាមួយរដ្ឋាភិបាល ចាប់បញ្ជូនជនភៀសខ្លួនទ្រង់ទ្រាយធំ ពីប្រទេសថៃ ទៅដាក់ពន្ធនាគារនៅប្រទេសកម្ពុជាវិញ ដែលអ្នកការពារសិទ្ធិមនុស្សហៅថា ជាទង្វើគាបសង្កត់ឆ្លងដែន រំលោភច្បាប់អន្តរជាតិក្នុងទិសដៅបំបិទមាត់អ្នករិះគន់ ឬអ្នកដែលមាននិន្នាការផ្ទុយរដ្ឋាភិបាល។ យ៉ាងហោចណាស់ជនភៀសខ្លួនដែលជាសកម្មជនបក្សប្រឆាំង១០នាក់ត្រូវបានសមត្ថកិច្ចចាប់បញ្ជូនទៅកម្ពុជាវិញតាមសំណើរដ្ឋាភិបាលត្រកូលហ៊ុន គិតចាប់ពីឆ្នាំ២០២១មកដល់ចុងឆ្នាំ២០២៤៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។