លោក កឹម សុខា បន្ត​ជួប​ជាមួយ​ឯក​អគ្គ​រដ្ឋ​ទូត​អាល្លឺម៉ង់ និង​អូស្ត្រាលី

ដោយ ខែ សុណង
2019-11-13
អ៊ីម៉ែល
មតិ
Share
បោះពុម្ព
លោក កឹម សុខា ប្រធាន​គណបក្ស​សង្គ្រោះ​ជាតិ ក្នុង​ពេល​ទទួល​ជួប​ឯកអគ្គរាជទូត​អូស្រ្តាលី អ្នកស្រី អេនជេឡា ខូខូរេន (Angela Corcoran) នៅ​គេហដ្ឋាន​របស់​លោក នា​រាជធានី​ភ្នំពេញ​នៅ​ថ្ងៃ​ទី១២ ខែ​វិច្ឆិកា ឆ្នាំ២០១៩។
លោក កឹម សុខា ប្រធាន​គណបក្ស​សង្គ្រោះ​ជាតិ ក្នុង​ពេល​ទទួល​ជួប​ឯកអគ្គរាជទូត​អូស្រ្តាលី អ្នកស្រី អេនជេឡា ខូខូរេន (Angela Corcoran) នៅ​គេហដ្ឋាន​របស់​លោក នា​រាជធានី​ភ្នំពេញ​នៅ​ថ្ងៃ​ទី១២ ខែ​វិច្ឆិកា ឆ្នាំ២០១៩។
រូប៖ ហ្វេសប៊ុក Chantha Muth

ប្រធានគណបក្សសង្គ្រោះជាតិ លោក កឹម សុខា បន្ត​ជួប​ជា​មួយ​ឯក​អគ្គ​រដ្ឋ​ទូត​អាល្លឺម៉ង់ និង អូស្ត្រាលី ដោយ​​ពិភាក្សា​ផ្តោត​លើ​ការ​កសាង​ប្រជាធិបតេយ្យ​នៅ​កម្ពុជា និង​​ការ​ជួយ​ជំរុញ​ឲ្យ​លោក កឹម សុខា ទទួល​បាន​សិទ្ធិ​សេរីភាព​ពេញលេញ​ឡើង​វិញ។ ជំនួបរវាងលោក កឹម សុខា ជាមួយ​ឯក​អគ្គ​រដ្ឋ​ទូត​ប្រទេស​សេរី​ធំៗ ទាំង​ពីរ​នេះ​ គឺ​​បន្ទាប់​​ពី​​តុលាការ​​របប​​ក្រុង​​ភ្នំពេញ បាន​​បន្ធួរ​បន្ថយ​លក្ខខណ្ឌ​​មួយ​​ចំនួន​​ដល់​​រូប​​លោក។

នេះជាថ្ងៃទី២ហើយដែលឯកអគ្គរដ្ឋទូតបរទេស បានចូលសួរសុខទុក្ខលោក កឹម សុខាដល់ផ្ទះរបស់ លោក ស្ថិតនៅ​ខណ្ឌ​ទួល​គោក ក្រុង​ភ្នំពេញ​។ ក្នុង​ជំនួប​ជាមួយ​ឯក​អគ្គរដ្ឋទូត​អាល្លឺម៉ង់ និង​ឯក​អគ្គ​រដ្ឋ​ទូតអូស្ត្រាលីនៅថ្ងៃទី១២ ខែវិច្ឆិកា លោក កឹម សុខា ពុំ​បាន​ថ្លែង​សារ ឬ​និយាយ​អ្វី​ប្រាប់​អ្នក​សារ​ព័ត៌មាន​​នោះ​​ទេ។ មេបក្សប្រឆាំងរូបនេះ គ្រាន់​តែ​ឈរ​ឲ្យ​អ្នក​សារព័ត៌មាន​ថត​រូប​មួយ​ភ្លែត ហើយ​បាន​​ចូល​ទៅ​ក្នុង​ផ្ទះ​វិញ។

ឯកអគ្គរដ្ឋទូតអូស្ត្រាលីប្រចាំកម្ពុជា អ្នកស្រី អេនជេឡា ខូខូរេន (Angela Corcoran) ថ្លែង​ប្រាប់​ក្រុម​អ្នក​សារព័ត៌មាន​យ៉ាង​ខ្លី​ក្រោយ​​បញ្ចប់​​ការ​សួរ​សុខ​ទុក្ខ​​គ្នា​ជាង ​១​ម៉ោង​​នោះ​ថា ការ​​បន្ធូរ​​បន្ថយ​​លក្ខខណ្ឌ​​​ស្ថិត​​​ក្រោម​​​ការ​​​ត្រួត​​ពិនិត្យ​​​ករណី​​​លោក កឹម សុខា គឺ​ជា​ការ​វិវឌ្ឍន៍​តិចតូច​មួយ។ អ្នកស្រី​បញ្ជាក់​ថា ប្រទេសអូស្ត្រាលី សង្ឃឹមថា រដ្ឋាភិបាលកម្ពុជា នឹង​ទម្លាក់​បទ​ចោទ​លើ​លោក កឹម សុខា និង​​ផ្តល់​សិទ្ធិ​សេរីភាព​ពេញលេញ​ជូន​លោក​ឡើង​វិញ​ក្នុង​ការ​ធ្វើ​នយោបាយ។

ចំណែកឯកអគ្គរដ្ឋទូតអាល្លឺម៉ង់ប្រចាំកម្ពុជា លោក គ្រីស្ទាន ប៊ឺហ្គ័រ (Christan Berger) វិញ ពុំ​បាន​ធ្វើ​អត្ថាធិប្បាយ​អ្វី​ជា​មួយ​អ្នក​សារព័ត៌មាន​នោះ​ទេ ក្រោយ​ជំនួប​ជាមួយ​លោក កឹម សុខា។

នាយក​ខុទ្ទកាល័យ​លោក ​កឹម សុខា គឺ លោក​មុត ចន្ថា ប្រាប់អ្នកសារព័ត៌មានថា ក្នុង​ជំនួប​ទាំង​ពីរ​នេះ គឺ​ជា​ការ​សួរ​សុខ​ទុក្ខ​គ្នា ការ​ពិភាក្សា​គ្នា​ជា​លក្ខណៈ​ឯកជន និង​ផ្តោត​លើ​ការ​ពិភាក្សា​​ផ្លាស់​ប្តូរ​​យោបល់​​ពី​​ដំណើរ​​ការ​​លទ្ធិ​​ប្រជាធិបតេយ្យ​ឲ្យ​បាន​រឹងមាំ​នៅ​ក្នុង​ប្រទេស​កម្ពុជា៖ «គាត់​​បាន​​សម្តែង​​ការ​​គួរ​​សម សួរ​សុខ​ទុក្ខ និង​​ពិភាក្សា​​អំពី​​បញ្ហា​​សុខភាព ហើយ​ក៏​បាន​ផ្លាស់ប្តូរ​យោបល់​គ្នា​អំពី​ទស្សនៈ​​វិស័យ​​ទៅ​​មុខ ដើម្បី​​ធ្វើ​​យ៉ាង​​ម៉េច​​ជួយ​​គ្នា ទាំង​អស់​ដើម្បី​កសាង​ដំណើរ​ការ​ប្រជាធិបតេយ្យ​នៅ​កម្ពុជា​ឲ្យ​​កាន់​​តែ​​រឹងមាំ និង​​មាន​​គ្រប់​​ភាគី​​ទាំង​​អស់»

លោក មុត ចន្ថា ឲ្យដឹងដែរ​ថា ថ្វី​ដ្បិត​ឯកអគ្គ​រដ្ឋទូត​អាល្លីម៉ង់ មិន​បាន​ថ្លែង​អ្វី​ជាមួយ​អ្នក​សារ​ព័ត៌មាន ក៏​ដោយ ក៏​ក្នុង​ជំនួប​បិទ​ទ្វារ​នោះ លោក គ្រីស្ទាន ប៊ឺហ្គ័រ បាន​លើក​ឡើង​ថា ជំហរ​របស់​អាល្លឺម៉ង់ ដូច​គ្នា​នឹង​សេចក្តី​ថ្លែង​ការណ៍​របស់​សហភាព​អឺរ៉ុប ដែល​បាន​ចេញ​កាល​ពី​ថ្ងៃ​ទី១១ ខែវិច្ឆិកា​ គឺចង់​ឃើញ​អាជ្ញាធរ​កម្ពុជា​ ចាត់​វិធានការណ៍​ជាបន្ទាន់​ បើកចំហ​រលំ​ហរ​នយោបាយ​ បង្កើត​ឲ្យ​មាន​នូវ​លក្ខខណ្ឌ​ចាំបាច់​នានា​ដើម្បីឲ្យ​មាន​គណបក្ស​ប្រឆាំង​តាម​បែប​ប្រជាធិបតេយ្យ​ និង​ជឿ​ទុកចិត្ត​បាន​ ហើយ​ចាប់ផ្តើម​ដំណើរការ​ផ្សះ​ផ្សារ​ជាតិ​តាមរយៈ​កិច្ច​សន្ទនា​ ដោយពិត​ប្រាកដ​ និង​មានការ​ចូលរួម​ពី​គ្រប់​ភាគី​ពាក់ព័ន្ធ​ទាំងអស់​។ សហភាពអឺរ៉ុប ក៏ចង់​ឃើញ​ឲ្យ​មានការ​ដោះលែង​លោក​ កឹម​ សុខា​ ទាំងស្រុង​ និង​មានការ​ផ្តល់​សិទ្ធិ​នយោបាយ​ឲ្យ​លោក​ឡើងវិញ​ ដើម្បីឲ្យ​លោក​ កឹម​ សុខា​ អាច​បំពេញ​តួនាទី​ពេញលេញ​ក្នុង​ជីវិត​នយោបាយ​​របស់​លោក។‍‍‍‍ សហភាព​អឺរ៉ុប​ ក៏​រំពឹង​ចង់​ឃើញ​អាជ្ញាធរ​កម្ពុជា​ ផ្តល់​សិទ្ធិ​នយោបាយ​ដល់​គ្រប់​សមាជិក​គណបក្ស​ប្រឆាំង​ទាំងអស់​ដែល​ត្រូវ​បាន​ហាមប្រាម​មិន​ឲ្យ​ធ្វើនយោបាយ​ និង​ឲ្យ​មានការ​ដោះលែង​ ក្រុម​អ្នកគាំទ្រ​ និង​សកម្មជន​គណបក្ស​ប្រឆាំង​ទាំងអស់​ ដែល​អាជ្ញាធរ​កម្ពុជា​បាន​ចាប់​ និង​ឃុំខ្លួន​ពួកគេ​ជាបន្តបន្ទាប់​នា​រយៈពេល​ចុងក្រោយ​នេះ។

កាលពីថ្ងៃទី១១ ខែវិច្ឆិកា ឯករដ្ឋទូតអាមេរិក និងបារាំង ក៏បានទៅសួរសុខទុក្ខលោក កឹម សុខា ដល់​ផ្ទះ​ដែរ។ ឯក​អគ្គ​រដ្ឋ​ទូត​ប្រទេស​មហា​អំណាច​ទាំងពីរ​នៅ​តែ​សង្ឃឹម និង​នៅ​តែ​ស្នើ​​យ៉ាង​​ទទូច​ដល់​​​រដ្ឋាភិបាល​​កម្ពុជា​​ឱ្យ​​ទម្លាក់​​ចោល​​បទ​ចោទ​ប្រកាន់​​លើ​​លោក កឹម សុខា និង​ដោះ​លែង​​ជន​​​ទាំង​​ឡាយ​​​ណា​ ដែល​​​ត្រូវ​​​បាន​​​​ឃុំ​​ខ្លួន​​​តាម​​​ទំនើង​​ចិត្ត ឬ​​​ដោយ​​​ខុស​​ច្បាប់ ក្នុង​​​នោះ​​​​មាន អ្នក​សារ​ព័ត៌មាន​សកម្ម ជន​​​សង្គម​​ស៊ីវិល ព្រម​​ទាំង​​​អ្នក​គាំទ្រ និង​​សមាជិក​​គណបក្ស​​ប្រឆាំងផងដែរ។

ប្រធានអង្គភាពអ្នកនាំពាក្យរដ្ឋាភិបាល​លោក ផៃ ស៊ីផាន មាន​ប្រសាសន៍​ថា ក្នុង​ដំណាក់​កាល​នេះ រដ្ឋាភិបាល​​មិន​​​យក​​ចិត្ត​​ទុក​​ដាក់ នឹង​មតិ​ទាំងនេះ​ទេ ព្រោះ​គ្រាន់​តែ​ជា​យោបល់ និង​​​ជា​​ក្តី​​បារម្ភ​របស់​​ប្រទេស​​ជា​​មិត្ត​​ប៉ុណ្ណោះ។ លោក​បន្ត​ថា  ករណី​លោក​ កឹម​ សុខា​ និង​មន្ត្រី​បក្ស​ប្រឆាំង​ដទៃទៀត​ គឺ​ជា​​កិច្ចការ​​របស់​​តុលាការ ហើយ​រដ្ឋាភិបាល​មិន​មាន​អំណាច​ទៅ​លូកលាន់​បាន​ទេ។ ទោះ​យ៉ាង​​ណា​ក្តី លោក​​ព្រលយ​​ថា រដ្ឋាភិបាល​អាច​លូក​ដៃ​អន្តរាគមន៍​បាន​ក្នុង​ករណី​សំណុំ​រឿង​នេះ បន្ទាប់​​ពី​​មាន​​សាលក្រម​ស្ថាពរ​​ពី​​តុលាការ៖ «បើ​​សិន​​ជា​​អង្គហេតុ​​​ចោទ​​​ប្រកាន់​​​ថា លោក កឹម សុខា មាន​ទោស។ នេះ​​គឺ​​ចៅក្រម​​លោក​​បន្ត​​ហើយ​​លោក កឹម សុខា មាន​សិទ្ធិ​ប្តឹង​ទៅ​ឧទ្ធរណ៍​ហើយ​មាន​សិទ្ធិ​ប្តឹង​ទៅ​​កំពូល ហើយបើសិនជា​មាន​ទោស​នៅ​តែ​មាន​ទោស​ដដែល។ តើ​​មធ្យោបាយ​​​របៀប​​ម៉េច? ពេល​នោះ​ដល់​រដ្ឋាភិបាល អាច​​ប្រើប្រាស់​​សិទ្ធិ​​នាយក​រដ្ឋមន្ត្រី ដែល​ចែង​​ដោយ​ច្បាប់ ដូច្នេះ​​នាយក​រដ្ឋមន្ត្រី លោក​​ស្នើ​សុំ​ព្រះមហាក្សត្រ​​លើក​​លែង​​ទោស។ នេះ​​ជា​​ដំណើរ​​ការ​​យុត្តិធម៌​​របស់​​កម្ពុជា»

តុលាការ​ក្រុង​ភ្នំពេញ​កាលពី​ថ្ងៃ​ទី១០ វិច្ឆិកា បាន​សម្រេច​កែប្រែ​លក្ខខណ្ឌ​នៃ​កាតព្វកិច្ច​មួយ​ចំនួន​សម្រាប់​លោក កឹម សុខា។ តុលាការ​បាន​អនុញ្ញាត​ឱ្យ​លោក កឹម សុខា អាច​ធ្វើ​ដំណើរ​បាន​នៅ​ក្នុង​ប្រទេស ប៉ុន្តែ​មិន​ឱ្យ​ហួស​ពី​ព្រំប្រទល់​ដែន​របស់​កម្ពុជា​បាន​ឡើយ ហើយក៏​មិន​លោក​ធ្វើ​សកម្មភាព​នយោបាយ​បាន​នោះ​ដែរ។ ក្រៅ​ពី​នេះ តុលាការ​បាន​តម្រូវ​ឱ្យ​លោក​ឆ្លើយតប​នឹង​ការ​កោះ​ហៅ​ពី​គ្រប់​សមត្ថកិច្ច។ លោក កឹម សុខា សម្តែង​ការ​សោក​ស្តាយ​ដែល​តុលាការ​ហាម​លោក មិន​ឲ្យ​ធ្វើ​នយោ បាយ។ លោក​នៅ​តែ​ទាមទារ​ឲ្យ​តុលាការ​ទម្លាក់​បទ​ចោទប្រកាន់លើ លោក និង​អ្នក​ទាំង​ឡាយ ដែល​បាត់​បង់​សិទ្ធិ​សេរីភាព​នយោបាយ។

អ្នកតាមដានបញ្ហានយោបាយនៅកម្ពុជា លើក​ឡើង​ថា កាយវិការ​របស់​ឯក​អគ្គ​រដ្ឋ​ទូត​ប្រទេស​សេរី​ធំៗ ទាំង​នេះ​បង្ហាញ​ថា ប្រទេស​​ទាំង​​នោះ នៅ​តែ​ទទួល​ស្គាល់និងគាំទ្រលោក កឹម សុខា ជា​មេ​ដឹក​នាំ បក្សប្រឆាំង ហើយ​ក៏​បង្ហាញ​កាន់​តែ​ច្បាស់​ថា ពួក​គេ​មិន​ដក​ដៃ​ឡើយ​ក្នុង​ការ​ទាមទារ​ឲ្យ​រដ្ឋាភិបាល ស្តារប្រជាធិបតេយ្យ និងការគោរពសិទ្ធិមនុស្សឡើងវិញ តាមរយៈការដោះលែង និង​បើក​លំហ​សិទ្ធិ សេរីភាពពេញលេញជូនអ្នកទោសនយោបាយទាំងឡាយនៅ​កម្ពុជា។

អ្នកវិភាគ​នយោបាយ លោក បណ្ឌិត ឡៅ ម៉ុងហៃ បញ្ចេញ​មតិ​នៅ​លើ​ហ្វេសប៊ុក​ថា យោង​តាម​ច្បាប់​ស្តីពី​គណបក្ស​នយោបាយ ដែល​ត្រូវ​បាន​ធ្វើ​វិសោធនកម្ម​ជា​បន្ត​បន្ទាប់ មាន​តែ​តុលាការ​កំពូល​ទេ ដែល​មាន​អំណាច​ហាម​ឃាត់​សិទ្ធិ​ធ្វើ​នយោបាយ​របស់​លោក កឹម សុខា មិន​មែន ចៅក្រម​ស៊ើបសួរ​ទេ។លើសពីនេះ លោក​ថា ដីកា​របស់​ចៅក្រម​ស៊ើបសួរ មិន​បាន​កំណត់​រយ:​ពេល​ដែល លោក កឹម សុខា មិន​ត្រូវ​ធ្វើ​សកម្មភាព​នយោបាយ​នោះ​ឡើយ ។ អ្នក​ជំនាញ​ផ្នែក​ច្បាប់​រូប​នេះ បន្ត​ថា ច្បាប់ មិន​បាន​កំណត់​រយ:​ពេល​ដាក់​ជន​ជាប់​ចោទ ក្រោម​ការ​ត្រួត​ពិនិត្យ​របស់​តុលាការ​នោះ​ទេ បើ​គ្មាន​ការ​កាត់​ទោស​ក្នុង​រយ:​ពេល ១៨ខែ​នៃ​ការ​ឃុំ​ខ្លួន​ក្នុង​គុក។ លោក​ថា បើ​ផុត​រយ:​ពេល​នេះ​ តុលាការ​ត្រូវ​ដោះ​លែង​ជន​ជាប់​ចោទ​ឲ្យ​មាន​សេរីភាព​ពេញលេញ​វិញ។ លោក បណ្ឌិត ឡៅ ម៉ុងហៃ យល់​ថា លោក កឹម សុខា គួរ​តែ​ត្រូវ​បាន​ដោះ​លែង​ឲ្យ​មាន​សេរីភាព​តាំង​ពី​ថ្ងៃ​ទី៣ ខែ​មីនា ឆ្នាំ២០១៩ មក​ម៉្លេះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

Wish the EU,IPU,UN,world superpowers,international community and Asian leaders will held this evil Hun Sen accountable at this time.

Free But no free if this evil Hun Sen still in power and no one can be safe and no anyone can trust with all these fascist communism"it always lies liars,cheater,schemes,disrespect,inhumane,traitor,scoundrel,tyrant,buffoon,mafia,serial killer,bloody-hand,dirtiest politic,drug addiction,drug cartel,monster man,crooks,thieves,mental illness,psychopath,anti-democracy system,anti-God or religion,anti-freedom of right,anti-political parties,anti-peace,anti-international community,anti-christ,anti-EBA/GPS policy,anti-pple gathering,anti-reelection,anti-fear international community interfere its rogue govm't affairs etc etc....

Nov 13, 2019 04:00 PM

គេហទំព័រ​ទាំងមូល