លោក កឹម សុខា ប្រធានគណបក្សសង្គ្រោះជាតិ បានដឹកនាំក្រុមមេធាវីរបស់លោក និងមន្ត្រីគណបក្សសង្គ្រោះជាតិមួយចំនួនទៅចូលរួមគោរពវិញ្ញាណក្ខន្ធ ម្ដាយក្មេកលោក ហ៊ុន សែន នៅល្ងាចថ្ងៃទី៥ ឧសភានេះ។
នេះជាលើកទី១ ហើយ ដែលលោក កឹម សុខា ចេញមុខជាសាធារណៈចូលរួមពិធីបុណ្យសពម្ដាយ ក្មេកលោកនាយករដ្ឋមន្ត្រី ក្រោយពីអាជ្ញាធរចាប់លោកដាក់ពន្ធនាគារត្រពាំងផ្លុង និងការឃុំខ្លួនក្នុងផ្ទះក្នុងរយៈពេលប្រមាណ ៣ឆ្នាំមកនេះ។ នៅក្នុងរូបថត ដែលសារព័ត៌មានស្និទ និងលោក ហ៊ុន សែន យកមកផ្សព្វផ្សាយនោះ លោក កឹម សុខា បានជួបអង្គុយសន្ទនាដោយផ្ទាល់ជាមួយលោក ហ៊ុន សែន ក្នុងសំលៀកបំពាក់កាន់ទុក្ខ ប៉ុន្តែគេមិនទាន់ដឹងថា តើលោក កឹម សុខា បានជជែកពីអ្វីខ្លះ ជាមួយលោក ហ៊ុន សែន ក្រៅពីចូលរួមសំដែងការសោកស្ដាយ និងសាររំលែកទុក្ខនោះ?
អាស៊ីសេរីមិនអាចទាក់ទងមេធាវីការពារក្ដីលោក កឹម សុខា គឺលោក ចាន់ ចេន អ្នកស្រីមេធាវី ម៉េង សុភារី និងមន្ត្រីខុទ្ទកាល័យរបស់លោក គឺលោក មុត ចន្ថា ដែលបានទៅចូលរួមជាមួយលោក កឹម សុខា ដែរនោះបាននៅឡើយទេ គិតមកដល់មុនការផ្សាយនេះ។ រីឯមេធាវីលោក កឹម សុខា មួយរួបទៀត លោក ផែង ហែង មានប្រសាសន៍ថា លោកមិនបានអញ្ជើញទៅចូលរួមគោរពវិញ្ញាណក្ខន្ធអ្នកស្រី ប៊ុន ស៊ាងលី ម្ដាយក្មេកលោកនាយករដ្ឋមន្ត្រី ហ៊ុន សែន នៅគេហដ្ឋានរបស់លោកក្បែរវិមានឯករាជ្យនោះទេ ដោយសារតែលោកជាប់រវល់ពិធីបុណ្យសពសាច់ញាតិលោកដែរ នៅថ្ងៃទី៥ ឧសភានេះ។ ប៉ុន្តែលោក ផែង ហេង បញ្ជាក់ថា តាមលោកមើលឃើញក្នុងរូបថតក្នុងបណ្ដាញសារព័ត៌មានដែរនោះ លោក កឹម សុខា និង លោក ហ៊ុន សែន ទំនងជាមិនបានជជែកពីបញ្ហាអ្វីផ្សេង ក្រៅពីសាររំលែកទុក្ខនៅក្នុងពិធីបុណ្យសពនោះទេ។
សារព័ត៌មានដែលស្និទ្ធ និងលោក ហ៊ុន សែន ចុះផ្សាយថា លោក កឹម សុខា ទៅគោរពវិញ្ញាណក្ខន្ធម្ដាយក្មេក លោក ហ៊ុន សែន នេះ បន្ទាប់ពីមានការអនុញ្ញាតពីលោកនាយករដ្ឋមន្ត្រី និងក្រុមគ្រួសារសព។
ក្រោយពី អ្នកស្រី ប៊ុន ស៊ាងលី ទទួលមរណភាពភ្លាមៗ លោក កឹម សុខា បានសរសេរសាររំលែកទុក្ខផ្ញើទៅក្រុមគ្រួសារលោក ហ៊ុន សែន ដែរ ដែលមានខ្លឹមសារថា៖ « មរណភាពរបស់អ្នកឧកញ៉ាព្រឹទ្ធមហាឧបាសិកាធម្មញ្ញាណវិវឌ្ឍនា ប៊ុន ស៊ាងលី គឺជាការបាត់បង់មាតា ជីដូន ដែលជាអ្នកមានគុណដ៏ធំធេង ដែលបានចិញ្ចឹមបីបាច់ថែរក្សា និងអប់រំទូន្មានកូនចៅប្រកបដោយព្រហ្មវិហារធម៌ » ។ ចំពោះថ្នាក់ដឹកនាំ និងសកម្មជនបក្សប្រឆាំងមួយចំនួនទៀត ក៏បង្ហោះសារចូលរួមរំលែកទុក្ខជាមួយក្រុមគ្រួសារលោកនាយករដ្ឋមន្ត្រី ហ៊ុន សែន ដែរ បើទោះជាពួកគេ ត្រូវបានរដ្ឋាភិបាលធ្វើទុក្ខបុកម្នេញ ឥតស្រាកស្រាន្តក្ដី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។