អ្នកនាំពាក្យ​ក្រសួង​យុត្តិធម៌​ថា ការ​ឃុំខ្លួន​លោក កឹម សុខា មិន​ខុសច្បាប់​ទេ

ដោយ ហេង រស្មី
2019-09-04
អ៊ីម៉ែល
មតិ
Share
បោះពុម្ព
លោក កឹម សុខា (រូប​កណ្ដាល) ប្រធាន​គណបក្ស​សង្រ្គោះជាតិ និង​មេធាវី​ការពារ​ក្ដី​របស់​លោក នា​បរិវេណ​ផ្ទះ​លោក កឹម សុខា នៅ​ខណ្ឌ​ទួលគោក។
លោក កឹម សុខា (រូប​កណ្ដាល) ប្រធាន​គណបក្ស​សង្រ្គោះជាតិ និង​មេធាវី​ការពារ​ក្ដី​របស់​លោក នា​បរិវេណ​ផ្ទះ​លោក កឹម សុខា នៅ​ខណ្ឌ​ទួលគោក។
រូប​ពី​ហ្វេសប៊ុក លោក ផែង ហេង

អ្នកនាំពាក្យ​ក្រសួងយុត្តិធម៌​ថ្លែង​ការពារ រដ្ឋាភិបាល​ថា ការ​ឃុំខ្លួន​លោក កឹម សុខា ប្រធាន​គណបក្ស​សង្គ្រោះ​ជាតិ រយៈពេល​ពីរ​ឆ្នាំ​កន្លង​មក​នេះ​មិន​មាន​អ្វី​ខុសច្បាប់​ទេ។ កាលពី​ថ្ងៃ​ទី​២ កញ្ញា ជា​ខួប​នៃ​ការ​ឃុំខ្លួន​របស់​លោក កឹម សុខា ពីរ​ឆ្នាំ ដែល​ការ​ឃាត់ខ្លួន​នេះ ត្រូវ​បាន​សង្គម​ស៊ីវិល​ចាត់ទុកជា ទង្វើ​នយោបាយ និង​អយុត្តិធម៌ ដើម្បី​ឈាន​ទៅ​រំលាយ​គណបក្ស​សង្គ្រោះជាតិ។

អ្នកនាំពាក្យ​ក្រសួង​យុត្តិធម៌ លោក ជិន ម៉ាលីន បញ្ជាក់​ថា ការ​រិះគន់​ចំពោះ​ការ​ឃុំខ្លួន​លោក កឹម សុខា រយៈពេល​ពីរ​ឆ្នាំ​កន្លង​ទៅ​នេះ​គឺ​ខុស​ទៅតាម​ទិដ្ឋភាព​ផ្លូវច្បាប់ ដែល​មាន​ជា​ធរមាន​ពី​ព្រោះ​ថា ករណី​នេះ​តុលាការ​បានសម្រេច​ចេញ​ដីកា​ឃុំខ្លួន​លោក កឹម សុខា នៅ​ពន្ធនាគារ​ត្រពាំង​ផ្លុង កាល​ពី​ថ្ងៃ​ទី​៥ ខែ​កញ្ញា ឆ្នាំ​២០១៧ ហើយ​ក្រោយ​មក​ចៅក្រម​ស៊ើបសួរ​បានសម្រេច​ដោះលែង​ឱ្យ​នៅ​ក្រៅ​ឃុំ​កាលពី​ថ្ងៃ​ទី​០៩ កញ្ញា ឆ្នាំ​២០១៨​។​ហេតុដូច្នេះ​គិត​មកដល់ពេលនេះ​លោក កឹម សុខា បាន​ស្ថិតនៅ​ក្រោម​ការ​​ឃុំខ្លួន​នៅ​ក្នុង​ផ្ទះ​រយៈពេល ១​ឆ្នាំ និង ៥ ថ្ងៃ​ប៉ុណ្ណោះ វា​មិន​ខុស​ទៅតាម​ទិដ្ឋភាព​ផ្លូវច្បាប់​ទេ​៖ «ករណី​លោក កឹម សុខា នេះ​ក៏​មិនបាន​ស្ថិតនៅ​ក្នុង​ការ​ឃុំខ្លួន​នៅ​ក្នុង​ផ្ទះ​ដែរ ពីព្រោះ​ច្បាប់​យើង​អត់​មាន​របប​នៃ​ការ​ឃុំខ្លួន​នៅ​ក្នុង​ផ្ទះ​ទេ។ បាន​ន័យថា​គាត់​ស្ថិតនៅ​ក្រៅ​ឃុំ ក៏ប៉ុន្តែ ស្ថិត​នៅ​ក្រោម​ការ​ត្រួត​ពិនិត្យ​របស់​តុលាការ។ អ៊ីចឹង​តុលាការ​គេ​កំណត់​លក្ខខណ្ឌ​មួយ​ចំនួន កន្លែង និង​បរិវេណ​ដែល​គាត់​អាច​ទៅ​បាន និង​អ្វី​ដែល​គាត់​អាច​ធ្វើ​បាន។ ក៏​ប៉ុន្តែ​ការ​សម្រេច​នៅ​ក្នុង​ផ្ទះ​គឺជា​សិទ្ធិ​របស់​គាត់​ទេ គាត់​ចង់​ចេញ​ទៅ​ណា​គឺជា​សិទ្ធិ​របស់​គាត់​ទេ ក៏ប៉ុន្តែ​គាត់​អាច​ចេញទៅ​ក្រៅ​បាន​ក្នុង​បរិវេណ​ដែល​តុលាការ​បាន​កំណត់ ហើយ​បើ​គាត់​ចង់​ចេញ​ហួស​ពី​ហ្នឹង​ត្រូវ​សុំ​ការអនុញ្ញាត​ពី​ចៅ​ក្រម​ស៊ើបសួរ»

លោក កឹម សុខា ប្រធាន​គណបក្ស​សង្គ្រោះជាតិ ត្រូវ​កម្លាំង​សមត្ថកិច្ច​នៃ​របប​ក្រុងភ្នំពេញ​ចាប់ខ្លួន​កាលពី​យប់​រំលង​អធ្រាត្រ​ថ្ងៃ​ទី​២ ឈាន​ចូល​ដល់​ថ្ងៃ​ទី​៣ ខែ​កញ្ញា ឆ្នាំ​២០១៧ នៅ​ក្នុង​គេហដ្ឋាន​របស់លោក​ក្នុង​ខណ្ឌ​ទួលគោក​រាជធានី​ភ្នំពេញ រួច​ហើយ​យក​ទៅ​ឃុំឃាំង​ភ្លាមៗ នៅ​ពន្ធនាគារ​ត្រពាំង​ផ្លុង ខេត្ត​ត្បូងឃ្មុំ ជាប់​ព្រំដែន​ប្រទេស​វៀតណាម។

របប​ក្រុងភ្នំពេញ​បាន​ចោទប្រកាន់​លោក​ពី​បទ​ចោទ​សន្ទិដ្ឋភាព ឬ​ក្បត់ជាតិ ជាមួយ​ជនបរទេស ដែល​បទចោទប្រកាន់​នេះ ត្រូវ​បាន​បដិសេធ​ដោយ​លោក កឹម សុខា និង​ច្រានចោល​ដោយ​អង្គការ​សិទ្ធិមនុស្ស​ជាតិ និង​អន្តរជាតិ រួម​ទាំង​ប្រទេស​លោក​ខាងលិច​ផង។

សហ​មេធាវី​មួយ​រូប​របស់​លោក កឹម សុខា គឺ​អ្នកស្រី ម៉េង សុធារី ប្រាប់​អាស៊ីសេរី​ថា លោក កឹម សុខា នៅតែ​ទទួលរង​នូវ​ការ​រឹតត្បិត​សិទ្ធិ​សេរីភាព​យ៉ាង​ខ្លាំង ព្រមទាំង​ដាក់​បម្រាម​យ៉ាង​តឹងរ៉ឹង​ពី​ចៅក្រម​ស៊ើបសួរ។ អ្នកស្រី​ថា បម្រាម​នេះ បាន​ធ្វើ​ឱ្យ​លោក កឹម សុខា បាត់បង់​សិទ្ធិ​សេរីភាព​នៃ​ការ​បញ្ចេញ​មតិ ការ​ដើរ​ហើរ និង​ជួប​ប្រជុំ​ជាមួយ​មន្ត្រី តំណាង​សហគមន៍​ជាតិ និង​អន្តរជាតិ​ជាដើម​។​

អ្នកស្រី ម៉េង សុធារី កត់សម្គាល់​ថា ការ​រឹតត្បិត​សិទ្ធិ​សេរីភាព​នេះ មិនមែន​កើតមានឡើង​តែ​ចំពោះ​លោក កឹម សុខា នោះ​ទេ តែ​សូម្បីតែ​ភរិយា និង​ម្ដាយ​របស់​លោក កឹម សុខា រួម​ទាំង​ភាគី​សហ​មេធាវី​របស់​លោក កឹម សុខា ផង ក៏​ទទួលរង​នូវ​ការ​ចាំ​តាមដាន ឃ្លាំមើល​យ៉ាង​សព្វបែបយ៉ាង​ពី​អាជ្ញាធរ​របស់​លោក ហ៊ុន សែន​ដែរ ។ អ្នកស្រី​ថា សហ​មេធាវី​របស់​លោក កឹម សុខា នៅតែ​រក្សា​ជំហរ​ដដែល ក្នុង​នោះ​រួមមាន​ការ​ទាមទារ​ឱ្យ​ទម្លាក់​ចោល ឬ​លើកលែង​បទចោទប្រកាន់​ទាំងអស់​មក​លើ​លោក កឹម សុខា៖ «គាត់​ត្រូវ​បាន​រឹត​បន្តឹង​យ៉ាង​ខ្លាំង​ផ្អែក​ទៅ​តាម​សេចក្ដី​សម្រេច​របស់​ចៅក្រម​ស៊ើបសួរ​ក្នុង​នោះ​គឺ​មាន​ដូចជា ការ​មិន​ឱ្យ​ជួប​ដល់​អតីត​ថ្នាក់ដឹកនាំ​គណបក្ស​សង្គ្រោះ​ជាតិ មិន​ឱ្យ​ជួប​ជនបរទេស​មិន​ឱ្យ​ធ្វើ​សកម្មភាព​នយោបាយ ហើយ​ជាពិសេស​ហ្នឹង​មិន​ឱ្យ​គាត់​ធ្វើដំណើរ​ចាកចេញ​ពី​បរិវេណ​ដែល​កំណត់​ដោយ​ចៅក្រម​ស៊ើបសួរ។ លក្ខខណ្ឌ​ទាំងអស់​ហ្នឹងហើយ​គឺជា​លក្ខខណ្ឌ​មួយ​ដែល​ក្នុងនាម​ខ្ញុំ​ជា​មេធាវី មិន​ធ្លាប់​ដែល​បាន​ជួប ហើយក៏​មិន​ធ្លាប់​ដែល​បាន​ឃើញ​សេចក្តី​សម្រេច​របស់​ចៅក្រម​ស៊ើបសួរ​បែប​ហ្នឹង​ដែរ​ពី​មុន​មក»

អ្នកវិភាគ​បណ្ឌិត ឡៅ ម៉ុងហៃ បញ្ជាក់​ប្រាប់​នៅ​ក្នុង​វេទិកា​អ្នក​ស្ដាប់​អាស៊ីសេរី​ថា ចាប់​តាំង​ពី​ការ​ចាប់ខ្លួន​រហូតដល់​បញ្ជូន​ទៅ​ឃុំឃាំង​នៅ​ក្នុង​ផ្ទះ ដែល​ធ្វើឡើង​ដោយ​របប​ក្រុងភ្នំពេញ​គឺ​ធ្វើ​ឡើង​ដោយ​អយុត្តិធម៌​ដោយសារតែ​អាជ្ញាធរ​បាន​ដកស្រង់​សំដី​លោក​កឹម សុខា និយាយ​តាំងពី​ឆ្នាំ​២០១៣​មក​ចោទប្រកាន់​គឺ​មិន​ត្រូវ​ទាល់តែសោះ៖ «ធ្វើឡើង​នៅ​ក្នុង​កាលៈទេសៈ​មួយ​ដាក់​សម្ពាធ​អាហ្នឹង​គឺ​វា​អត់​ត្រឹមត្រូវ​ទេ ហើយ​យក​មក​ដាក់​ឃុំ​នៅ​ក្នុង​ផ្ទះ ដោយមាន​ការ​ការពារ​រហូត​ដល់​មាន​ការ​ដាក់​ប៉ូលិស​មួយ​ពេល​នោះ មាន​រហូតដល់​៥០០​នាក់​ដើម្បី​ការពារ​កន្លែង​ហ្នឹង»

ចំណែក កូនស្រី​ច្បង​លោក កឹម សុខា គឺ​កញ្ញា កឹម មនោវិទ្យា លើក ថា ព្រឹត្តិការណ៍​សម្រុកចូល​ចាប់ខ្លួន​ឪពុក​របស់​កញ្ញា​ក្នុង​ផ្ទះ ទាំង​កណ្ដាលយប់ កាលពី ២​ឆ្នាំមុន​នោះ គឺជា​ហេតុការណ៍​ដ៏​រន្ធត់ ហើយ​វា​ជា​សុបិន្ត​អាក្រក់​ដែល​កើតមានឡើង​មក​លើ​គ្រួសារ​របស់​កញ្ញា។

លោក កឹម សុខា នៅ​ក្នុង​គម្រប់​ខួប ២​ឆ្នាំ​នៃ​ការ​ឃុំខ្លួន លោក​បាន​សរសេរ​សារ​នៅ​លើ​គេហទំព័រ​ហ្វេសប៊ុក​របស់​លោក​ថា លោក​ស្ម័គ្រចិត្ត​ធ្វើ​ពលិកម្ម​ជូន​ជាតិ មិនមែន​លោក​មិន​ចេះ​ខ្លាច មិនមែន​លោក​មិន​ដឹង​ពី​គ្រោះថ្នាក់ មិនមែន​ព្រោះ​លោក​ល្ងង់​ទេ តែ​ក្នុង​តួនាទី​ជា​អ្នកដឹកនាំ គឺ​ខុស​ពី​ចៅហ្វាយ ឬ​ថៅកែ​។ លោក​បញ្ជាក់​ថា ចៅហ្វាយ ឬ​ថៅកែ​គឺជា​អ្នក​ចាំ​យក​លទ្ធផល​ពី​ការងារ តែ​អ្នកដឹកនាំ​គឺជា​អ្នក​ដែល​លះបង់​មុនគេ និង​ច្រើន​ជាងគេ ដើម្បី​ជា​គំរូ​ដល់​អ្នកគាំទ្រ។

សហរដ្ឋអាមេរិក និង​សហភាព​អឺរ៉ុប ជា​ញឹកញាប់​តែងតែ​រំលឹក​ទៅ​របប​ក្រុងភ្នំពេញ​ឱ្យ​ដោះលែង លោក កឹម សុខា។ ប៉ុន្តែ​របប​ក្រុងភ្នំពេញ​តែង​ឆ្លើយ​បដិសេធ និង​ចាត់​ទុក​ការ​អំពាវនាវ​ទាំងនោះ​ថា ការ​ជា​ការ​ជ្រៀតជ្រែក​កិច្ចការ​ផ្ទៃក្នុង​របស់​ខ្លួន ហើយ​ទាំង​ការ​ចាប់ និង ឃុំខ្លួន​នៅ​ក្នុង​ផ្ទះ​គឺ​ធ្វើ​ឡើង​ត្រឹមត្រូវ​តាមច្បាប់​។ ការ​បដិសេធ​នេះ​ហើយ​ទើប​បាន​សហគមន៍​អឺរ៉ុប និង​អាមេរិក​បាន​ឈាន​ទៅ​ដល់​ចាត់វិធានការ​មួយ​ចំនួន​រួម​ទាំង​គម្រោង​ដក​EBA និង​ដាក់ទណ្ឌកម្ម​មន្ត្រី​នៃ​របប​លោក ហ៊ុន សែន​ផង​ដែរ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

Time to remove evil out of planet earth before they strike us back

How the world leaders can make any deal with all these unofficial govm't,unofficial pm,unofficial election,outlaw govm't,and unrecognized govm't who won't care anything at all,just beside itself cronies.That why this thugs govm't nothing care about right or wrong at all,and they can say,or do whatever they wanted"shame on thuggish".Now,they didn't care whatever the whole world say about it,because now they all got fatcat,long shape claw,long fang,big muscle and time to conquer to any world leader,that why they don't need the world to help them anymore"See Saddam,Mugabe,Kim J.Un,Gaddafi and evil Hun Sen as an example"they seen the world as their enemy now.

Sep 04, 2019 01:27 PM

គេហទំព័រ​ទាំងមូល