ខ្មែរនៅអូស្ត្រាលីជាង ១០០នាក់បានធ្វើពិធីសាសនា ដើម្បីប្រសិទ្ធិពរជ័យដល់ការវិលចូលស្រុករបស់លោក សម រង្ស៊ី នៅដើមខែវិច្ឆិកាខាងមុខនេះ។ ការធ្វើពិធីនេះ ព្រោះពួកគេយល់ថា លោក សម រង្ស៊ី ចូលប្រទេសកម្ពុជាវិញមិនមែនបង្កសង្គ្រាមដូចរបបក្រុងភ្នំពេញចោទប្រកាន់នោះទេ ប៉ុន្តែដើម្បីទៅដោះស្រាយបញ្ហា ដែលកម្ពុជាកំពុងជួបប្រទះ។
អ្នកគាំទ្រគណបក្សសង្រ្គោះជាតិនៅប្រទេសអូស្ត្រាលីមានជំនឿថា ពិធីសាសនានឹងធ្វើឲ្យវត្ថុស័ក្កិសិទ្ធិតាមថែរក្សាពលរដ្ឋខ្មែរ និងលោក សម រង្ស៊ី វិលចូលកម្ពុជានៅថ្ងៃទី៩ ខែវិច្ឆិកា បានសុខសប្បាយ និងជោគជ័យ។ ពិធីនេះប្រារព្ធធ្វើនៅវត្តពុទ្ធរង្សីម៉ែលប៊ន ក្នុងទីក្រុងម៉ែលប៊ន នៅថ្ងៃទី៣ ខែវិច្ឆិកា៖ «»
ប្រធានសាខាគណបក្សសង្រ្គោះជាតិនៅប្រទេសអូស្ត្រាលី និងប្រទេសនូវែលហ្សេឡង់ លោក ម៉ែន វណ្ណា ឲ្យអាស៊ីសេរីដឹងថា ការវិលចូលស្រុករបស់លោក សម រង្ស៊ី និងអ្នកប្រជាធិបតេយ្យផ្សេងទៀត ក្នុងគោលបំណងចង់បានសន្តិភាព ដូច្នេះខ្មែរនៅអូស្ត្រាលីមិនចង់ឃើញការបង្ហូរឈាមរវាងខ្មែរ និងខ្មែរទៀតទេ។ លោកបញ្ជាក់ថា ការចូលស្រុករបស់លោក សម រង្ស៊ី មិនមែនជាការបំបែកបំបាក់ជាតិ ដូចការចោទប្រកាន់របស់របបក្រុងភ្នំពេញនោះទេ៖ «»
ចៅហ្វាយក្រុងដែនឌឺណុង (Dandenong) ស្តីទី លោក ជា យូហន ថ្លែងថា បើពលរដ្ឋខ្មែរមិនរួមគ្នាក្នុងការវិលចូលស្រុកវិញនោះទេ នឹងមិនអាចជួយស្រោចស្រង់ប្រទេសកម្ពុជា ដែលលោក ហ៊ុន សែន កំពុងទាញឲ្យធ្លាក់ចូលក្នុងវិបត្តិនោះឡើយ។ លោកបន្តទៀតថា ការវិលចូលស្រុកម្តងនេះមិនមែនជារឿងស្រួលទេ ប៉ុន្តែលោកអះអាងថា លោកនឹងអ្នកមុខអ្នកការនៅប្រទេសអូស្ត្រាលី នឹងស្នើទៅរដ្ឋាភិបាលអូស្ត្រាលីឲ្យការពារពលរដ្ឋខ្មែរដែលមានសញ្ជាតិអូស្ត្រាលី៖ «»
គិតត្រឹមថ្ងៃទី០៣ ខែវិច្ឆិកា ការសន្យាវិលចូលប្រទេសកម្ពុជាវិញរបស់លោក សម រង្ស៊ី នៅសល់តែ០៦ទៀតប៉ុណ្ណោះនឹងដល់ពេលកំណត់នៃការធ្វើដំណើរមាតុភូមិនិវត្តន៍របស់លោក។
ទោះជារបបក្រុងភ្នំពេញបានព្រមានថា ចាប់ខ្លួន បាញ់សម្លាប់ និងពឹងប្រទេសជិតខាងកម្ពុជាមិនឲ្យលោកឆ្លងកាត់ក្តី ក៏លោក សម រង្ស៊ី រក្សាជំហរវិលចូលស្រុកវិញដែរ។
ប្រធានស្តីទីគណបក្សសង្រ្គោះជាតិលោក សម រង្ស៊ី បានបង្ហោះសារនៅលើហ្វេសប៊ុករបស់លោក នៅថ្ងៃទី៣ ខែវិច្ឆិកា ដោយបញ្ជាក់ជាថ្មីថា ការវិលចូលស្រុករបស់លោក សម រង្ស៊ី ដើម្បីស្តារលទ្ធិប្រជាធិបតេយ្យ សិទ្ធិមនុស្សនៅកម្ពុជារក្សាប្រព័ន្ធអនុគ្រោះពន្ធEBA ប្រគល់ដីធ្លីជូនពលរដ្ឋរងគ្រោះ បំបាត់អំពើពុករលួយ ដោះស្រាយបញ្ហាបំណុលពលរដ្ឋក្រីក្រ រៀបចំប្រព័ន្ធតុលាការឡើងវិញ និងការពារផលប្រយោជន៍ និងភាពថ្លៃថ្នូរដល់ពលរដ្ឋ ដែលជាម្ចាស់ទឹកដី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។