មេធាវីការពារក្ដីស្ថាបនិកគណបក្សបេះដូងជាតិ លោក សៀម ភ្លុក និងមន្ត្រីគណបក្សភ្លើងទៀនបីនាក់ទៀត សម្រេចប្ដឹងសាទុក្ខទៅតុលាការកំពូល ប្រឆាំងការសម្រេចឃុំខ្លួនពួកគេ។ មន្ត្រីសង្គមស៊ីវិល ចង់ឃើញតុលាការយកច្បាប់ស្ដីពីគណបក្សនយោបាយ មកដោះស្រាយបញ្ហានេះ ជាជាងការប្រើបទចោទព្រហ្មទណ្ឌចោទប្រកាន់លើពួកគេ។
ស្ថាបនិកគណបក្សបេះដូងជាតិលោក សៀម ភ្លុក និងមន្ត្រីគណបក្សភ្លើងទៀនបីរូបទៀត គឺលោក ខឿន វីរ៉ាត់ អ្នកស្រី នូ សុទ្ធារី និង លោក តូច ថឹង មិនពេញចិត្ត ចំពោះការសម្រេចរបស់សាលាឧទ្ធរណ៍ភ្នំពេញ ដែលបន្តឃុំខ្លួនពួកគាត់នៅក្នុងសំណុំរឿងក្លែងបន្លំស្នាមមេដៃ ដើម្បីបង្កើតគណបក្សបេះដូងជាតិឡើយ។
មេធាវីការពារក្ដីលោក សៀម ភ្លុក និងជាមេធាវីរបស់មន្ត្រីគណបក្សភ្លើងទៀន គឺលោកមេធាវី ជូង ជូងី ឱ្យវិទ្យុអាស៊ីសេរីដឹងនៅថ្ងៃទី១០ ខែមករាថា កូនក្ដីរបស់លោកទាំង៤ នៅតែរក្សាជំហរថា មិនបានក្លែងបន្លំស្នាមមេដៃឡើយ។ លោកបន្តថា កូនក្ដីរបស់លោក គឺលោក សៀម ភ្លុក ជាមនុស្សចម្បងក្នុងសំណុំរឿងនេះ គ្មានចេតនា ធ្វើឱ្យខូចខាតស្នាមមេដៃ ឬមានចេតនាបន្លំស្នាមមេដៃឡើយ។ លោកមេធាវី ឱ្យដឹងទៀតថា ពេលនេះលោកត្រៀមខ្លួនការពារក្ដីរបស់លោក សៀម ភ្លុក និងមន្ត្រីគណបក្សភ្លើងទៀនបីរូបទៀត នៅតុលាការ តែលោកមិនទាន់ទទួលដំណឹងថា តុលាការកំពូលនឹងបើកសវនាការសំណុំរឿងនេះនៅពេលណាឡើយ។
មេធាវី ជូង ជូងី៖«ទី១ កូនក្ដីខ្ញុំ សៀម ភ្លុក គាត់អត់មានបានធ្វើកិច្ចការទាំងអស់នោះទេ។ អ៊ីចឹង ចោទថា គាត់ក្លែងអត់ត្រូវ។ ទី២ គាត់ក៏គ្មានចេតនា ចង់ធ្វើឱ្យខុសដែរ ពីព្រោះអ្នកបើកគណបក្សនយោបាយ បើសិនជាអត់បានស្នាមមេដៃជាក់ស្ដែងធ្វើម៉េចធ្វើនយោបាយឈ្នះ គ្មានអ្នកណាធ្វើគណបក្សនយោបាយចង់បានស្នាមមេដៃក្លែង គឺអត់ដែលមានទេ។ អ៊ីចឹង គាត់គ្មានចេតនាទាល់តែសោះធ្វើឱ្យខូចខាតមេដៃ ឬក៏ក្លែងបន្លំហ្នឹងទេ អ៊ីចឹង គាត់អត់មានចេតនាក្នុងការប្រព្រឹត្តិបទល្មើសទាល់តែសោះ»។
វិទ្យុអាស៊ីសេរី មិនអាចសុំអត្ថាធិប្បាយ នៃការកំណត់ពេលវេលាបើកសវនាការលើសំណុំរឿងនេះ ពីប្រធានតុលាការកំពូល លោក ជីវ កេង បានទេ នៅថ្ងៃទី១០ ខែមករា។
សាលាឧទ្ធរណ៍ភ្នំពេញ កាលពីថ្ងៃទី៣០ ខែវិច្ឆិកា ឆ្នាំ២០២៣ បានសម្រេចច្រានចោលបណ្ដឹងជំទាស់របស់លោក សៀម ភ្លុក និងមន្ត្រីគណបក្សភ្លើងទៀន ដោយតម្កល់សេចក្ដីសម្រេចសាលាដំបូងរាជធានីភ្នំពេញទុកជាបានការដដែល។ សាលាដំបូងរាជធានីភ្នំពេញ បានផ្ដន្ទាទោសពួកគេលើសំណុំរឿងក្លែងបន្លំនិងប្រើប្រាស់លិខិតក្លែងនេះ សម្រេចឱ្យលោក សៀម ភ្លុក ជាប់ពន្ធនាគាររយៈពេល ២ឆ្នាំ ៦ខែ ចំណែកមន្ត្រីគណបក្សភ្លើងទៀនបីរូបផ្សេងទៀត ត្រូវជាប់ពន្ធនាគាររយៈពេល ២ឆ្នាំ ពាក់ព័ន្ធការប្រមូលស្នាមមេដៃពីពលរដ្ឋ ដើម្បីបង្កើតគណបក្សបេះដូងជាតិ។
អ្នកសម្របសម្រួលផ្នែកអង្កេតរបស់អង្គការឃ្លាំមើលការបោះឆ្នោត ខុមហ្វែ្រល (COMFREL) លោក កន សាវាង្ស នៅតែយល់ថា ចំណាត់ការផ្លូវច្បាប់លើលោក សៀម ភ្លុក និងអ្នកផ្សេងទៀត មិនត្រឹមត្រូវតាមច្បាប់ស្ដីពីគណបក្សនយោបាយឡើយ។ លោកបន្តទៀតថា ការមិនអនុញ្ញាតចុះបញ្ជីឱ្យគណបក្សបេះដូងជាតិ គឺគ្រប់គ្រាន់ហើយ។ ម៉្យាងវិញទៀត លោក សៀម ភ្លុក ក៏មិនមែនជាអ្នកធ្វើឱ្យខូចខាតស្នាមមេដៃនោះដែរ។ អ្នកជំនាញកិច្ចការបោះឆ្នោតរូបនេះ ចង់ឃើញតុលាការសម្រេចក្ដីលើសំណុំរឿងនេះឡើងវិញ ដើម្បីផ្ដល់យុត្តិធម៌ដល់លោក សៀម ភ្លុក និងអ្នកពាក់ព័ន្ធ។
លោក កន សាវាង្ស៖«ក្រសួងមហាផ្ទៃសម្រេចត្រឹមតែទទួលចុះបញ្ជី ឬមិនទទួលចុះបញ្ជីទេ ហើយអាចបង្ហាញប្រាប់ថា ចំណុចណា ដែលជាចំណុចខ្វះខាត ដើម្បីអាចរកមើលនីតិវិធីនៅក្នុងការបំពេញព័ត៌មានហ្នឹងបន្ថែម មិនមានចំណុចណាមួយ ដែលចង្អុលបង្ហាញត្រូវតែប្ដឹងទៅតុលាការ គឺមិនមានទេ»។
ដូចគ្នានេះដែរ នៅពេលឡើងបំភ្លឺតុលាការម្ដងៗ លោក សៀម ភ្លុក ប្រាប់ទៅតុលាការថា លោកមិនដឹងថា ស្នាមមេដៃ ដែលប្រមូលមកនោះមានបញ្ហានោះឡើយ។ ទោះយ៉ាងណាក្ដី លោកថា ដ្បិតតែស្នាមមេដៃមួយចំនួនតូចមានបញ្ហាក្ដី តែស្នាមមេដៃនៅសេសសល់ជាង៤ពាន់ទៀត នៅតែគ្រប់គ្រាន់អាចស្នើសុំបង្កើតគណបក្សបេះដូងជាតិបានដដែល។ លោក សៀម ភ្លុក ធ្លាប់សរសេរចេញពីពន្ធនាគារថា លោកស្នើបង្កើតគណបក្សបេះដូងជាតិ ដើម្បីចូលរួមកសាងកម្ពុជា ឱ្យក្លាយជាប្រទេសប្រជាធិបតេយ្យ សេរី ពហុបក្ស និងការគោរពសិទ្ធិមនុស្ស។ ទោះយ៉ាងណាក្ដី មន្ត្រីបក្សកាន់អំណាចលោក សុខ ឥសាន ចោទប្រកាន់ថា លោក សម រង្ស៊ី ជាអ្នកនៅពីក្រោយនៃការបង្កើតគណបក្សបេះដូងជាតិរបស់លោក សៀម ភ្លុក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។