មេធាវីការពារក្ដីអនុប្រធានគណបក្សភ្លើងទៀន កំពុងរៀបចំពាក្យប្ដឹងទៅសាលាឧទ្ធរណ៍ប្រឆាំងការឃុំលោក ថាច់ សេដ្ឋា។ មន្ត្រីសង្គមស៊ីវិលរិះគន់ថា ចំណាត់របស់សាលាដំបូងរាជធានីភ្នំពេញ លើមន្ត្រីបក្សភ្លើងទៀនពេលនេះថា ជាការធ្វើទុក្ខបុកម្នេញផ្នែកនយោបាយ។
មេធាវីមានពេលវេលា មួយសប្ដាហ៍ ដើម្បីប្ដឹងទៅសាលាឧទ្ធរណ៍ ទាមទារឱ្យមានការដោះលែងមន្ត្រីជាន់ខ្ពស់គណបក្សភ្លើងទៀន លោក ថាច់ សេដ្ឋា ដើម្បីអាចនៅក្រៅឃុំឡើងវិញ។
មេធាវីការពារក្ដីលោក ថាច់ សេដ្ឋា គឺលោក ជូង ជូងី ឱ្យវិទ្យុអាស៊ីសេរីដឹងថ្ងៃទី១៨ ខែមករាថា លោកបានស្នើសុំថតសំណុំរឿងនេះពីតុលាការ ដើម្បីប្រើប្រាស់ក្នុងការដាក់ពាក្យប្ដឹងឧទ្ធរណ៍ប្រឆាំងការឃុំខ្លួន។
លោក ជូង ជូងី៖«សមត្ថកិច្ចប្រើជាសំអាងទៅចាប់ខ្លួនគាត់មកហ្នឹងចង្អុលទៅអាសយដ្ឋានដែលឯកឧត្ដម អត់រស់នៅទីហ្នុងគាត់ថា អាសយដ្ឋានហ្នឹងគាត់ឈប់រស់នៅយូរហើយ។ អ៊ីចឹង អ្វីដែលខ្ញុំចាប់អារម្មណ៍ថា បើចេញដីកាកោះអត់ទៅដល់អាសយដ្ឋាន ដែលគាត់នៅពិតប្រាកដ ម្ដេចគាត់ទទួលបាន ហើយប៉ូលិសរកអត់ឃើញ ដល់ពេលចេញដីកានាំខ្លួនរកឃើញភ្លាមតែម្ដង លឿននេះលឿន!សាច់រឿងអ៊ីចឹង អ្វីដែលខ្ញុំចាប់អារម្មណ៍»។
លោកមេធាវី ជូង ជូងី ថា លោក មិនទាន់បានដឹងលម្អិត ពីដំណើររឿងនៃកូនក្ដីរបស់លោកនៅឡើយទេ ព្រោះពេលនេះអ្វីដែលលោកត្រូវដោះ ស្រាយ បន្ទាន់គឺប្ដឹងទាមទារឱ្យតុលាការដោះលែងលោក ថាច់ សេដ្ឋា និងការពិនិត្យមើលភាពប្រក្រតីលើនៃសែកស្អុយទាំង ៥សន្លឹក ដែលតុលាការយកមកដាក់បន្ទុកលើលោក ថាច់ សេដ្ឋា។
សមត្ថកិច្ចចាប់ខ្លួនមន្ត្រី លោក ថាច់ សេដ្ឋា កាលពីថ្ងៃទី១៦ ខែមករា ដោយចោទប្រកាន់ថា មន្ត្រីជាន់ខ្ពស់គណបក្សភ្លើងទៀនរូបនេះ មិនបានចូលបំភ្លឺតាមដីកាកោះរបស់តុលាការចំនួនពីរលើក កាលឆ្នាំ២០២១។
ទោះបីជាយ៉ាងណាក្ដី លោកមេធាវី ជូង ជូងី ឱ្យដឹងទៀតថា សំណុំរឿងនេះ ភាគីដើមបណ្ដឹង បានប្ដឹងលោក ថាច់ សេដ្ឋា កាលពីអំឡុងឆ្នាំ២០១១ ម្ដងរួចហើយ ពីបទឆបោក តែត្រូវបានតុលាការច្រានចោល ហើយទើបពេលនេះ ឃើញភាគីដើមបណ្ដឹងនោះចេញមកប្ដឹងកូនក្ដីរបស់លោកជាថ្មីពីករណីចេញសែកស្អុយនេះទៅវិញ។ លោកមេធាវីថា ផ្អែកតាមច្បាប់តុលាការមិនអាចអង្គហេតុដដែលមកចោទប្រកាន់លើក្នុងសំណុំរឿងផ្សេងគ្នាបានទេ។
ទាក់ទងរឿងនេះ ប្រពន្ធលោក ថាច់ សេដ្ឋ លោកស្រី ថាច់ សុខបូរ៉ានី បានទៅសួរសុខទុក្ខ និងបានយកថ្នាំពេទ្យឱ្យលោក ថាច់ សេដ្ឋា។ អ្នកស្រី ថាច់ សុខបូរ៉ានី ថា ការចោទប្រកាន់លើប្ដីលោកស្រី ជារឿងនយោបាយ ព្រោះប្ដីលោកស្រី មិនបានប្រព្រឹត្តិដូចការចោទប្រកាន់ទេ។
លោកស្រី ថាច់ សុខបូរ៉ានី៖«តុលាការគឺគាត់ចេះតែចោទប៉ុន្តែ រឿងហ្នឹងរឿងនយោបាយសុទ្ធ គាត់(លោក ថាច់ សេដ្ឋា)បាននិយាយថា គេចោទគាត់គាត់មិនដឹងអីទាំងអស់»។
កូនប្រុសលោក ថាច់ សេដ្ឋា លោក ថាច់ សុខកុញ្ចរា បារម្ភថា គ្រួសារលោកនឹងជួបការលំបាកព្រោះឪពុកដែលជាជនបង្គោលក្នុងគ្រួសារកំពុងជាប់ឃុំ។ កូនប្រុសលោក ថាច់ សេដ្ឋា ស្នើតុលាការ គួរដោះលែងឪពុករបស់លោកឱ្យមានសេរីភាពឡើងវិញ។
លោក ថាច់ សុខកុញ្ចរា៖«បើករណីនេះខ្ញុំអត់សូវដឹងដែរ ព្រោះអីចាប់ភ្លាមៗហ្នឹងបានខ្ញុំដឹងព័ត៌មានដែរហ្នឹង គ្រួសារអត់មានដឹងគាត់(លោក ថាច់ សេដ្ឋា)ជំពាក់អ្នកណា?ក្រុមហ៊ុនណា?គាត់អត់ដែលប្រាប់ផង ហើយចាប់អារម្មណ៍មួយទៀត គឺក្មេងៗក្នុងផ្ទះខ្ញុំទាំងអស់ហ្មង ការហូបចុកអីលើគាត់ទាំងអស់ ម្ហូបអីលើគាត់ទាំងអស់ ហើយម៉ាក់ខ្ញុំអត់រកអីទេ»។
ក្រុមអ្នកឃ្លាំមើលនយោបាយលើកឡើងថា ការចោទប្រកាន់លើលោក ថាច់ សេដ្ឋា ពេលនេះនឹងធ្វើឱ្យមតិជាតិ និងអន្តរជាតិ មើលឃើញថា ជាការដាក់សម្ពាធ ឬជាការគំរាមកំហែងលើគណបក្សភ្លើងទៀន ច្រើនជាងការអនុវត្តច្បាប់។
អ្នកនាំពាក្យសមាគមការពារសិទ្ធិមនុស្ស អាដហុក លោក ស៊ឹង សែនករុណា សង្កេតឃើញថា ការចាត់វិធានការរបស់តុលាការមកលើលោក ថាច់ សេដ្ឋា ពោរពេញដោយចម្ងល់ជាច្រើន។ លោកបន្តថា បើផ្អែកតាមមេធាវី របស់លោក ថាច់ សេដ្ឋា លើកឡើង សំណុំរឿងនេះចាប់ផ្ដើមតាំងពីអំឡុងឆ្នាំ២០១១ ប៉ុន្តែតុលាការគួរអូសបន្លាយមកដល់ឆ្នាំ២០១៩ និងបន្តរហូតដល់ឆ្នាំ២០២២ នេះ។ មន្ត្រីសង្គមស៊ីវិលរូបនេះ កត់សម្គាល់ទៀតថា ការអះអាងរបស់តុលាការ ពីការហៅលោក ថាច់ សេដ្ឋា ចំនួនពីរលើកកាលពីខែកុម្ភៈ និងខែមិថុនា ឆ្នាំ២០២១ ហាក់មិន ទំនងទេ ព្រោះកាលនោះ ប្រទេសកម្ពុជា ជួបករណីផ្ទុះរាលដាលជំងឺកូវីដ១៩ ដែលរដ្ឋាភិបាលបានប្រើវិធានការបិទខ្ទប់តំបន់មួយចំនួនធំ នៅរាជធានី ភ្នំពេញ និងបណ្ដាខេត្តនានា។
លោក ស៊ឹង សែនករុណា៖«កាលៈទេសៈនេះ បើសិនជាគណបក្សកាន់អំណាច ក៏ដូចជាខាងតុលាការប្រើវិធានការបែបនេះកាន់តែគេមើលឃើញថា បរិយាកាសនយោបាយ ក្នុងការប្រកួតប្រជែងផ្នែកនយោបាយការបោះឆ្នោតនាពេលខាងមុខមកដល់គឺជាបរិយាកាសមួយដែលកាន់តែអាប់អួទៅហើយបាទ»។
ទាក់ទងរឿងនេះវិទ្យុអាស៊ីសេរី មិនអាចសុំការបំភ្លឺបន្ថែមពីប្រធានលេខាធិការដ្ឋានសាលាដំបូងរាជធានីភ្នំពេញ លោក អ៊ី រិន្ទ បានទេនៅថ្ងៃទី១៨ ខែមករា។
លោក ថាច់ សេដ្ឋា ជាថ្នាក់ជាន់ខ្ពស់គណបក្សភ្លើងទៀនទី១ ដែលត្រូវបានចាប់ខ្លួន និងជាមេដឹកនាំគណបក្សភ្លើងទៀនទី៣ ដែលជាប់បណ្ដឹងនៅតុលាការនៃរដ្ឋាភិបាល លោក ហ៊ុន សែន៕