រដ្ឋមន្ត្រីក្រសួងមហាផ្ទៃលោក ស ខេង ណែនាំឲ្យបើកកិច្ចប្រជុំក្រើនរំលឹកដល់អាជ្ញាធររាជធានីខេត្តទូទាំងប្រទេសដើម្បីបង្កលក្ខណៈងាយស្រួលដល់គណបក្សនយោបាយខណៈការបោះឆ្នោតក្រុមប្រឹក្សាឃុំ-សង្កាត់កាន់តែខិតជិតមកដល់។
កិច្ចប្រជុំកាលពីថ្ងៃទី១៤ ខែមីនា ធ្វើឡើងបន្ទាប់ពីលោក ស ខេង រដ្ឋមន្ត្រីក្រសួងមហាផ្ទៃមើលឃើញពីការមិនយកចិត្តទុកដាក់របស់អាជ្ញាធរថ្នាក់ក្រោមជាតិមួយចំនួន លើសេចក្តីណែនាំរបស់លោកកន្លងមកដោយសារអាជ្ញាធរមូលដ្ឋានខ្លះនៅតែបន្តការលំបាកនិងគម្រាមកំហែងគ្រប់រូបភាពដល់គណបក្សនយោបាយមួយចំនួន។
អគ្គនាយករងនៃអគ្គនាយកដ្ឋានរដ្ឋបាលក្រសួងមហាផ្ទៃលោក ឈឹម កាន បានប្រាប់កាសែតភ្នំពេញប៉ុស្តិ៍ថាគោលដៅសំខាន់នៃកិច្ចប្រជុំនេះ គឺណែនាំនិងក្រើនរំលឹក ដល់អាជ្ញាធររាជធានីខេត្ត និងសមត្ថកិច្ចពាក់ព័ន្ធថ្នាក់ក្រោមជាតិ ត្រូវយកចិត្តទុកដាក់សម្រួល ឲ្យគណបក្សនយោបាយទាំងឡាយអាចធ្វើសកម្មភាពនយោបាយស្របតាមច្បាប់លិខិតបទដ្ឋាន។ បន្ថែមពីនេះ អាជ្ញាធរ ត្រូវអនុវត្តតាមលិខិតណែនាំរបស់រដ្ឋមន្ត្រីក្រសួងមហាផ្ទៃ កាលពីដើមខែកុម្ភៈ ដើម្បីធ្វើយ៉ាងណាឱ្យមានលក្ខណៈសេរី ត្រឹមត្រូវ និងយុត្តិធម៌ ស្របទៅតាមគោលការណ៍លទ្ធិប្រជាធិបតេយ្យ សេរីពហុបក្ស ចំពោះគណបក្សនយោបាយទាំងអស់ ដែលបានចុះបញ្ជីចូលរួមការបោះឆ្នោតជ្រើសរើសក្រុមប្រឹក្សាឃុំ-សង្កាត់នៅឆ្នាំនេះ និងបោះឆ្នោតជ្រើសរើសតំណាងរាស្ត្រនៅឆ្នាំក្រោយ។
គណបក្សមួយចំនួន ក្នុងនោះរួមមានគណបក្សភ្លើងទៀត អះអាងថា អាជ្ញាធរនៅតាមមូលដ្ឋាន នៅតែដាក់សម្ពាធ គំរាមកំហែង បំភិតបំភ័យបេក្ខជន និងសកម្មជនពួកគេស្ទើរគ្រប់រូបភាព។ មន្រ្តីសង្គមស៊ីវិល ក៏បានស្នើដល់ភាគីពាក់ព័ន្ធ ឲ្យបញ្ឈប់ការប្រព្រឹត្តទង្វើដែលផ្ទុយពីច្បាប់ ដើម្បីធានាថា ពលរដ្ឋគ្រប់រូបបានប្រើប្រាស់សិទ្ធិរបស់ខ្លួន ដោយគ្មានការរើសអើង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។