គណៈកម្មាធិការ ខុមហ្វ្រែល រួមនឹងអង្គការសង្គមស៊ីវិលមួយចំនួនទៀត នឹងធ្វើការរួមគ្នាចាប់ពីថ្ងៃទី២៦ ដល់ថ្ងៃទី២៩ កក្កដា ដើម្បីពិនិត្យមើលពីស្ថានភាពនៃដំណើរការរៀបចំការបោះឆ្នោត និងភាពមិនប្រក្រតីនានាពាក់ព័ន្ធនឹងការបោះឆ្នោត។
មន្ត្រីព័ត៌មាន ខុមហ្វ្រែល លោក ស្រី សុភ័គ្រ បានឲ្យដឹងនៅថ្ងៃទី២៥ កក្កដា ថា អង្គការ ខុមហ្វ្រែល បានបង្កើតបន្ទប់ស្ថានការណ៍បោះឆ្នោតឆ្នាំ២០១៣ សម្រាប់ផ្សព្វផ្សាយរួមគ្នា អន្តរាគមន៍រួមគ្នា និងវាយតម្លៃរួមគ្នា អំពីភាពមិនប្រក្រតីនានានៅមុនថ្ងៃបោះឆ្នោត ថ្ងៃបោះឆ្នោត ឬស្ថានភាពបោះឆ្នោតទាំងមូល។ លោក ស្រី សុភ័គ្រ បញ្ជាក់ថា គិតដល់ថ្ងៃទី២៥ កក្កដា នេះ មានអង្គការសង្គមស៊ីវិលជាង ៣០ ហើយដែលចុះឈ្មោះសហការធ្វើកិច្ចការនេះជាមួយអង្គការ ខុមហ្វ្រែល។
បន្ទប់ស្ថានការណ៍បោះឆ្នោតឆ្នាំ២០១៣ នេះ ជាលើកទី១ហើយដែលអង្គការ ខុមហ្វ្រែល បានបង្កើតឡើង ដើម្បីបញ្ជូនព័ត៌មាននានាពាក់ព័ន្ធនឹងកិច្ចការបោះឆ្នោតឲ្យបានឆាប់រហ័ស ទៅដល់ប្រជាពលរដ្ឋបានដឹង។ បន្ទប់ស្ថានការណ៍បោះឆ្នោតឆ្នាំ២០១៣ នេះ មានគណៈកម្មការសំខាន់ៗចំនួន៣ រួមមាន ក្រុមការងារតាមដានអំពីភាពមិនប្រក្រតី ក្រុមការងារតាមដានអ្នកទៅចូលរួមបោះឆ្នោតមានការកើនឡើង ឬថយចុះជាងពីពេលមុន និងក្រុមអ្នកប្រមូលលទ្ធផលបោះឆ្នោតជាដើម។
ក្រៅពីនេះទៀត សមាជិកនៃបន្ទប់ស្ថានការណ៍បោះឆ្នោត មានមេធាវី អ្នកវិភាគ និងតំណាងអង្គការសង្គមស៊ីវិល ដែលធ្វើការទាក់ទងនឹងធ្វើការបោះឆ្នោត។
នៅថ្ងៃទី២៥ កក្កដា នេះដែរ គណៈកម្មាធិការប្រព្រឹត្តិកម្ម (CRAC) ដែលមានអង្គការសង្គមស៊ីវិលជាង ២០ជាសមាជិក បានចេញសេចក្ដីថ្លែងការណ៍សម្ដែងពីការព្រួយបារម្ភអំពីភាពមិនប្រក្រតីក្នុងពេលធ្វើយុទ្ធនាការឃោសនាបោះឆ្នោត។
នៅក្នុងសេចក្ដីថ្លែងការណ៍នោះ បានសរសេរពីករណីមិនប្រក្រតីដែលកើតមានក្នុងពេលឃោសនារយៈពេល ២៨ថ្ងៃកន្លងមក បានបង្ហាញឲ្យឃើញថា មានបញ្ហាមួយចំនួនបានកើតមានឡើង ដូចជាអំពើហិង្សា ការចាប់ខ្លួន ការគំរាមកំហែងបំភិតបំភ័យទៅលើអ្នកគាំទ្រគណបក្សប្រឆាំង ការរារាំងមិនឲ្យចូលរួមដង្ហែក្បួនគណបក្ស ការប្រើប្រាស់ពាក្យសម្ដីថានឹងមានសង្គ្រាម ឬរដ្ឋប្រហារដោយកងយោធពលខេមរភូមិន្ទ ប្រសិនបើគណបក្សប្រឆាំងឈ្នះឆ្នោត។ ការទិញទឹកចិត្តតាមរយៈការផ្តល់ថវិកា និងសម្ភារៈ ដើម្បីឲ្យមានការចូលរួមឃោសនា ការជេរប្រមាថ និងឌឺដងពាក្យសម្ដីដាក់គ្នាធ្ងន់ៗ ការបំផ្លាញស្លាកគណបក្ស ការប្រើប្រាស់ប្រព័ន្ធផ្សព្វផ្សាយមិនស្មើភាពគ្នា ការមិនទាន់ផ្តល់សិទ្ធិឲ្យ លោក សម រង្ស៊ី បោះឆ្នោត និងឈរឈ្មោះបោះឆ្នោតដូចជាមេបក្សដទៃទៀតជាដើម។
បន្ថែមពីលើនេះទៀត គណៈកម្មាធិការ ខុមហ្វ្រែល នឹងធ្វើសន្និសីទសារព័ត៌មានសរុបលទ្ធផលភាពមិនប្រក្រតីនៃយុទ្ធនាការឃោសនាបោះឆ្នោតនេះនៅរសៀលថ្ងៃទី២៦ កក្កដា ឆ្នាំ២០១៣៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។