សកម្មជនបក្សប្រឆាំងខេត្តព្រះសីហនុលោក ម៉ៃ ហុងស្រៀង ដែលត្រូវបានសមត្ថកិច្ចឃុំខ្លួនជាងកន្លះឆ្នាំ នៅពន្ធនាគារព្រៃស ត្រូវបានតុលាការដោះលែងឲ្យមានសេរីភាពហើយ។ លោក ម៉ៃ ហុងស្រៀង និងអ្នកការពារសិទ្ធិមនុស្សថា រឿងនេះ ករណីឃាត់ខ្លួនលោក ជាករណីអយុត្តិធម៌។
មន្ត្រីពន្ធនាគារ បានដោះលែង លោក ម៉ៃ ហុងស្រៀង នៅម៉ោងជាង ៤រសៀល ថ្ងៃទី៣ មេសា ទោះបីសាលដីកាឧទ្ធរណ៍ឲ្យពន្ធនាគារ ដោះលែងលោកតាំងពីថ្ងៃទី១ មេសាមកម្ល៉េះ។ លោក ប្រាប់អាស៊ីសេរី ក្នុងពេលចេញពីពន្ធនាគារភ្លាមៗ ថា ការឃុំខ្លួនជាង ៨ខែមកនេះ ជារឿងនយោបាយសុទ្ធសាធ និងអះអាងថាលោក មិនបានប្រព្រឹត្តិកំហុស ដូចការចោទប្រកាន់ឡើយ។ លោក អះអាងថា នៅតែមានស្មារតីដដែល បើទោះជាប់ពន្ធនាគារ ដោយអយុត្តិធម៌ក៏ដោយ៖ « ការឃុំខ្លួននេះ ខ្ញុំយល់ថា ជាការព្រួយបារម្ភរបស់ខាងបក្សកាន់អំណាច។ តែមិនអ្វីទេ ខ្ញុំទ្រាំបាន។ សុំផ្ដាំផ្ញើទៅបងប្អូនប្រជាពលរដ្ឋថា ឧត្ដមគតិរបស់ខ្ញុំនៅតែដដែល គឺគ្មានបំណងអ្វី ទៅជាន់ពន្លិចរដ្ឋាភិបាលទេ។ គ្រាន់ថា ដើម្បីឲ្យប្រទេសជាតិយើង ដើរទៅមុខទាំងអស់គ្នា ឲ្យរីកចម្រើនដូចប្រទេសគេដទៃ គ្មានបំណងអ្វីទៅជាន់ពន្លិចទេ»។
ចៅក្រមសាលាដំបូងរាជធានីភ្នំពេញ បានកាត់ទោស លោក ម៉ៃ ហុងស្រៀង ឲ្យជាប់ពន្ធនាគារ ១ឆ្នាំកន្លះ (១៨ខែ) ដោយចោទប្រកាន់ពីបទញុះញង់ ឲ្យប្រព្រឹត្តិបទឧក្រិដ្ឋជាអាទិ៍។ សកម្មជនបក្សប្រឆាំងរូបនេះ មិនសុខចិត្ត នឹងការសម្រេចនេះ ហើយបានប្ដឹងបន្ត ទៅសាលាឧទ្ធរណ៍ ទាមទារឲ្យទម្លាក់បទចោទ និងស្នើសុំដោះលែង ដោយគ្មានលក្ខខណ្ឌ។ កាលពីដើមឆ្នាំ២០២០ ចៅក្រមសាលាឧទ្ធរណ៍ បានកាត់ក្ដីបន្ថយទោសលោក ពី ១៨ខែ ឲ្យនៅជាប់ទោស ៨ខែ ក្នុងបទចោទដដែល។
ប្រធានផ្នែកឃ្លាំមើលសិទ្ធិមនុស្ស នៃសមាគម អាដហុក លោក នី សុខា សង្កេតឃើញថា ការដោះលែងលោក ម៉ៃ ហុងស្រៀង មិនមែនធ្វើឡើងតាមការស្នើសុំទេ តែជាការបញ្ចប់ការឃុំខ្លួនក្នុងពន្ធនាគារ តាមការសម្រេចរបស់តុលាការ។ ដូច្នេះ លោកសោកស្ដាយចំពោះការឃុំខ្លួនសកម្មជនបក្សប្រឆាំងជាង ៨ខែ ដោយថា នេះជាការឃុំបែបអយុត្តិធម៌។
លោកស្នើសុំឲ្យសមត្ថកិច្ច បញ្ឈប់ការធ្វើទុក្ខបុកម្នេញ លើសកម្មជននយោបាយតទៅទៀត ព្រោះលោកសង្កេតឃើញថា មួយរយៈចុងក្រោយនេះ ប៉ូលិសធ្វើសកម្មភាពតាមចាប់សកម្មជនបក្សប្រឆាំងឡើងវិញ។ លោក ស្នើសុំឲ្យមានការផ្សះផ្សាគ្នា ប្រមែប្រមូលយកគំនិតខ្មែរទាំងអស់ ដើម្បីរួមគ្នាទប់ទល់នឹងជំងឺកូវីដ១៩ (Covid 19) ល្អជាជាង ការបន្តតាមចាប់ខ្លួន និងឃុំខ្លួនអ្នកចូលរួមផ្ដល់យោបល់៖ « ខ្ញុំយល់ថា មិនមែនតែ លោក ម៉ៃ ហុងស្រៀង ទេ។ តុលាការ គួរតែពិចារណាទៅលើអ្នកដែលជាប់ឃុំដទៃៗ ទៀត ដែលគ្រាន់តែជាអ្នកធ្វើកិច្ចការងារជួយទៅដល់សង្គមជាតិយើងហ្នឹង គឺគួរតែពិចារណាមើលអ្នកទាំងអស់នោះ។ មុនពេលរដូវចូលឆ្នាំនេះ តុលាការគួរតែ ពិចារណាទៅលើអ្នកដទៃទៀត ដែលគាត់ជាប់ ពន្ធនាគារ ដោយសារតែគាត់បញ្ចេញមតិ បញ្ចេញយោបល់ ហើយនឹងទាក់ទងទៅនឹងបញ្ហារឿងខ្លះទៀត វាពាក់ព័ន្ធទៅនឹងកិច្ចការងារនយោបាយ ការងារអ្វីហ្នឹង។ ខ្ញុំគិតថា តុលាការគួរតែពិចារណា ដោះលែងពួកគេ ឲ្យមានសេរីភាព ក្នុងរដូវចូលឆ្នាំហ្នឹងទៅ»។
លោក ម៉ៃ ហុងស្រៀង គឺជាសកម្មជនបក្សប្រឆាំងម្នាក់ ក្នុងចំណោមសកម្មជនបក្សប្រឆាំងជិត ១០០នាក់ ដែលត្រូវបានរបបក្រុងភ្នំពេញ បង្ក្រាបក្នុងយុទ្ធនាការទប់ទល់នឹងដំណើរមាតុភូមិនិវត្តន៍របស់លោក សម រង្ស៊ី។ លោក ហ៊ុន សែន មេដឹកនាំរបបក្រុងភ្នំពេញ បានបញ្ជាឲ្យមន្ត្រីក្រសួងយុត្តិធម៌ ទៅសម្រួលជាមួយតុលាការឱ្យដោះលែងសកម្មជនទាំងនោះ បានជាង ៧០នាក់ហើយ។ មេធាវីកាន់ក្ដីឲ្យអ្នកទោសនយោបាយ នៃគណបក្សសង្គ្រោះជាតិ លោក សំ សុគង់ ធ្លាប់និយាយថា នៅសល់អ្នកជាប់ឃុំពាក់ព័ន្ធ នឹងរឿងនយោបាយចន្លោះ មុនឆ្នាំ២០១៩ ចំនួន ៧នាក់ទៀត មិនទាន់ទទួលបានការដោះលែង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។