ប៉ូលិស​ខេត្ត​បាត់ដំបង​បន្ត​សហ​ការណ៍​ជា​មួយ​អាជ្ញាធរ​ថៃ​ទប់​ស្កាត់​ក្រុម​បក្ស​ប្រឆាំង​ធ្វើ​សកម្មភាព​តាម​ព្រំដែន

ដោយ ជាតិ ចំណាន
2019.11.19
ប៉ូលិស​ខ្មែរ និង​ថៃ 111819 ប៉ូលិស​នៃ​ស្នងការដ្ឋាន​នគរបាល​ខេត្ត​បាត់ដំបង ជួប​ពិភាក្សា​ជា​មួយ​អាជ្ញាធរ​ខេត្ត​ស្រះកែវ ប្រទេស​ថៃ នៅ​ព្រឹក​ថ្ងៃ​ទី១៨ ខែ​វិច្ឆិកា ឆ្នាំ២០១៩។
រូប៖ ពី​ហ្វេសប៊ុក​ស្នងការដ្ឋាន​នគរបាល​ខេត្ត​បាត់ដំបង

ប៉ូលិស​នៃ​ស្នងការដ្ឋាន​នគរបាល​ខេត្ត​បាត់ដំបង​បន្ត​ពង្រឹង​កិច្ច​សហប្រតិបត្តិការ​ជា​មួយ​អាជ្ញាធរ​ខេត្ត​ស្រះកែវ ប្រទេស​ថៃ ដើម្បី​ទប់​ស្កាត់​ក្រុម​គណបក្ស​ប្រឆាំង​​ដែល​គាំទ្រ​លោក សម រង្ស៊ី ​មិន​ឱ្យ​ធ្វើ​សកម្មភាព​នយោបាយ​នៅ​តាម​ព្រំដែន​កម្ពុជា-ថៃ។ មន្ត្រី​គណបក្ស​ប្រឆាំង​មួយ​ចំនួន​ដែល​ភៀស​ខ្លួន​នៅ​ក្រៅ​ប្រទេស​អះអាង​ថា ថ្វីត្បិតតែ​អាជ្ញាធរ​ខ្មែរ​តាម​ធ្វើ​ទុក្ខបុកម្នេញ​មិន​ឈប់​ឈរ​យ៉ាង​នេះ​ក្ដី​ក៏​ពួកគាត់​នៅ​តែ​ប្រកាន់​ជំហរ​ត្រៀម​រង់ចាំ​ទទួល​លោក សម រង្ស៊ី និង​ថ្នាក់​ដឹក​នាំ​គណបក្ស​ប្រឆាំង​វិល​ចូលស្រុក​​វិញ​ដដែល។

ប្រធាន​យុវជន​គណបក្ស​សង្គ្រោះ​ជាតិ​រាជធានី​ភ្នំពេញ​ដែល​ភៀស​ខ្លួន​នៅ​ប្រទេស​ថៃ​ លោក​ ឃឹន រឿន​ ប្រាប់​អាស៊ី​សេរី​នៅ​ថ្ងៃ​ទី​១៨ ​វិច្ឆិកា​ថា ពួក​លោក​ដែល​ភៀស​ខ្លួន​នៅ​ក្រៅ​ប្រទេស​ត្រៀម​វិល​ត្រឡប់​ទៅ​មាតុ​ប្រទេស​នៅ​ពេល​ដ៏​ខ្លី​ខាងមុខ ដើម្បី​ចូល​រួម​ស្ដារ​ប្រជាធិបតេយ្យ​នៅ​កម្ពុជា​ឱ្យ​រស់​ឡើង​វិញ។លោក​បន្ត​ថា ថ្នាក់​ដឹក​នាំ​គណបក្ស​សង្គ្រោះ​ជាតិ​កំពុង​តែ​ធ្វើ​ការងារ​ការ​ទូត​ជា​មួយ​ប្រទេស​​អាស៊ាន ដើម្បី​សុំ​ឱ្យ​ជួយ​អន្តរាគមន៍​បើក​ផ្លូវ​ឱ្យ​ប្រធាន​ស្ដីទី​គណបក្ស​សង្គ្រោះ​ជាតិ លោក សម រង្ស៊ី និង​ថ្នាក់​ដឹក​នាំ​គណបក្ស​នេះ​បាន​វិល​ស្រុក​វិញ​នៅ​ពេល​ខាង​មុខ៖ «ខ្ញុំ​តាំង​ចិត្ត​ហើយ​ថា ទោះ​បី​ជា​កាល​ទេស​បែប​ណា​ក៏​ដោយ ក៏​ខ្ញុំ​នៅ​ជា​មួយ​លោក​ប្រធាន សម រង្ស៊ី និង​ថ្នាក់​ដឹក​គណបក្ស​ដែរ​ ព្រោះ​ប្រទេស​យើង​ត្រូវ​ការ​យើង​ទាំង​អស់​គ្នា​ ហើយ​បើ​យើង​មិន​ក្រោក​ឈរ​ទេ​ជន​ជាតិ​យួន និង​ជនជាតិ​ចិន ដាក់​អនាគម ឬ​យក​ដី​ខ្មែរ​តែ​ម្ដង។ព្រោះ​កន្លង​មក​នេះ​សភា​អនុម័ត ច្បាប់​សន្ធិសញ្ញា​បន្ថែម អ៊ីចឹង​យើង​ប្រគល់​ដី​ឱ្យ​គេ​ដោយ​ស្វ័យប្រវត្តិ តាម​រយៈ​មេ​ដឹក​នាំ​សព្វ​ថ្ងៃ»

លោក​បន្ថែម​ថា ថ្វីត្បិត​តែ​ប៉ូលិស​ខេត្ត​បាត់ដំបង​បន្ត​រឹតចំណង​មិត្តភាព​ជា​មួយ​ភាគី​ថ្ងៃ​យ៉ាង​នេះ​ក្ដី ក៏​មិន​អាច​ទប់​ស្កាត់​សកម្មជន​គណបក្ស​ប្រឆាំង​ដែល​កំពុង​ភៀស​ខ្លួន​នៅ​ក្រៅ​ប្រទេស​ និង​នៅ​ក្នុង​ស្រុក​ឱ្យ​ឈប់​ធ្វើ​សកម្មភាព​នយោបាយ​បាន​ដែរ ល្គឹក​ណា​របប​លោក ហ៊ុន សែន មិន​ព្រម​ដោះ​ស្រាយ​បញ្ចប់​វិបត្តិ​នយោបាយ​នៅ​កម្ពុជា​នោះ។

ស្រដៀង​គ្នា​នេះ ប្រធាន​គណបក្ស​សង្គ្រោះ​ជាតិ​ខេត្ត​ស្វាយរៀង​ ដែល​កំពុង​ភៀស​ខ្លួន​នៅ​ក្រៅ​ប្រទេស​ លោក ម៉ៅ វិបុល មាន​ប្រសាសន៍​ថា លោក​និង​សកម្មជន​ដទៃ​ទៀត​រាប់​រយ​នាក់​នៅ​ប្រទេស​ថៃ​នៅ​តែ​បន្ត​ដំណើរ​ជា​មួយ​ថ្នាក់​ដឹក​នាំ​គណបក្ស​ប្រឆាំង​រហូត​ដល់​ទី​បញ្ចប់ ដោយ​មិន​ខ្លាច​អាជ្ញាធរ​ធ្វើ​ទុក្ខបុកម្នេញ​នោះ​ឡើយ។លោក​បញ្ជាក់​ថា ​របប​ក្រុង​ភ្នំពេញ​កំពុង​តែ​ភ័យ​ស្លន់ស្លោ​ខ្លាច​អ្នក​គាំទ្រ​បក្ស​ប្រឆាំង​ប្រមូលផ្ដុំ​គ្នា​​ទៅ​ទទួល​លោក​ សម រង្ស៊ី​ វិល​ចូល​ស្រុក​វិញ​សាជា​ថ្មី ​ធ្វើ​ឱ្យ​​ពិបាក​ទប់ទល់​ទើប​​បាន​ជា​របប​នេះ​បន្ត​តាម​ធ្វើ​ទុក្ខបុកម្នេញ​មន្ត្រី​គណបក្ស​ប្រឆាំង​បែប​នេះ៖ «លោក ហ៊ុន សែន ពិត​ជា​មិន​យក​ទោសពៃរ៍​ក៏​ពិត​មែន​ ក៏ប៉ុន្តែ​នៅ​ក្នុង​ការ​ចោទ​ប្រកាន់​របស់​តុលាការ​ដដែល។ អីចឹង​ខ្ញុំ​មាន​តែ​ប្រឹង​តស៊ូ​បន្ត​ទៀត​ ព្រោះ​​ខ្ញុំ​ចង់បាន​អ្វី​ដែល​យុត្តិធម៌​ និង​មាន​សិទ្ធិ​ស្មើ​គ្នា​ចំពោះ​មុខ​ច្បាប់។ អីចឹង​ពួក​ខ្ញុំ​នៅ​តែ​តស៊ូ ដើម្បី​ផ្លាស់​ប្ដូរ​របប​ដែល​និយាយ​តែ​មាត់​តាម​តែ​បុគ្គល​ម្នាក់ អីចឹង​ខ្ញុំ​ត្រូវ​តែ​តស៊ូ ដើម្បី​ផ្លាស់​ប្ដូរ​ដើម្បី​ឱ្យ​ប្រទេស​មាន​នីតិរដ្ឋ​ពិតប្រាកដ»

ប្រតិកម្ម​របស់​មន្ត្រី​គណបក្ស​សង្គ្រោះ​ជាតិ​នេះ បន្ទាប់​ពី​ប៉ូលិស​នៃ​ស្នងការដ្ឋាន​នគរបាល​ខេត្ត​បាត់ដំបង ចាប់​ផ្ដើម​ពង្រឹង​កិច្ច​សហ​ប្រតិបត្តិការ​ជា​មួយ​អាជ្ញាធរ​ខេត្ត​ស្រះកែវ​​របស់​ថៃ​ជា​ថ្មី​ទៀត។ ស្នងការ​នគរបាល​ខេត្ត​បាត់ដំបង​លោក​ អ៊ុច សុខុន បាន​ដឹកនាំ​មន្ត្រី​ក្រោម​ឱវាទ​ជា​ច្រើន​នាក់ ​ជួប​ពិភាក្សា​ជា​មួយ​អាជ្ញាធរ​ខេត្ត​ស្រះកែវ (Srakao) ប្រទេស​ថៃ ដើម្បី​ពង្រឹង​សាមគ្គីភាព​នៅ​តាម​ព្រំដែន​​កម្ពុជា​ថៃ​នៅ​ព្រឹក​ថ្ងៃ​ទី១៨ វិច្ឆិកា។ ក្នុង​ជំនួប​នោះ​លោក អ៊ុច សុខុន បាន​អរគុណ​ដល់​ភាគី​ថៃ​ ដែល​បាន​ទប់ស្កាត់​ដំណើរ​មាតុភូមិនិវត្តន៍​របស់​លោក សម រង្សី និង​ថ្នាក់​ដឹកនាំ​គណបក្ស​ប្រឆាំង​បាន​សម្រេច​ដោយ​មិនឱ្យ​ពួក​គេ​វិល​ចូល​​កម្ពុជា​បាន​កាល​ពី​ថ្ងៃ​ទី៩ វិច្ឆិកា​កន្លង​ទៅ។ គេហទំព័រ​ស្នងការដ្ឋាន​នគរបាល​ខេត្ត​បាត់ដំបង​ចុះ​ផ្សាយ​នៅ​ថ្ងៃ​ទី១៨ វិច្ឆិកា​ថា លោក​ស្នងការ​រូប​នេះ​នៅ​តែ​បន្ត​ស្នើសុំ​ឱ្យ​អាជ្ញាធរ​ថៃ​សហ​ការណ៍​​ទប់ស្កាត់​សកម្មភាព​ល្មើស​ច្បាប់ ជា​ពិសេស​ទប់ស្កាត់​​​ថ្នាក់​ដឹក​នាំ​គណបក្ស​ប្រឆាំង​កុំ​ឱ្យ​ពួកគេ​យក​ទឹក​ដី​ថៃ ប៉ុនប៉ង​បំផ្លាញ​សុខ​សន្តិភាព និង​ដើម្បី​រក្សា​សន្តិសុខ​នៅ​តាម​ព្រំដែន​ខេត្ត​បាត់ដំបង​ និង​ខេត្ត​ស្រះ​កែវ​បន្ត​ទៀត។

នាយករង​ទទួល​បន្ទុក​ផ្នែក​ឃ្លាំមើល​សិទ្ធិមនុស្ស​នៃ​អង្គការ លីកាដូ (LICADHO) លោក អំ សំអាត យល់​ថា មូលហេតុ​ដែល​ប៉ូលិស​ខេត្ត​បាត់ដំបង​បន្ត​សហការ​ជាមួយ​ភាគី​ថៃ​នេះ ដោយសារ​តែថ្មីៗ នេះ មេ​ដឹក​នាំ​របប​ក្រុង​ភ្នំពេញ​លោក ហ៊ុន សែន បាន​ប្រកាស​តាម​ចាប់​ថ្នាក់​ដឹក​នាំ​គណបក្ស​ប្រឆាំង​ចំនួន ១៨នាក់ ប្រសិន​បើ​ពួកគេ​វិល​ចូល​មក​កម្ពុជា​វិញ​នោះ។ ទោះ​ជា​យ៉ាង​ណា​លោក អំ សំអាត បញ្ជាក់​ថា នេះ​ជា​ការ​ធ្វើ​ទុក្ខ​បុក​ម្នេញ​ផ្នែក​នយោបាយ​មក​លើ​គូភាគី ដែល​មាន​និន្នាការ​ប្រឆាំង​នឹង​រដ្ឋាភិបាល៖ «បាទ! ទោះ​បី​ជា​មួយ​រយៈ​ក្រោយ​ថ្ងៃទី៩ វិច្ឆិកា​មាន​ការ​បន្ធូរបន្ថយ​ស្ថានភាព​មួយ​ចំនួន​ក៏​ដោយ​ក៏​បញ្ហា​ការ​បារម្ភ​នៅ​មាន។ អ៊ីចឹង​យើង​ចង់​បាន​ធ្វើ​យ៉ាង​ណា​បន្ធូរ​បន្ថយ​ការ​តានតឹង​ផ្នែក​នយោបាយ​ហ្នឹង​ទៅ ដើម្បី​ឱ្យ​ប្រជាពលរដ្ឋ​អនុវត្ត​សិទ្ធិ​ជា​មូលដ្ឋាន​ ហើយ​អ្នក​នយោបាយ​ធ្វើ​យ៉ាង​ណា​កុំ​យក​ពលរដ្ឋ​ធ្វើ​ជា​ឧបករណ៍​ទៅ​ឱ្យ​រង់​គ្រោះ​ជំនួស​ខ្លួន​ជា​ការ​ល្អ»

សកម្មជន​គណបក្ស​ប្រឆាំង​ដែល​ភៀស​ខ្លួន​នៅ​ប្រទេស​ថៃ​អះអាង​ថា ពួក​គេ​នៅ​តែ​មាន​កម្លាំង​ច្រើន​​អាច​ទៅ​ចូល​រួម​អម​ដំណើរ​ថ្នាក់​ដឹក​គណបក្ស​សង្គ្រោះ​ជាតិ​វិល​ចូល​ស្រុក​វិញ​បាន​គ្រប់​ពេល។ ពួកគេ​សង្ឃឹម​ថា នៅ​ពេល​ដ៏​ខ្លី​ខាង​មុខ​នេះ លោក សម រង្ស៊ី នឹង​អាច​រក​ផ្លូវ​ចូល​ទៅ​ដល់​មាតុប្រទេស បាន​ដោយ​ងាយ​ស្រួល ដើម្បី​បញ្ចប់​វិបត្តិ​នយោបាយ​នៅ​កម្ពុជា៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

អត្ថបទពេញនិយម
នយោបាយ
សង្គម​ស៊ីវិល​រំពឹង​ថា​ ឯកអគ្គរដ្ឋទូត​អាមេរិក​ប្រចាំ​កម្ពុជា​ថ្មី​នឹង​បន្ត​ចូល​រួម​លើក​ស្ទួយ​ប្រជាធិបតេយ្យ
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។