បក្ស​នយោបាយ​រិះគន់​លោក ហ៊ុន សែន យក​ប័ណ្ណ​ក្រីក្រ​ឃោសនា​រក​សំឡេង​ឆ្នោត​មុន​រដូវ​កាល

ដោយ មាន ឫទ្ធិ
2022.10.02
Share on WhatsApp
Share on WhatsApp
បក្ស​នយោបាយ​រិះគន់​លោក ហ៊ុន សែន យក​ប័ណ្ណ​ក្រីក្រ​ឃោសនា​រក​សំឡេង​ឆ្នោត​មុន​រដូវ​កាល លោក​នាយករដ្ឋមន្ត្រី ហ៊ុន សែន។
រូប៖ ហ្វេសប៊ុក​លោក ហ៊ុន សែន

គណបក្ស​នយោបាយ​មួយចំនួន​រិះគន់​ថា លោកនាយក​រដ្ឋមន្ត្រី ហ៊ុន សែន កំពុង​រំលោភច្បាប់ គោលការណ៍​ស្មើភាព និង​តួនាទី​ក្នុង​ឋានៈ​ជា​នាយករដ្ឋមន្ត្រី​យក​វេទិកា​រួម​ទាំង​ធនធាន​ជាតិ​ទៅ​ឃោសនា​រក​សំឡេង​ពី​ពលរដ្ឋ ដើម្បី​គេង​ចំណេញ​ផលប្រយោជន៍​បក្ស​ខ្លួន​សម្រាប់​ការបោះឆ្នោត​ជ្រើសតាំង​តំណាងរាស្ត្រ​នៅ​ខែ​កក្កដា ឆ្នាំ​២០២៣។ ប្រតិកម្ម​នេះ បន្ទាប់​ពី​លោក ហ៊ុន សែន យក​គោល​នយោបាយ​ផ្តល់​ប័ណ្ណ​ក្រីក្រ​ធ្វើជា​មធ្យោបាយ​សម្រាប់​អំពាវនាវ​ឱ្យ​ពលរដ្ឋ​បោះឆ្នោត​ជូន​គណបក្ស​ប្រជាជន​កម្ពុជា​នៅពេល​ខាងមុខនេះ។

គណបក្ស​នយោបាយ​មួយចំនួន​លើកឡើង​ស្របគ្នា​ថា លោកនាយក​រដ្ឋមន្ត្រី ហ៊ុន សែន និង​មន្ត្រី​រដ្ឋាភិបាល​ត្រូវ​អនុវត្ត​តួនាទី​ឱ្យ​បាន​ត្រឹមត្រូវ ដើម្បី​ពង្រឹង​ការអនុវត្ត​ច្បាប់​ស្របតាម​គោលការណ៍​ប្រជាធិបតេយ្យ​សេរី​ពហុបក្ស។

អនុប្រធាន​គណបក្ស​ភ្លើងទៀន លោក ថាច់ សេដ្ឋា ថ្លែង​ថា ការឃោសនា​រក​សំឡេងឆ្នោត​របស់​លោក ហ៊ុន សែន មុន​ពេលវេលា​បោះឆ្នោត​ដូច្នេះ គឺជា​រឿង​មិន​ត្រឹមត្រូវ​តាមច្បាប់​នោះ​ទេ​។ លោក​ចាត់ទុក​ទង្វើ​នេះ​រំលោភ​តួនាទី ធនធាន​រដ្ឋ​ពី​សំណាក់​រដ្ឋាភិបាល ក្នុង​គោលបំណង​កេង​ចំណេញ​ប្រយោជន៍​នយោបាយ​ផ្ទាល់ខ្លួន​ដែល​ធ្វើ​ឱ្យ​ការបោះឆ្នោត​នៅពេល​ខាងមុខ​មិន​ស្មើភាព​គ្នា និង​ប្រកប​ដោយ​សេរី ត្រឹមត្រូវ និង​យុត្តិធម៌​តាមច្បាប់​បានទេ៖ «មិនទាន់​និយាយ​ពី​រឿង គ​.​ជ​.​ប ផង គ្រាន់តែ​តួនាទី​មួយ​របស់​នាយក​រដ្ឋមន្ត្រី​ក្នុង​ឋានៈ​ជា​ប្រធាន​គណបក្ស​ប្រជាជន​កម្ពុជា និង​ជា​បក្ស​កាន់អំណាច​ហើយ​ប្រើប្រាស់​តួនាទី​ឃោសនា​មុន​ការបោះឆ្នោត​ហើយ​ហ្នឹង អ្វី​ទៅ​ដែល​យើង​ថា ធានា​ដល់​ការបោះឆ្នោត​មួយ​ដោយ​ស្មើភាព​គ្នា​ប្រព្រឹត្ត​ទៅ​ដោយ សេរី ត្រឹមត្រូវ និង​យុត្តិធម៌ ហ្នឹង​ជា​សញ្ញា​ឃើញ​ច្បាស់​ទាំងអស់គ្នា​ថា វា​មិនអាច​ទៅរួច​ទេ ពីព្រោះ​អ្នកដឹកនាំ​ចាប់ផ្តើម​ឃោសនា​តាំងពី​ពេលនេះ​ទៅ​ហើយ​ហ្នឹង»

ស្រដៀង​គ្នា​នេះ​ដែរ ប្រធាន​គណៈកម្មាធិការ​នាយក​នៃ​គណបក្ស​ប្រជាធិបតេយ្យ​មូលដ្ឋាន លោក យង់ សាំង​កុមារ យល់​ឃើញ​ថា តួនាទី​នាយករដ្ឋមន្ត្រី​តំណាង​ឱ្យ​ពលរដ្ឋ​ខ្មែរ​គ្រប់​និន្នាការ​នយោបាយ​។ លោក​បន្ត​ថា រដ្ឋាភិបាល​ផ្សព្វផ្សាយ​គោលនយោបាយ​ដឹកនាំ​ប្រទេស​មិន​ខុស​នោះ​ទេ ប៉ុន្តែ​ការ​យក​ហេតុផល​នៃ​ការ​ផ្តល់​ប័ណ្ណ​ក្រីក្រ​ដើម្បី​អំពាវនាវ​រក​សំឡេងឆ្នោត​ពី​ពលរដ្ឋ​មុន​រដូវ​កាល​ឃោសនាបោះឆ្នោត​ជា​ការ​ដឹកនាំ​ប្រទេស​ច្របូកច្របល់​តួនាទី និង​កាតព្វកិច្ច​។ លោក​បញ្ជាក់​ថា តាមច្បាប់ គណបក្ស​កាន់​អំណាច​មាន​សិទ្ធិ​ប្រើប្រាស់​ថវិកាជាតិ​ដើម្បី​អនុវត្ត​គោល​នយោបាយ​ក្នុង​អាណត្តិ​ដឹកនាំ​របស់​ខ្លួន តែ​ផ្ទុយទៅវិញ​លោក​មើល​ឃើញ​ថា សារ​នយោបាយ​របស់​មេដឹកនាំ​បក្ស​កាន់អំណាច​បែបនេះ​អាច​ធ្វើ​ឱ្យ​ពលរដ្ឋ​មួយចំនួន​យល់​ច្រឡំ​ថា​គណបក្សប្រឆាំង ឬ​គណបក្ស​ក្រៅ​រដ្ឋាភិបាល​មិន​មាន​ប្រាក់​ជួយឧបត្ថម្ភ​ដល់​ពួកគាត់៖ «ពេលនេះ​មិនមែន​ជា​ពេល​សម្រាប់​គាត់​ឃោសនា​ទេ ខ្ញុំ​គិត​ថា ការ​ធ្វើ​រៀប​នេះ​ហាក់​មិន​ចូលរួម​ចំណែក​ពង្រឹង​តួនាទី​របស់​រដ្ឋាភិបាល និង​តួនាទី​របស់​គណបក្ស​នយោបាយ​ក្នុង​សង្គម ហើយ​ធ្វើ​ឱ្យ​ច្របូកច្របល់​ថែមទៀត ចំពោះ​យើង​យល់​ថា គាត់​គួរតែ​បន្ត​ការ​ពង្រឹង​តួនាទី​របស់​គាត់​ធ្វើ​ជា​នាយករដ្ឋមន្ត្រី ប្រមុខ​រដ្ឋាភិបាល​ល្អ​សម្រាប់​ខ្មែរ​គ្រប់រូប​ទៅ»

ប្រតិកម្ម​នេះ​គណបក្ស​នយោបាយ​នេះ ស្រប​ពេល​ការ​បោះឆ្នោត​ជ្រើសតាំង​តំណាងរាស្ត្រ​នៅ​សល់​ជាង​១០​ខែ​ទៀត តែ​លោក ហ៊ុន សែន បាន​ថ្លែង​សារ​ផ្លែផ្កា​ឱ្យ​គូ​ប្រជែង​នយោបាយ ហើយ​លើស​ពី​នេះ​លោក​អំពាវនាវ​ដល់​ពលរដ្ឋ​បោះឆ្នោត​ឱ្យ​គណបក្ស​ប្រជាជន​កម្ពុជា​ដឹកនាំ​ប្រទេស​បន្ត​ទៀត​។ លោក​អះអាង​ថា គណបក្ស​ប្រជាជន​សម្រាប់​ការបោះឆ្នោត​ខាងមុខ​មិន​សន្យា​ចោល​ដូច​បក្ស​ផ្សេង​នោះ​ទេ តែ​រដ្ឋាភិបាល​ដែល​ដឹកនាំ​ដោយ​គណបក្ស​របស់​លោក​កំពុង​អនុវត្ត​គោលនយោបាយ​ឧបត្ថម្ភ​សាច់​ជូន​ពលរដ្ឋ​ជិត​៣​លាន​នាក់​។ ការ​ឃោសនា​របស់​លោក ហ៊ុន សែន នៅ​មុខ​ពលរដ្ឋ​ជាង​ពីរ​ពាន់​គ្រួសារ​នៅ​ភូមិ​ធម្មជាតិ​រុនតាឯក ស្រុក​បន្ទាយស្រី ខេត្ត​សៀមរាប កាលពី​ថ្ងៃ​ទី​១ ខែ​តុលា៖ «ខ្ញុំ​នឹង​សង្ឃឹម​ជឿជាក់​ថា ប្រជាពលរដ្ឋ​នៅ​ទីនេះ​ដែល​ខ្ញុំ​បាន​នឹង​កំពុង​ខិតខំ​ដោះស្រាយ​បញ្ហា​គ្រប់យ៉ាង​ឱ្យ​បងប្អូន​បែរ​ទៅជា​បោះឆ្នោត​ឱ្យ​អ្នកដទៃ​នោះ​ទេ ខ្ញុំ​មិន​ជឿ​ទេ​។ ប៉ុន្តែ​សម្រាប់​ខ្ញុំ​ថ្ងៃនេះ​បាន​បញ្ជាក់​ជាមួយគ្នា​ហើយ អ្នកខ្លះ​ធ្លាប់​ដោយ​តាម​គេ គឺ​សញ្ញា​ទេវតា​ស្រួល​សម្គាល់​ណាស់ សញ្ញា​ហ្នឹង​នៅ​ជាមួយ​បងប្អូន​រហូត បងប្អូន​ឱ្យ​មាន​ការ​អី​ទេវតា​អើយ​ជួយ​ផង មិនដែល​ស្រែក​ហៅថា​ភ្លើង​ជន្លូស​អើយ​ជួយ​ផង គឺ​អត់​ទេ»

ទាក់ទង​រឿ​នេះ អ្នកនាំពាក្យ​គណៈកម្មាធិការ​ជាតិ​រៀបចំ​ការបោះឆ្នោត (​គ​.​ជ​.​ប​) លោក ហង្ស ពុទ្ធា ប្រាប់​វិទ្យុ​អាស៊ីសេរី​ថា ស្ថាប័ន​របស់​លោក​ពុំ​មាន​ភារកិច្ច​ដោះស្រាយ​រឿង​ការឃោសនា​រក​សំឡេងឆ្នោត​របស់​គណបក្ស​នយោបាយ​នោះ​ទេ ដោយ​លោក​អះអាង​ថា អំឡុង​ពេលនេះ គឺ​ហួស​ដែន​សមត្ថកិច្ច​របស់​គ​.​ជ​.​ប ហើយ​លោក​ជំរុញ​ឱ្យ​ភាគី​ពាក់ព័ន្ធ​ដែល​យល់​ថា ខុសឆ្គង​ប្តឹង​ទៅ​អាជ្ញាធរ​មាន​សមត្ថកិច្ច​ដើម្បី​ដោះស្រាយ​រឿង​នេះ​វិញ​៖ «ពេល​ឥឡូវនេះ​មិន​ស្ថិត ក្នុង​ដែន​សមត្ថកិច្ច​ដែល​គ..ប ធ្វើការ​គ្រប់គ្រង​ទេ គឺ​ពាក់ព័ន្ធ​អាជ្ញាធរ​តាមដាន​ពិនិត្យមើល​ទៅលើ​បញ្ហា​ហ្នឹង​បាទ»

ជុំវិញ​រឿង​នេះ នាយក​ប្រតិបត្តិ​អង្គការ​និចហ្វិក (Nicfec) លោក សំ គន្ធាមី មាន​ប្រសាសន៍​ថា​ពេលនេះ​ពុំ​មែន​ជា​ពេលវេលា​សម្រាប់​គណបក្ស​នយោបាយ​ឃោសនា​គោលនយោបាយ​រក​សំឡេងឆ្នោត​ទេ។ លោក​បន្ត​ថា ទោះបី​ច្បាប់​តម្រូវ​រដ្ឋាភិបាល​អនុវត្ត​តួនាទី​របស់​ខ្លួន​ដោយ​ឯករាជ្យ​និង​មិន​លម្អៀង​និន្នាការ​នយោបាយ​យ៉ាង​ណា​ក្តី ក៏​លោក​មើល​ឃើញ​ថា មន្ត្រី​រដ្ឋាភិបាល​តែងតែ​ឆ្លៀតឱកាស​យក​វេទិកា​របស់​រដ្ឋ​អំពាវនាវ​ឱ្យ​ពលរដ្ឋ​បោះឆ្នោត​ឱ្យ​គណបក្ស​កាន់អំណាច ដោយ​គ្មាន​វិធានការ​ទប់ស្កាត់​ករណី​ទាំង​នោះ​ទេ៖ «ច្បាប់​គឺ​តម្រូវ​ឱ្យ​ឯករាជ្យ អព្យាក្រឹត្យ​ដោយ​មិន​លម្អៀង ប៉ុន្តែ​រឿង​នេះ​វា​ជាទូទៅ​ហើយ​ស្រុក​ខ្មែរ​គ្មាន​នរណា​ចាប់​ថ្នាក់​អី​ទេ ហើយ​វា​ទៅជា​ទំលាប់​របស់​ថ្នាក់ដឹកនាំ​ទៅ​ហើយ​ក្នុង​វេទិកា​តែងតែ​អំពាវនាវ​នេះ»

រដ្ឋធម្មនុញ្ញ​មាត្រា ៣៥ ចែងថា​ប្រជាពលរដ្ឋ​ខ្មែរ​ទាំង​ពីរ​ភេទ មាន​សិទ្ធិ​ចូលរួម​យ៉ាងសកម្ម ក្នុង​ជីវភាព​នយោបាយ សេដ្ឋកិច្ច សង្គមកិច្ច និង​វប្បធម៌​របស់​ប្រទេសជាតិ​។ ប៉ុន្តែ ច្បាប់បោះឆ្នោត បាន​ហាមឃាត់ មិន​ឲ្យ​មន្ត្រី​សាធារណៈ ដូចជា​នាយករដ្ឋមន្ត្រី​ជាដើម ប្រើប្រាស់​តួនាទី​របស់​រដ្ឋ ដើម្បី​កេង​ចំណេញ​ប្រយោជន៍​បក្ស​របស់​ខ្លួន​នោះ​ឡើយ​។ មាត្រា ៨០ នៃ​ច្បាប់បោះឆ្នោត​ជ្រើសតាំង​តំណាងរាស្ត្រ បាន​ហាម​ប្រើប្រាស់​ថវិកា សម្ភារៈ មធ្យោបាយ​ដឹកជញ្ជូន ដែល​ជា​សម្បត្តិ​រដ្ឋ ដើម្បី​ធ្វើ​សកម្មភាព​ឃោសនាបោះឆ្នោត ឲ្យ​គណបក្ស​នយោបាយ​ណាមួយ ឬ​បេក្ខជន​ណា​ម្នាក់។

ទោះ​យ៉ាងណា​មន្ត្រី​សង្គម​ស៊ីវិល និង​គណបក្ស​នយោបាយ​នៅតែ​រក​ឃើញ​ថា បក្ស​កាន់អំណាច​រំលោភ​លើ​ច្បាប់​ទាក់ទង​នឹង​ការប្រើប្រាស់​ស្ថាប័ន​និង​ធនធាន​រដ្ឋ​បម្រើ​ប្រយោជន៍​នយោបាយ​របស់​ខ្លួន ដែល​រំលោភបំពាន​លើ​ការបោះឆ្នោត​ដោយ​សេរី ត្រឹមត្រូវ និង​យុត្តិធម៌​។ ពួកគេ​រកឃើញ​ថា មន្ត្រីរាជការ​ស៊ីវិល​មួយចំនួន​បាន​យក​ម៉ោង​ការងារ ឈ្មោះ​ស្ថាប័ន និង​ធនធាន​រដ្ឋ ទៅ​បម្រើ​ផលប្រយោជន៍​គណបក្សកាន់អំណាច​ដែល​ផ្ទុយ​ទៅ​នឹង​គោលការណ៍​ច្បាប់ ដែល​តម្រូវ​មន្ត្រីរាជការ​ត្រូវ​មាន​អព្យាក្រឹតភាព​ក្នុង​សកម្មភាព​បំពេញការងារ​របស់​ខ្លួន ស្របតាម​ច្បាប់ និង​នីតិវិធី​សម្រាប់​ការបោះឆ្នោត​។ ប៉ុន្តែ​រហូតមកដល់​ស​កម្ម​ភាព​ឃោសនា​រក​សំឡេងឆ្នោត​ដែល​រំលោភ​អំណាច និង​តួនាទី​នៅតែ​បន្ត​កើតឡើង ដោយសារ​គ្មាន​ស្ថាប័ន​ណា​មាន​សមត្ថកិច្ច​ចាត់វិធានការ​លើ​អ្នក​ប្រព្រឹត្ត​ឱ្យ​អនុវត្ត​ត្រឹមត្រូវ​តាមច្បាប់​នៅ​ឡើយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។