ក្រុមមេដឹកនាំពលករខ្មែរនៅក្រៅប្រទេស ដែលមាននិន្នាការគាំទ្រគណបក្សសង្គ្រោះជាតិ អំពាវនាវឲ្យកងកម្លាំងប្រដាប់អាវុធ កំពុងល្បាតនៅតាមព្រំដែន កម្ពុជា ថៃ កុំវាយបង្ក្រាប ឬបាញ់ប្រហារពលករខ្មែរ នៅថ្ងៃទី០៩ វិច្ឆិកា។ ពួកគេ អះអាងថា ពលករខ្មែរ ទាំងអស់ អមដំណើរ លោក សម រង្ស៊ី វិលទៅប្រទេសកម្ពុជា ដើម្បីស្ដារលទ្ធិប្រជាធិបតេយ្យ និងដើម្បីទាមទារផលប្រយោជន៍ឲ្យកងកម្លាំងប្រដាប់អាវុធ។
ក្រុមមេដឹកនាំ និងពលករខ្មែរ ចំណាយស្រុក ទទូចសុំឲ្យកងកម្លាំង ក្រោមបង្គាប់មេបញ្ជាការ ដែលមាននិន្នាការគាំទ្ររបបក្រុងភ្នំពេញ កុំវាយបង្ក្រាប ធ្វើបាបពលករខ្មែរ ព្រោះពួកគាត់មានឈាមជ័រជាខ្មែរដូចគ្នា ហើយគោលបំណងដូចគ្នា គឺដើម្បីចង់បានលទ្ធិប្រជាធិបតេយ្យ និងធ្វើឲ្យគ្រួសារកងកម្លាំងមានជីវភាពធូរធារ។
មេដឹកនាំពលករនៅប្រទេសជប៉ុន និងជាប្រធានចលនាសង្គ្រោះជាតិនៅជប៉ុន លោក ហៃ វណ្ណា ប្រាប់ថា លោកនឹងដឹកនាំពលករខ្មែរពីប្រទេសជប៉ុន ទៅចូលរួមជាមួយពលករខ្មែរនៅប្រទេសថៃ ហើយដើរចូលប្រទេសកម្ពុជាជាមួយគ្នា នៅថ្ងៃទី៩ វិច្ឆិកា។ លោក អះអាងថា ការចូលទៅមាតុប្រទេសវិញ ដើម្បីស្ដារប្រជាធិបតេយ្យ និងលើកស្ទួយជីវភាពគ្រួសារកងទ័ព បំបាត់អំពើពុករលួយបក្ខពួកនិយម ក្នុងជួរកងកម្លាំងប្រដាប់អាវុធជាដើម។ មេដឹកនាំពលកររូបនេះ អំពាវនាវឲ្យកម្លាំង ដែលកំពុងយាមល្បាតតាមព្រំដែន ជួយការពារពលករ និងពលរដ្ឋខ្មែរ ប្រសិនបើមានកងកម្លាំងបរទេសបង្កប់ខ្លួន ចាំវាយប្រហារ ឬធ្វើបាបពលរដ្ឋខ្មែរ៖ «ខ្ញុំសូមអំពាវនាវដល់កងទ័ពខ្មែរ ដែលកំពុងតែត្រូវបាន លោក ហ៊ុន សែន បញ្ជាឲ្យមកល្បាតតាមព្រំដែនខ្មែរថៃ ខ្ញុំគិតថា ប្រសិនបើគាត់ជាខ្មែរពិតប្រាកដ គាត់អត់មានស្ដាប់បញ្ជា លោក ហ៊ុន សែន ទេ គាត់មិនត្រូវលើកចុងកាណុង វាយប្រហារមកលើប្រជាពលរដ្ឋខ្មែរទេ គឺគាត់គួរតែត្រៀមខ្លួនជួយថែរក្សាសុវត្ថិភាពប្រជាពលរដ្ឋ ដែលគាត់ព្រមចាកចេញពីប្រទេសថៃ ចូលប្រទេសកម្ពុជា។ មួយវិញទៀត គឺខ្ញុំស្នើដល់កងទ័ពមេត្តាធ្វើយ៉ាងណា រក្សាសុខសន្តិភាព ដល់ថ្នាក់ដឹកនាំគណបក្សសង្គ្រោះជាតិ ក៏ដូចជាប្រជាពលរដ្ឋ ដែលអមដំណើរ។ ប្រសិនបើមានកងទ័ពយួន ឬក៏កងទ័ពចិន ដែលលោក ហ៊ុន សែន បានបញ្ជ្រាបចូលមកក្នុងព្រំដែនកម្ពុជា ថៃ ហ្នឹង គឺសុំឲ្យកងទ័ពធ្វើអន្តរាគមន៍ មិនមែនមកបាញ់ប្រជាពលរដ្ឋទេ គឺបាញ់លើអាកងទ័ព ដែល លោក ហ៊ុន សែន បញ្ជាមក»។
ការអំពាវនាវនេះ ក្រោយពេលរបបក្រុងភ្នំពេញ បានដាក់ពង្រាយកងកម្លាំងប្រដាប់អាវុធ គ្រប់កន្លែងតាមបណ្ដោយព្រំដែនកម្ពុជាថៃ ទាំងតាមច្រកទ្វារអន្តរជាតិ និងតាមគុម្ពោតព្រៃ។ ការដាក់ពង្រាយកម្លាំងបែបនេះ ក៏ធ្វើឲ្យពលករធ្វើការនៅប្រទេសកូរ៉េខាងត្បូងអំពាវនាវឲ្យកងកម្លាំងប្រដាប់អាវុធតាមព្រំដែន កុំវាយបង្ក្រាប ឬបាញ់ប្រហារ តែត្រូវបែរមកចូលរួម និងជួយក្រុមពលករវិញ។
ចំណែកពលករនៅប្រទេសកូរ៉េខាងត្បូង និងជាប្រធានក្រុមព័ត៌មាននៃចលនាយុវជនគណបក្សសង្គ្រោះជាតិប្រចាំប្រទេសកូរ៉េខាងត្បូង លោក មាស ពិសាល ថ្លែងថា ការសម្ញែងកងកម្លាំងបំភ័យពលករតាមព្រំដែន មិនអាចធ្វើឲ្យពួកគាត់តក់ស្លុត ឬរួញរាក្នុងការវិលចូលកម្ពុជាវិញ នៅថ្ងៃទី៩ វិច្ឆិកានោះទេ។ ប៉ុន្តែដើម្បីបញ្ចៀសការប៉ះទង្គិចគ្នារវាងខ្មែរ និងខ្មែរ ពលកររូបនេះ អំពាវនាវឲ្យកងកម្លាំងប្រដាប់អាវុធ កុំបាញ់ប្រហារ ឬបង្ក្រាបពលរដ្ឋខ្មែរ ព្រោះពលករទាំងនោះមានបំណងអមលោក សម រង្ស៊ី ដើម្បីស្ដារលទ្ធិប្រជាធិបតេយ្យ និងជួយធ្វើឲ្យជីវភាពកងកម្លាំងមានភាពប្រសើរទៅវិញទេ៖ « ខ្ញុំអំពាវនាវដល់បងប្អូនកងទ័ពទាំងអស់ កុំប្រើអាវុធបាញ់ទៅលើប្រជាពលរដ្ឋ ដែលមានឈាមជ័រ ដូចគ្នា ដែលមិនមានអ្វី មិនមានអាវុធ នៅក្នុងដៃ ដែលគាត់គ្រាន់តែ ដើរកាត់ព្រំដែន ដើម្បីទៅប្រទេសកម្ពុជា ក្នុងន័យបង្ហាញពីការទាមទារ ការចង់បានលទ្ធិប្រជាធិបតេយ្យពិតប្រាកដនៅកម្ពុជា ការគោរពសិទ្ធិសេរីភាពប្រជាពលរដ្ឋ ការចង់បានគណបក្សដែលខ្លួនពេញចិត្តរស់ឡើងវិញ បោះឆ្នោតប្រកួតប្រជែងស្មើមុខស្មើមាត់។ ខ្ញុំក៏អំពាវនាវដល់សម្ដេចហ៊ុន សែន ដែរ សុំឲ្យគិតឡើង ប្រជាពលរដ្ឋ គឺជាម្ចាស់ប្រទេសដែរ។ អ៊ីចឹង បើស្រលាញ់ប្រទេសមែន ស្រលាញ់ពលរដ្ឋមែន គួរតែដាក់បញ្ជាស្រែកពីចម្ងាយទៅថា កុំឲ្យកងទ័ពប្រើកម្លាំងបាយ កុំឲ្យប្រើអាវុធ រះទៅលើប្រជាពលរដ្ឋ ឬសូម្បីហិង្សាតិចតួច ស្ដួចស្ដើងណាមួយ ក៏មិនគួរឲ្យកើតមានដែរ»។
គម្រោងវិលត្រលប់របស់លោក សម រង្ស៊ី តាមច្រកព្រំដែនប្រទេសថៃ មិនទាន់មានការប្រែប្រួលនៅឡើយ ព្រោះគណបក្សប្រឆាំង កំពុងចរចាជាមួយរដ្ឋាភិបាលថៃ ក្នុងការស្នើសុំឲ្យពលករ និងមន្ត្រីគណបក្សសង្គ្រោះជាតិ អាចដើរឆ្លងតាមព្រំដែនថៃ ចូលប្រទេសកម្ពុជា នៅថ្ងៃទី៩ វិច្ឆិកា។ គិតត្រឹមថ្ងៃទី៣១ តុលា នៅសល់ ១០ថ្ងៃទៀត គឺដល់ថ្ងៃកំណត់ហើយ។ មន្ត្រីគណបក្សសង្គ្រោះជាតិប្រចាំប្រទេសថៃ អះអាងថា នឹងមានពលករច្រើននាក់ ដែលនឹកស្មានមិនដល់ វិលត្រឡប់ទៅប្រទេសកម្ពុជា នៅថ្ងៃទី៩ វិច្ឆិកា។
មន្រ្តីសន្តិសុខថៃឲ្យដឹងថា អាជ្ញាធរថៃនឹងមិនចាប់ខ្លួនមន្រ្តីបក្សប្រឆាំង តាមការស្នើសុំរបស់ភាគីកម្ពុជានោះឡើយ។ មន្រ្តីដដែលរូបនេះបញ្ជាក់ប្រាប់អាស៊ីសេរី ក្នុងលក្ខខណ្ឌសុំមិនបញ្ចេញឈ្មោះ ព្រោះគ្មានសិទ្ធិអនុញ្ញាតនិយាយរឿងនេះជាសាធារណៈថា អាជ្ញាធរថៃពិតជាទទួលបានដីកាចាប់ខ្លួន មន្រ្តីជាន់ខ្ពស់គណបក្សសង្គ្រោះជាតិ ចំនួន ៨នាក់ពិតមែន ក្នុងនោះរួមមានលោក សម រង្ស៊ី និងអ្នកស្រី មូរ សុខហួរ ផង។
ប្រភពបានបន្ថែមថា ភាគីកម្ពុជាបានជូនដំណឹងដល់ភាគីថៃ ឲ្យជួយចាប់ខ្លួនពួកគាត់ទាំងនោះ ពេលមកដល់ប្រទេសថៃ ប្រសិនបើពួកគាត់មានបំណងឆ្លងកាត់ប្រទេសថៃ ចូលប្រទេសកម្ពុជា។ ប៉ុន្តែ ភាគីថៃមិនចង់ប្រឡាក់ប្រឡូសក្នុងកិច្ចការផ្ទៃក្នុងរបស់កម្ពុជានោះទេ។ ភាគីថៃ គ្រាន់តែដាក់ឈ្មោះអ្នកទាំងនោះ ក្នុងបញ្ជីខ្មៅប៉ុណ្ណោះ។
ប្រធានក្រុមការងារគណបក្សសង្គ្រោះជាតិ ប្រចាំប្រទេសថៃ លោក លី រតនៈរស្មី ប្រាប់ថា មកដល់ពេលនេះ មានកម្មករច្រើនសែននាក់ហើយ ស្ម័គ្រចិត្តអមដំណើរលោក សម រង្ស៊ី។ លោកថា តួលេខពលករ ដែលត្រូវអមដំណើរ លោក សម រង្ស៊ី នឹងត្រូវប្រកាសនៅកំឡុងថ្ងៃទី ៥ ឬ ៦ ខែវិច្ឆិកា។ ទោះយ៉ាងណា ប្រធានក្រុមការងារបក្សប្រឆាំងរូបនេះ អំពាវនាវឲ្យកងកម្លាំងល្បាតតាមព្រំដែន និងកងកម្លាំង តាមបណ្ដាខេត្ត កុំវាយបង្ក្រាបពលករ និងពលរដ្ឋខ្មែរ។ លោកថា ពលករបានទ្រាំធ្វើការយ៉ាងលំបាក ចាកចោលផ្ទះសម្បែង លះបង់គ្រួសារ ចាកចោលស្រុកកំណើត ដើម្បីរកប្រាក់ចិញ្ចឹមគ្រួសារ និងបង់ពន្ធចូលរដ្ឋ ដើម្បីបើកប្រាក់ខែឲ្យកងកម្លាំងប្រដាប់អាវុធ ដូច្នេះកងកម្លាំងប្រដាប់អាវុធ មិនត្រូវធ្វើបាបពួកគេទេ។ លោក លី រតនៈរស្មី អំពាវនាវឲ្យកងកម្លាំងប្រដាប់អាវុធ រួមដៃជាមួយពលករ និងពលរដ្ឋក្នុងប្រទេស ស្ដារលទ្ធិប្រជាធិបតេយ្យនៅកម្ពុជាជាមួយគ្នាវិញ៖ « និយាយរួមទៅ នៅក្នុងប្រទេសកម្ពុជា បងប្អូនយើង ជនរួមជាតិ ទាំងអស់ យើងដឹងហើយថា សព្វថ្ងៃនេះ គ្រប់គ្រងដោយរបបផ្ដាច់ការតិរច្ឆានខ្លាំងណាស់ ហើយនៅក្នុងពេលនេះ មិនថា ប្រជាពលរដ្ឋ មិនថា មន្ត្រីរាជការមួយចំនួនធំ ដែលរងទុក្ខ ដែលរងគ្រោះ នៅក្នុងរបបផ្ដាច់ការហ្នឹង។ អ៊ីចឹង បើសិនជាបងប្អូន ជនរួមជាតិ កងកម្លាំងប្រដាប់អាវុធទាំងអស់ ដែលយើងស្រលាញ់ យើងចង់បានគោរពសិទ្ធិមនុស្ស ហើយមិនលំបាកធ្វើការក្នុងរបបនេះទេ យើងជួយគ្នា ដើម្បីរំដោះបងប្អូនជនរួមជាតិ ចេញពីរបបផ្ដាច់ការហ្នឹង»។
ក្រៅពីពលករ គណបក្សប្រឆាំងអះអាងថា នៅមានពលរដ្ឋខ្មែរស់នៅប្រទេសលោកសេរី និងសមាជិកបក្សប្រឆាំងច្រើននាក់ទៀត នឹងអមដំណើរលោក សម រង្ស៊ី នៅថ្ងៃទី៩ វិច្ឆិកា ខណៈសមាជិកសភាអឺរ៉ុប និងក្រុមអ្នកស្រឡាញ់ប្រជាធិបតេយ្យ ជាជនបរទេសខ្លះទៀត ក៏នឹងអមដំណើរ ឃ្លាំមើលដំណើរមាតុភូមិនិវត្តន៍របស់លោក សម រង្ស៊ី ដែរ។ លើសពីនេះ បក្សប្រឆាំង អះអាងថា ពលរដ្ឋខ្មែរ នៅក្នុងប្រទេស ក៏នឹងចេញមកទទួល លោក សម រង្ស៊ី ដែរ។
មេដឹកនាំរបបក្រុងភ្នំពេញ លោក ហ៊ុន សែន លើកឡើងថា ការអំពាវនាវឲ្យកងកម្លាំងប្រឆាំងរដ្ឋាភិបាលរបស់លោក គ្មានឥទ្ធិពលឡើយ។
អាស៊ីសេរី មិនអាចសុំការបញ្ជាក់ពី អ្នកនាំពាក្យរបបក្រុងភ្នំពេញ លោក ផៃ ស៊ីផាន បានទេ នៅថ្ងៃទី៣១ ខែតុលា ដោយសារទូរស័ព្ទរោទ៍ គ្មានអ្នកទទួល។ តែលោក ផៃ ស៊ីផាន ធ្លាប់អះអាងថា ការវិលត្រឡប់របស់ពលករ អមដំណើរលោក សម រង្ស៊ី វិលចូលស្រុកវិញនោះ ត្រូវបានរដ្ឋាភិបាលចោទថា ជាការធ្វើរដ្ឋប្រហារផ្តួលរំលំរដ្ឋាភិបាល នឹងបញ្ជាឲ្យបង្ក្រាបភ្លាមៗ ឬឈានដល់ការកម្ទេចតែម្តង៖ « ចំពោះជំហររដ្ឋាភិបាល គឺយើងចាប់ រង្ស៊ី ហើយបើមានសកម្មភាពណាមួយដែលផុលផុស ដែលចាត់ទុកថា ជាសកម្មភាពធ្វើរដ្ឋប្រហារ យើងនឹងកម្ទេច ឬក៏បង្ក្រាប»។
ទោះយ៉ាងណា មេបញ្ជាការនគរបាលជាតិប្រចាំទិសភូមិភាគទី៤ និងទី៥ លោក ខេង សុមេធ បានដាក់បញ្ជា កាលពីថ្ងៃទី៣០ តុលា ឲ្យនគរបាលអន្តរាគមន៍ និងនគរបាលការពារព្រំដែនទាំងអស់ ត្រូវតែកម្ចាត់ក្រុមថ្នាក់ដឹកនាំគណបក្សសង្គ្រោះជាតិ ដែលគ្រោងធ្វើមាតុភូមិនិវត្តន៍នៅពេលខាងមុខឱ្យទៅជាផេះ។ លោកប្រាប់កងកម្លាំងប្រដាប់អាវុធថា ការវិលចូលស្រុករបស់ក្រុមលោក សម រង្ស៊ី គឺក្រុម ដែលប៉ុនប៉ងផ្ដួលរំលំរាជរដ្ឋាភិបាលដឹកនាំសព្វថ្ងៃ៖ «ត្រៀមកម្លាំងចាប់អន្តរាគមន៍។ ដូច្នេះកិច្ចការងារអន្តរាគមន៍ គឺ ខ្ញុំអនុវត្តទៅតាមទីតាំង និងបទបញ្ជាថ្នាក់លើ ដែលបានចង្អុលទិសដៅ ហើយខ្ញុំនឹងអនុវត្តបញ្ជា។ ចំពោះការវិលត្រលប់របស់ទណ្ឌិត សម រង្ស៊ី អង្គភាពអន្តរាគមន៍ បានត្រៀមខ្លួនរួចជាស្រេចរងចាំបទបញ្ជា ដូច្នេះរៀងរាល់ ពេលវេលា មិន ថាយប់ មិនថាថ្ងៃ មិនថាពេលណា អង្គភាពអន្តរាគមន៍ ត្រូវតែមានកម្លាំងដាច់ខាតចេញទៅបំពេញភារកិច្ចជូន រាជរដ្ឋាភិបាល ជាពិសេសអគ្គស្នងការនគរបាលជាតិ»។
ប៉ុន្តែ លោក សម រង្ស៊ី និងក្រុមមេដឹកនាំពលករ ហៅការលើកឡើងរបស់ក្រុមមេយោធា នៃរបបក្រុងភ្នំពេញ ថាជាលេសប្រឌិត ធ្វើឲ្យកងកម្លាំងប្រដាប់អាវុធ និងពលរដ្ឋយល់ច្រឡំ។ លោក សម រង្ស៊ី និងក្រុមមេដឹកនាំពលករអះអាងថា ពួកគេមានបំណងចង់ចូលទៅប្រទេសកម្ពុជា ដើម្បីស្ដារលទ្ធិប្រជាធិបតេយ្យ សិទ្ធិសេរីភាពពលរដ្ឋ និងធ្វើយ៉ាងណា ដើម្បីរក្សាប្រព័ន្ធអនុគ្រោះពន្ធ និងសម្ពាធផ្សេងៗ ពីអន្តរជាតិ។
ក្នុងខិត្តប័ណ្ណ របស់ លោក សម រង្ស៊ី ចេញផ្សាយកាលពីថ្ងៃទី៨ តុលា លើបណ្ដាញសង្គមហ្វេសប៊ុក (facebook)សរសេរថា ការធ្វើមាតុភូមិនិវត្តន៍ នៅថ្ងៃទី៩ វិច្ឆិកា ដើម្បីដោះស្រាយបញ្ហាជីវភាពរស់នៅរបស់ពលរដ្ឋខ្មែរគ្រប់រូប។ លោក សម រង្ស៊ី អះអាងថា មន្ត្រីរាជការ និងកងកម្លាំងប្រដាប់អាវុធ ត្រូវរក្សាតំណែង និងឡើងបុណ្យសក្ដិ សម្រាប់អ្នកស្នេហាជាតិ បានឡើងប្រាក់បៀវត្សរ៍ ដល់កម្រិតសមរម្យ អាចចិញ្ចឹមគ្រួសារបានយ៉ាងថ្លៃថ្នូរ។ បំបាត់ទម្លាប់ឡើងបុណ្យសក្ដិ តាមរយៈអំពើពុករលួយ បក្ខពួកនិយម និងគ្រួសារនិយម ដើម្បីធានាភាពស្អាតស្អំ និងយុត្តិធម៌ក្នុងសង្គម។
រីឯក្រុមអ្នកតំណាងរាស្ត្រសហរដ្ឋអាមេរិក វិញ បានព្រមានរបបក្រុងភ្នំពេញថា របបនេះ នឹងជួបសម្ពាធធ្ងន់ធ្ងរ ប្រសិនបើហ៊ានវាយបង្ក្រាប ចាប់ដាក់ពន្ធនាគារ ឬបាញ់សម្លាប់អ្នកនិយមប្រជាធិបតេយ្យណាម្នាក់ ក្នុងដំណើរវិលត្រលប់របស់លោក សម រង្ស៊ី នៅថ្ងៃទី៩ វិច្ឆិកា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។