ប្រជាពលរដ្ឋនៅខេត្តប៉ៃលិន ព្រួយបារម្ភខ្លាចបាត់បង់ទឹកដីមួយចំនួននៅតំបន់ព្រំដែនក្នុងក្រុងប៉ៃលិន ក្លាយទៅជាកម្មសិទ្ធិរបស់ប្រទេសថៃ ដោយសារតែទាហានថៃជាច្រើននាក់បានចូលទៅសង់រោងស្នាក់នៅលើដីខ្មែរតំបន់ព្រំដែនខេត្តប៉ៃលិនម្ដងហើយម្ដងទៀត។
ប្រជាពលរដ្ឋម្នាក់នៅតំបន់ព្រំដែនខេត្តប៉ៃលិនថ្លែងសុំមិនឱ្យបញ្ចេញឈ្មោះ និងសំឡេង ឱ្យដឹងនៅរសៀលថ្ងៃទី២០ ឧសភាថា ផ្ទៃដីទំហំជាង ៣ពាន់ម៉ែត្រការ៉េ (៣.២០០) នៅតំបន់ព្រំដែនក្នុងភូមិបរតាំងស៊ូ សង្កាត់បរយ៉ាខា ក្រុងប៉ៃលិន ប្រឈមនឹងការបាត់បង់ទឹកដីទៅឱ្យភាគីថៃនៅពេលខាងមុខ ពីព្រោះទាហានថៃជាច្រើននាក់បានចូលទៅកាន់កាប់ដីតំបន់នោះជាបន្តបន្ទាប់។ លោកបញ្ជាក់ថា កាលពីថ្ងៃទី២០ ខែសីហា ឆ្នាំ២០១៩ ទាហានថៃចូលមកកាប់ឆ្ការព្រៃនិងបំផ្លាញផលដំណាំរបស់ពលរដ្ឋនៅលើដីដែលមានបញ្ហាប្រមាណ ១សប្ដាហ៍ហើយដកថយទៅវិញ។ ក្រោយមកទៀត នៅដើមខែឧសភានេះ ទាហានថៃប្រមាណ ១០នាក់បានចូលទៅសង់រោងស្នាក់នៅដោយមានដាក់ទង់ជាតិថៃនៅលើដីនោះជាថ្មីទៀត ហើយទើបតែរុះរើរោងនោះចេញកាលពីថ្ងៃទី១៨ ឧសភា។
ទាក់ទងនឹងបញ្ហានេះ អាជ្ញាធរខេត្តប៉ៃលិន អះអាងថា តំបន់ដែលទាហានថៃចូលមកធ្វើរោងស្នាក់នៅនោះជាដីតំបន់ស។ អភិបាលរងខេត្តប៉ៃលិន លោក ធូ ភា ថ្លែងនៅក្នុងសន្និសីទសារព័ត៌មាននៅព្រឹកថ្ងៃទី២០ ឧសភាថា ទាហានថៃបានយល់ព្រមរុះរើរោងចេញពីដីតំបន់នោះអស់ហើយ បន្ទាប់ពីកម្ពុជាបានយល់ព្រមកាយដីធ្វើផ្លូវ ដែលធ្លាក់ចូលមាត់អូរព្រំដែនប្រទេសទាំង២ ចេញតាមការស្នើសុំរបស់ភាគីថៃ៖ «ភាគីទាំង២ បានឯកភាពគ្នារួចហើយ ហើយក៏បានឯកភាពគ្នាអនុវត្តភ្លាមៗ កាលពីថ្ងៃសុក្រកន្លងទៅ។ នៅពេលដែលយើងកាយចប់ភាគីថៃក៏គេបានរុះរើរោងរួចរាល់ហើយដែរ។ អីចឹងបញ្ហាដែលយើងវិវាទគ្នាបន្តិចបន្តួចនៅទីនោះ ត្រូវបានដោះស្រាយចប់ជាស្ថាពរហើយ ស្ថិតក្នុងស្ថានភាពដដែលឡើងវិញ នេះគឺជាកិច្ចសហប្រតិបត្តិការល្អមួយរវាង ខេត្តចាន់បូរី និងខេត្តប៉ៃលិន » ។
ទោះជាយ៉ាងណាប្រធានគណបក្សសង្គ្រោះជាតិខេត្តប៉ៃលិន ដែលកំពុងភៀសខ្លួននៅក្រៅប្រទេស អ្នកស្រី វ៉ែន ដារ៉ា ថ្លែងថា ថ្វីត្បិតតែទាហានថៃយល់ព្រមរើរោងចេញពីតំបន់ព្រំដែននោះក្ដី ក៏ទាហានថៃអាចនឹងវិលចូលមកកាន់កាប់ដីនៅភូមិបរតាំងស៊ូនោះជាថ្មីទៀតក្នុងពេលខាងមុខ ប្រសិនបើរដ្ឋាភិបាលខ្មែរមិនបានដោះស្រាយជាមួយភាគីថៃឱ្យបានច្បាស់លាស់នោះ៖ «ខ្ញុំគិតហើយស្រេចថា បើខ្ញុំធ្វើកិច្ចការការងារហ្នឹង បើគណបក្សសង្គ្រោះជាតិជាប់ឆ្នោត ខ្ញុំត្រូវយកប្រជាជនដាក់តាមព្រំដែនហ្នឹង ធ្វើសាលារៀនធ្វើថ្នល់ឱ្យជាប់ព្រំដែន ឈប់ឱ្យគេរំកិលមកបាន ព្រោះយើងចេះតែដកទៅ គេចេះតែចូលមក ហើយអត់មានការតវ៉ាអីចឹង យើងហ្នឹងខាតរហូត ហើយអាជ្ញាធរថែមមិនការពារខ្មែរដែលទៅការពារដីហ្នឹង បែរទៅដេញគាត់ចេញពីព្រំដែនប្រទល់ចាប់ដាក់គុកអីចឹងទៅ ហ្នឹងកន្លងមក ជាពិសេសដីលោកសមាជិកក្រុមប្រឹក្សាខ្ញុំមួយហ្នឹងគឺគាត់កាប់ដីគាត់ត្រឹមព្រំសោះហើយយកដីគាត់អស់រលីង » ។
ឆ្លើយតបរឿងនេះទេសរដ្ឋមន្ត្រីទទួលបន្ទុកបេសកកម្មពិសេសកិច្ចការព្រំដែនកម្ពុជា លោក វ៉ា គីមហុង ប្រាប់អាស៊ីសេរីថា ទីតាំងដែលទាហានថៃបោះជំរំស្នាក់នៅនោះ ពុំមែនជាការរំលោភបំពានអធិបតេយ្យរបស់កម្ពុជាទេ ពីព្រោះជាតំបន់ដែលប្រទេសទាំង២ មិនទាន់បានដោះស្រាយនៅឡើយ។ លោកបន្តថា អាជ្ញាធរកម្ពុជាគ្រោងជួបភាគីថៃពិភាក្សាគ្នាអំពីបញ្ហាព្រំដែនតំបន់នោះពេលឆាប់ៗខាងមុខ៖ «ចុះបើគេដកចេញហើយតើព្រួយបារម្ភអីឥឡូវហ្នឹង ? បើគេរើចេញពីកន្លែងបោះតង់ហ្នឹងអស់ហើយ ក៏ប៉ុន្តែតង់ហ្នឹងមិនមែនសំណង់អីរឹងមាំនោះទេ » ។
ទោះជាយ៉ាងណា សមាជិកក្រុមប្រឹក្សាឃ្លាំមើលកម្ពុជា លោក រ៉ុង ឈុន កត់សំគាល់ថា នៅតំបន់ព្រំដែនកម្ពុជានិងថៃត្រូវបានទាហានថៃរំលោភចូលក្នុងអធិបតេយ្យកម្ពុជាស្ទើរគ្រប់តំបន់តាមក្រវាត់ព្រំដែនប្រទេសទាំង២ ក៏ប៉ុន្តែអាជ្ញាធរកម្ពុជាតែងតែបិទបាំងព័ត៌មានទាំងនេះ ហើយហាមឃាត់ពលរដ្ឋមិនឱ្យចូលទៅពិនិត្យមើលតំបន់ ដែលមានភាពចម្រូងចម្រាសគ្នានោះឡើយ។លោកថា ការធ្វើបែបនេះធ្វើឱ្យកម្ពុជាប្រឈមនឹងការបាត់បង់ទឹកដី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។