បក្សប្រឆាំងថាការបូជាសពលោក ប៉ែន សុវណ្ណ បង្ហាញពីការរើសអើងនយោបាយ
ពិធីបូជាសពលោក ប៉ែន សុវណ្ណ នៅវត្តឫស្សីសាញ់ ជិតគុកព្រៃស នៅថ្ងៃទី៦ ខែវិច្ឆិកា ឆ្នាំ២០១៦។
Photo SBN
សពលោក ប៉ែន សុវណ្ណ អតីតនាយករដ្ឋមន្ត្រីនៃរបបសាធារណៈប្រជាមានិតកម្ពុជា និងជាតំណាងរាស្ត្រគណបក្សសង្គ្រោះជាតិ នោះ ត្រូវបានបូជាហើយនៅលើមេរុក្នុងវត្តឫស្សីសាញ់ ស្ថិតនៅខណ្ឌដង្កោ ក្រោមមេឃភ្លៀងរលឹមស្រិចៗនៅព្រឹកថ្ងៃអាទិត្យ ទី៦ វិច្ឆិកា។ បក្សប្រឆាំង និងប្រជាពលរដ្ឋ យល់ថា ការដែលអាជ្ញាធររាជធានីភ្នំពេញ មិនអនុញ្ញាតឲ្យធ្វើពិធីបូជានៅវត្តបទុមវតី ក្នុងរាជធានីភ្នំពេញ គឺបង្ហាញពីការរើសអើងនយោបាយ។
សពលោក ប៉ែន សុវណ្ណ ត្រូវបានក្រុមគ្រួសារ និងគណៈកម្មការបុណ្យ រួមទាំងប្រជាពលរដ្ឋប្រមាណ ២ពាន់នាក់ បានដង្ហែចេញពីវត្តថាន់ នៅម៉ោងជិត ៧ព្រឹក ថ្ងៃទី៦ ខែវិច្ឆិកា ឆ្ពោះទៅបូជានៅវត្តឫស្សីសាញ់ មិនឆ្ងាយប៉ុន្មានពីគុកព្រៃស ស្ថិតនៅខណ្ឌដង្កោ រាជធានីភ្នំពេញ។
ការបង្វែរទិសមកបូជានៅជាយក្រុងភ្នំពេញនេះ ក្រោយពីមានភាពចម្រូងចម្រាសគ្នាជាច្រើនលើករវាងគណៈកម្មការបុណ្យសព និងសាលារាជធានីភ្នំពេញ អំពីទីកន្លែងបូជាសពនៅមុខវត្តបទុមវតី និងវត្តនិរោធ ព្រមទាំងទីតម្កល់សពសម្រាប់ធ្វើបុណ្យនៅវត្តនួនមណីរាម ហៅវត្តថាន់ រាជធានីភ្នំពេញ។
អនុប្រធានគណៈកម្មការបុណ្យសពលោក ប៉ែន សុវណ្ណ និងជាតំណាងរាស្ត្រគណបក្សសង្គ្រោះជាតិ លោក ម៉ៅ មុនីវណ្ណ សម្ដែងការមិនពេញចិត្តនឹងសាលារាជធានីភ្នំពេញ ដែលតម្រូវឲ្យបូជាសពលោក ប៉ែន សុវណ្ណ នៅជាយក្រុង។ លោកថា នេះគឺបង្ហាញឲ្យឃើញនូវការរើសអើងផ្នែកនយោបាយ ឬមានស្តង់ដារពីរ ដោយលោកលើកហេតុផលថា លោក ប៉ែន សុវណ្ណ ធ្លាប់ជានាយករដ្ឋមន្ត្រី និងជាតំណាងរាស្ត្រមួយរូប មិនគួរណាមិនត្រូវបានអនុញ្ញាតឲ្យបូជាសពនៅមុខវត្តបទុមវតី ទេ៖ «ទង្វើនេះគឺវាកាន់តែញាំងអោយទឹកចិត្តប្រជាពលរដ្ឋ និងយុវជនខ្មែរមើលឃើញកាន់តែច្បាស់ថា នៅក្នុងប្រទេសយើង អ្នកនយោបាយសូម្បីតែប្រទេសយើងក៏មិនអធ្យាស្រ័យអោយសពរបស់គាត់ បូជាស័ក្ដិសមទៅនឹងកិត្តិយសដ៏ឧត្ដុង្គឧត្ដមដែលមួយជីវិតរបស់គាត់ គាត់បានធ្វើពលីកម្មច្រើនណាស់សម្រាប់ជាតិ»។
អតីតនាយករដ្ឋមន្ត្រីរូបនេះ ទទួលមរណភាពកាលពីថ្ងៃទី២៩ ខែតុលា ក្នុងអាយុ ៨០ឆ្នាំ។ មុនពិធីបូជានេះ គឺសពលោក ប៉ែន សុវណ្ណ ត្រូវបានបក្សប្រឆាំង និងក្រុមគ្រួសារ ដង្ហែចេញពីខេត្តតាកែវ មកតម្កល់ធ្វើបុណ្យនៅវត្តថាន់ ក្នុងរាជធានីភ្នំពេញ កាលពីព្រឹកថ្ងៃទី២ ខែវិច្ឆិកា។
យុវតីម្នាក់ឈ្មោះ ទីតាភូ ដែលបានចូលរួមពិធីបូជាសពលោក ប៉ែន សុវណ្ណ រៀបរាប់ថា លោក ប៉ែន សុវណ្ណ គឺជាអតីតនាយករដ្ឋមន្ត្រីខ្មែរមួយរូបដែលមានឆន្ទៈ និងស្មារតីស្នេហាជាតិ និងប្រជាជន ដោយហ៊ានប្រឆាំងនឹងបរទេសឈ្លានពានកម្ពុជា ដូច្នេះគួរណាស់តែគាត់ទទួលបានកិត្តិយសក្នុងការបូជាសពនៅមុខវត្តបទុមវតី ពោលគឺមិនមែននៅជាយក្រុងភ្នំពេញដូច្នេះទេ៖ «យើងខកចិត្តនៅពេលដែលអាជ្ញាធរមិនអនុញ្ញាតអោយបូជាសពគាត់នៅមុខវត្តបទុមវតី»។
រីឯកូនស្រីលោក ប៉ែន សុវណ្ណ វិញថ្លែងថា ថ្វីត្បិតតែសពឪពុកអ្នកស្រីមិនត្រូវបានអនុញ្ញាតឲ្យបូជានៅក្នុងទីក្រុងភ្នំពេញក្តី ក៏ប៉ុន្តែអ្នកស្រីយល់ថា ប្រជាពលរដ្ឋខ្មែរនៅតែគោរពស្រឡាញ់ ហើយថែមទាំងឲ្យតម្លៃ និងកាន់តែអាណិតឪពុកអ្នកស្រីកាន់តែខ្លាំងថែមទៀត។ អ្នកស្រីបន្ថែមថា ឪពុកអ្នកស្រីនឹងមិនតូចចិត្តឡើយចំពោះកន្លែងបូជាសពនេះ ព្រោះមួយជីវិតរបស់គាត់កាលនៅរស់ គឺដើម្បីតែប្រជាពលរដ្ឋ និងប្រទេសជាតិ៖ «មួយជីវិតគាត់ដើម្បីប្រជាជន ហើយបូជានៅកន្លែងណាក៏ដោយអោយតែលើទឹកដីខ្មែរ គឺគាត់ពេញចិត្តហើយ។ នៅកន្លែងនេះគេបូជាសពប្រជាជនធម្មតា ដូចជាមានន័យហើយ គាត់បូជានៅទីនេះ មានន័យថា គាត់នឹងជួបប្រជាជនរបស់គាត់ទៀត»។
គណៈកម្មការបុណ្យ ឲ្យដឹងថា ក្រោយពីពិធីបូជានោះ គឺអដ្ឋិធាតុលោក ប៉ែន សុវណ្ណ នឹងត្រូវយកទៅតម្កល់ទុកនៅគេហដ្ឋានរបស់លោកនាខេត្តតាកែវ ហើយគណៈកម្មការ និងគ្រួសារ គ្រោងនឹងសាងសង់ចេតិយមួយនៅទីនោះ សម្រាប់ឲ្យពលរដ្ឋខ្មែរជំនាន់ក្រោយគ្រប់រូបបានដឹង និងបានទៅគោរពបូជាវិញ្ញាណក្ខន្ធរបស់គាត់ផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
- ស្ដាប់ផ្ទាល់ (ព្រឹក ៥:៣០-៦:៣០ ល្ងាច ៧:៣០-៨:៣០)
- សំឡេង
- លោក ហ៊ុន សែន ប្រកាសតាមចាប់ខ្លួនបណ្ឌិត សេង សារី ដែលវិភាគរឿងលទ្ធភាពបង្កើតរដ្ឋាភិបាលបង្រួបបង្រួមជាតិ
- អ្នកជំនាញ និងសង្គមស៊ីវិល៖ រដ្ឋាភិបាលមិនគួរប្រថុយចាក់វ៉ាក់សាំងឲ្យក្មេងអាយុ ៦ឆ្នាំដល់ ១១ឆ្នាំមុនការសម្រេចរបស់ WHO ឡើយ
- សមាគមខ្មែរក្រោមត្រៀមមេធាវីដើម្បីជួយការពារក្ដីអតីតសង្ឃ ប៉ាង សុដា
- លោក សម រង្ស៊ី ថា លោក ហ៊ុន សែន ជាប់អន្ទាក់ខ្លួនឯងមិនអាចផ្ទេរអំណាចទៅកូនប្រុសបាន
- មន្ត្រីបក្សប្រឆាំងមិនតក់ស្លុត ឬភ័យខ្លាច ចំពោះការលបចូលរួមប្រជុំតាមអនឡាញ (Zoom) របស់លោក ហ៊ុន សែន ទេ
