វិបត្តិនយោបាយដែលអូសបន្លាយជាច្រើនឆ្នាំមកនេះ បានធ្វើឲ្យពលរដ្ឋពឹងទេវតា ដើម្បីឲ្យជួយបន្ទន់ចិត្ត អ្នកនយោបាយខ្មែរឲ្យត្រូវរ៉ូវគ្នាឡើងវិញ។ អ្នកវិភាគយល់ថា ការដែលធ្វើឲ្យពលរដ្ឋរត់ទៅពឹងទេវតាបែបនេះ ព្រោះពលរដ្ឋធុញទ្រាន់នឹងរឿងដដែលនៃវិបត្តិនេះ។
ពលរដ្ឋរំពឹងថា ការបួងសួងរបស់ពួកគេ ដែលទូលថ្វាយទៅទេវតាឆ្នាំថ្មីបុត្រីកបិលមហាព្រហ្ម អាចធ្វើឲ្យព្រះនាងគោរាគៈទេវីនឹងអន្ទងចិត្តអ្នកនយោបាយទាំងអស់ឲ្យចាប់ដៃគ្នាកសាងប្រទេសជាតិ និងឈប់ចោទប្រកាន់គ្នាថា ក្បត់ជាតិទៀត។
ពលរដ្ឋរស់នៅខេត្តកំពង់ស្ពឺម្នាក់លោក ជិន ទេវីន ប្រាប់ថា លោកបានអុជធូបសំពះទេវតាឆ្នាំថ្មីជួយឲ្យអ្នកនយោបាយខ្មែរគិតពីប្រយោជន៍ជាតិជាធំ បោះបង់ចោលចិត្តលោភលន់ ដែលគិតបក្ស និងក្រុមខ្លួនជាធំ។ លោកថា នៅក្នុងសង្គមមួយបើអ្នកនយោបាយឈ្លោះទាស់ទែងគ្នារហួតហើយចោទគ្នាថាក្បត់ជាតិទៅវិញទៅមកនោះ គឺប្រទេសជាតិមិនអាចអភិវឌ្ឍន៍ដូចប្រទេសជិតខាងឡើយ៖ «ខ្ញុំបានអុជធូបនៅផ្ទះអត់បានទៅវត្តទេគ្រាន់ថា រំលឹកដល់ទេវតាឆ្នាំថ្មីក៏ដូចជាវត្ថុស័ក្ដិសិទ្ធិប្រទេសយើងហ្នឹង ចង់ឲ្យអ្នកនយោបាយខ្មែរយើងគាត់បានលើកតម្កល់នូវប្រយោជន៍ជាតិជាធំក្នុងការអភិវឌ្ឍជាតិយើង » ។
ស្រដៀងគ្នានេះដែរ ពលរដ្ឋម្នាក់ទៀតរស់នៅខេត្តស្វាយរៀង លោកស្រី យស សុភណ្ឌ ក៏ចង់ឃើញមេដឹកនាំគណបក្សកាន់អំណាច និងគណបក្សប្រឆាំងវិលរកតុចរចាវិញដែរ។ ពលរដ្ឋរូបនេះយល់ថា ករណីនេះមិនចាំបាច់រំខានទេវតាក៏បានដែរ ព្រះមហាក្សត្រទ្រង់មានសិទ្ធិអំណាចគ្រប់គ្រាន់ស្របតាមច្បាប់ក្នុងការសម្របសម្រួលឲ្យមានដំណោះស្រាយនយោបាយ៖ «ព្រះអង្គលោកឈរជាជំហរយ៉ាងរឹង ដើម្បីសម្រុះសម្រួលដល់គណបក្សទាំងពីរហ្នឹងចេះចរចាគ្នា ដើម្បីរកដំណោះស្រាយមួយដ៏សម្រាប់ឲ្យប្រទេសជាតិយើងរីកចម្រើន យើងមិនគួរណាយករឿងផ្ទាល់ខ្លួនមកដាក់ មកសិទ្ធិអំណាចរបស់យើងម្នាក់ៗ មកដាក់ខ្លួនទេ ដល់តែអត់ឱនឲ្យទើបប្រទេសជាតិយើងមានសេចក្ដីសុខ»។
វិបត្តិនយោបាយដែលបន្តអួសបន្លាយបានធ្វើឲ្យអ្នកនយោបាយខ្មែរចោទគ្នាទៅវិញមករហូតរំលាយគណបក្សប្រឆាំង បើទោះជាសព្វថ្ងៃមេបក្សប្រឆាំង គឺលោក កឹម សុខា មិនជាប់ពន្ធនាគារក្ដី ប៉ុន្តែនៅតែរងបទចោទ និងត្រូវបាត់បង់សិទ្ធិសេរីយ៉ាងធ្ងន់ធ្ងរ ជាពិសេស គឺសិទ្ធិធ្វើនយោបាយឡើងវិញ រីឯលោក សម រង្ស៊ី ត្រូវបានរដ្ឋាភិបាលចាត់វិធានការគ្រប់បែបយ៉ាងមិនឲ្យលោកអាចវិលចូលស្រុកវិញបាន។
មេធាវីលោក កឹម សុខា ម្នាក់គឺលោក ផែង ហេង បានសរសេរលើហ្វេសប៊ុករបស់លោកក្នុង ថ្ងៃបុណ្យចូលឆ្នាំថ្មីនេះថា ដោយឆ្លៀតឱកាសសូមបួងសួងឱ្យអ្នកនយោបាយខ្មែរលុបចោលនូវនយោបាយព្យាបាទគ្នា ចូរចាប់យកព្រះធម៌ មានព្រហ្មវិហារធម៌រវាងគ្នា និងគ្នា ចាប់ដៃគ្នាក្នុងនាមជាខ្មែរដូចគ្នា ដើម្បីប្រជារាស្ត្រខ្មែរ និងអភិវឌ្ឍប្រទេសទាំងអស់គ្នាចីរកាលតរៀងទៅ។
អ្នកវិភាគនយោបាយ និងសង្គមដែលហ៊ានរិះគន់លោក ហ៊ុន សែន ឥតសំចៃមាត់ និងកំពុងនិរទេសខ្លួននៅក្រៅប្រទេស លោក គឹម សុខ យល់ថា ពលរដ្ឋខ្មែរកំពុងធុញទ្រាន់នឹងវិបត្តិនយោបាយ ដែលបង្កឡើងដោយមេដឹកនាំគណបក្សប្រជាជនកម្ពុជា និងមេដឹកនាំគណបក្សសង្គ្រោះជាតិ។ លោកបន្តថា អ្នកនយោបាយ ជាពិសេស គឺគណបក្សកាន់អំណាចគួរស្ដាប់ការបារម្ភ និងតម្រូវការរបស់ពលរដ្ឋ ដែលចង់ឃើញជម្លោះនយោបាយនេះដើរដល់ទីបញ្ចប់៖ «វិបត្តិនយោបាយនឹងបានដោះស្រាយគ្នាឆាប់ ផ្សះផ្សាគ្នាឆាប់ បញ្ហាផ្សេងៗ ទៀត នឹងអាចរួមគ្នាប្រយុទ្ធប្រឆាំងយកជ័យជូនជាតិបានទេ មែនទែនទៅប្រជាពលរដ្ឋគាត់យល់អំពីបញ្ហានយោបាយហ្នឹងជ្រៅជ្រះរហូតដឹងថា អ្វីៗ ដែលអ្នកនយោបាយបន្តឈ្លោះគ្នាហ្នឹង គឺជាគ្រោះអាសន្នសម្រាប់ជាតិកម្ពុជា»។
បុណ្យចូលឆ្នាំថ្មី ប្រពៃណីជាតិ ឆ្នាំជូត មានរយៈពេលបីថ្ងៃពីថ្ងៃទី១៣ ដល់ថ្ងៃទី១៥ ខែមេសា គ.ស ២០២០។ ទេវតាឆ្នាំថ្មី ឆ្នាំជូតនេះទ្រង់ព្រះនាមថា គោរាគៈទេវី ។ តាមទំនៀមទម្លាប់ខ្មែរពលរដ្ឋតែងរៀបចំផ្ទះសម្បែង គ្រឿងសក្ការបូជាទទួលទេវតាឆ្នាំថ្មី និងបួងសួងសុំសេចក្ដីសុខតាមបំណងប្រាថ្នារបស់ពួកគេរៀងៗ ខ្លួន។ ឆ្នាំថ្មីពលរដ្ឋប្រុសស្រីតែងមានជំនឿថា នឹងបានចាកផុតពីឧបទ្រពចង្រៃនិងភាពសៅហ្មងទាំងឡាយទាំងពួង ដែលមានកាលពីឆ្នាំចាស់ដោយផ្លាស់ចូលនូវសិរីសួស្ដីថ្មី ជោគជតារាសីថ្មី ដែលនឹងបានមកពីការប្រទានពរនៃទេវតាឆ្នាំថ្មី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។