សាលាដំបូងរាជធានីភ្នំពេញគ្រោងនឹងបើកសវនាការសំណុំរឿងរបស់អតីតប្រធានគណបក្សកម្លាំងជាតិ លោក ស៊ុន ចន្ធី ជាថ្មីម្ដងទៀត នៅថ្ងៃទី២៦ ខែធ្នូសប្ដាហ៍ក្រោយនេះ ក្នុងដំណើររឿង ដែលតុលាការចោទប្រកាន់លោក ពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»។
លិខិតអញ្ជើញមេធាវីចេញកាលពីថ្ងៃទី១១ ខែធ្នូ ដោយព្រះរាជអាជ្ញារង លោក សេង ហៀង ឱ្យដឹងថា សវនាការនៅសប្ដាហ៍ក្រោយនេះ នឹងធ្វើនៅសាលសវនាការទី៣ នៅម៉ោង ៨កន្លះព្រឹក។
ចៅក្រមនៅសាលាដំបូងរាជធានីភ្នំពេញ បានបើកសវនាការសំណុំរឿងអតីតប្រធានគណបក្សកម្លាំងជាតិ លោក ស៊ុន ចន្ធី ម្ដងរួចហើយកាលពីរសៀលថ្ងៃទី២៥ ខែវិច្ឆិកា។ ប៉ុន្តែនៅពេលបិទបញ្ចប់សវនាការចៅក្រមពុំបានកំណត់ពេលវេលាពីការប្រកាសសាលក្រមនៅឡើយ។ លោក ស៊ុន ចន្ធី ពុំបានចូលរួមសវនាការនោះទេ ដោយលោកអះអាងថាមានបញ្ហាសុខភាព ដោយសារការលំបាកក្នុងពេលធ្វើដំណើរដោយដៃជាប់ខ្នោះនៅពេលអាជ្ញាធរបញ្ជូនលោកពីពន្ធនាគារខេត្តពោធិ៍សាត់មករាជធានីភ្នំពេញ។
សមត្ថកិច្ចបានចាប់ខ្លួនអតីតប្រធានគណបក្សកម្លាំងជាតិលោក ស៊ុន ចន្ធី នៅអាកាសយានដ្ឋានអន្តរជាតិភ្នំពេញ កាលពីខែឧសភា ដោយចោទថា លោកបានញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម ទាក់ទងនឹងការផ្សព្វផ្សាយព័ត៌មាននៅលើបណ្ដាញសង្គមទម្លាក់កំហុសទៅលើរដ្ឋាភិបាល ពីការចែកប័ណ្ណក្រីក្រជូនពលរដ្ឋមានភាពលម្អៀង និងរើសអើង។
ប៉ុន្តែសាច់ញាតិ មន្ត្រីបក្សប្រឆាំង និងមន្ត្រីអង្គការសង្គមស៊ីវិលមើលឃើញថា ការចោទប្រកាន់នេះធ្វើឡើងក្រោមរូបភាពនយោបាយ ព្រោះអ្វីដែល លោក ស៊ុន ចន្ធី លើកឡើងនេះជាការបញ្ចេញមតិពីរឿងពិតជាក់ស្ដែងក្នុងសង្គម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។