តុលាការ​គ្រោង​ជម្រះ​ក្តី​លោក កឹម សុខា នៅ​ពាក់​កណ្ដាល​ខែ​មករា ឆ្នាំ២០២០

ដោយ សុជីវី
2019-12-09
អ៊ីម៉ែល
មតិ
Share
បោះពុម្ព
លោក កឹម សុខា ប្រធាន​គណបក្ស​សង្គ្រោះ​ជាតិ ថត​នៅ​​ឯ​គេហដ្ឋាន​របស់​លោក ​ថ្ងៃ​ទី១៣ ខែ​វិច្ឆិកា ឆ្នាំ២០១៩។
លោក កឹម សុខា ប្រធាន​គណបក្ស​សង្គ្រោះ​ជាតិ ថត​នៅ​​ឯ​គេហដ្ឋាន​របស់​លោក ​ថ្ងៃ​ទី១៣ ខែ​វិច្ឆិកា ឆ្នាំ២០១៩។
រូប៖ RFA

សាលាឧទ្ធរណ៍​​ នៅ​ថ្ងៃ​ទី៩ ធ្នូ​នេះ សម្រេច​ច្រាន​​ចោល​បណ្ដឹង​របស់​​ក្រុម​​មេធាវី​​លោក កឹម សុខា ដែល​ប្ដឹង​ជំទាស់​នឹង​ដីកាបញ្ជូន​សំណុំ​រឿង​លោក កឹម សុខា ​ទៅ​ជំនុំ​ជម្រះ ដែល​ចេញ​​ដោយ​ចៅក្រម​ស៊ើបសួរ​តុលាការ​ក្រុង​​ភ្នំពេញ។ នៅ​​ថ្ងៃ​​នេះ​ដែរ តុលាការ​ក្រុង​​ភ្នំពេញ​បាន​កំណត់​ថ្ងៃ​ជំនុំ​ជម្រះ​ក្តី​លោក កឹម សុខា ហើយ គឺ​នៅ​ពាក់​កណ្ដាល​ខែ​ក្រោយ​នេះ។

សហ​មេធាវី​ការពារ​ក្តី​ឱ្យ​លោក កឹម សុខា លោក ចាន់ ចេន ថ្លែង​ប្រាប់​ក្រុម​​អ្នក​​សារព័ត៌មាន​ក្រោយ​បញ្ចប់​​សវនាការ​សាលា​ឧទ្ធរណ៍​ថា លោក​​សោក​ស្តាយ​ចំពោះ​ការ​សម្រេច​របស់​សាលាឧទ្ធរណ៍។ តែ​យ៉ាង​ណា លោក​​ថា ក្រុម​​មេធាវី​នឹង​នៅ​តែ​ប្រឹង​ប្រែង​តស៊ូ​តាម​ផ្លូវ​ច្បាប់​ដើម្បី​ជួយ​ដល់​លោក​ កឹម សុខា ទោះ​ជា​អាច​ស្មាន​ដឹង​អំពី​លទ្ធផល​ក៏​ដោយ​។ ​លោក​សង្កត់​ធ្ងន់​ថា នេះ​ជា​សំណុំ​រឿង​នយោបាយ ដូច្នេះ​ដំណោះ​ស្រាយ​ដែល​ល្អ គឺ​ត្រូវ​ធ្វើ​តាម​ផ្លូវ​នយោបាយ៖ «យើង​គិត​​ថា រឿង​នេះ​ជា​រឿង​នយោបាយ ជម្លោះ​អ្នក​នយោបាយ អ៊ីចឹង​គួរ​តែ​ដោះស្រាយ​តាម​ផ្លូវ​នយោបាយ»

ចៅក្រម​ស៊ើបសួរ​តុលាការ​ក្រុង​ភ្នំពេញ លោក គី ឫទ្ធី បាន​ប្រកាស​បិទ​ការ​ស៊ើបសួរ​សំណុំ​រឿង​លោក កឹម សុខា កាល​ពី​​ពាក់​កណ្ដាល​ខែ​វិច្ឆិកា​កន្លង​ទៅ ក្រោយ​​ប្រើ​ពេល​ស៊ើបអង្កេត​ជាង ២ឆ្នាំ។ ជាង​ពីរ​សប្ដាហ៍​​ក្រោយ​​មក គឺ​នៅ​ថ្ងៃ​ទី២ ធ្នូ លោក គី ឫទ្ធី បាន​សម្រេច​បញ្ជូន​សំណុំ​រឿង​នេះ​ទៅ​ជំនុំ​ជម្រះ ដោយ​អះអាង​ថា លោក​​មាន​ភស្តុតាង​​គ្រប់គ្រាន់ ដើម្បី​​ដាក់​​បន្ទុក​​លើ​​លោក កឹម សុខា។

ទោះ​ជា​យ៉ាង​ណា ក្រុម​មេធាវី​លោក កឹម សុខា អះអាង​ថា ដីកាបញ្ជូន​​រឿង​ទៅ​ជំនុំ​ជម្រះ​របស់​ចៅក្រម​ស៊ើបសួរ​នេះ មាន​ភាព​មិន​ប្រក្រតី និង​មិន​ស្រប​តាម​ទិដ្ឋភាព​ច្បាប់​ត្រង់​ចំណុច​​មួយ​ចំនួន ​ដូច​ជា ចៅក្រម​ស៊ើបសួរ​បន្ត​រក្សា​លោក កឹម សុខា ក្រោម​ការ​ត្រួត​ពិនិត្យ​តាម​ផ្លូវ​តុលាការ ដែល​ប្រការ​នេះ​ផ្ទុយ​​នឹង​ក្រម​​នីតិវិធី​ព្រហ្មទណ្ឌ។ ជាមួយ​​គ្នា​នេះ ចៅក្រម​ស៊ើបសួរ​មិន​ទាន់​បាន​សម្រេច​លើ​លិខិត​ស្នើសុំ​លើក​លែង​ការ​ចោទ​ប្រកាន់​ដែល​ក្រុម​​មេធាវី​​បាន​ដាក់​ជូន​កាល​ពី​ពេល​ថ្មីៗ នេះ​នៅ​ឡើយ ហើយ​ចៅក្រម​​ស៊ើបសួរ​ក៏​​មិន​បាន​ស៊ើបអង្កេត​ពេល​លេញ​​ចំពោះ​​ភាគី​ពាក់ព័ន្ធ ឱ្យ​ស្រប​ទៅ​នឹង​កាតព្វកិច្ច​​របស់​ខ្លួន​ដែល​​ត្រូវ​ស្វែង​រក​ទាំង​ភស្តុតាង​ដាក់​បន្ទុក និង​ដោះបន្ទុក មុន​ពេល​ចេញ​​ដីកា​ដំណោះ​ស្រាយ​បញ្ជូន​រឿង​ទៅ​​ជំនុំ​ជម្រះ​នោះ​ដែរ។ ម្យ៉ាង​វិញ​ទៀត មក​​ដល់​ពេល​នេះ ចៅក្រម​ស៊ើបសួរ​​មិន​​ទាន់​អាច​បង្ហាញ​​ថា តើ​ភ្នាក់ងារ ឬ​រដ្ឋ​បរទេស​ណាមួយ​ដែល​ លោក កឹម សុខា បាន​ត្រូវ​រ៉ូវ​ជាមួយ​នោះ​ឡើយ។

អ្នក​នាំ​ពាក្យ​សមាគម​ការពារ​សិទ្ធិមនុស្ស​អាដហុក (ADHOC) លោក ស៊ឹង សែនករុណា ថ្លែង​ថា ការ​សម្រេច​របស់​សាលាឧទ្ធរណ៍​នេះ មិន​មាន​អ្វី​ចម្លែក​នោះ​ទេ ព្រោះ​ប្រមុខ​រដ្ឋាភិបាល​កម្ពុជា​បាន​ប្រកាស​ទុក​​ជា​មុន​ទៅ​ហើយ​ថា សំណុំ​​រឿង​នេះ​ត្រូវ​លើក​ទៅ​ជំនុំ​ជម្រះ។ លោក​យល់​ថា ទាល់​តែ​មាន​​ដំណោះស្រាយ​នយោបាយ​ ទើប​លោក កឹម សុខា អាច​រួច​​ខ្លួន​ ព្រោះ​នេះ​ជា​សំណុំ​រឿង​នយោបាយ៖ «ក្នុង​ករណី​នេះ យើង​យល់​ថា ពិបាក​នឹង​ឱ្យ​ចៅក្រម​ប្រកាន់​នូវ​ឯករាជ្យ​ភាព​ណាស់ ពីព្រោះ​យើង​ឃើញ​​ហើយ មាន​ការ​បង្ហាញ​ផ្លូវ​ថា រឿង​នេះ​ត្រូវ​ធ្វើ​អ៊ីចេះ រឿង​នេះ​ត្រូវ​ធ្វើ​អ៊ី​ចុះ​ជា​មុន​ហើយ​ហ្នឹង។ អ៊ីចឹង​ថា តើ​ចៅក្រម​មាន​ភាព​ក្លាហាន​ក្នុង​ការ​សម្រេច​នូវ​ឯករាជ​ភាព​របស់​ខ្លួន​តាម​វិជ្ជាជីវៈ​បាន​ដែរ​ឬទេ ខណៈ​ប្រមុខ​រដ្ឋាភិបាល​បាន​លើក​​ឡើង​របៀប​នេះ»។

លោក​នាយក​រដ្ឋ​មន្ត្រី ហ៊ុន សែន បាន​ចេញ​មុខ​ប្រកាស​ជា​សាធារណៈ​ថា សំណុំ​រឿង​នេះ​ត្រូវ​តែ​បញ្ជូន​ទៅ​ជំនុំ​ជម្រះ ដោយ​គ្មាន​ការ​ទម្លាក់​ចោល​ឡើយ។ ការ​ប្រកាស​នេះ ធ្វើ​ឡើង​នៅ​អំឡុង​​ពេល​ដែល​ក្រុម​មេធាវី​បាន​ដាក់​លិខិត​ស្នើសុំ​ឱ្យ​ចៅក្រម​ស៊ើបសួរ​ទម្លាក់​ចោល​ការ​ចោទ​ប្រកាន់​លើ​លោក កឹម សុខា៖ «ដំណើរ​ការ​ក្ដី​មួយ​នេះ គឺ​មិន​មែន​​ត្រូវ​ធ្វើ​មួយ​ថ្ងៃ ពីរ​ថ្ងៃ មួយ​ខែ ឬ​ពីរ​ខែ​ទេ។ វា​ត្រូវ​ប្រើ​រយៈពេល​វែង។ រួច​ហើយ​មាន​អ្នក​​ខ្លះ​ថា បន្តិច​ទៀត​ព្រះមហាក្សត្រ​លើក​លែង​ទោស។ បើ​មិន​​ទាន់​កាត់​ទោស​ផង តើ​​ព្រះមហាក្សត្រ​មាន​​ទោស​ឯណា​សម្រាប់​លែង? លើក​លែង​ការ​ចោទ​ប្រកាន់ ក៏​អត់​ទេ។ អា​ហ្នឹង គឺ​រឿង​​តុលាការ​គេ​ចោទ​ប្រកាន់​រួច​ទៅ​ហើយ​តើ ហើយ​សមត្ថកិច្ច​របស់​តុលាការ​មិន​ដឹង​កាត់​ពេល​ណា អ្វី​ពេល​ណា? គេ​គ្រាន់តែ​បិទ​ការ​ស៊ើបអង្កេត​ដើម្បី​បញ្ជូន​ទៅ​ជម្រះ តែ​រឿង​ជម្រះ​ពេល​ណា​ គឺ​ជា​រឿង​របស់​តុលាការ»

អ្នក​ការពារ​សិទ្ធិ​មនុស្ស និង​អ្នក​តាម​ដាន​ស្ថានការណ៍​នយោបាយ​បាន​រិះគន់​ថា ប្រសាសន៍​​របស់​លោក ហ៊ុន សែន នេះ គឺ​ជា​ការ​ដាក់​សម្ពាធ​លើ​​តុលាការ និង​ប៉ះ​ពាល់​ដល់​ឯករាជ្យ​នៃ​ស្ថាប័ន​យុត្តិធម៌​​មួយ​នេះ។

ក្រុម​មេធាវី​លោក កឹម សុខា ធ្លាប់​បាន​អះអាង​ថា តុលាការ​ត្រូវ​តែ​ទម្លាក់​ចោល​បទ​ចោទ​លើ​លោក កឹម សុខា ពីព្រោះ​ចៅក្រម​ស៊ើបសួរ​បាន​ប្រើ​រយៈ​ពេល​ជាង ២ឆ្នាំ​ក្នុង​ការ​ស៊ើបអង្កេត​រឿង​ក្តី លើស​ពី​ការ​កំណត់​ក្នុង​ក្រម​នីតិវិធី​ព្រហ្មទណ្ឌ ដែល​ការ​ស៊ើប​អង្កេត​ត្រូវ​ប្រើ​ពេល​ត្រឹម ១៨ខែ​ប៉ុណ្ណោះ។ ម្យ៉ាង​វិញ​ទៀត ការ​ស៊ើប​អង្កេត​នា​ពេល​កន្លង​មក ចៅក្រម​រក​មិន​ឃើញ​មាន​រដ្ឋ​​បរទេស ឬ​ជន​បរទេស ឬ​អ្នក​សម​គំនិត​ក្នុង​រឿង​នេះ​ ដូច​ការ​ចោទ​ប្រកាន់​របស់​តំណាង​អយ្យការ​នោះ​ឡើយ។ ជាង​នេះ​ទៅទៀត ក្នុង​​​គោល​ការណ៍​​ច្បាប់ ការ​ផ្ដន្ទាទោស​ជន​ណា​ម្នាក់​ ត្រូវ​ផ្អែក​លើ​ធាតុផ្សំ​នៃ​បទល្មើស​ចាំ​បាច់​ចំនួន ៣ គឺ​ធាតុ​ច្បាប់ អំពើ​ប្រព្រឹត្ត​ និង​ចេតនា​ប្រព្រឹត្ត ហើយ​បើ​ខ្វះ​ធាតុ​ផ្សំ​ណាមួយ​ គឺ​មិន​អាច​ផ្ដន្ទាទោស​បាន​ឡើយ។ ក្នុង​​សំណុំ​រឿង​លោក​ កឹម សុខា នេះ ក្រុម​មេធាវី​ពិនិត្យ​ឃើញ​ថា តុលាការ​ខ្វះ​ធាតុ​ផ្សំ​ពីរ​សំខាន់ គឺ​អំពើ​ប្រព្រឹត្ត និង​​ចេតនា​ប្រព្រឹត្ត។

មាត្រា៣៨ នៃ​រដ្ឋ​ធម្មនុញ្ញ ​ចែង​ថា “វិមតិសង្ស័យ​ត្រូវ​បាន​ជា​ប្រយោជន៍​ដល់​ជន​ជាប់​ចោទ” ហើយ​មាត្រា​៤ នៃ​ក្រម​ព្រហ្មទណ្ឌ​ចែង​ថា “ពុំ​មាន​បទល្មើស​ទេ ប្រសិន​បើ​គ្មាន​ចេតនា​ប្រព្រឹត្ត” ដូច្នេះ ផ្អែក​តាម​អង្គហេតុ និង​អង្គច្បាប់ ក្រុម​មេធាវី​អះអាង​ថា តុលាការ​មិន​អាច​ចោទ​ប្រកាន់ ឬ​ផ្ដន្ទាទោស​លោក កឹម សុខា ពី​បទ​សន្ទិដ្ឋភាព​ឬ​ការ​ត្រូវ​រ៉ូវ​គ្នា​ជាមួយ​បរទេស​បាន​នោះ​ឡើយ។

ទោះ​ជា​យ៉ាង​ណា ជោគ​វាសនា​របស់​លោក កឹម សុខា នឹង​ត្រូវ​សម្រេច​នៅ​ខែ​ក្រោយ​នេះ​ហើយ ពីព្រោះ​សាលាដំបូង​រាជធានី​ភ្នំពេញ​បាន​កំណត់​យក​ថ្ងៃ​ទី១៥ ខែ​មករា ជា​ថ្ងៃ​បើក​សវនាការ​ជំនុំ​ជម្រះ​រឿង​ក្ដី​​របស់​លោក៕


ព័ត៌មាន (0)
Share
គេហទំព័រ​ទាំងមូល