ប៉ូលិស​ខេត្ត​មួយ​ចំនួន​ប្រជុំ​ត្រៀម​កម្លាំង​ការពារ​សន្តិសុខ​ក្នុង​ពេល​ជម្រះក្ដី​លោក កឹម សុខា

ដោយ ទីន ហ្សាការីយ៉ា
2020-01-12
អ៊ីម៉ែល
មតិ
Share
បោះពុម្ព
រដ្ឋមន្ត្រី​ក្រសួង​មហាផ្ទៃ លោក ស ខេង (ឆ្វេង) ចាប់​ដៃ​ជាមួយ​អនុប្រធាន​គណបក្ស​សង្គ្រោះ​ជាតិ លោក កឹម សុខា មុន​អ្នក​នាំ​ពាក្យ​បក្ស​ទាំង​២ ធ្វើ​សន្និសីទ​កាសែត​ស្ដីពី​លទ្ធផល​នៃ​ជំនួប​នៅ​ថ្ងៃ​ទី​១៩ ខែ​កុម្ភៈ ឆ្នាំ​២០១៦ នា​វិមាន​រដ្ឋ​សភា។
រដ្ឋមន្ត្រី​ក្រសួង​មហាផ្ទៃ លោក ស ខេង (ឆ្វេង) ចាប់​ដៃ​ជាមួយ​អនុប្រធាន​គណបក្ស​សង្គ្រោះ​ជាតិ លោក កឹម សុខា មុន​អ្នក​នាំ​ពាក្យ​បក្ស​ទាំង​២ ធ្វើ​សន្និសីទ​កាសែត​ស្ដីពី​លទ្ធផល​នៃ​ជំនួប​នៅ​ថ្ងៃ​ទី​១៩ ខែ​កុម្ភៈ ឆ្នាំ​២០១៦ នា​វិមាន​រដ្ឋ​សភា។
RFA/Rann Samnang

មេ​ប៉ូលិស​តាម​ខេត្ត​មួយ​ចំនួន​ចាប់ផ្ដើម​ប្រជុំ​ត្រៀម​កងកម្លាំង​ជាច្រើន​នាក់ ដើម្បី​ការពារ​សន្តិសុខ​ក្នុង​ពេល​ជម្រះក្ដី​ប្រធាន​គណបក្ស​សង្គ្រោះជាតិ លោក កឹម សុខា នៅ​ថ្ងៃទី​១៥ មករា។ មន្ត្រី​អង្គការ​សង្គម​ស៊ីវិល និង​សកម្មជន​បក្ស​ប្រឆាំង ចាត់​ទុក​សកម្មភាព​របស់​ប៉ូលិស​នេះ ថា ជា​ការ​ត្រៀម​កម្លាំង​ជ្រុល​ហួស​ហេតុ។

មេ​ប៉ូលិស​នៃ​ស្នងការ​នគរបាល​ស្ទឹងត្រែង កំពង់ធំ និង​ខេត្ត​តាកែវ ជាដើម បាន​ប្រជុំ​កងកម្លាំង​នៅ​អង្គភាព​របស់​ខ្លួន ចាប់​ពី​ថ្ងៃ​ទី​១០ និង​ថ្ងៃ​ទី​១១ មករា ដែល​មាន​កងកម្លាំង​ចូលរួម​ប្រមាណ​ពី​១០០​ទៅ​ជាង​៣០០​នាក់។

គេហទំព័រ​អគ្គស្នងការ​នគរបាល​បាល​ជាតិ ចុះផ្សាយ​នៅ​ថ្ងៃ​ទី​១២ មករា ថា ស្នងការ​នគរបាល​ខេត្ត​តាកែវ លោក សុខ សំណាង បាន​ដឹកនាំ​កម្លាំង​ក្រោម​ឱវាទ​ជាង​៣០០​នាក់ ចូល​ប្រជុំ​នៅ​ស្នងការដ្ឋាន​នគរបាល​ខេត្ត ដើម្បី​ការពារ​សន្តិសុខ នៃ​សវនាការ​ជម្រះក្ដី លោក កឹម សុខា នៅ​​ពេល​ខាងមុខ​។ លោក សុខ សំណាង បញ្ជាក់​ថា កងកម្លាំង​នឹង​ដាក់​ពង្រាយ ចាប់ពី​ទី​១១ មករា រហូត​ដល់​មាន​បទបញ្ជា​ជា​ថ្មី និង​ត្រៀម​កម្លាំង​ប្រចាំការ​២៤​ម៉ោង នៅ​តាម​អង្គភាព​នីមួយៗ​ដើម្បី​ចេញ​អន្តរាគមន៍​ពេល​មាន​ហេតុការណ៍​កើតឡើង​នៅ​ក្នុង​ខេត្ត​នេះ។

ទាក់ទង​នឹង​ការ​ដាក់​ពង្រាយ​កងកម្លាំង​នេះ ប្រធាន​យុវជន​គណបក្ស​សង្គ្រោះ​ជាតិ​រាជធានី​ភ្នំពេញ ដែល​កំពុង​ភៀសខ្លួន​នៅ​ក្រៅ​ប្រទេស​លោក ឃិន រឿន ថ្លែង​នៅ​ថ្ងៃទី​១២ មករា ថា ការ​ដាក់​កម្លាំង​ការពារ​នេះ គឺជា​ការ​ចំណាយ​ថវិកាជាតិ​ឥតប្រយោជន៍​។ លោក​ថា គណបក្ស​សង្គ្រោះ​ជាតិ​មិនបាន​ជូនដំណឹង​ដល់​អ្នកគាំទ្រ​ទៅ​ប្រមូល​ផ្ដុំ​គ្នា​នៅមុខ​សាលាដំបូង​រាជធានី​ភ្នំពេញ​ក្នុង​ពេល​បើកសវនាការ​ជម្រះក្ដី លោក កឹម សុខា​នៅ​ពេល​ខាងមុខ​នោះ​ទេ។ លោក​បន្ថែម​ទៀត​ថា ការ​ជម្រះ​ក្ដី​នេះ គឺជា​រឿង​លេងសើច​រដ្ឋាភិបាល ដើម្បី​បន្លំ​ភ្នែក​អន្តរជាតិ​ប៉ុណ្ណោះ​។ លោក​សន្និដ្ឋាន​ថា មូល​ហេតុ​ដែល​រដ្ឋាភិបាល​ត្រៀម​កម្លាំង​ការពារ​ក្នុង​ថ្ងៃ​ជម្រះក្ដី​លោក កឹម សុខា ដោយសារ​អាជ្ញាធរ​ព្រួយបារម្ភ​ខ្លាច​អ្នក​គាំ​គណបក្ស​នេះ ប្រមូល​ផ្ដុំគ្នា​ផ្ដួល​រំលំ​រដ្ឋាភិបាល​ឯក​បក្ស៖ «បាទ​នេះ​គឺ​ការ​ចំណាយ​លុយ​ខ្ជះខ្ជាយ​របស់​រដ្ឋាភិបាល​ក្រុងភ្នំពេញ ហើយ​ចេះតែ​ប្រឌិត​រឿង​ឱ្យ​តែ​មាន​ធ្វើ​ឱ្យ​ប្រជាពលរដ្ឋ​ភ័យខ្លាច​មិន​ចេះ​ចប់​មិន​ចេះ​ហើយ។ ខ្ញុំ​ជឿជាក់​ថា របប​ក្រុងភ្នំពេញ​សម្ដែង​រឿង​ទាំងអស់​ហ្នឹង​លែង​សម​ហើយ ជាពិសេស​ប្រជាពលរដ្ឋ​លែង​មាន​ជំនឿ​លើ​ការសម្ដែង​ទាំង​ហ្នឹងហើយ។ ប្រជាពលរដ្ឋ​ចាំតែ​ពេល​ការ​វិល​ត្រឡប់​របស់​លោក សម រង្ស៊ី នៅ​ខាង​មុខ​នេះ ហើយ​ពួកគាត់​ហ្នឹង​ងើបឡើង​ទាំងអស់​គ្នា ដើម្បី​ទាមទារ​ឱ្យ​របប​ក្រុងភ្នំពេញ​ស្ដារ​ប្រជាធិបតេយ្យ​ឡើងវិញ»

ចំណែក​ឯ​ប្រធាន​ផ្នែក​សិទ្ធិមនុស្ស​នៃ​សមាគម​ការពារ​សិទ្ធិមនុស្ស​អាដហុក​(Adhoc) លោក នី សុខា យល់ថា ក្នុង​ពេល​ជម្រះក្ដី​លោក កឹម សុខា នៅ​ពេល​ខាងមុខនេះ ហាក់​ពុំ​មាន​អ្វី​សំខាន់​រហូតដល់​រដ្ឋាភិបាល​ត្រូវ​ដាក់​កងកម្លាំង​ការពារ​ន្តិ​សុខ​នៅ​ពាសពេញ​ប្រទេស​នោះ​ទេ។ លោក​ថា រដ្ឋាភិបាល​អាច​ដាក់​កម្លាំង​ការពារ​បន្តិចបន្តួច​នៅ​រាជធានី​ភ្នំពេញ ដូច​ការ​ជម្រះក្ដី​ប្រជាពលរដ្ឋ​គឺ​គ្រប់គ្រាន់​ហើយ​។​មន្ត្រី​អង្គការ​សង្គម​ស៊ីវិល​រូប​នេះ​បញ្ជាក់​ថា ការ​ត្រៀម​កម្លាំង​ប៉ូលិស​ដ៏​ច្រើន​នេះ ដោយសារ​អាជ្ញាធរ​ព្រួយបារម្ភ​ខ្លាច​កម្លាំង​មហាជន​ងើប​បះបោរ ក្នុង​ថ្ងៃ​បើកសវនាការ​នោះ ហើយ​ធ្វើ​ឱ្យ​ប៉ះពាល់​ដល់​ការដឹកនាំ​របស់​ខ្លួន៖ «ដល់​អីចឹង​ទៅ​យើង​ឃើញ​ថា អ្វី​ដែល​ជា​ទឹកចិត្ត​គាំទ្រ របស់​សកម្មជន​គណ​បក្ស​ប្រឆាំង​ហ្នឹង យើង​ដឹង​ហើយ​មាន​អ្នកគាំទ្រ​មិន​តិច​គ្នា។ បើ​តាម​លទ្ធផល​ឆ្នោត​កន្លងមក មាន​ជាង​៣​លាន​នាក់ ដូច្នេះ​មិនមែន​ជា​ចំនួន​មួយ​តិច​ទេ​។ អីចឹង​យើង​ឃើញ​ថា នេះ​ជា​ការ​ព្រួយបារម្ភ​ធំ​ណាស់​របស់​រដ្ឋាភិបាល មិន​ដឹង​ថា ការ​រំលាយ​គណបក្សប្រឆាំង​ទៅ​ហើយ​ហ្នឹង​ថា​តើ​អ្នកគាំទ្រ​គេ​នូវ​មិន​សប្បាយចិត្ត​ឬ​អត់»

តុលាការ​ក្រុង​ភ្នំពេញ​នឹង​បើកសវនាការ​ជម្រះក្ដី​ប្រធាន​គណបក្ស​សង្គ្រោះ​ជាតិ​គឺ​លោក កឹម សុខា នៅ​ថ្ងៃ​ទី​១៥ មករា។ ក្នុង​ដំណើរ​ស៊ើបអង្កេត​សំណុំ​រឿង​នេះ តុលាការ បាន​កោះហៅ​មនុស្ស​មួយ​ចំនួន​ដែល​អ្នកខ្លះ​ធ្លាប់​ធ្វើការ​ជាមួយ​លោក កឹម សុខា និង​អ្នកខ្លះ​មិនដែល​សោះ ក្នុង​នោះ​មាន អ្នកនាំពាក្យ​គណបក្ស​ប្រជាជន​កម្ពុជា លោក ឈឹម ផលវរុណ មន្ត្រី​សង្គម​ស៊ីវិល យុវជន​ដែល​ឈឺឆ្អាល​ការងារ​សង្គម​ចំនួន ២​នាក់ និង​នៅ​ពេល​ថ្ងៃ​សវនាការ​ជំនុំជម្រះ​កាន់តែ​ខិតជិត​ចូល​មក​ដល់ តុលាការ​ក៏បាន​ចេញ​ដីកា​ជា​បន្តបន្ទាប់​កោះហៅ​សកម្មជន និង​មន្ត្រី​គណបក្ស​សង្គ្រោះ​ជាតិ​មួយចំនួន​ឱ្យចូល​ខ្លួន​ក្នុងនាម​សាក្សី​ដែរ​។ លោក កឹម សុខា ត្រូវ​តុលាការ​ចោទប្រកាន់​ក្នុង​សំណុំរឿង​សន្ទិដ្ឋភាព ឬ​ការ​ត្រូវរ៉ូវ​ជាមួយ​បរទេស ដើម្បី​ផ្ដួល​រំលំ​រដ្ឋាភិបាល ដែល​ប្រព្រឹត្ត​នៅ​ប្រទេស​កម្ពុជា និង​ទីកន្លែង​ផ្សេងទៀត កាលពី​អំឡុង​ឆ្នាំ​១៩៩៣ រហូតដល់ ថ្ងៃទី​៣ ខែ​កញ្ញា ឆ្នាំ​២០១៧​។ សហគមន៍​ជាតិ និង​អន្តរជាតិ ចាត់​ទុក​វិធានការ​ច្បាប់​របស់​រដ្ឋាភិបាល​ក្រុងភ្នំពេញ​ទៅលើ​មេ​បក្ស​ប្រឆាំង​លោក​កឹម សុខា ថា ជា​រឿង​នយោបាយ និង​ទាមទារ​ឱ្យ​តុលាការ​ក្រុងភ្នំពេញ​ទម្លាក់​ចោល​បទចោទប្រកាន់ និង​ផ្ដល់​សិទ្ធិ​សេរីភាព​ពេញលេញ​ដល់​លោក បាន​ចូលរួម​ការងារ​នយោបាយ​ឡើងវិញ និង​បើក​ឱ្យ​មាន​ការប្រកួតប្រជែង​ការបោះឆ្នោត​ជ្រើសរើស​តំណាងរាស្ត្រ​ដោយ​ត្រឹមត្រូវ និង​យុត្តិធម៌៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល