លោក សម រង្ស៊ី ជួបសមាជិកសភា និងព្រឹទ្ធសភាអូស្ត្រាលី
2019.08.17
ថ្ងៃដំបូងនៃការធ្វើដំណើរទៅប្រទេសអូស្ត្រាលី លោក សម រង្ស៊ី បានជួបសមាជិកព្រឹទ្ធសភា និងសមាជិករដ្ឋសភាសហព័ន្ធនៃប្រទេសអូស្ត្រាលី នៅថ្ងៃទី១៧ ខែសីហានេះ។ លោក សម រង្ស៊ី បានសរសេរលើហ្វេសប៊ុករបស់លោកថា លោកបានទៅដល់ទីក្រុងអាដេតលេត (Adelaide) រដ្ឋអូស្ត្រាលីខាងត្បូង ហើយបានជួបសមាជិកាព្រឹទ្ធសភាសហព័ន្ធ គឺអ្នកស្រី ផេននី វង់ (Penny Wong) ដែលជាអ្នកនាំពាក្យគណបក្សប្រឆាំង ទាក់ទងកិច្ចការបរទេស និងតំណាងរាស្ត្រសហព័ន្ធ លោក ម៉ាក បាត់ល័រ (Mark Butler)។ ក្រៅពីនេះ គេឃើញមានពលរដ្ឋខ្មែរនៅអូស្ត្រាលី ដែលជាអ្នកគាំទ្រលោក សម រង្ស៊ី ប្រធានស្ដីទីគណបក្សសង្គ្រោះជាតិរូបនេះ ក៏ទៅទទួលលោកដែរ។
លេខាគណបក្សសង្គ្រោះជាតិប្រចាំទីក្រុង Adelaide រដ្ឋអូស្ត្រាលីខាងត្បូង ខៀវ តារា ឱ្យអាស៊ីសេរីដឹងថា ក្នុងជំនួបនោះ សមាជិកព្រឹទ្ធសភា និងរដ្ឋសភាអូស្ត្រាលី បង្ហាញការព្រួយបារម្ភពីឥទ្ធិពលចិននៅប្រទេសកម្ពុជា ខណៈឃើញមានសារព័ត៌មានចុះផ្សាយថា ចិនបានដាក់មូលដ្ឋានទ័ពនៅក្នុងតំបន់សមុទ្ររាម ខេត្តព្រះសីហនុ ហើយពួកគេកំពុងតាមដានរឿងនេះយ៉ាងចិត្តទុកដាក់។ លោកឱ្យដឹងទៀតថា សមាជិកព្រឹទ្ធសភា និងរដ្ឋសភាអូស្ត្រាលី នឹងជំរុញរដ្ឋាភិបាលអូស្ត្រាលីឱ្យដាក់ទណ្ឌកម្មលើក្រុមលោក ហ៊ុន សែន ដូចដែលអាមេរិកបានដាក់ទណ្ឌកម្មលើរបបនេះ។ ចំណែកការវិលត្រឡប់ទៅប្រទេសកម្ពុជារបស់លោក សម រង្ស៊ី នាពេលខាងមុខនេះ លោក ខៀវ តារា ប្រាប់ថា សមាជិកព្រឹទ្ធសភា និងរដ្ឋសភាអូស្ត្រាលី គាំទ្រជំហរនេះ និងតាមដានព្រឹត្តិការណ៍នោះដោយចិត្តទុកដាក់៖ «បក្សអូស្ត្រាលីនឹងដាក់ស្នើទៅរដ្ឋាភិបាលឲ្យដាក់ច្បាប់ដាក់ដូចអាមេរិកបានធ្វើច្បាប់ H.R 526 ធ្វើចំណែកហើយនៅអូស្ត្រាលីមានច្បាប់ស្រដៀងហ្នឹងដែរ គ្រាន់តែយើងយកមកអនុវត្តដោយតាមដានសាច់រឿងភស្តុតាងឲ្យបានត្រឹមត្រូវ យើងនឹងអាចយកមកអនុវត្តបាន»។
ការបំពេញទស្សនកិច្ចរបស់លោក សម រង្ស៊ី ក្នុងពេលនេះ ក្រៅតែជួបអ្នកនយោបាយអូស្ត្រាលី លោកក៏ជួបអ្នកគាំទ្ររបស់លោកដែរ ដើម្បីបញ្ជាក់ជំហរ និងគោលបំណងនៃការ វិលចូលស្រុកវិញរបស់លោក នៅថ្ងៃទី៩ ខែវិច្ឆិកា ឆ្នាំ២០១៩ នោះ។
តាមគម្រោង លោក សម រង្ស៊ី នៅអូស្ត្រាលីចាប់ពីថ្ងៃទី១៧ រហូតដល់ថ្ងៃទី២៦ ខែសីហា គឺនៅទីក្រុងសំខាន់ៗ មួយចំនួន ដែលមានពលរដ្ឋរស់នៅច្រើន ដូចជា ទីក្រុងស៊ីដនី Sydney ទីក្រុងអាដេលេត និងទីក្រុងម៉ែលប៊ន (Melbourne) ជាដើម។ ក្រៅពីនេះ លោកក៏នឹងទៅប្រទេស នូវែលហ្សេឡង់ (New Zealand) ដែរ៕