លោក សម រង្ស៊ី ស្វាគមន៍​តតាំង​នឹង​លោក ហ៊ុន សែន នៅ​តុលាការ​បារាំង​ករណី​ឃាតកម្ម​លោក ហុក ឡងឌី

ដោយ មួង ណារ៉េត
2019-06-07
អ៊ីម៉ែល
មតិ
Share
បោះពុម្ព
លោក​នាយករដ្ឋមន្ត្រី ហ៊ុន សែន (ឆ្វេង) និង​លោក សម រង្ស៊ី អតីត​ប្រធាន​គណបក្ស​សង្គ្រោះជាតិ។
លោក​នាយករដ្ឋមន្ត្រី ហ៊ុន សែន (ឆ្វេង) និង​លោក សម រង្ស៊ី អតីត​ប្រធាន​គណបក្ស​សង្គ្រោះជាតិ។
Photo: RFA

លោក សម រង្ស៊ី ប្រធាន​ស្ដីទី​គណបក្ស​សង្គ្រោះជាតិ ស្វាគមន៍​លោក ហ៊ុន សែន ឱ្យ​តតាំង​ក្តី​នៅមុខ​តុលាការ​បារាំង បើ​លោក ហ៊ុន សែន ពិតជា​ចង់​ប្ដឹងផ្ដល់​លោក​រឿង​សារ​របស់​លោក​អំពី​ការ​ស្លាប់​របស់​លោក ហុក ឡងឌី។

លោក សម រង្ស៊ី ថា លោក​មាន​ជំនឿ​មុតមាំ​លើ​ភាព​ឯករាជ្យ​របស់​តុលាការ​បារាំង ដែល​មិន​ដូច​ប្រព័ន្ធ​តុលាការ​នៃ​របប​លោក ហ៊ុន សែន ដែល​គ្រាន់តែ​ជា​ឧបករណ៍​នយោបាយ បម្រើការ​ក្រាញ​អំណាច​របស់​លោក ហ៊ុន សែន​នោះ៖ «មិន​អី​ទេ ចាំ​តតាំង​គ្នា​នៅ​ចំពោះ​មុខ​តុលាការ​ឯករាជ្យ នឹង​ល្អមើល​មែនទែន ព្រោះ​លោក ហ៊ុន សែន គាត់​ធ្លាប់តែ​លេងសើច​បញ្ជា​តុលាការ​អាយ៉ង​របស់​គាត់​តាម​ចិត្ត នៅ​ទីក្រុង​ភ្នំពេញ​។ ប៉ុន្តែ​មក​ប៉ះ​តុលាការ​បារាំង គឺ​ខុសគ្នា​ដូច​មេឃ​នឹង​ដី​។ ពាក្យ​បណ្តឹង​លោក ហ៊ុន សែន ប្ដឹង​ខ្ញុំ​នៅ​ភ្នំពេញ​គ្មាន​ន័យ គ្មាន​តម្លៃ គ្មាន​ប្រយោជន៍​។ បើ​លោក ហ៊ុន សែន ហ៊ាន​ចេញ​មុខ​មក​តតាំង​ក្តី​នឹង​ខ្ញុំ​នៅ​តុលាការ​បារាំង ដែល​ជា​តុលាការ​ឯករាជ្យ នោះ​ខ្ញុំ​ស្វាគមន៍»

ប្រតិកម្ម​របស់​លោក សម រង្ស៊ី ធ្វើ​ឡើង​តប​ទៅ​នឹង​លោក ហ៊ុន សែន ដែល​គ្រោង​រៀបចំ​ដាក់ពាក្យ​ប្ដឹង​លោក នៅ​ចំពោះ​មុខ​តុលាការ​បារាំង ចំពោះ​សារ ដែល​លោក​បង្ហោះ​តាម​ទំព័រ​ហ្វេសប៊ុក កាលពី​ដើមខែ មិថុនា​នេះ ដែល​លើក​ឡើង​ថា លោក ហ៊ុន សែន ជា​អ្នក​សម្លាប់ ហុក ឡងឌី តាមរយៈ​ការ​ដាក់​គ្រាប់បែក​ឱ្យ​ផ្ទុះ ក្នុង​ឧទ្ធម្ភាគចក្រ នៅ​ពេល​ដែល​កំពុងតែ​ហោះហើរ​លើ​ខេត្ត​ស្វាយរៀង កាលពី​ថ្ងៃទី៩ ខែ​វិច្ឆិកា ឆ្នាំ​២០០៨។ នៅក្​នុង​សារ​តាម​ហ្វេសប៊ុក​ដដែល​នោះ​លោក សម រង្ស៊ី បន្ថែម​ថា ឥឡូវនេះ លោក ឌី វិជ្ជា ដែល​ជា​កូនប្រុស​របស់​លោក ហុក ឡងឌី និង ជា​កូនប្រសា​របស់​លោក ហ៊ុន សែន ដឹង​ច្បាស់​អំពី​ឃាតកម្ម​លើឪពុក​របស់​លោក​។ លោក​បន្ត​ថា លោក ឌី វិជ្ជា កំពុងតែ​គិតគូរ​អំពី​ផែនការ​សងសឹក​ជួស​ឪពុក​របស់​លោក​។ ផែនការ​នេះ មានការ​គាំទ្រ​ពី​លោក ស ខេង ពីព្រោះ លោក ស ខេង ដឹងខ្លួន​ថា​លោក ហ៊ុន សែន កំពុងតែ​រៀបចំ​ផែនការ​ដក​ដំណែង​របស់​លោក ឬក៏​កម្ចាត់​លោក​តែម្ដង ដើម្បី​ឱ្យ​កូនប្រុស​បង្កើត​របស់​លោក ហ៊ុន សែន គឺ​លោក ហ៊ុន ម៉ាណែត ហ៊ុន ម៉ានិត និង ហ៊ុន ម៉ានី មក​បន្តវេន​ពី​លោក ហ៊ុន សែន ដោយ​មិន​មាន​នរណា​អាច​រារាំង​បាន ចំពោះ​នយោបាយ​គ្រួសារនិយម​របស់​លោក ហ៊ុន សែន នេះ។

មន្ត្រី​នាំពាក្យ​រដ្ឋាភិបាល​កម្ពុជា​លោក ផៃ ស៊ីផាន ប្រាប់​អាស៊ីសេរី កាលពី​ថ្ងៃ​ទី ០៧ ខែ មិថុនា ថា​លោក ហ៊ុន សែន កំពុង​ឱ្យ​ក្រុម​មេធាវី​របស់​លោក រៀបចំ​សំណុំរឿង​ដើម្បី​ដាក់​ប្តឹង​លោក សម រង្ស៊ី ហើយ​។ ចំណែក​ឯ​អនុប្រធាន​គណបក្ស​ប្រជាជន​កម្ពុជា និង​ជា​រដ្ឋមន្ត្រី​ក្រសួងមហាផ្ទៃ​លោក ស ខេង ក៏​គ្រោង​នឹង​ដាក់​ពាក្យ​បណ្ដឹង​ដាច់ដោយឡែក​មួយ​ដែរ ជុំវិញ​ករណី​ដូចគ្នា​នេះ​។ លោក ផៃ ស៊ី​ផាន បញ្ជាក់​ថា ហេតុផល​មួយ​ក្នុងចំណោម​ហេតុផល​ចំនួន​បី ក្នុង​ការ​គ្រោង​ដាក់​ប្ដឹង​លោក សម រង្ស៊ី ទៅ​តុលាការ​បារាំង គឺ​ដោយសារ​ទី​មួយ​លោក សម រង្ស៊ី មាន​សញ្ជាតិ​បារាំង និង ទី​ពីរ​គឺ​លោក សម រង្ស៊ី កំពុង​មាន​វត្ត​មាននៅ​ប្រទេស​បារាំង​ស្រាប់៖ «ហេតុផល​ទី​បី​គឺ​តម្លៃ​សាកល ហ្នឹង​ជា​តម្លៃ​យុត្តិធម៌​សាកល»

លោក សម រង្ស៊ី ធ្លាប់​ឈ្នះ​ក្តី​លើ​មន្ត្រី​ជាន់ខ្ពស់​របប​លោក ហ៊ុន សែន នៅ​តុលាការ​បារាំង​។ តុលាការ​បារាំង កាលពី​ខែ មេសា ឆ្នាំ ២០១១ ធ្លាប់​ច្រានចោល​ពាក្យ​បណ្ដឹង​បរិហារកេរ្តិ៍ ដែល​ដាក់​ប្ដឹង​ដោយ​អតីត​ឧបនាយករដ្ឋមន្ត្រី​ក្រសួង​ការបរទេស​កម្ពុជា​លោក ហោ ណាំហុង ប្រឆាំង​នឹង​រូបលោក​។ កាលណោះ​លោក ហោ ណាំហុង ប្តឹង​លោក សម រង្ស៊ី ជុំវិញ​ការណ៍​ដែល​លោក​ថ្លែង​អំពី​តួនាទី​របស់​លោក ហោ ណាំហុង នៅ​ក្នុង​ការគ្រប់គ្រង​គុក​បឹងត្របែក កាលសម័យ​ខ្មែរក្រហម​។ តុលាការ​បារាំង ច្រានចោល​បណ្ដឹង​លោក ហោ ណាំហុង ដោយ​ឈរ​លើ​ការ​បកស្រាយ​ថ្មី នៃ​ច្បាប់​ស្ដីពី​សេរីភាព​សារព័ត៌មាន និង ថា​លោក ហោ ណាំហុង គឺជា​បុគ្គល​សាធារណៈ។

ក្រៅពី​គម្រោង​ប្ដឹង​លោក សម រង្ស៊ី ទៅ​តុលាការ​បារាំង​នេះ មន្ត្រី​របប​លោក ហ៊ុន សែន រួម​ទាំង​លោក ហ៊ុន សែន ផង ប្ដឹង​លោក សម រង្ស៊ី ជាង ១០ ករណី​ហើយ នៅ​ក្នុង​តុលាការ​កម្ពុជា។ ទោះជា​យ៉ាងនេះ​ក្តី បណ្តឹង​ទាំងអស់​នេះ រង​ការ​រិះគន់​ថា មាន​ចេតនា​នយោបាយ​បាយ។

រហូតមកដល់​ពេលនេះ របប​លោក ហ៊ុន សែន ក៏​មិនដែល​ធ្វើ​សំណើសុំ​បត្យាប័ន​ទៅ​ប្រទេស​បារាំង ដើម្បី​ឱ្យ​បញ្ជូន​លោក សម រង្ស៊ី មក​ទទួលទោស​នៅ​តុលាការ​កម្ពុជា នោះ​ដែរ បើ​ទោះ​បី​លោក សម រង្ស៊ី មាន​សញ្ជាតិ​កម្ពុជា​ដែរ។ មន្ត្រី​ជាន់ខ្ពស់​នៃ​អង្គការ​ឃ្លាំមើល​សិទ្ធិមនុស្ស​អន្តរជាតិ ធ្លាប់​ប្រាប់​អាស៊ីសេរី​ថា ករណី​ប្ដឹងផ្ដល់​លោក សម រង្ស៊ី នេះ គឺជា​រឿង​នយោបាយ​សុទ្ធសាធ ដែល​ធ្វើ​ឱ្យ​របប​លោក ហ៊ុន សែន គ្មាន​មូលដ្ឋាន​ឯណា​ក្នុង​ការ​ស្នើសុំ​ធ្វើ​បត្យាប័ន​នោះ​ទេ ហើយ​បើ​ស្នើ ក៏​រដ្ឋាភិបាល​បារាំង​មិន​ធ្វើតាម​ដែរ ព្រោះ​ជា​រឿង​នយោបាយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល