១ . គណបក្សក្រៅរដ្ឋាភិបាលចំនួន៤ជួបក្រសួងមហាផ្ទៃស្នើកែលំអសេរីភាពនយោបាយ
គណបក្សនយោបាយក្រៅរដ្ឋាភិបាលចំនួន៤បានជួបជាមួយមន្ត្រីជាន់ខ្ពស់ក្រសួងមហាផ្ទៃនៅថ្ងៃទី១៥ កញ្ញា ម្សិលមិញនេះ ដោយស្នើទៅក្រសួងមហាផ្ទៃជួយអន្តរាគមន៍ទៅអាជ្ញាធរមូលដ្ឋានឲ្យបញ្ឈប់ការធ្វើទុក្ខបុកម្នេញលើគណបក្សក្រៅរដ្ឋាភិបាល។ មន្រ្តីសង្គមស៊ីវិលថាជំនួបនេះជាការវិវឌ្ឍន៍ថ្មីមួយហើយដើម្បីឲ្យបរិយាកាសនយោបាយល្អគឺទាមទារឲ្យក្រសួងមហាផ្ទៃយកចិត្តទុកតាមដានការងារលើមន្ត្រីថ្នាក់ក្រោមរបស់ខ្លួននៅមូលដ្ឋាន។
២ . តុលាការភ្នំពេញជម្រះក្ដីសកម្មជនបក្សប្រឆាំង៣៩នាក់រឿងរួមគំនិតក្បត់ជាតិ
សាលាដំបូងរាជធានីភ្នំពេញបើកសវនាការជំនុំជម្រះក្ដីលើសំណុំរឿងរួមគំនិតក្បត់របស់ថ្នាក់ដឹកនាំ និង សកម្មជនគណបក្សប្រឆាំង៣៩នាក់តែអវត្តមាន៣៦នាក់កាលពីព្រឹកថ្ងៃទី១៥ ខែកញ្ញា ម្សិលមិញ។ ប៉ុន្តែប្រធានក្រុមប្រឹក្សាជំនុំជម្រះអ្នកស្រី អ៊ុក រ៉េតគន្ធា បានសាកសួរលោក គង់ ម៉ាស់ តែម្នាក់ ចំណែក២នាក់ទៀត គឺ ខាន់ ប៊ុន ផេង និងលោក វឿង សំណាង នឹងបើកសវនាការសួរដេញដោលនៅថ្ងៃទី២២ ខែកញ្ញាសប្ដាហ៍ក្រោយបន្តទៀត។
អានព័ត៌មានបន្ថែម...
៣ . របាយការណ៍បង្ហាញថា ប្រជាពលរដ្ឋ ត្រូវគេបង្ខំឲ្យលក់ដីដោះស្រាយបំណុលស្ថាប័នហិរញ្ញវត្ថុ
សង្គមស៊ីវិលក្នុងស្រុកនិងអង្គការហ្វីអាន (FIAN) នៃប្រទេសអាល្លឺម៉ង់ (Germany) បានចេញផ្សាយរបាយការណ៍លទ្ធផលស្រាវជ្រាវមួយបង្ហាញថាប្រជាពលរដ្ឋកម្ពុជាជាច្រើនត្រូវបានគេបង្ខំលក់ដីដើម្បីដោះស្រាយបំណុលដែលបានខ្ចីពីស្ថាប័នហិរញ្ញវត្ថុក្នុងស្រុក។មន្ត្រីអង្គការសង្គមស៊ីវិលយល់ថារដ្ឋាភិបាលកម្ពុជានិងភាគីពាក់ព័ន្ធត្រូវមានវិធានការណ៍អន្តរាគមន៍បន្ទាន់ជួយដល់ប្រជាពលរដ្ឋក្រីក្រដែលកំពុងមានបំណុលវ័ណ្ឌករដើម្បីជៀសវៀងកុំឱ្យពួកគេត្រូវលក់ដីសងបំណុលដោយបង្ខំបន្តទៀត។
៤ . លោក ហ៊ុន សែន ថាកំណើននៃកម្ដៅផែនដី និងគ្រោះធម្មជាតិកំពុងមានឥទ្ធិពលខ្លាំង
លោកនាយករដ្ឋមន្រ្តី ហ៊ុន សែន លើកឡើងក្នុងនាមប្រធានប្តូរវេនអាស៊ានថា បប្រែបម្រួលអាកាសធាតុ ការកើនឡើងនៃកម្ដៅផែនដី និងគ្រោះធម្មជាតិ កំពុងលេចរូបរាង និងមានឥទ្ធិពលកាន់តែខ្លាំងឡើង ដែលអាចបង្កឱ្យមានការផ្លាស់ប្ដូរចរន្តសេដ្ឋកិច្ច និងការធ្លាក់ចុះតម្លៃផលិតផលនៅលើសាកលលោក។ អ្នកឃ្លាំមើលបញ្ហាសង្គមយល់ថា ការលើកឡើងរបស់លោក ហ៊ុន សែន គឺជាការដាស់តឿនដល់ប្រទេសសមាជិកអាស៊ានឱ្យមានឆន្ទៈការពារធនធានធម្មជាតិ ដើម្បីទ្រទ្រង់លំនឹងផែនដី។ ទោះជាយ៉ាងណា អ្នកស្រឡាញ់បរិស្ថានមើលឃើញថា កម្ពុជានារយៈពេលប៉ុន្មានឆ្នាំចុងក្រោយនេះ ភោគទ្រព្យជាតិរងការបំផ្លិចបំផ្លាញធ្ងន់ធ្ងរ ជាពិសេសការបង្កឱ្យមានវិនាសកម្មព្រៃឈើនៅកម្ពុជាដែលមានទំហំធំធេង។
[ អានព័ត៌មានបន្ថែម.... Opens in new window ]
៥ . មូលនិធិគ្លូនីសំរាប់យុត្តិធម៌ ស្នើដល់តុលាការកម្ពុជា ឲ្យដោះលែងកញ្ញាសេង ធារី ជាបន្ទាន់ និងដោយឥតលក្ខខណ្ឌ
មូលនិធិគ្លូនីសំរាប់យុត្តិធម៌ (Clooney Foundation for Justice -CFJ) នៅថ្ងៃទី១៥ ខែកញ្ញា ស្នើដល់តុលាការកម្ពុជា ឲ្យដោះលែងកញ្ញា សេង ធារី ជាបន្ទាន់ និងដោយឥតលក្ខខណ្ឌ។ ការអំពាវនាវនេះ ធ្វើឡើងក្រោយដែលរបាយការណ៍ថ្មីមួយស្តីពីការពិនិត្យដំណើរការកាត់ក្តី (TrialWatch) របស់មូលនិធិគ្លូនីសំរាប់យុត្តិធម៌ បានដាក់ពិន្ទុ អេហ្វ (F) ឬទាបបំផុត បន្ទាប់ពីបានរកឃើញថា ការកាត់ទោសមេធាវីខ្មែរអាមេរិកាំង កញ្ញា សេង ធារី ឱ្យជាប់ពន្ធនាគារ៦ឆ្នាំ នៅក្នុងសំណុំរឿង «រួមគំនិតក្បត់» គឺគ្មានភស្តុតាងណាមួយដើម្បីបង្ហាញថា កញ្ញាបានប្រព្រឹត្តបទឧក្រិដ្ឋនោះឡើយ។ ក៏ប៉ុន្តែផ្ទុយទៅវិញ តុលាការកម្ពុជាបែរជាផ្តោតទៅលើតែអត្ថបទចុះផ្សាយ និងរូបភាពដែលផ្សព្វផ្សាយ ក្នុងគណនីយហ្វេសប៊ុករបស់កញ្ញា ដែលបានបញ្ចេញមតិគាំទ្រ ដល់ការធ្វើមាតុភូមិនិវត្តរបស់លោក សម រង្ស៊ី ប្រធានស្តីទីគណបក្សសង្គ្រោះជាតិ កាលពីឆ្នាំ ២០១៩។
៦ . សង្គមស៊ីវិលស្នើឱ្យអាជ្ញាធរថ្នាក់លើ តាមដានអាជ្ញាធរមូលដ្ឋានចុះបង្ក្រាបល្បែងស៊ីសងក្នុង សហគមន៍ឱ្យមានប្រសិទ្ធភាព
មន្ត្រីសង្គមស៊ីវិល ស្នើឱ្យអាជ្ញាធរថ្នាក់លើនិងក្រសួងពាក់ព័ន្ធថ្នាក់ជាតិ តាមដានទៅលើការចុះ បង្ក្រាបល្បែងស៊ីសងរបស់អាជ្ញាធរនៅតាមមូលដ្ឋាន។ ពួកគាត់ថា ការធ្វើបែបនេះ គឺដើម្បីធានាឱ្យការអនុវត្តច្បាប់មានប្រសិទ្ធភាព និងពង្រឹងការងាររបស់មន្ត្រីទាំងនោះ ចៀសវាងមានការឃុបឃិតគ្នាក្នុងមូលដ្ឋានជាហេតុធ្វើឱ្យល្បែងស៊ីសងនៅតែបន្តមាន។
៧ . រោងចក្រវ៉ាក់សំាងកូវីដ - ១៩ នឹងចាប់ផ្ដើមសាងសង់នៅក្នុងខែវិច្ឆិកាខាងមុខ
រោងចក្រថ្នាំបង្កាជំងឺកូវីដ-១៩ លើកដំបូងនៅកម្ពុជានឹងចាប់ផ្ដើមបើកការដ្ឋានសាងសង់នៅក្នុងខែវិច្ឆិកា ខាងមុខ។ រដ្ឋលេខាធិការក្រសួងសុខាភិបាលអ្នកស្រី យក់ សម្បត្តិ ថ្លែងក្នុងសន្និសីទសារព័ត៌មាន ស្ដីពី សមិទ្ធផលសម្រេចបានរយៈពេល៥ឆ្នាំរបស់ក្រសួងសុខាភិបាលកាលពីថ្ងៃទី ១៥ ខែកញ្ញា ម្សិលម៉ិញថា ក្រសួងសុខាភិបាលបានធ្វើការងារជាច្រើនជាមួយក្រុមហ៊ុនផលិតវ៉ាក់សាំងរបស់ចិន ស៊ីណូវ៉ាក់ (Sinovac) ហើយមកដល់ពេលនេះមានក្រុមហ៊ុនឯកជនក្នុងស្រុកដែលទទួលសិទ្ធិផលិតឱសថកំពុងរៀបចំដីសម្រាប់សាងសង់។ រោងចក្រវ៉ាក់សាំងនេះនឹងត្រូវសាងសង់នៅលើដីទំហំប្រហែល ៥ហិកតារ ក្នុងភូមិទួលអំពិល ឃុំពញាឮ ស្រុកពញាឮ ខេត្តកណ្ដាល។
៨ . មន្ត្រីជាន់ខ្ពស់អូស្ត្រាលីមកកម្ពុជាដើម្បីពង្រឹងទំនាក់ទំនងអូស្ត្រាលី - អាស៊ាន
សមាជិកព្រឹទ្ធសភានិងជាមន្ត្រីជាន់ខ្ពស់ផ្នែកពាណិជ្ជកម្មនិងផលិតកម្មនៃប្រទេសអូស្ត្រាលី លោក ធីម អេរ៉េស (Tim Ayres) នឹងដឹកនាំគណៈប្រតិភូអូស្ត្រាលីមកកាន់កម្ពុជានៅសប្ដាហ៍នេះដើម្បីចូលរួមកិច្ចប្រជុំរដ្ឋមន្ត្រីសេដ្ឋកិច្ចអាស៊ានលើកទី៥៤ និងកិច្ចប្រជុំពាក់ព័ន្ធដទៃទៀតដែលប្រព្រឹត្តទៅចាប់ពីថ្ងៃទី១១ ដល់ថ្ងៃទី១៨ ខែកញ្ញា។ ស្ថានទូតអូស្ត្រាលីប្រចាំកម្ពុជាឱ្យដឹងក្នុងសេចក្ដីប្រកាសព័ត៌មានកាលពីថ្ងៃទី១៤ កញ្ញាថា នេះជាកិច្ចប្រជុំលើកដំបូងរបស់រដ្ឋមន្ត្រីសេដ្ឋកិច្ចចាប់តាំងពីមេដឹកនាំអាស៊ានបានយល់ព្រមលើភាពជាដៃគូយុទ្ធសាស្ត្រគ្រប់ជ្រុងជ្រោយថ្មីជាមួយអូស្ត្រាលីកាលពីខែតុលា ឆ្នាំ២០២១។
៩ . កសិករចិញ្ចឹមជ្រូកត្អូញត្អែរពីតម្លៃជ្រូកចុះថោកក្នុងរដូវបុណ្យភ្ជុំបិណ្ឌ
នៅខេត្តប៉ៃលិនឯណោះវិញកសិករចិញ្ចឹមជ្រូកត្អូញត្អែរពីតម្លៃជ្រូករស់ចុះថោកឱកាសបុណ្យភ្ជុំនិងលក់មិនបានប្រាក់កម្រៃដោះស្រាយជីវភាពគ្រួសារ។ កសិករចិញ្ចឹមជ្រូកអះអាងថាតម្លៃចំណីជ្រូកចេះតែបន្តហក់ឡើងថ្លៃតែតម្លៃជ្រូករស់កាន់តែធ្លាក់តម្លៃ។ ប្រធានសមាគមអ្នកចិញ្ចឹមសត្វកម្ពុជាមើលឃើញថាការត្រៀមជ្រូកសម្រាប់បុណ្យភ្ជុំលើសលប់នាំអោយតម្លៃសាច់ជ្រូកធ្លាក់ចុះ។
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។