លោក សម រង្សី ចោទថា លោក ឃ្លាំង ហួត ជាអ្នកសម្លាប់ លោក លិម គិមយ៉ា
2025.01.30

ប្រធានស្ដីទីគណបក្សសង្គ្រោះជាតិ លោក សម រង្សី បានចោទអភិបាលរងរាជធានីភ្នំពេញ លោក ឃ្លាំង ហួត ថា ជាអ្នកសម្លាប់អតីតតំណាងរាស្ត្រគណបក្សសង្គ្រោះជាតិ គឺលោក លិម គិមយ៉ា កាលពីថ្ងៃទី៧ ខែមករា។ ទន្ទឹមនឹងនោះ លោក សម រង្សី ក៏បានបង្ហាញភស្តុតាង មួយចំនួន ដែលបញ្ជាក់ថា លោក ឃ្លាំង ហួត ពិតជាពាក់ព័ន្ធលើករណីឃាតកម្មនេះ ដែលមានអតីតនាយករដ្ឋមន្ត្រី លោក ហ៊ុន សែន ជាមេកើយ និងជាអ្នកបញ្ជាពីខាងក្រោយខ្នង។ រីឯលោក ឃ្លាំង ហួត បានច្រានចោលចំពោះការចោទប្រកាន់នេះ ដោយថា ជារឿងមិនពិត។
ប្រធានស្ដីទីគណបក្សសង្គ្រោះជាតិ លោក សមរង្សី នៅថ្ងៃទី២៨ ខែមករា បានបង្ហោះសារ និងរូបភាព លោក ឃ្លាំង ហួត ថាមានទំនាក់ទំនងយ៉ាងជិតស្និទ្ធជាមួយ លោក ហ៊ុន សែន និង អតីតនាយករដ្ឋមន្ត្រីថៃ គឺលោក ថាក់ស៊ីន ស៊ីណាវ៉ាត់ (Thaksin Shinawatra)។ លោក សម រង្សី ថា ភាពជិតស្និទ្ធនេះហើយ ដែលលោក ចោទលោក ឃ្លាំង ហួត ថា មានពាក់ព័ន្ធករណី ឃាតកម្ម លោក លិម គិមយា ព្រោះកន្លងមក មានសំឡេងបែកធ្លាយរបស់លោក ហ៊ុន សែន បានបញ្ជាលោក ឃ្លាំង ហួត ឱ្យតាមធ្វើបាប មកលើសកម្មជនបក្សប្រឆាំង ដែលភៀសខ្លួននៅថៃ។
លើសពីនោះទៀត លោក សម រង្សី ថា លោក ឃ្លាំង ហួត ជាមេកើយ របស់លោក ពេជ្រ គឹមស្រ៊ិន ប៉ូលីសថៃរកឃើញថា បុគ្គលរូបនេះជាអ្នកចង្អុលបង្ហាញអត្តសញ្ញាណ លោក លឹម គិមយ៉ា ប្រាប់ទៅខ្មាន់កាំភ្លើងជនជាតិថៃ ឈ្មោះ អេកាឡាក់ ផែណយ (Ekkalak Phaenoi) Ekkalak "Sergent Em" Paenoi ឱ្យបាញ់សម្លាប់ លោក លិម គិមយា នៅទីក្រុងបាងកក កាលពីថ្ងៃទី៧ ខែ មករា។
លោក សម រង្សី បញ្ជាក់ថា នៅក្នុងសំឡេង បែកធ្លាយ កាលពីខែកញ្ញា ឆ្នាំ២០២៤ បានបង្ហាញយ៉ាងច្បាស់ ដែលលោក ហ៊ុន សែន បានបញ្ជាឱ្យលោក ឃ្លាំង ហួត តាមចាប់បញ្ជូនសកម្មជនបក្សប្រឆាំងគឺ លោក ផន ផានណា មកកម្ពុជាវិញ បើទោះបីជា «ស្លាប់ ឬ រស់» ក៏ដោយ។ នៅក្នុងសារសំឡេងនោះ លោក ហ៊ុន សែន បានណែនាំឱ្យ លោក ឃ្លាំង ហួត និងបក្ខពួក ត្រូវសហការជាមួយក្រុមអាវក្រហមថៃ ហើយមិនឱ្យពាក់ព័ន្ធនឹងប៉ូលិសថៃនោះទេ។
ឆ្លើយតបជុំវិញការចោទប្រកាន់នេះ អភិបាលរងរាជធានីភ្នំពេញ លោក ឃ្លាំង ហួត ប្រាប់វិទ្យុ អាស៊ីសេរី នៅថ្ងៃទី២៩ ខែមករាថា ការចោទប្រកាន់ និងលើកឡើងរបស់លោក សម រង្សី នេះ ជារឿងមិនពិត ហើយលោក មិនខ្វល់ចំពោះការចោទប្រកាន់ទាំងអស់នោះឡើយ។ ទន្ទឹមនឹងនោះ លោកបានច្រានចោលថា លោកមិនដែលស្គាល់ លោក លី រតនរស្មី និងលោក ពេជ្រ គឹមស្រ៊ិន ដែលប៉ូលិសថៃ ចេញដីកាចាប់ខ្លួន ពាក់ព័ន្ធឃាតកម្ម មកលើ លោក លិម គិមយ៉ា នោះដែរ។
លោក ឃ្លាំង ហួត៖ «ខ្ញុំគ្មានអ្វីទៅឆ្លើយឆ្លងជាមួយជនបីជំនាន់នោះ សូម្បីតែ អ្នកមានគុណខ្ញុំត្រកូល ហ៊ុន វាជេរប្រមាថកាតទានសឹងអី ចំណែកកម្រិតខ្ញុំត្រឹមអភិបាលរង ទៅខ្វល់ស្អី»។
រីឯ សារសំឡេងបែកធ្លាយ ដែលគេស្គាល់ថា ជាសំឡេង របស់ លោក ហ៊ុន សែន បញ្ជាឱ្យលោក ឃ្លាំង ហួត តាមចាប់សកម្មជនបក្សប្រឆាំង គឺ លោក ផន ផានណា នោះ លោកថា ជាសំឡេងក្លែងក្លាយ មិនមែនជាសំឡេង របស់ លោក ហ៊ុន សែននោះ ឡើយ។ យ៉ាងណា លោកថា ប្រសិនបើប៉ូលិសថៃ រកឃើញថា លោកមានជាប់ពាក់ព័ន្ធ ដូចការចោទប្រកាន់របស់ លោក សម រង្សី មែននោះ លោកមិនខ្លាចក្នុងការចូលខ្លួនបំភ្លឺនោះឡើយ។
លោក ឃ្លាំង ហួត៖ «អូយ!..ណែ៎ៗ ឥឡូវមើល៍ បើមាននរណាហៅខ្ញុំទៅសួរ ចម្លើយ ខ្ញុំទៅភ្លាម។ អាស៊ីសេរី ពឹងនរណាគេនៅស្រុកខ្មែរឱ្យមកតាមដានខ្ញុំមើល៍ ថាតើស្ថានភាពខ្ញុំយ៉ាងម៉េច។ ខ្ញុំទៅលេងបាលទះ ពេលខ្លះខ្ញុំដើរតែម្នាក់ឯង សប្បាយៗទេ ខ្ញុំអត់មានអីភ័យខ្លាចផង ព្រោះជាមនុស្សបរិសុទ្ធ ទៅភ័យស្អី»។
ក្រៅពីការចោទប្រកាន់របស់ សម រង្សី មកលើ លោក ឃ្លាំង ហួត ពាក់ព័ន្ធ ឃាតកម្មលើ លោក លិម គិមយ៉ា លោក សម រង្សី ក៏បានចោទប្រកាន់ លោក ឃ្លាំង ហួត ថា ជាអ្នកនៅពីក្រោយនៃការបាត់ខ្លួន សកម្មជនគាំទ្រ លោក ថាក់ស៊ីន ឈ្មោះ«វ៉ាន់ឆាឡឺម សាតស័ក្តិសិទ្ធ» ផងដែរ។ ប៉ុន្តែ លោក ឃ្លាំង ហួត បានឆ្លើយថា លោកពុំដែលស្គាល់ លោក វ៉ាន់ឆាឡឺម នោះទេ។ ចំណែក រូបភាពជាច្រើន ដែលលោកធ្លាប់ថតជាមួយ លោក វ៉ាន់ ឆាឡឺម នោះ លោកថា ដោយសារតែ លោក ជាមនុស្សមាន កេរ្តិ៍ឈ្មោះ ល្បីម្នាក់ ដូច្នេះ ការសុំថតពីអ្នកជុំវិញជារឿងធម្មតា។
ទាក់ទិនរឿងនេះ នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្ស លីកាដូ (LICADHO) លោក អំ សំអាត លើកឡើងថា ឃាតកម្មលើ លោក លិម គិមយ៉ា នេះប៉ូលិសថៃ កំពុងតែស៊ើបអង្កេត ដូច្នេះការលើកឡើងរបស់ លោក សម រង្សី យ៉ាងណានោះ គឺជារឿងមួយទៀត។ តែយ៉ាងណា លោកថា ប្រសិនបើករណីនេះ ជាប់ពាក់ព័ន្ធពលរដ្ឋខ្មែរ ហើយប៉ូលិសថៃ ស្នើសុំឱ្យមានការចាប់ខ្លួន បញ្ជូនមកប្រទេសថៃយ៉ាងណានោះ កម្ពុជាគួរតែមានការសហការ ក្នុងការចាប់បញ្ជូន ដើម្បីបន្តសំណុំរឿង។
លោក អំ សំអាត៖ «កម្ពុជាឬក៏ប្រទេសផ្សេងនោះ ត្រូវតែសហការជាមួយនឹងប្រទេសថៃ ដើម្បីបញ្ជូនមនុស្សទៅតាមការរកឃើញ របស់គេដើម្បីជាភាពយុត្តិធម៌ សម្រាប់ករណីឃាតកម្មនឹង ព្រោះនេះជារឿងសំខាន់»។
លោក ឃ្លាំង ហួត ក្រៅពីមានតួនាទីជាអភិបាលរងរាជធានីភ្នំពេញ លោកគឺជាជាសមាជិកគណៈកម្មាធិការកណ្ដាលរបស់គណបក្សប្រជាជនកម្ពុជា និងជាទីប្រឹក្សា និងជាជំនួយការផ្ទាល់ របស់លោក ហ៊ុន សែន ផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។