លោក សម រង្ស៊ី អះអាង​ថា ម៉ាឡេស៊ី​គាំទ្រ​លោក ក្នុង​ការ​ស្ដារ​លទ្ធិ​ប្រជាធិបតេយ្យ និង​សិទ្ធិមនុស្ស

ដោយ ទីន ហ្សាការីយ៉ា
2019-11-12
អ៊ីម៉ែល
មតិ
Share
បោះពុម្ព
លោក សម រង្ស៊ី ប្រធាន​ស្ដីទី​គណបក្ស​សង្គ្រោះ​ជាតិ
លោក សម រង្ស៊ី ប្រធាន​ស្ដីទី​គណបក្ស​សង្គ្រោះ​ជាតិ
រូប៖ ហ្វេសប៊ុកលោក សម រង្ស៊ី

លោក សម រង្ស៊ី ប្រធានស្ដីទីគណបក្សសង្រ្គោះជាតិ អះអាងថា ម៉ាឡេស៊ីគាំទ្រអ្នក​ប្រជាធិបតេយ្យ​ដូច​គ្នា លើ​សកម្មភាព​ការងារ​តស៊ូ ដើម្បី​ឲ្យ​មាន​ការ​គោរព​សិទ្ធិ​មនុស្ស និង​ប្រជាធិបតេយ្យ។ ការ​អះអាង​បែប​នេះ ក្រោយ​ពី​លោក សម​ រង្ស៊ី បាន​ជួប​រដ្ឋមន្រ្តី​ការ​បរទេស​ម៉ាឡេស៊ី និង​ជា​អគ្គលេខាធិការ​គណបក្ស​សម្ព័ន្ធ​ម៉ាឡេស៊ី​ផង។

នៅ​ថ្ងៃ​ទី១២ វិច្ឆិកា​នេះ លោក សម រង្ស៊ី នឹង​ចូលរួម​ប្រជុំ​ជាមួយ​តំណាងរាស្រ្ត​ម៉ាឡេស៊ី​ទៀត ដែល​នឹង​ជជែក​អំពី​មធ្យោបាយ​ឆ្ពោះ​ទៅ​មុខ​ក្នុង​ការ​ស្វែងរក​ការ​អភិវឌ្ឍន៍​សង្គម​ល្អ​បំផុត​សម្រាប់​ប្រទេស​ម៉ាឡេស៊ី (Malaysia) និង​កម្ពុជា” ។

លោក សម រង្ស៊ី បាន​បញ្ចេញ​សារ​របស់​លោក​ជា​ថ្មី​ម្ដង​ទៀត នៅ​ខណៈ​លោក​នៅ​ប្រទេស​ម៉ាឡេស៊ី ថា ផែនការ​វិល​ទៅ​កម្ពុជា​វិញ​របស់​លោក នៅ​តែ​រក្សា​ដដែល ហើយ​អំពាវនាវ​ឲ្យ​ប្រជាពលរដ្ឋ​ប្រមូល​កម្លាំង​គ្នា ដើម្បីត្រៀមវិល​ទៅ​កម្ពុជា​វិញ​ជាមួយ​លោក​នៅ​ពេល​ឆាប់ៗ ខាង​មុខ​នេះ។

លោក សម រង្ស៊ី អះអាង​ថា ទោះ​បី​ជា​លោក​មិន​បាន​ដឹក​នាំ​ពលរដ្ឋ​វិល​ទៅ​កម្ពុជា​វិញ​បាន នៅ​ថ្ងៃ​ទី៩ វិច្ឆិកា ដោយសារ​តែ​របប​លោក ហ៊ុន សែន ទប់​ស្កាត់​ក្ដី ប៉ុន្តែ​ការ​ប្ដេជ្ញា​ចិត្ត​របស់​លោក​ទៅ​កម្ពុជា​វិញ នៅ​តែ​រក្សា​ដដែល ហើយ​លោក​រំពឹង​ថា លោក នឹង​អាច​វិល​ទៅ​កម្ពុជា​វិញ​បាន​នៅ​ពេល​ឆាប់ៗ នេះ៖ «យើង​ត្រូវ​តែ​រក្សា​យើង ដែល​យើង​បាន​ប្រមូលផ្ដុំ គឺ​យើង​អត់​រំសាយ​ថា ហើយ​ខ្ញុំ​សង្ឃឹម​ថា នៅ​ពេល​មុខ​នឹង​មាន​ព្រឹត្តិការណ៍​ធំ​មួយ គឺ​ការ​ផ្លាស់ប្ដូរ​ពិត​ប្រាកដ»

លោក សម រង្ស៊ី មាន​ប្រសាសន៍​បែប​នេះ កាល​ពី​ថ្ងៃ​ទី១១ វិច្ឆិកា ក្រោយ​ពី​ជួប​លោក​រដ្ឋមន្រ្តី​ការ​បរទេស​ម៉ាឡេស៊ី លោក សៃហ្វូឌីន អាប់ឌុលឡោះ​ (Saifuddin Abdullah) និង​ជា​អគ្គលេខាធិការ​គណបក្ស​សម្ព័ន្ធ​ម៉ាឡេស៊ី ដែល​កំពុង​កាន់​អំណាច​ផង។ លោក សម រង្ស៊ី មាន​ប្រសាសន៍​ថា​ លោក​រដ្ឋមន្រ្តី​ក្រសួង​ការ​បរទេស​ម៉ាឡេស៊ី​ជួប​លោក ក្នុង​នាម​គណបក្ស និង​គណបក្ស។ ទោះ​ជា​យ៉ាង​​ណា​​លោក សម រង្ស៊ី អះអាង​ថា ម៉ាឡេស៊ីនៅតែប្រកាន់គោលការណ៍លើកស្ទួយសិទ្ធិមនុស្ស និង​ប្រជាធិបតេយ្យ៖ «មិន​មែន​រឿង កឹម សុខា ម្នាក់​ឯង និង សម រង្ស៊ី ម្នាក់​ឯង​ទេ គឺ​ត្រូវ​តែ​ដោះ​ស្រាយ​ជា​គោលការណ៍ ឲ្យ​ពលរដ្ឋ​មាន​សិទ្ធិ​សេរីភាព​ពិត​ប្រាកដក​ទាំង​អស់​គ្នា នៅ​ពេល​នោះ​វិបត្តិនយោបាយ​នឹង​ត្រូវ​បញ្ចប់»

លោក សម រង្ស៊ី នឹងទៅចូលរួមប្រជុំជាមួយតំណាងរាស្រ្តម៉ាឡេស៊ីថែមទៀតនៅថ្ងៃទី១២វិច្ឆិកានេះ តាមការអញ្ជើញរបស់តំណាងរាស្រ្តមួយរូប គឺអ្នកស្រី នូរុលអៃសះ អាន់វ៉ា (Nurul Izzah Anwar) ដែល​ជា​កូន​ស្រី​បង្កើត​របស់​លោក អាន់វ៉ា អ៊ីប្រាហ៊ីម (Nurul Izzah Anwar) ដែល​ជា​អតីត​មេ​ដឹក​នាំ​គណបក្ស​ប្រឆាំង​ដ៏​លេច​ធ្លោ​មួយ​រូប​នៅ​អាស៊ី មុន​ពេល​គណបក្ស​របស់​លោក​បាន​ដឹក​នាំ​រដ្ឋាភិបាល​បច្ចុប្បន្ន ក្រោយ​ពី​ចង​សម្ព័ន្ធ​ជាមួយ​គណបក្ស​ដទៃ​ទៀត ដែល​ដឹក​នាំ​ដោយ​លោក មហាធៀរ មហាំម៉ាត់ (Muhathir Muhammad) ដែល​ជា​នាយក​រដ្ឋមន្រ្តី​បច្ចុប្បន្ន។

ក្នុងបទសំភាសន៍ជាមួយអាស៊ីសេរីកាលពីយប់មិញ លោកសម រង្ស៊ី មិនបានប្រាប់​លម្អិត​អំពី​របៀបវារៈ​អំពីកិច្ចប្រជុំជាមួយតំណាងរាស្រ្តម៉ាឡេស៊ីនេះទេ ដោយ​លោក​គ្រាន់​តែ​បញ្ជាក់​យ៉ាង​ខ្លី​ថា លោក​នឹង​ជម្រាប​ជូន​នៅ​ថ្ងៃ​ទី១២ វិច្ឆិកា គឺ​នៅ​ក្រោយ​ពី​កិច្ច​ប្រជុំ។


ទោះបីជាយ៉ាងនេះក្ដី អ្នកស្រី នូរុលអៃសះ អាន់វ៉ា (Nurul Izzah Anwar) តំណាងរាស្រ្ត​ម៉ាឡេស៊ី ឲ្យ​កាសែត The star ដឹង​នៅថ្ងៃ​ទី១១ វិច្ឆិកា​ថា អ្នកស្រី​អញ្ជើញ​លោក​សម រង្ស៊ី និង​ភរិយា​របស់​លោក គឺ​អ្នក​ស្រី ជួឡុង ស៊ូមួរ៉ា ទៅ​ចូលរួម​ប្រជុំ​នៅ​វិមាន​រដ្ឋសភា ដែល​របៀបវារៈ ពិភាក្សា​អំពី មធ្យោបាយ​ឆ្ពោះទៅមុខក្នុងការ ការអភិវឌ្ឍន៍សង្គមល្អបំផុតសម្រាប់ប្រទេសម៉ាឡេស៊ី (Malaysia)និងកម្ពុជា

អ្នកវិភាគនយោបាយចាស់វស្សា លោក បណ្ឌិត ឡៅ ម៉ុងហៃ បាន​សរសេរ​នៅលើបណ្ដាញសង្គមហ្វេសប៊ុករបស់​លោក​ថា តំណាង​រាស្រ្ត​ម៉ាឡេស៊ី អញ្ជើញ លោក សម រង្ស៊ី ឲ្យ​ទៅ​ជួប​ប្រជុំ​ជាមួយ​សភា​ប្រទេស​ម៉ាឡេស៊ី​នេះ នៅ​ស្រប​ពេល​មាន​អន្តរាគមន៍​ពី​រដ្ឋាភិបាល និង​សមាជិក​សភា​សហរដ្ឋ​អាមេរិក អគ្គលេខាធិការ​នៃ​អង្គការ​សហប្រជាជាតិ សមាជិក​សភា​អឺរ៉ុប ដែល​ពួក​គេ​សុំ​ឲ្យ​មាន​ការ​សម្របសម្រួល ចំពោះ​ការ​វិល​ត្រឡប់​របស់ សម រង្ស៊ី មកកម្ពុជាវិញ និង​ការ​ចរចា​គ្នា អាច ជាចំណុចផ្លូវបត់ មួយ​ទៀត​នៃ​ជម្លោះ​រវាង សង្គ្រោះ​ជាតិ និង​រដ្ឋាភិបាល​កម្ពុជា។ លោក បណ្ឌិត ឡៅ ម៉ុងហៃ បន្ថែម​ថា ម៉ាឡេស៊ី ជា​ប្រទេស​ប្រជាធិបតេយ្យ​ដឹក​មុខ​គេ​នៅ​តំបន់​អាស៊ាន  ហើយ​គេ​មិន​ចាប់​លោក សម រង្ស៊ី តាម​ការ​ស្នើសុំ​របស់​រដ្ឋាភិបាល​ខ្មែរ ឬ​បដិសេធ​មិន​ឲ្យ​លោក​ចូល​ទៅ​កាន់​ដី​ម៉ាឡាស៊ី​​នោះ​​ឡើយ។

លោក បណ្ឌិត ឡៅម៉ុងហៃ បាន​សរសេរ​រំលឹក​ថា នៅ​ទសវត្ស ឆ្នាំ១៩៨២ ប្រទេស​ម៉ាឡេស៊ី ដឹក​នាំ​ដោយ​នាយករដ្ឋមន្ត្រី មហាធៀរ មហាំម៉ាត់ - Mahathir Mohamad – និង​លោក អាន់វ៉ា អ៊ីប្រាហ៊ីម (Awar Ibrahim)- ជាឧបនាយកមន្រ្តី បានជួយកម្ពុជា ក្នុងការបង្កើតរដ្ឋាភិបាលចម្រុះត្រីភាគី កម្ពុជា​ប្រជាធិបតេយ្យ (Coalition Government of Democratic Kampuchea (CGDK) ដែល​មាន​សម្តេច នរោត្តម សីហនុ ជា​ប្រធាន សម្តេច សឺន សាន ជា​នាយក​រដ្ឋមន្ត្រី និង ខៀវ សំផន ជា​រដ្ឋមន្ត្រី​ការ​បរទេស។ រដ្ឋាភិបាល​នេះ​បាន​ទទួល​ការ​គាំទ្រ​កាន់​តែ​ច្រើន​ទៅ​លើ​ឆាក​អន្តរជាតិ ក្នុង​ការ​តស៊ូ​ប្រឆាំង និង​កងទ័ព​វៀតណាម​នៅ​កម្ពុជា ។

លោក សម រង្ស៊ី អះអាងថា លោក​នឹងធ្វើការទាមទារ ឬនឹងដឹកនាំពលរដ្ឋទៅកម្ពុជា រហូត​ដល់​មាន​ការ​ផ្លាស់​ប្ដូរ​មួយ​នៅ​កម្ពុជា ដែល​ធ្វើ​ឲ្យ​កម្ពុជា​ក្លាយ​ទៅ​ជា​ប្រទេស​ប្រជាធិបតេយ្យ​ពិត​ប្រាកដ គោរព​សិទ្ធិ​មនុស្ស និង​នីតិរដ្ឋ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល