លោក សម រង្ស៊ី ប្រធានស្ដីទីគណបក្សសង្គ្រោះជាតិ បានសរសេរអះអាងជាថ្មី លើហ្វេសប៊ុករបស់លោក នៅថ្ងៃទី៦ វិច្ឆិកាថា លោកនឹងចាកចេញពីទីក្រុងប៉ារីស ប្រទេសបារាំង នៅថ្ងៃទី៧ វិច្ឆិកា ហើយនឹងទៅដល់ទីក្រុងបាងកក ប្រទេសថៃ នៅថ្ងៃទី៨ វិច្ឆិកា ដើម្បីត្រៀមទៅដល់ប្រទេសកម្ពុជានៅថ្ងៃសៅរ៍ ទី៩ ខែវិច្ឆិកានេះ។
នៅមុនការចេញដំណើររបស់លោកពីទីក្រុងប៉ារីសនេះ លោក សម រង្ស៊ី ក៏បានសរសេរលិខិតមួយច្បាប់ ជូនទៅលោក ប្រាយុទ្ធ ចាន់អូចា នាយករដ្ឋមន្ត្រីថៃ កាលពីថ្ងៃទី៣១ ខែតុលា ឆ្នាំ២០១៩។ លិខិតរបស់លោក សម រង្ស៊ី នោះ គឺសុំសិទ្ធិឆ្លងកាត់ប្រទេសថៃដោយសុវត្ថិភាព ដើម្បីចូលទៅប្រទេសកម្ពុជា តាមរយៈការចុះនៅវាលយន្តហោះសុវណ្ណភូមិ នៅទីក្រុងបាងកក នៅថ្ងៃទី៨ វិច្ឆិកា ហើយឆ្លងចូលទៅប្រទេសកម្ពុជា តាមច្រកព្រំដែនប៉ោយប៉ែត នៅថ្ងៃទី៩ វិច្ឆិកា។ លោកក៏រំឭកការដឹងគុណរដ្ឋាភិបាលថៃកាលពីឆ្នាំ២០១៣ ដែលបានអនុញ្ញាតឱ្យលោកបានឆ្លងកាត់ចូលតៅប្រទេសកម្ពុជា។
តាមរយៈសំបុត្រយន្តហោះមួយសន្លឹក ដែលអាស៊ីសេរីទទួលបាននៅព្រឹកថ្ងៃទី៦ វិច្ឆិកា បង្ហាញថា លោក សម រង្ស៊ី នឹងចេញដំណើរពីហ្សាល ដឺ ហ្គោល (Charles De Gaulle) ទីក្រុងប៉ារីស ឆ្ពោះទៅវាលយន្តហោះសុវណ្ណភូមិ ទីក្រុងបាងកក ប្រទេសថៃ តាមជើងយន្តហោះថៃ TG931។ សំបុត្រនោះបញ្ជាក់ពេលវេលាចាកចេញពីទីក្រុងប៉ារីស គឺនៅវេលាម៉ោង ១២ និង ៣០នាទី ថ្ងៃទី៧ វិច្ឆិកា ហើយនឹងចុះចតនៅវេលាម៉ោង៦ ថ្ងៃទី៨ ខែវិច្ឆិកា ឆ្នាំ២០១៩។
ទោះជាយ៉ាងណាក្ដី អាស៊ីសេរីនៅមិនទាន់បានទទួលព័ត៌មានអំពីការឆ្លើយតបរបស់រដ្ឋាភិបាលថៃនៅឡើយទេ រហូតមកដល់ពេលនេះ។
ជាហូរហែកន្លងមក និងនៅក្នុងលិខិតរបស់លោកជូនលោក ប្រាយុទ្ធ ចាន់អូចា លោក សម រង្ស៊ី តែងបញ្ជាក់ថា ការសម្រេចវិលត្រឡប់ចូលស្រុកកំណើតវិញ គឺជាជម្រើសចុងក្រោយរបស់លោក ដើម្បីរំដោះប្រទេសជាតិចេញពីរបបផ្ដាច់ការសព្វថ្ងៃ ហើយនាំមកនូវលទ្ធិប្រជាធិបតេយ្យពិតប្រាកដជូនប្រទេសកម្ពុជា។ លោកបញ្ជាក់ថា ព្រឹត្តិការណ៍មាតុភូមិនិវត្តន៍របស់លោកឆ្លងកាត់ប្រទេសថៃនោះ នឹងប្រព្រឹត្តទៅដោយសន្តិវិធី ដើម្បីជាឱកាសសម្រាប់អ្នកនយោបាយខ្មែរទាំងអស់ផ្សះផ្សារគ្នា។
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។