លោក សម រង្ស៊ី លើកឡើងថា លោក ហ៊ុន សែន កំពុងទ័លច្រកករណីកាត់ទោសលោក កឹម សុខា ពីបទក្បត់ជាតិ ។ ប៉ុន្តែអ្នកនាំពាក្យរដ្ឋាភិបាលថា អ្វីដែលលោក សម រង្ស៊ី លើកឡើង គឺគ្រាន់ចង់បញ្ចេញមតិ ដើម្បីទាញការចាប់អារម្មណ៍ តាមបណ្ដាញសារព័ត៌មានប៉ុណ្ណោះ។
ថ្លែងក្នុងពេលជួបអ្នកគាំទ្រនៅសហរដ្ឋអាមេរិកថ្ងៃទី១៥ ធ្នូ ប្រធានស្ដីពីគណបក្សសង្គ្រោះជាតិ លោក សម រង្ស៊ី លើកឡើងថា តុលាការក្រុងភ្នំពេញគ្រោងនឹងជំនុំជម្រះលោក កឹម សុខា នៅពាក់កណ្ដាលខែមករា ឆ្នាំ២០២០ ខាងមុខ ប៉ុន្តែប្រសិនរដ្ឋាភិបាលរងគំនាបខ្លាំងពីសហគមន៍អន្តរជាតិ តុលាការអាចនឹងដោះលែងលោក កឹម សុខា ដែលជាការអនុញ្ញាតឲ្យគណបក្សសង្គ្រោះជាតិដំណើរឡើងវិញ។ លោកថា ករណីនេះនឹងធ្វើឲ្យលោក ហ៊ុន សែន ជួបគ្រោះថ្នាក់បើគណបក្សសង្គ្រោះជាតិអាចដំណើរឡើងវិញ៖ «សម្ភាធអន្តរជាតិខ្លាំងតុលាការទទួលស្គាល់ថា អត់មានអ្វីកាត់ទោសទេ ព្រោះអ្វីដែលគេចោទ កឹម សុខា គ្មានមូលដ្ឋាន បើចូលចំណុចហ្នឹង លោក ហ៊ុន សែន ត្រូវចប់ របប ហ៊ុន សែន ត្រូវចប់ដោយសារដោះលែង កឹម សុខា កឹម សុខា អត់មានទោសអ្វីទេ ហើយមិនមែនត្រឹមតែដោះលែង កឹម សុខា គឺថ្នាក់ដឹកនាំគណបក្សសង្គ្រោះជាតិទាំងអស់តាមសំណើសហភាពអឺរ៉ុបពេលនេះ កឹម សុខា សម រង្ស៊ី ចាប់ដៃគ្នាឡើងវិញ»។
លោក សម រង្ស៊ី លើកឡើងទៀតថា ប្រសិនលោក ហ៊ុន សែន ជ្រើសរើសផ្លូវមួយ គឺត្រូវកាត់ទោសឲ្យលោក កឹម សុខា ឲ្យជាប់ទោសពីក្បត់ជាតិ និងស្នើទៅព្រះមហាក្សត្រ ដើម្បីលើកលែងទោសលោក កឹម សុខា គឺមិនអាចទៅរួចទេ។ លោកបញ្ជាក់ថា ការដែលចោទប្រកាន់លោក កឹម សុខា ពីបទក្បត់ជាតិ ដែលមានការឃុបឃិតជាមួយសហរដ្ឋអាមេរិក គឺតុលាការមិនអាចរកភស្តុតាងបាន ដើម្បីចោទប្រកាន់នោះទេ៖ «កឹម សុខា ក្បត់ជាតិ ជាមួយអាមេរិក ចឹងមិនត្រឹមតែកាត់ទោស កឹម សុខា ទៅកាត់ទៅទោស ដូណាល់ ត្រាំ ពីព្រោះមិនអាចកាត់ផ្ដាច់បានទេ ចឹងឲ្យទៅសួរអាមេរិកម៉េចទៅអាមេរិកថា ម៉េចទៅឃុបឃិតជាមួយជា កឹម សុខា អាមេរិកគេទះកំផ្លៀងចោទប្រកាន់គេអ៊ីចឹង។ អ៊ីចឹងបាន ហ៊ុន សែន ក៏ទ័លច្រកដែរ កុំទៅបោកបញ្ឆោតអឺរ៉ុប អាមេរិក កាត់ទោសយករួចតែខ្លួនឲ្យស្តេច លោកលើកលែងទោសនេះមិនមែនដំណោះស្រាយទេ»។
លោក សម រង្ស៊ី បញ្ជាក់ទៀតថា លោក ហ៊ុន សែន ជ្រើសផ្លូវណាក៏ជាផ្លូវគ្រោះថ្នាក់ដែរ។ លោក សម រង្ស៊ី លើកឡើងថា ការសម្រេចរបស់សហភាពអឺរ៉ុបក្នុងករណីព្យួរ ឬមិនព្យួរប្រព័ន្ធអនុគ្រោះពន្ធ EBA នឹងជះឥទ្ធិពលលើសំណុំរឿងលោក កឹម សុខា។
ទាក់ទងការលើកឡើងរបស់លោក សម រង្ស៊ី បែបនេះ អាស៊ីសេរីមិនអាចសុំកាឆ្លើយតបពីអ្នកនាំពាក្យក្រសួងយុត្តិធម៌ លោក ជិន ម៉ាលីន បានទេ នៅថ្ងៃទី១៦ ខែធ្នូ។
រីឯអ្នកនាំពាក្យរដ្ឋាភិបាល លោក ផៃ ស៊ីផាន និយាយថា ការដែលលោក សម រង្ស៊ី លើកឡើងបែបនេះជាការបញ្ចេញមតិក្នុងសតិអារម្មណ៍មិនសូវល្អ ។ លោកថា លោក សម រង្ស៊ី ប្រឹងប្រែងនិយាយក្នុងពេលនេះ គឺគ្រាន់តែចង់ទាមទារចំណាប់អារម្មណ៍ពីប្រព័ន្ធផ្សព្វផ្សាយ៖ « គាត់ ( លោក សម រង្ស៊ី ) ចេះបញ្ចេញមតិតាមតែគាត់យល់ឃើញប្រើប្រាស់សំឡេងគាត់តាមប្រព័ន្ធសារព័ត៌មានតែប៉ុណ្ណឹង នេះជាយុទ្ធនាការឃោសនា ដើម្បីឲ្យគេចាប់អារម្មណ៍ ព្រោះលោកបរាជ័យពីរដងយ៉ាងធំៗ » ។
សាលាដំបូងរាជធានីភ្នំពេញនឹងបើកសវនាការសំណុំរឿងមេដឹកនាំបក្សប្រឆាំងលោក កឹម សុខា ករណីចោទពីបទសន្ទិដ្ឋភាពជាមួយបរទេស ឬឃុបឃិតជាមួយបរទេសនៅថ្ងៃទី១៥ ខែមករា ឆ្នាំ២០២០ វេលាម៉ោង ៨ និង ៣០នាទីព្រឹក។
ទោះជាយ៉ាងណា ក្រុមមេធាវីលោក កឹម សុខា ទាមទារឱ្យទម្លាក់ការចោទប្រកាន់កូនក្តីរបស់ខ្លួន ដោយលើកហេតុផលថា គ្មានភស្តុតាងបញ្ជាក់ថា លោក កឹម សុខា បានប្រព្រឹត្តដូចការចោទប្រកាន់ឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។