លោក សម រង្ស៊ី ប្រធានស្ដីទីគណបក្សសង្គ្រោះជាតិ បានដឹកនាំគណៈប្រតិភូគណបក្សប្រឆាំង ទៅចូលរួមប្រជុំនៅសភាអឺរ៉ុប នៅទីក្រុងប្រ៊ុចសែល ប្រទេសបែលហ្សិក នៅថ្ងៃទី២៦ មិថុនា។ លោក ថ្លែងប្រាប់សភាអឺរ៉ុបថា វាសនារបស់ពលរដ្ឋកម្ពុជាល្អ ឬអាក្រក់ គឺស្ថិតនៅលើកណ្ដាប់ដៃរបស់លោក ហ៊ុន សែន ដែលលោកបានបំផ្លាញប្រជាធិបតេយ្យ រំលោភសិទ្ធិមនុស្ស និងរំលាយគណបក្សប្រឆាំង។
លោក សម រង្ស៊ី អំពាវនាវពីទីក្រុងប្រ៊ុចសែលតាមរយៈវីដេអូផ្សាយផ្ទាល់ នៅលើហ្វេសប៊ុកផេករបស់លោក ឱ្យពលរដ្ឋត្រៀមខ្លួនធ្វើបាតុកម្ម ងើបតវ៉ា តតាំងនិងមេដឹកនាំរបបក្រុងភ្នំពេញ បើសិនជាលោក ហ៊ុន សែន មិនព្រមអនុវត្តតាមសហគមន៍អឺរ៉ុប នៅពេលខាងមុខទេនោះ។ លោកបញ្ជាក់ថា ដំណោះស្រាយនយោបាយ គ្មានអ្វីពិបាកទេ គឺគ្រាន់តែលោក ហ៊ុន សែន គោរពតាមលក្ខខ័ណ្ឌរបស់សហភាពអឺរ៉ុប ទៅលើគោលការណ៍គោរពសិទ្ធិមនុស្ស ប្រជាធិបតេយ្យ សិទ្ធិដីធ្លី និងដោះលែងអ្នកជាប់ឃុំដោយសារតែរឿងនយោបាយទាំងអស់នោះ គឺជាការស្រេច ហើយអ្វីៗនឹងប្រសើរឡើង ទាំងនយោបាយ សេដ្ឋកិច្ច និងសន្តិសុខសង្គមជាដើម។ «»
អាស៊ីសេរីមិនអាចទាក់ទងអ្នកនាំពាក្យរដ្ឋាភិបាល ដើម្បីសុំការឆ្លើយតប ចំពោះការលើកឡើងរបស់លោក សម រង្ស៊ី នេះ បាននៅឡើយទេ នៅមុនការផ្សាយនេះ។
លោក សម រង្ស៊ី ទៅចូលរួមកិច្ចប្រជុំសភាអឺរ៉ុបនេះ នៅស្របពេលសហភាពអឺរ៉ុបនឹងបិទបញ្ចប់ដំណើរការតាមដាន និងវាយតម្លៃស្ថានការណ៍កម្ពុជា នៅពាក់កណ្ដាលខែសីហាខាងមុខ។ បន្ទាប់ពីនេះ សហភាពអឺរ៉ុបនឹងចេញរបាយការណ៍ស្ដីពីរបកគំហើញ និងធ្វើសេចក្ដីសន្និដ្ឋាននៅខែវិច្ឆិកា។ពេលនោះ សហភាពអឺរ៉ុបនឹងទុកពេល ១ខែ ឱ្យរបបលោក ហ៊ុន សែន ដើម្បីឆ្លើយតបនឹងរបាយការណ៍នេះ។ នៅខែកុម្ភៈ ឆ្នាំ២០២០ សហភាពអឺរ៉ុបនឹងសម្រេចចិត្តជាចុងក្រោយថា ត្រូវដក ឬរក្សាទុកប្រព័ន្ធអនុគ្រោះពន្ធនេះ ហើយបើអឺរ៉ុបសម្រេចដកហូតមែន នោះការយកពន្ធលើទំនិញកម្ពុជានឹងត្រូវចាប់ផ្ដើមជាផ្លូវការនៅខែសីហា ឆ្នាំ២០២០ ខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។