រដ្ឋសភាអាមេរិក បានអនុម័តច្បាប់ H.R 526 នៅព្រឹកថ្ងៃអង្គារ ទី១៦ ខែកក្កដានេះ ដើម្បីដាក់ទណ្ឌកម្មលោក ហ៊ុន សែន និងមន្ត្រីរបបនេះ ដែលចូលដៃក្នុងការរំលោភសិទ្ធិមនុស្ស និង ប្រជាធិបតេយ្យធ្ងន់ធ្ងរនៅកម្ពុជា។
សមាជិកសភាអាមេរិកលោក ថិត យ៉ូហូ (Ted Yoho) ដែលជាអ្នកផ្ដួចផ្ដើមស្នើច្បាប់នេះជាថ្មី ថ្លែងនៅក្នុងសេចក្ដីថ្លែងការណ៍ នៅព្រឹកថ្ងៃទី១៦ ខែ កក្កដានេះ ថា ច្បាប់ស្ដីពីប្រជាធិបតេយ្យនៅកម្ពុជា ឆ្នាំ ២០១៩ នេះ នឹងវាយបកទៅរបបលោក ហ៊ុន សែន ចំពោះការបំផ្លាញប្រជាធិបតេយ្យ និងរំលោភសិទ្ធិមនុស្ស ដោយដាក់ទណ្ឌកម្មផ្នែកហិរញ្ញវត្ថុ និងបិទទិដ្ឋាការចំពោះមន្ត្រីទាំងនោះ។
លោក ថិត យ៉ូហូ បន្ថែមថា លោកសង្ឃឹមយ៉ាងមុតមាំថា ច្បាប់ដែលគាំទ្រដោយបក្សទាំងពីរក្នុងរដ្ឋសភានេះ នឹងត្រូវបញ្ជូនទៅព្រឹទ្ធសភាដើម្បីអនុម័ត និងបន្ទាប់មកប្រធានាធិបតីចុះហត្ថលេខា ដើម្បីប្រកាសឱ្យចូលជាធរមាន។ លោកថា ដល់ពេលដែលត្រូវចាត់ការរបបលោក ហ៊ុន សែន ឱ្យទទួលខុសត្រូវ ចំពោះទង្វើរំលោភសិទ្ធិមនុស្ស និងបំផ្លាញប្រជាធិបតេយ្យធ្ងន់ធ្ងរហើយ។
តើច្បាប់នេះ នឹងមានប្រសិទ្ធភាព ក្នុងការដាក់ទណ្ឌកម្មលោក ហ៊ុន សែន និងមន្ត្រីរបបនេះឬទេ? តើកម្ពុជានឹងខាតបង់អ្វីខ្លះ បើច្បាប់នេះចូលជាធរមាន?
សូមលោកអ្នកនាង រង់ចាំស្ដាប់វេទិកាអ្នកស្ដាប់អាស៊ីសេរី នៅយប់ថ្ងៃអង្គារ ទី ១៦ ខែ កក្កដា នេះ ចាប់ពីម៉ោង ៧:៣០ ដល់ ៨:៣០ ដែលនឹងពិភាក្សាលម្អិតបន្ថែមលើប្រធានបទនេះ។
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។