ស្ថាបនិកគណបក្សបេះដូងជាតិលោក សៀម ភ្លុក ថាលោកបានត្រៀមមេធាវី និងភស្តុតាងដោះបន្ទុកគ្រប់គ្រាន់ហើយ ដើម្បីឆ្លើយបំភ្លឺជុំវិញបទចោទក្លែងបន្លំស្នាមមេដៃ។ ការអះអាងនេះ ធ្វើឡើងតបទៅនឹងដីកាកោះរបស់ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញលោក សេង ហៀង ដែលឲ្យលោក សៀម ភ្លុក ចូលទៅបំភ្លឺនៅតុលាការនៅថ្ងៃទី២២ ខែមីនា ខាងមុខ។
ទោះបីជាលោកមិនទាន់បានទទួលដីកាពីតុលាការជាផ្លូវការយ៉ាងណាក្ដី ក៏ស្ថាបនិកគណបក្សបេះដូងជាតិលោក សៀម ភ្លុក ប្រាប់វិទ្យុអាស៊ីសេរី កាលពីយប់ថ្ងៃទី ៦ ខែមីនា ថាលោកបានត្រៀមខ្លួនរួចរាល់អស់ទៅហើយ ដើម្បីតតាំងរឿងក្ដីនេះ។
មិនត្រឹមតែត្រៀមខ្លួនរួចរាល់នោះទេ លោកថែមទាំងមានសង្ឃឹមយ៉ាងមុតមាំថា នឹងឈ្នះក្តីនេះទៀតផង។ ប៉ុន្តែនៅក្នុងប្រព័ន្ធតុលាការ ដែលរងឥទ្ធិពលពីបក្សកាន់អំណាចបែបនេះ លោកថាលោកមិនមែនឈ្នះក្តីក្នុងតុលាការទេ គឺឈ្នះក្តីលើសមានចិត្តពីពលរដ្ឋ៖ «អ្វីៗវាអាស្រ័យលើការសម្រេចចិត្តរបស់តុលាការ ព្រោះតុលាការយើងដឹងស្រាប់ហើយ គាត់ស្ថិតក្រោមគំនាបគណបក្សកាន់អំណាច អ៊ីចឹងការសម្រេចចិត្តរបស់គាត់ ទោះបីជាយើងមានភ័ស្តុតាងដាក់បន្ទុកមាំទាំយ៉ាងណា មានហេតុផលយ៉ាងណា ពេលដែលគាត់សម្រេចចិត្តយ៉ាងណាហើយ នោះយើងត្រូវតែទទួលយកតាមហ្នឹង ! ទោះបីមិនឈ្នះលើក្រដាស ប៉ុន្តែយើងអាចឈ្នះទឹកចិត្តឈ្នះមតិជាតិនិងអន្តរជាតិ។ ប្រហែលជាគេមិនយល់ព្រមតាមសេចក្តីសម្រេចរបស់តុលាការដែរនៅពេលខ្លះ» ។
បណ្តឹងប្តឹងចោទប្រកាន់លោក សៀម ភ្លុក ពីបទក្លែងបន្លំស្នាមមេដៃនេះ ធ្វើឡើងក្រោយពីលោកបានដាក់ពាក្យប្តឹងទៅតុលាការកំពូល ប្តឹងទាស់សេចក្តីសម្រេចរបស់ក្រសួងមហាផ្ទៃដែលបានបដិសេធសំណើសុំចុះឈ្មោះគណបក្សបេះដូងជាតិ ទៅក្នុងបញ្ជីគណបក្សនយោបាយ។ ប៉ុន្តែ តុលាការកំពូល កាលពីចុងឆ្នាំ២០២១ បានសម្រេចតាមក្រសួងមហាផ្ទៃដដែល និងបិទផ្លូវតវ៉ា។ កាលណោះ អ្នកនាំពាក្យក្រសួងមហាផ្ទៃលោក ខៀវ សុភ័គ ធ្លាប់ព្រមានលោក សៀម ភ្លុក តាមសារព័ត៌មានក្នុងស្រុក(រស្មីកម្ពុជា) ថាបើក្រសួងមហាផ្ទៃប្ដឹងវិញ ប្រយ័ត្នជាប់គុក។
វិទ្យុអាស៊ីសេរី មិនអាចសុំការបំភ្លឺបន្ថែមពីលោក ខៀវ សុភ័គ បាននៅឡើយទេ កាលពីថ្ងៃទី៦ ខែមីនា ដោយសារទូរស័ព្ទចូលច្រើនដង គ្មានអ្នកទទួល។
ក្រសួងមហាផ្ទៃ កាលពីថ្ងៃទី២ ខែមីនា បានប្រកាសលុបឈ្មោះគណបក្សបេះដូងជាតិ ចេញពីបញ្ជីគណបក្សនយោបាយ ដោយអះអាងថាការលុបឈ្មោះនេះ គឺធ្វើឡើងតាមបទបញ្ញត្តិនៃច្បាប់ស្តីពីគណបក្សនយោបាយ និងក្រោយសេចក្តីសម្រេចបិទផ្លូវតវ៉ារបស់តុលាការកំពូល។ មូលហេតុនៃការលុបឈ្មោះគណបក្សបេះដូងជាតិនេះ គឺក្រសួងមហាផ្ទៃអះអាងថា មានភ័ស្តុតាងបង្ហាញថាគណបក្សនេះ ប្រព្រឹត្តខុសច្បាប់ក្នុងដំណើរការដាក់ពាក្យសុំចុះបញ្ជីគណបក្ស ដោយមានការផ្ដិតមេដៃជំនួស ក្លែងបន្លំអត្តសញ្ញាណបុគ្គល ការផ្ដិតមេដៃធ្វើឲ្យខូចគុណភាពដើម្បីបង្កើនចំនួនអ្នកគាំទ្រ និងលក្ខន្តិកៈបក្សផ្ទុយនឹងច្បាប់ស្ដីពីគណបក្សនយោបាយជាដើម។
ប៉ុន្តែលោក សៀម ភ្លុក ថាការលើកឡើងរបស់ក្រសួងមហាផ្ទៃនេះ គឺមានចរិតនយោបាយ ក្នុងការធ្វើទុក្ខបុកម្នេញ និងជាលេសមិនចង់ចុះបញ្ជីគណបក្សបេះដូងជាតិ ដែលលោកថាជាគណបក្សប្រឆាំងមួយដែរតែប៉ុណ្ណោះ។
លោកថា ការប្តឹងបកមកលោកវិញបែបនេះ គឺជារូបភាពគំរាមកំហែងបន្ថែមទៀត និងមិនចំណេញអ្វីទាំងអស់ដល់កម្ពុជា។ លោក សៀម ភ្លុក ថាដើម្បីប្រយោជន៍ជាតិ និងមុខមាត់កម្ពុជា លោកស្នើឲ្យតុលាការទម្លាក់បទចោទប្រកាន់នេះជាបន្ទាន់ និងដោយឥតលក្ខខណ្ឌ៖ «ខ្ញុំជឿថា ការគំរាមកំហែង ធ្វើទុក្ខបុកម្នេញមកលើរូបខ្ញុំ ដែលជាតំណាងស្ថាបនិកនៃគណបក្សនយោបាយមួយ វាអត់បានចំណេញអ្វីដល់បក្សកាន់អំណាចនោះទេ។ ផ្ទុយទៅវិញវាបានតែការរិះគន់ និងការចម្អកឡកឡឺយពីមហាជន ពីខ្ញុំក៏អត់បានទៅធ្វើអ្វីខុសច្បាប់ ឬទៅប្រព្រឹត្តអ្វីបង្កឧក្រិដ្ឋកម្ម បង្កព្យសនកម្មសង្គម ធ្វើឲ្យប៉ះពាល់ដល់ប្រយោជន៍សង្គម វាអត់។ អានេះយើងតស៊ូមតិទៅតាមច្បាប់» ។
បើទោះបីជាគ្មានគណបក្សបេះដូងជាតិក៏ដោយក៏លោក សៀម ភ្លុក ជឿថាមន្រ្តីនិងសកម្មជនគណបក្សនេះ នឹងនាំគ្នាទៅចូលរួមជីវភាពនយោបាយជាមួយគណបក្សភ្លើងទៀនដែលលោកថា ជាគណបក្សប្រឆាំងធំមួយដែលមានលទ្ធភាពតតាំងនឹងគណបក្សកាន់អំណាចបាននៅក្នុងការបោះឆ្នោតនាពេលខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។