ប្រជាពលរដ្ឋមួយចំនួននៅខេត្តបន្ទាយមានជ័យរិះគន់អាជ្ញាធរខេត្ត ដែលបានហាមឃាត់មន្ត្រីក្រោមឱវាទ មិនឱ្យសុំច្បាប់សម្រាកចេញទៅក្រៅប្រទេសចាប់ពីចុងខែតុលានេះដល់ថ្ងៃទី១៣ វិច្ឆិកាខាងមុខ។ ពលរដ្ឋថា នេះជាការកៀរគរមន្ត្រីដើម្បីត្រៀមទប់ស្កាត់ពលរដ្ឋទៅចូលរួមអមដំណើរថ្នាក់នាំគណបក្សប្រឆាំងធ្វើមាតុភូមិនិវត្តន៍នៅពេលខាងមុខ។
ពលរដ្ឋនៅខេត្តបន្ទាយមានជ័យលើកឡើងថា ស្រដៀងគ្នាថា មន្ត្រីរាជការនិងប្រជាពលរដ្ឋមិនពេញចិត្តចំពោះបម្រាមរបស់អាជ្ញាធរខេត្ត ដែលមិនអនុញ្ញាតឱ្យមន្ត្រីរាជការក្រោមឱវាទចេញទៅក្រៅប្រទេស អំឡុងពេលនៃការគ្រោងវិលត្រឡប់មកកម្ពុជាវិញរបស់ លោក សម រង្ស៊ី។
ប្រជាពលរដ្ឋនៅក្រុងសិរីសោភ័ណម្នាក់ថ្លែងសុំមិនឱ្យបញ្ចេញឈ្មោះ ដើម្បីការពារសុវត្ថិភាពផ្ទាល់ខ្លួនឱ្យដឹងនៅថ្ងៃទី២៧ តុលាថា ស្ថានការណ៍នៅក្នុងស្រុកកាន់តែតឹងតែងហើយ ទើបបានជាអាជ្ញាធរហាមមន្ត្រីគ្រប់ស្ថាប័នក្នុងខេត្តនេះមិនឱ្យសុំច្បាប់សម្រាកចេញទៅក្រៅប្រទេស។ ពលរដ្ឋរូបនេះយល់ថា ការធ្វើបែបនេះបានប៉ះពាល់ដល់សិទ្ធិសេរីភាពរបស់មន្ត្រីតូចតាច ដូចជាកូនរបស់លោកជាដើម ដែលមានគម្រោងចង់ទៅលេងក្រៅប្រទេស ប៉ុន្តែត្រូវផ្អាកទៅវិញ ព្រោះរងសំពាធពីមន្ត្រីថ្នាក់លើ៖ «ខ្ញុំនិយាយជាអាជ្ញាកណ្ដាល បើមិនឱ្យច្បាប់ឈប់ទេវា ប៉ះពាល់សតិអារម្មណ៍ហើយ ព្រោះពីដើមមកអ្នកណាចង់ឈប់ៗទៅ។ ឥឡូវនេះសូម្បីតែសិស្សមិនទាន់បានចូលរៀនផង ព្រោះអីវាយោងទៅតាមសភាពការណ៍សព្វថ្ងៃ ហើយការធ្វើបែបនេះវាខុសប្រក្រតី។ ធម្មតាក្មេងតែភ្ជុំហើយចូលកងវិញហើយ តែនេះមិនទាន់បានចូលផង គឺថ្ងៃទី១១វិច្ឆិកាបានចូលរៀន » ។
លោកបន្ថែមទៀតថា ប្រជាពលរដ្ឋនិងមន្ត្រីរាជការជាច្រើននាក់នៅក្នុងខេត្តបន្ទាយមានជ័យមិនពេញចិត្តនឹងបទបញ្ជារបស់អាជ្ញាធរខេត្តនោះទេ។ លោកបន្តថា ការហាមឃាត់នេះ អាចដោយសារអាជ្ញាធរព្រួយបារម្ភខ្លាចលោក សម រង្ស៊ី ធ្វើមាតុភូមិនិវត្តន៍តាមព្រំដែនកម្ពុជាថៃក្នុងខេត្តបន្ទាយមានជ័យ ទើបបានជាអាជ្ញាធរត្រៀមមន្ត្រី ដើម្បីទប់ស្កាត់ប្រជាពលរដ្ឋទៅទៅទទួលថ្នាក់ដឹកនាំគណបក្សប្រឆាំង។
ចំណែកពលរដ្ឋនៅខេត្តបន្ទាយមានជ័យម្នាក់ទៀតដែលសុំមិនឱ្យបញ្ចេញឈ្មោះដែរនោះថ្លែងថា បទបញ្ជារបស់អាជ្ញាធរខេត្តនេះ គឺជារឿងនយោបាយធ្វើឡើងដើម្បីផ្គាប់ចិត្តចៅហ្វាយនាយរបស់ខ្លួនគឺលោក ហ៊ុន សែន ដើម្បីទប់ស្កាត់មន្ត្រីរាជការមិនឱ្យទៅចូលរួមស្ដារប្រជាធិបតេយ្យជាមួយថ្នាក់ដឹកនាំគណបក្សប្រឆាំងនៅថ្ងៃទី៩ វិច្ឆិកាខាងមុខ៖ «ខ្ញុំយល់ថាវាខ្លាចប្រជាពលរដ្ឋក៏ដូចជាមន្ត្រីរាជការ និងកងកម្លាំងប្រដាប់អាវុធទទួលលោកសម រង្ស៊ី ត្រឡប់មកកម្ពុជា។ ខ្ញុំយល់ឃើញថាការត្រឡប់មកកម្ពុជាគឺជាការត្រឹមត្រូវ វាមិនមានអីខុសច្បាប់ទេ ព្រោះអ្នកដែលខុសច្បាប់គឺមានតែរបបក្រុងភ្នំពេញជាអ្នកខុសច្បាប់ខ្លាំងមែនទែន » ។
ប្រតិកម្មរបស់ប្រជាពលរដ្ឋនេះ ដោយសារអាជ្ញាធរខេត្តបន្ទាយមានជ័យបានចេញសេចក្ដីប្រកាសហាមឃាតមន្ត្រីគ្រប់ស្ថាប័ន អភិបាលស្រុក និងមេឃុំ ចៅសង្កាត់ នៅក្នុងខេត្តនេះ មិនឱ្យសុំច្បាប់ឈប់សម្រាក និងការធ្វើដំណើរចេញទៅក្រៅប្រទេសចាប់ពីថ្ងៃទី២៤ តុលា រហូតដល់ថ្ងៃទី១៣ វិច្ឆិកា ខាងមុខ។ អភិបាលខេត្តបន្ទាយមានជ័យ លោក អ៊ុំ រាត្រី បញ្ជាក់នៅក្នុងលិខិតជូនដំណឹងចុះថ្ងៃទី២៤តុលាថា ក្រសួងមហាផ្ទៃមិនអនុញ្ញាតច្បាប់ឱ្យមន្ត្រីទាំងឡាយឈប់សម្រាកចាប់ពីថ្ងៃជូនដំណឹងនេះទៅ លើកឡើងតែករណីមានជំងឺធ្ងន់ធ្ងរប៉ុណ្ណោះទើបអនុញ្ញាតឱ្យឈប់សម្រាកបាន។
នាយកប្រតិបត្តិអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ ថ្លែងថា បទបញ្ជារបស់អាជ្ញាធរខេត្តនេះ ជាការរឹតត្បិតសិទ្ធិ សេរីភាពរបស់មន្ត្រីរាជការដោយខុសច្បាប់។ លោកបញ្ជាក់ថា អាជ្ញាធរអាចហាមឃាត់មន្ត្រីមិនឱ្យឈប់សម្រាកបាន លុះត្រាតែប្រទេសមានភាពចលាចល និងស្ថិតក្នុងភាពអាសន្នប៉ុន្តែនៅកម្ពុជាមិនដល់ថ្នាក់ ដែលត្រូវអនុវត្តបែបនេះនៅឡើយទេ៖ «អីចឹងខ្ញុំយល់ថានេះវាគ្រាន់លិខិតមួយរបស់អាជ្ញាធរខេត្តបន្ទាយមានជ័យតែ ព្រោះតាមច្បាប់វិធានការណ៍អភិបាលខេត្តមិនអាចប្រឆាំង ឬធ្វើឱ្យប៉ះពាល់ដល់ខ្លឹមសារកំពូលរបស់ជាតិបានទេ។ អ៊ីចឹងខ្ញុំយល់ថា វិធានការណ៍បែបនេះ វានឹងមិនមានប្រសិទ្ធភាព ហើយក៏ វាមិនតំណាងឱ្យជាតិទាំងមូលដែរ » ។
ទោះជាយ៉ាងណាប្រជាពលរដ្ឋមួយចំនួននៅខេត្តបន្ទាយមានជ័យ ថ្លែងថា បើទោះបីជាលោកអភិបាលខេត្តខំរឹតបន្តឹងមន្ត្រីក្រោមឱវាទយ៉ាងណាក៏ដោយ ក៏មិនអាចទប់ស្កាត់កម្លាំងប្រជាពលរដ្ឋទៅអមដំណើរលោក សម រង្ស៊ី វិលចូលស្រុកវិញបានដែរ។ពួកគាត់បន្ថែមថា មួយរយៈចុងក្រោយនេះ ពលរដ្ឋនៅក្នុងស្រុកតាមដានស្ថានការណ៍នយោបាយស្រុកទេសយ៉ាងដិតដល់ ហើយពួកគេចង់ឱ្យលោក សម រង្ស៊ី ធ្វើមាតុភូមិនិវត្តន៍ឱ្យបានឆាប់កាន់តែល្អ ដើម្បីរួមគ្នាស្ដារប្រជាធិបតេយ្យនៅកម្ពុជាឱ្យបានឆាប់ ដោយមានគណបក្សសង្គ្រោះជាតិចូលរួមការបោះឆ្នោតដោយសេរីត្រឹមត្រូវ និងយុត្តិធម៌ឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។