អង្គការ​សង្គម​ស៊ីវិល​ចំនួន​៣ បដិសេធ​ចូល​រួម​កិច្ច​ពិភាក្សា​តាម​ការ​កោះ​ហៅ​ពី​របប​ក្រុង​ភ្នំពេញ

ដោយ ហេង រស្មី
2019-09-11
អ៊ីម៉ែល
មតិ
Share
បោះពុម្ព
ចំណងជើង​នៃ​របាយការណ៍​របស់​អង្គការ លីកាដូ សមាគម​ធាង​ត្នោត​ និង​អង្គការ​តម្លាភាព​កម្ពុជា ស្ដីពី​បំណុល​មីក្រូហិរញ្ញវត្ថុ។
ចំណងជើង​នៃ​របាយការណ៍​របស់​អង្គការ លីកាដូ សមាគម​ធាង​ត្នោត​ និង​អង្គការ​តម្លាភាព​កម្ពុជា ស្ដីពី​បំណុល​មីក្រូហិរញ្ញវត្ថុ។
រូប៖ ហ្វេសប៊ុក​សមាគម​ធាងត្នោត

គណៈ​គ្រប់​គ្រង​អង្គការ លីកាដូ សមាគម​ធាង​ត្នោត​ និង​អង្គការ​តម្លាភាព​កម្ពុជា​បាន​បដិសេធ​ចូល​រួម​កិច្ច​ពិភាក្សា​ចង្អៀត​នៅ​ទីស្ដីការ​គណៈរដ្ឋមន្ត្រី។

នៅ​ក្នុង​លិខិត​របស់​អង្គការ លីកាដូ​ និង​ សមាគម​ធាង​ត្នោត​ចេញនៅថ្ងៃទី១០ កញ្ញាបាន​បញ្ជាក់​ថា​ ការ​មិន​ចូល​រួម​ប្រជុំ​សារ​ជា​ថ្មី​នេះ ដោយ​សារ​តែ​មិន​មាន​អ្វី​ត្រូវ​បកស្រាយ​ និង​ពន្យល់​បន្ថែម​ទៀត​ ហើយ​សូម​តម្កល់​នូវ​ការ​ពន្យល់​របស់​តំណាង​អង្គការ​ដែល​បាន​បកស្រាយ​នៅ​ក្នុង​កិច្ច​ពិភាក្សា​ចង្អៀត​កាល​ពី​ថ្ងៃ​ទី៤ កញ្ញា​កន្លង​ទៅ។

ចំណែក​អង្គការ​តម្លាភាព​កម្ពុជា​បាន​លើក​យក​ហេតុ​ផល​ថា​ ការ​មិន​ចូល​រួម​នៅ​ក្នុង​កិច្ច​ពិភាក្សា​នេះ​គឺ​ដោយ​សារ​តែ​លោក ព្រាប កុល កំពុង​ជាប់​រវល់​បំពេញ​បេសកកម្ម​អន្តរជាតិ​នៅ​ទ្វីប​អឺរ៉ុប។

អង្គភាព​អ្នក​នាំ​ពាក្យ​រដ្ឋាភិបាល​បាន​ចេញ​លិខិត​កោះ​អញ្ជើញ​ដាច់​ដោយ​ឡែកៗ ពី​គ្នា​កោះ​ហៅ​គណៈ​គ្រប់គ្រង​អង្គការ លីកាដូ និង​ សមាគម​ធាង​ត្នោត​ឲ្យ​មក​ជជែក​រឿង​ស្ថានភាព​មីក្រូ​ហិរញ្ញវត្ថុ​បន្ទាប់​ពី​ការ​ជជែក​គ្នា​មិន​ដាច់​ស្រេច​កាល​ពី​សប្ដាហ៍​មុន។​ ចំណែក​ឯ​អង្គការ​តម្លាភាព​កម្ពុជា​ឲ្យ​មក​ពិភាក្សា​លើ​អត្ថបទ​ដែល​មាន​ចំណង​ជើង​ថា «ចំណុច​ស្ដីពី​ការ​សម្រេច​ចិត្ត​ដ៏​សំខាន់​ ដែល​ត្រូវ​ធ្វើ​សម្រាប់​កម្ពុជា» ដែល​កិច្ច​ប្រជុំ​នេះ​ធ្វើ​នៅ​ទីស្ដីការ​គណៈរដ្ឋមន្ត្រី​នៅ​ថ្ងៃ​ទី១១ កញ្ញា។

ឆ្លើយ​តប​ចំពោះ​ការ​បដិសេធ​នេះ​អង្គភាព​អ្នក​នាំ​ពាក្យ​រាជ​រដ្ឋាភិបាល​បាន​ចេញ​សេចក្ដី​ថ្លែង​ការណ៍​មួយ​ដោយ​បាន​សំដែង​ការ​សោក​ស្ដាយ ចំពោះ​ការ​ច្រាន​ចោល​ភាព​ជា​ដៃគូ​របស់​អង្គការ​ទាំង​បី គឺ​អង្គការ​តម្លាភាព​កម្ពុជា អង្គការ លីកាដូ និង​សមាគម​ធាង​ត្នោត តាម​រយៈ​កិច្ច​ប្រជុំ​សន្ទនា​ផ្ទៃ​ក្នុង​រវាង​ស្ថាប័ន​ជំនាញ​រដ្ឋាភិបាល។

របប​ក្រុង​ភ្នំពេញ​បាន​ចោទ​ប្រកាន់​អង្គការ លីកាដូ និង​សមាគម​ធាងត្នោត​ថា​​មិន​បាន​បង្ហាញ​នូវ​សុចរិត​ភាព​របស់​ខ្លួន​ពាក់ព័ន្ធ​នឹង​របាយការណ៍ ដែល​បាន​ចោទ​ប្រកាន់​ថា​ មាន​ប្រជាពលរដ្ឋ​ខ្មែរ​ប្រមាណ​ជាង ២លាន​នាក់​កំពុង​ជំពាក់​បំណុល​មីក្រូហិរញ្ញវត្ថុ​វ័ណ្ឌក។

អ្នកនាំពាក្យ​រដ្ឋាភិបាល​លោក ផៃ ស៊ីផាន បញ្ជាក់​ថា លោក​មាន​ការ​ខក​ចិត្ត​ចំពោះ​ការ​បដិសេធ​នេះ​តែ​ទោះ​ជា​យ៉ាង​ណា​លោក​បញ្ជាក់​ថា រដ្ឋាភិបាល​នឹង​ពិចារណា​ថា តើ​នឹង​ដោះ​ស្រាយ​យ៉ាង​ណា​ចំពោះ​អង្គការ​សមាគម​ទាំង​បី​នេះ​ទៅ​ពេល​ខាង​មុខ៕

(គំនូស​បង្ហាញ​អំពី​វដ្ដបំណុល​នៃ​កម្ចី​ពី​មេក្រូ​ហិរញ្ញវត្ថុ)

 

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល