លោក វ៉ា គឹមហុង បដិសេធ​ព័ត៌មាន​ថា កម្ពុជា​ប្រែប្រួល​ផែនទី​នៅ​តំបន់​កន្ទុយ​នាគ​ខេត្ត​រតនគិរី

ដោយ អាស៊ីសេរី
2019-11-11
អ៊ីម៉ែល
មតិ
Share
បោះពុម្ព
បង្គោល​ព្រំ​ដែន​លេខ​ ០០​ ឋិត​ក្នុង​ចន្លោះ​ប្រទេស​ឡាវ​ វៀតណាម​ និង​កម្ពុជា​ នៅ​តំបន់​កន្ទុយ​នាគ​ក្នុង​ខេត្តរតនគិរី កាល​ពី​ថ្ងៃ​ទី៣១ ខែតុលា ឆ្នាំ២០១៨។
បង្គោល​ព្រំ​ដែន​លេខ​ ០០​ ឋិត​ក្នុង​ចន្លោះ​ប្រទេស​ឡាវ​ វៀតណាម​ និង​កម្ពុជា​ នៅ​តំបន់​កន្ទុយ​នាគ​ក្នុង​ខេត្តរតនគិរី កាល​ពី​ថ្ងៃ​ទី៣១ ខែតុលា ឆ្នាំ២០១៨។
រូប៖ ហ្វេសប៊ុក​ស្នងការដ្ឋាន​នគរបាល​ខេត្តរតនគិរី

ទេស​រដ្ឋមន្ត្រី​ទទួល​បន្ទុក​បេសកកម្ម​ពិសេស​កិច្ចការ​ព្រំដែន​ លោក​ វ៉ា​ គឹ​មហុង​ បដិសេធ​ចំពោះ​ព័ត៌មាន​ដែល​ផ្សាយ​ថា​ កម្ពុជា​បាត់បង់​ទឹកដី​មួយ​ផ្នែក​ នៅ​តំបន់​កន្ទុយ​នាគ​ ក្នុង​ខេត្តរតនគិរី​ មកទល់​នឹង​ខេត្តមណ្ឌលគិរី​។ លោក​អះអាង​ថា​ ផែនទី​ដែល​កម្ពុជា​ ប្រើប្រាស់​ផ្លូវការ​ ជា​ផែនទី​ របស់​ក្រុម​ភូមិ​សា​ស្ដ្រឥណ្ឌូចិន​ មាន​ទំហំ​ ១៨១.០៣៥​គីឡូម៉ែត្រ​ក្រឡា​ មាន​ចែង​ក្នុង​រដ្ឋធម្មនុញ្ញ​។

ទេស​រដ្ឋមន្ត្រី​ទទួលបន្ទុក​ បេសកកម្ម​ពិសេស​កិច្ចការ​ព្រំដែន​ លោក វ៉ា គឹមហុង ឱ្យ​ដឹង​នៅ​ថ្ងៃ​ទី១១​ វិច្ឆិកា​ថា​ លោក​មិន​ទទួលស្គាល់​ ផែនទី​ទាំងឡាយ​ណា​ ដែល​ចុះផ្សាយ​ខុសពី​ទម្រង់​ដើម​ លក់​លើ​ទីផ្សារ​ និង​ផែនទី​ ដែល​ផ្សាយ​ដោយក្រុម​ហ៊ុន​វៀតណាម​នោះ​ទេ​។ លោក​បញ្ជាក់​ថា​ កម្ពុជា​ប្រើប្រាស់​ផែនទី​ខ្នាត​ ១/១០០ពាន់ ធ្វើ​នៅចន្លោះ​ឆ្នាំ១៩៣៣ ដល់​ឆ្នាំ១៩៥៣ ដែល​ទទួល​ស្គាល់​ជា​អន្តរជាតិ​នៅចន្លោះ​ឆ្នាំ១៩៦៣ ដល់​ឆ្នាំ១៩៦៩។

ចំពោះ​សំណួរ​ដែល​សួរ​ថា​ តើ​រដ្ឋាភិបាល​អាច​ធានា​បានទេ​ថា​ ផ្ទៃដី​ប្រទេស​កម្ពុជាពិត​ជា​​មាន​ទំហំ​ ១៨១​.០៣៥​ គីឡូម៉ែត្រ​ក្រឡា​ ដូច​ការ​ទទួលស្គាល់​ជា​អន្តរជាតិ​ដែរ ឬ​យ៉ាង​ណា​មន្ត្រី​ជាន់ខ្ពស់​រដ្ឋាភិបាល​រូប​នេះ​ឆ្លើយ​ថា​ ភាគីកម្ពុជា និង​វៀតណាម បាន​បោះ​បង្គោល​ព្រំ​ដែន​រួច​ចំនួន ៨៤​ភាគ​​រយ​​ហើយ ប៉ុន្តែ​មិន​ទាន់​អាច​គណនា​បាន​នោះ​ទេ ពោល​គឺ​ទាល់​តែ​បោះ​បង្គោល​ព្រំ​ដែន​ចប់​សព្វ​គ្រប់​ ទើប​រដ្ឋាភិបាល​អាច​គណនា​បាន?«ផ្លូវការតែមួយទេ យើងដឹងហើយណា ផែនទី របស់ក្រុមភូមិសាស្ត្រឥណ្ឌូចិន ផែនទីណាទៀត ដែលចុះផ្សាយយើងអត់ទទួលខុសត្រូវទេ។ ខ្សែ​ជុំវិញ​ប្រទេស​យើង នៅសល់ ១៦ភាគរយជាមួយវៀតណាម ជាមួយឡាវ និងថៃខ្ញុំមិនថាទេ យើងនិយាយជាមួយវៀតណាម អត់ទានបិទកើតទេ វានៅសល់ ១៦ភាគ​រយ​កំពុង​ចរចា។ ដូច្នេះ​ផ្ទៃ​ដី​នៅ​សល់ ១៨១.០៣៥គីឡូ​ម៉ែត្រ​ការ៉េ»។

ការ​បញ្ជាក់​របស់​លោក វ៉ា គឹមហុង នេះ គឺ​នៅ​ក្រោយ​ពេល​​ក្រុមហ៊ុន​ទេសចរ​វៀតណាម​ថ្មីៗ នេះ​ បាន​បង្ហាញ​ផែនទី​ប្រទេស​កម្ពុជា​ខុសពី​ទម្រង់​ដើម​ បាត់​តំបន់​កន្ទុយនាគ​ឋិត​ក្នុង​ខេត្ត​រតនគិរី​ មក​ទល់​និង​ខេត្ត​មណ្ឌលគិរី។ បញ្ហា​នេះ ក្រុម​យុវជន​អ្នក​ឃ្លាំ​មើល​កិច្ចការ​ព្រំដែន និង​អ្នក​ប្រើ​ប្រាស់​បណ្ដាញ​សង្គម​ហ្វេសប៊ុក មាន​មន្ទិល និង​ចង់​ឱ្យ​រដ្ឋាភិបាល​បង្ហាញ ករណី​នេះ​ជា​សាធារណៈ​ឱ្យ​ច្បាស់លាស់។

កម្ពុជា​មាន​ព្រំដែន​ជាប់​នឹង​ប្រទេស​វៀតណាម​ចំនួន ១.២៤៥​គីឡូម៉ែត្រ​ ដែល​ត្រូវ​បោះ​បង្គោល​ព្រំដែន​សរុប​ចំនួន​ ៣៧១បង្គោល។ បច្ចុប្បន្ន​ប្រទេស​ទាំងពីរ​បាន​បោះ​បង្គោល​រួចរាល់​ចំនួន ៣១៥​បង្គោល​ ឬ​ស្មើ​និង​ ៨៤ភាគ​រយ​ហើយ​ នៅ​សល់​បង្គោល​ចំនួន ៥៦ ទៀត​ ឋិត​នៅ​ខេត្ត​រតនគិរី​ មណ្ឌលគិរី​ ត្បូងឃ្មុំ​ ស្វាយរៀង​ ខេត្ត​កណ្ដាល​ និង​ខេត្តតាកែវ​។

អាស៊ី​សេរី​បាន​សួរ​ លោក​ វ៉ា​ គឹ​មហុង​បន្ថែម​ទៀត​ថា​ តើ​បង្គោល​ចំនួន​ ១២៤​ ដែល​អគ្គ​ទេសាភិបាល​បារាំង​ប្រចាំ​ឥណ្ឌូចិន​បាន​បោះ​ ផ្អែក​តាម​អនុញ្ញា​កូសាំងស៊ីន​នៅ​ឆ្នាំ១៨៧៣​ មាន​នៅ​សល់​ឬ​ទេ​មក​ទល់​ពេល​នេះ?មន្ត្រី​រដ្ឋាភិបាល​រូប​នេះ​ឆ្លើយ​ថា មាន​បង្គោល​ខ្លះ​នៅ និង​មាន​បង្គោល​ខ្លះ​ទៀត​បាត់​ ដោយសារ​កម្ពុជា​ប្រើប្រាស់​ផែនទី​ផ្អែក​តាម​រដ្ឋធម្មនុញ្ញ​មាត្រា​ ២ ខ្នាត​ ១/១០០ពាន់​ ទទួល​ស្គាល់​អន្តរជាតិ​ចន្លោះ​ឆ្នាំ១៩៦៣ ដល់​ឆ្នាំ១៩៦៩។ លោក​បញ្ជាក់​ថា​ កម្ពុជា​ទាមទារ​ប្រើប្រាស់​ខ្សែ​ព្រំដែន​មិន​កែប្រែ​ បន្ទាប់​ពី​ទទួល​បាន​ឯករាជ្យ​ពី​រដ្ឋាភិបាល​បារាំង​ក្នុង​ឆ្នាំ១៩៥៣។ លោក​បញ្ជាក់​ទៀត​ថា​ ការ​បោះបង្គោល​ព្រំដែន​ផ្អែក​តាម​អនុសញ្ញា​កូសាំងស៊ីន​ ឆ្នាំ១៨៧៣ និង​ផែនទី​ដែល​កម្ពុជា​ប្រើប្រាស់​បច្ចុប្បន្ន​ ពុំ​ខុសគ្នា​នោះ​ទេ៖ «យើងដឹងថា វាមានហើយបង្គោលអនុសញ្ញកូសាំងស៊ីន ព្រះកូណា ព្រះបាទនរោត្តម លោកចុះហត្ថលេខា ១៨៧៣ហ្នឹង ។ បង្គោលខ្លះនៅ ហើយបង្គោលខ្លះទៀតវាបាត់។ យើងនិយាយឱ្យត្រឹមត្រូវ ហើងទាមទាររដ្ឋធម្មនុញ្ញយើងមាត្រា២ ១៩៩៣ យើង​ថា បូរណភាពទឹកដី ផែនទី ១/១០០ពាន់ បោះពុម្ភឆ្នាំ១៩៣៣ ដល់ឆ្នាំ១៩៥៣ ហើយប្អូនឯងទៅទាមទារបោះតាមឆ្នាំ១៨៧៣ ម៉េចកើត​»។

ទោះជាយ៉ាងណា តំណាង​រា​ស្ដ្រគណបក្ស​សង្គ្រោះ​ជាតិ​ លោក អ៊ុំ សំអាន ចង់​ឱ្យ​រដ្ឋាភិបាល​បង្ហាញ​ផែនទីថ្មី​ ដែល​ភាគី​កម្ពុជា​ និង​វៀតណាម​ប្រើប្រាស់​ ដើម្បី​បោះបង្គោល​ព្រំដែន​នៅ​តំបន់​កន្ទុយនាគ​ ក្នុង​ខេត្តរតនគិរី​? ដើម្បី​បំបាត់​ការសង្ស័យ​ចំពោះ​រឿង​នេះ។ លោក​មានមន្ទិល​ថា តើ​ផែនទី​ដែល​រដ្ឋាភិបាល​បោះ​បង្គោល​សម្រេច​បាន ៨៤​ភាគ​រយ​កន្លង​ទៅ ដូច​គ្នា​នឹង​ផែនទី​របស់​បារាំង​បន្សល់​ទុក​ឬ​ទេ?«ខ្ញុំយល់ថា រដ្ឋាភិបាលមិនហ៊ានបង្ហាញផែនទីថ្មីហ្នឹងទេ ហើយក៏មិនហ៊ានប្រៀបធៀបផែនទី បោនរបស់បារាំងដែល  ព្រោះផែនទីថ្មីហ្នឹង វាចូលដីខ្មែរច្រើនណាស់ ជាពិសេសតំបន់កន្ទុយនាគហ្នឹងគឺ  ដូចក្រុមហ៊ុនទេសចរវៀតណាមហ្នឹងឯង ព្រោះក្រុមហ៊ុនទេសចរវៀតណាម គឺគេធ្វើអ៊ីចឹង សំអាងលើផែនទី ដែលហ៊ុន សែន ចុះហត្ថលេខាជាមួយយួន នៅប្រទេសយួន កាលពីថ្ងៃទី ០៥ ខែតុលាហ្នឹងឯង​»។

លោក អ៊ុំ សំអាន បន្ថែម​ថា កម្ពុជា​គួរតែ​បោះបង្គោល​ផ្អែក​តាម​ អនុសញ្ញា​កូសាំងស៊ីន​ឆ្នាំ១៨៧៣​ ដែល​អគ្គ​ទេសាភិបាល​បារាំង​ប្រចាំឥណ្ឌូចិន​ បោះបង្គោល​ព្រំដែន​ចំនួន​ ១២៤​បង្គោល​ ដើម្បី​ពុះ​ចែក​ទឹកដី​កម្ពុជា​ និង​តំបន់​កូសាំងស៊ីន​ សម័យ​បារាំង​គ្រប់គ្រង​។ លោក​រិះគន់​ថា​ រដ្ឋាភិបាល​កម្ពុជា​ និង​វៀតណាម​ បាន​បោះបង្គោល​សម្រេច​បាន​ ៨៤​ភាគ​រយ​ មិន​បាន​យក​មរតក​បារាំង​មក​ប្រើ​នោះ​ទេ​ បែរជា​ផ្អែក​តាម​សន្ធិសញ្ញា​បំពេញបន្ថែម​ឆ្នាំ​១៩៨៥​ សម័យ​វៀតណាម​គ្រប់គ្រង​កម្ពុជា​ ផ្ទុយ​ពី​ច្បាប់អន្តរជាតិ​ និង​ច្បាប់​ជាតិ​ ជាហេតុ​ធ្វើ​ឱ្យ​កម្ពុជា​បាត់បង់​ទឹកដី៖ «យើងចង់ដឹងផែនទីថ្មី ហ្នឹង វាដូចផែនទី ក្រុមហ៊ុន ទេសចរយួនហ្នឹងគេ ធ្វើហ្នឹងពិតប្រាកដ ឬមិនពិតប្រាកដ វាបាត់ដីខ្មែរប៉ុន្មាន? វាដូចផែនទីបារាំងបន្សល់ទុកឱ្យឬអត់? ខាងរដ្ឋាភិបាលវៀតណាម គេអត់លាក់លៀមទេ ទាំងផែនទី និងឯកសារផ្សេងៗ លើកលែងតែខាងកម្ពុជាយើងទេដែលលាក់លៀម»។

ឆ្លើយតប​រឿង​នេះ​ លោក​ វ៉ា​ គឹ​មហុង​ អះអាង​ថា​ នៅ​តំបន់​កន្ទុយ​នាគ​ ពុំ​មាន​ការ​ប្រែប្រួល​ផែនទី​នោះ​ទេ​ ហើយ​លោក​បាន​ចុះ​ទៅ​បោះ​បង្គោល​ព្រំដែន​ដោយ​ផ្ទាល់​ គឺ​បង្គោល​ព្រំ​ដែន​លេខ​ ០០​ ឋិត​ក្នុង​​ចន្លោះ​ប្រទេស​ឡាវ​ វៀតណាម​ និង​កម្ពុជា​ក្នុង​ខេត្តរតនគិរី។ លោក​ថា​ ការ​បោះបង្គោល​នៅ​តំបន់​នោះ​ ផ្អែក​តាម​សន្ធិសញ្ញា ៣ប្រទេស​ មាន​សច្ចាប័ន និង​កំណត់​និយាម​ការ​ច្បាស់លាស់​ មិន​ធ្វើ​ឱ្យ​កម្ពុជា​បាត់​បង់​ទឹក​ដី​នោះ​ទេ៖ «វាអត់បាត់ទេ កន្ទុយនាគវានៅដដែលទេ ខ្ញុំប្រាប់ថា តំបន់កន្ទុយនាគហ្នឹង ចុងប៉ុចទាំងអស់ មានកម្ពុជា ឡាវ និងវៀតណាម ខ្ញុំទៅបោះបង្គោលលេខ ០០។ បង្គោល​យើងបោះ ៣ប្រទេស មានសន្ធិសញ្ញាទទួលយកទៅទៀត មាននិយាមការគ្រប់សព្វ។ អត់បាត់ទៅណាទេ មានសន្ធិសញ្ញាការពារទៅទៀត សន្ធិសញ្ញា ៣ប្រទេស ចុះហត្ថលេខា និង​មាន​សច្ចាប័នទៅទៀត ហើយប្អូនថាបាត់ម៉េច? ហើយទៅជឿអ្នកលក់អេតចាយនៅទីផ្សារម៉េចកើត? សូមវិទ្យុអាស៊ីសេរីលោកយោគយល់ផង»។

ប្រធាន​សមាគម​សម្ព័ន្ធ​និស្សិត​បញ្ញវន្ត​ខ្មែរ​ និង​ជាស​មា​ជិ​កក្រុមការងារ​ ១០០រាត្រី​ លោក​ មួង​ សូ​នី​ យល់ថា​ ការ​បោះបង្គោល​កន្លងមក​ ភាគី​វៀតណាម​ មានប្រៀប​ជាង​កម្ពុជា​គ្រប់តំបន់​ ។ លោក​ថា​ តំបន់​ដែល​នៅ​សេសសល់​ចំនួន​ ១៦​ ភាគរយ​ ដូចជា​ នៅ​តំបន់​អូរហ៊ុច ក្នុង​ខេត្ត​មណ្ឌលគិរី និង​នៅ​ឃុំ​ប៉ក់ញ៉ៃ​ ខេត្តរតនគិរី​ ត្រូវ​បាន​វៀតណាម​គ្រប់គ្រង​ទាំង​ស្រុង។ ក្រៅ​ពី​នេះ​ ការ​បោះ​បង្គោល​ព្រំដែន​កន្លង​មក​ លោក​ថា រដ្ឋាភិបាល​មិនបាន​ផ្តល់​ឱកាស​ ឱ្យ​ពលរដ្ឋ​ សង្គម​ស៊ីវិល​ និង​គណបក្ស​ប្រឆាំង​ចូលរួម​សម្រេច​ចិត្ត និង​ដឹង​ឮ​នោះ​ទេ សូម្បី​តែ​អ្នក​នយោបាយ​មួយ​ចំនួន​ធំ ក៏​រដ្ឋាភិបាល​មិន​ផ្តល់​សិទ្ធិ​សម្រេច​ចិត្ត​ក្នុង​រឿង​នេះ​ដែរ។

លោក មួង សូនី បារម្ភ​ថា ការ​ផ្តល់​ដីសម្បទាន​សេដ្ឋកិច្ច​របស់​រដ្ឋាភិបាល​ ទៅ​ឱ្យ​ក្រុមហ៊ុន​ វៀតណាម​ នៅ​តំបន់​កន្ទុយ​នាគ និង​តំបន់​ផ្សេង​ទៀត ក្នុង​ខេត្ត​រតន​គិ​រី​តាម​បណ្ដោយ​ព្រំដែន​ ជា​ហានិភ័យ​ធ្ងន់ធ្ងរ​មួយ​ ប៉ះពាល់​អធិបតេយ្យ​ជាតិ​ និង​ធ្វើ​ឱ្យ​កម្ពុជា​ងាយ​នឹង​របូត​ទឹកដី​ទៅ​វៀតណាម​គ្រប់គ្រង​នៅ​ថ្ងៃ​អនាគត៖ «ព័ត៌មានដែលបង្ហោះនៅសង្គមហ្វេសប៊ុកទាក់ទិន ដីនៅតំបន់កន្ទុយជារឿងពិត ខ្ញុំគិតថា រដ្ឋាភិបាលបកស្រាយឱ្យច្បាស់ ជូនពលរដ្ឋខ្មែរយើង ហើយជាពិសេសជំរុញឱ្យក្រុមហ៊ុនវៀតណាម បកស្រាយជុំវិញថា តំបន់កន្ទុយនាគជារបស់វៀតណាម ​»។

កាល​ពី​ថ្ងៃ​ទី៤ វិច្ឆិកា​កន្លង​ទៅ​ រដ្ឋសភា​របប​ក្រុងភ្នំពេញ​បាន​អនុម័ត​សេច​ក្ដី​ព្រាងច្បាប់​ស្ដី​ពី​ការ​អនុម័ត​យល់​ព្រម​លើ​សន្ធិសញ្ញា​បំពេញ​បន្ថែម​ឆ្នាំ២០១៩​ ដែល​ច្របាច់​បញ្ចូល​គ្នា​រវាង​សន្ធិសញ្ញា​កំណត់​ព្រំដែន​រដ្ឋ​រវាង​កម្ពុជា​ និង​វៀតណាម ឆ្នាំ១៩៨៥ និង​សន្ធិសញ្ញា​បំពេញ​បន្ថែម​ឆ្នាំ២០០៥។ សេច​ក្ដី​ព្រាងច្បាប់​នេះ​ ធ្វើ​ឡើង​បន្ទាប់​ពី​លោក​នាយក​រដ្ឋមន្ត្រី ហ៊ុន សែន បាន​ចុះ​កិច្ច​ព្រមព្រៀង​លើ​សន្ធិសញ្ញា​បំពេញ​បន្ថែម​ឆ្នាំ២០១៩​ នៅ​ទីក្រុង​ហាណូយ​ ប្រទេស​វៀតណាម។

ការ​អនុម័ត​សេច​ក្ដី​ព្រាងច្បាប់​នេះ គណបក្ស​ប្រឆាំង​​ ពលរដ្ឋ​ និង​ក្រុម​យុវជន​ បង្ហាញ​អារម្មណ៍​សោក​ស្ដាយ​ជា​ខ្លាំង និង​ចាត់​ទុក​ថា ជា​សន្ធិសញ្ញា​ខុស​ច្បាប់ ផ្ទុយ​ពី​រដ្ឋធម្មនុញ្ញ​ និង​កិច្ច​ព្រមព្រៀង​ទីក្រុង​ប៉ារីស​ឆ្នាំ១៩៩១ ជាពិសេស អំឡុង​ពេល​ដែល​កម្ពុជា​មាន​ជម្លោះ​នយោបាយ និង​ប្រព័ន្ធ​គ្រប់គ្រង​រដ្ឋ​បែប​បក្ស​តែ​មួយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល