ភរិយារបស់សកម្មជនបក្សប្រឆាំងនៅស្វាយរៀង លោក គង់ ម៉ាស់ ស្នើសុំឲ្យសហភាពអឺរ៉ុប ជួយអន្តរាគមន៍ទៅរដ្ឋាភិបាល ដោះលែងស្វាមីរបស់ខ្លួន បន្ទាប់ពីគាត់បានជាប់ពន្ធនាគារអស់ រយៈពេលជាង ១ឆ្នាំមកហើយពាក់ព័ន្ធនឹងការបង្ហោះសាររិះគន់រដ្ឋាភិបាលលើហ្វេសប៊ុក។ មន្ត្រីសិទ្ធិមនុស្ស ចាត់ទុកថា ករណីលោក លោក គង់ ម៉ាស់ គឺជារឿងនយោបាយ ហើយការបន្តឃុំខ្លួននេះ គឺជាការរំលោភសិទ្ធិមនុស្ស និងរំលោភច្បាប់ធ្ងន់ធ្ងរ។
ភរិយារបស់លោក គង់ ម៉ាស់ គឺលោកស្រី កុល សាត ប្រាប់អាស៊ីសេរីថា លោកស្រី បានដាក់លិខិត ស្នើសុំអន្តរាគមន៍ពីស្ថានទូតសហភាពអឺរ៉ុបប្រចាំក្រុងភ្នំពេញ កាលពីសប្ដាហ៍មុន ដើម្បីឲ្យជួយជំរុញទៅរដ្ឋាភិបាលកម្ពុជា ដោះលែងស្វាមីរបស់ខ្លួនពីពន្ធនាគារដោយឥតលក្ខខណ្ឌ។ លោកស្រី ថ្លែងថា ស្វាមីរបស់លោកស្រី មិនបានប្រព្រឹត្តកំហុសជេរប្រមាថរដ្ឋាភិបាល និងមន្ត្រីរាជការសាធារណៈ ដូចការចោទប្រកាន់របស់សាលាដំបូងរាជធានីភ្នំពេញ និងសាលាដំបូងខេត្តស្វាយរៀងឡើយ។
ភរិយារបស់អ្នកទោសនយោបាយរូបនេះ រៀបរាប់ថា ជារឿងឈឺចាប់ និងគួរឱ្យស្អប់ខ្ពើមបំផុតដែល ស្វាមីលោកស្រី ត្រូវជាប់ពន្ធនាគារក្នុងរយៈពេលដ៏យូរ ដោយគ្មានកំហុសអ្វីសោះ គ្រាន់តែបង្ហោះសារនៅលើបណ្ដាញសង្គមដោយសន្តិវិធី៖ «គឺអយុត្តិធម៌សម្រាប់គាត់។ ជាធម្មតាតាមដែលខ្ញុំដឹងគឺ ពលរដ្ឋមានសិទ្ធិបញ្ចេញមតិរិះគន់ក្នុងន័យស្ថាបនានៅក្នុងប្រទេសដែលប្រកាន់លទ្ធិប្រជាធិបតេយ្យ ដូច្នេះខ្ញុំ យល់ថា ពលរដ្ឋរិះគន់អ្នកដឹកនាំមិនមែនជាកំហុសទេ។ ខ្ញុំសូមឲ្យខាងតុលាការដោះលែងគាត់វិញ ដោយឥតលក្ខខណ្ឌ ព្រោះអីសុខភាពខ្សោយមានជំងឺលើសឈាមប្រចាំកាយ ហើយខ្ញុំក៏ឈឺទៀត។ ពិបាកមែនទែន » ។
លោកស្រី កុល សាត ឲ្យដឹងថា មកទល់ពេលនេះ ស្ថានទូតសហភាពអឺរ៉ុប មិនទាន់ឆ្លើយតបយ៉ាង ណានៅឡើយទេ។
អាជ្ញាធរក្រុងភ្នំពេញ បានចាប់ខ្លួនលោក គង់ ម៉ាស់ ដែលជាសមាជិកក្រុមការងារគណបក្សសង្គ្រោះ ជាតិខេត្តស្វាយរៀង កាលពីថ្ងៃទី១៦ ខែមករា ឆ្នាំ២០១៩ ដោយគិតមកទល់ពេលនេះលោកកំពុងជាប់ក្នុងពន្ធនាការព្រៃសជាង១២ខែហើយ។ លោកជាប់ទោស ២ករណី គឺទី១ សាលាដំបូងរាជ ធានីភ្នំពេញ ផ្តន្ទាទោសឲ្យជាប់ពន្ធនាគារ១៨ខែ ពីបទប្រមាថ និង ញុះញង់ឲ្យប្រព្រឹត្តបទឧក្រិដ្ឋ ជាអាទិ៍ តាមបណ្តឹងរបស់អគ្គស្នងការនគរបាលជាតិ លោក នេត សាវឿន បន្ទាប់ពីលោកបានសរសេរសារបង្ហោះនៅតាមបណ្តាញសង្គមហ្វេសប៊ុកពាក់ព័ន្ធនឹងយុទ្ធនាការម្រាមដៃស្អាតកាលពីមុនបោះឆ្នោត ឆ្នាំ២០១៨ និងសាររិះគន់បែបស្ថាបនាអំពីភាពអសកម្មមួយចំនួនរបស់រដ្ឋាភិបាលលោក ហ៊ុន សែន រួមទាំងការបង្ហោះសារចុងក្រោយរឿងតម្លៃកសិផលចុះថោកក្រោយពីសហភាព អឺរ៉ុបយកពន្ធអង្កកម្ពុជាជាដើម។ ចំណែកករណីទី២ គឺសាលាដំបូងខេត្តស្វាយរៀង ផ្ដន្ទាទោស ឲ្យជាប់ពន្ធនាគារចំនួន ១៥ថ្ងៃនិងពិន័យជាប្រាក់៥លានរៀលទៅដើមបណ្តឹង និង ១លានរៀល ចូលរដ្ឋតាមបណ្តឹងរបស់អតីតអភិបាលស្រុករមាសហែក លោក ពេញ ជា ។ ទោសទណ្ឌក្នុងសំណុំ រឿងនេះ ដោយសារតែសមាជិកបក្សប្រឆាំងរូបនេះ បង្ហោះសារលើហ្វេសប៊ុក សុំអន្តរាគមន៍ពីរដ្ឋាភិបាលករណីចោទថា លោក ពេញ ជា បានប្រើអំណាច និងឃុបឃិតជាមួយអាជ្ញាធរមួយចំនួនទៀត បណ្តេញប្រជាពលរដ្ឋក្រីក្រមួយគ្រួសារចេញពីដីលំនៅឋាន ដែលធ្លាប់រស់នៅតាំងពីឆ្នាំ១៩៩៨ នៅ ភូមិឃុំកំពង់ត្រាច ស្រុករមាសហែក។
អ្នកនាំពាក្យក្រសួងយុត្តិធម៌ លោក ជិន ម៉ាលីន ឆ្លើយតបថា ការស្នើសុំឲ្យដោះលែងលោក គង់ ម៉ាស់ គឺមិនអាចធ្វើទៅរួចឡើយ ដោយលោកអះអាងថា តុលាការ បានផ្ដន្ទាទោសដោយផ្អែកទៅលើ មូលដ្ឋានច្បាប់ និងមូលដ្ឋានបទល្មើស ដែលជននោះបានប្រព្រឹត្ត៖ « លក្ខខណ្ឌដែលគាត់ជាអ្នកនយោបាយធ្វើសកម្មភាពនយោបាយនេះ មិនអាចការពារគាត់ឲ្យរួចផុតពីការទទួលខុសត្រូវពីផ្លូវច្បាប់ ចំពោះបទល្មើស ដែលគាត់បានប្រព្រឹត្ត នោះទេ » ។
ផ្ទុយពីការលើកឡើងនេះ អ្នកច្បាប់ និងមន្ត្រីសិទ្ធិមនុស្ស យល់ថា ការបង្ហោះសារផ្សេងៗ របស់លោក គង់ ម៉ាស់ គឺគ្រាន់តែជាការប្រើប្រាស់សិទ្ធិបញ្ចេញមតិដែលធានាដោយរដ្ឋធម្មនុញ្ញនិងកតិកាសញ្ញាអន្តរជាតិស្ដីពីសិទ្ធិពលរដ្ឋ និងសិទ្ធិនយោបាយ ហើយការិះគន់នោះ គឺជាការរិះគន់បែបស្ថាបនា គ្មានន័យប្រមាថរដ្ឋាភិបាលឡើយ។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូលោក អំ សំអាត មានប្រសាសន៍ថា ករណីនេះ គឺជារឿងនយោបាយសុទ្ធសាធ ក្នុងគោលដៅគំរាមកំហែងបំបាក់ស្មារតីសកម្មជនបក្ស ប្រឆាំង ហើយខាងអង្គការសង្គមស៊ីវិលជាតិ និងអន្តរជាតិ ធ្លាប់បានចេញសេចក្ដីថ្លែងការណ៍ ទាមទារឲ្យដោះលែងលោក គង់ ម៉ាស់ ជាបន្តបន្ទាប់ដោយឥតលក្ខខណ្ឌផងដែរ។ មន្ត្រីសិទ្ធិមនុស្សរូបនេះ យល់ថា ការផ្ដន្ទាទោសមន្ត្រីបក្សប្រឆាំង ដោយគ្មានមូលដ្ឋាន និងភស្តុតាងច្បាស់លាស់នេះ ជាការរំលោភសិទ្ធិមនុស្ស និងរំលោភច្បាប់ ហើយជាផ្នែកមួយ ធ្វើឲ្យកម្ពុជាប្រឈមបាត់បង់ប្រព័ន្ធ អនុគ្រោះពន្ធEBA របស់សហភាពអឺរ៉ុបនៅខែក្រោយនេះ៖ « ជាធម្មតា ជាមន្ត្រីរាជការសាធារណៈ ឬជាមន្ត្រីរដ្ឋាភិបាល គឺត្រូវតែបើក ចិត្តបើកបេះដូងឲ្យបានទូលាយក្នុងការទទួលការរិះគន់ ដើម្បីធ្វើការស្ថាបនា ហើយបើការរិះគន់ ហើយត្រូវបានរងនូវការប្ដឹង រងនូវការចាប់ដាក់ពន្ធនាគារ គឺមិនមានអ្នកណាហ៊ានរិះគន់ទៀតទេ » ។
កន្លងមកសហភាពអឺរ៉ុប និងតំណាងរដ្ឋាភិបាលនៃប្រទេសសេរីធំៗ នៅលើពិភពលោក តែងតែ ជំរុញដល់រដ្ឋាភិបាលកម្ពុជា ឲ្យស្តារលទ្ធិប្រជាធិបតេយ្យ ការគោរពសិទ្ធិមនុស្សឡើងវិញ តាមរយៈ ការទម្លាក់ចោលរាល់បទចោទប្រកាន់លើលោក កឹម សុខា និងដោះលែងជនទាំងឡាយណា ដែលត្រូវបានឃុំខ្លួនតាមទំនើងចិត្ត ក្នុងនោះរួមមាន អ្នកសារព័ត៌មាន សកម្មជនសង្គមស៊ីវិល ព្រមទាំងអ្នកគាំទ្រ និងសមាជិកគណបក្សប្រឆាំងផងដែរ។ ប្រទេសទាំងនោះ សង្កត់ធ្ងន់ថា មានតែធ្វើតាមអនុ សាសន៍របស់ពួកគេនេះទេ ទើបមានប្រយោជន៍សម្រាប់កម្ពុជាទាំងវិស័យអភិបាលកិច្ច និងសេដ្ឋ កិច្ច។ សង្គមស៊ីវិលបារម្ភថា បើរដ្ឋាភិបាលលោក ហ៊ុន សែន នៅតែរក្សាជំហររឹងទទឹង គឺកម្ពុជាប្រាកដជាបាត់បង់ប្រព័ន្ធអនុគ្រោះពន្ធ EBA របស់សហភាពអឺរ៉ុបក្នុងរយៈពេលប្រមាណជាង ២ សប្ដាហ៍ទៀត ដែលធ្វើឲ្យប៉ះពាល់ធ្ងន់ធ្ងរ ដល់វិស័យកាត់ដេរ និងសេដ្ឋកិច្ចជាតិទាំងមូល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។